ឡាអេ៖ តុលាការព្រហ្មទណ្ឌអន្តរជាតិ (ICC) បានបើកការស៊ើបអង្កេតបឋមរបស់ខ្លួនហើយ ដើម្បីត្រួតពិនិត្យលើការចោទប្រកាន់រដ្ឋាភិបាលមីយ៉ាន់ម៉ាថា បានប្រពឹ្រត្តអំពើប្រល័យពូជសាសន៍ និងឧក្រិដ្ឋកម្មប្រឆាំងមនុស្សជាតិ លើជនជាតិដើមភាគតិចរ៉ូហ៊ីងយ៉ា។ ការសម្រេចចិត្តរបស់តុលាការព្រហ្មទណ្ឌអន្តរជាតិICCខាងលើនេះ អាចនឹងបើកផ្លូវឱ្យមានការស៊ើបអង្កេតយ៉ាងពេញលេញមួយ លើយោធាមីយ៉ាន់ម៉ា ដែលត្រូវបានគេចោទថា បានសម្លាប់រង្គាលជនជាតិរ៉ូហ៊ីងយ៉ារាប់ពាន់នាក់ និងបណ្ដេញជនជាតិភាគតិចដ៏កំសត់មួយនេះ ប្រមាណជាង៧០០,០០០នាក់ ចេញពីភូមិដ្ឋានរបស់ពួកគេក្នុងរដ្ឋ រ៉ាក់ឃីន។ យ៉ាងណាក៏ដោយ រដ្ឋាភិបាល និងយោធាមីយ៉ាន់ម៉ាបានច្រានចោទរាល់ការចោទប្រកាន់ទាំងឡាយ ហើយអះអាងថា អ្វីដែលយោធាមីយ៉ាន់ម៉ាបានធ្វើនៅក្នុងរដ្ឋ រ៉ាក់ឃីន គឺគ្រាន់តែដើម្បីការពារជនស៊ីវិលតែប៉ុណ្ណោះ និងមិនបានប្រព្រឹត្តអំពើប្រល័យពូជសាសន៍អ្វីនោះទេ៕

យ៉េមែន ៖ យោងតាមរបាយការណ៍របស់អង្គការ Save the Children បានឱ្យដឹងថា កុមារប្រមាណជាង១លាននាក់អាចនឹងត្រូវប្រឈមមុខនូវគ្រោះអត់ឃ្លាននៅក្នុងប្រទេសយ៉េមែន ដែលកំពុងញាំញីដោយសារសង្រ្គាមជាង៣ឆ្នាំមកនេះ។ ជុំវិញជម្លោះនៅប្រទេសយ៉េមែននេះ ដែរ  អង្គការ Save the Children បានព្រមានថា កុមារយ៉េមែនជាង១លាននាក់ទំនងជាត្រូវប្រឈមមុខនឹងគ្រោះអត់ឃ្លាននៅពេលអនាគត ខណៈកុមារសរុប៥,២លាននាក់ កំពុងប្រឈមមុខនឹងគ្រោះអត់ឃ្លានស្រាប់។ ជាមួយគ្នានោះដែរ តម្លៃម្ហូបអាហារឡើងខ្ពស់កប់ពពក និងការធ្លាក់ចុះនៃតម្លៃរូបិយវត្ថុយ៉េមែន គឺបង្កឡើងដោយសង្រ្គាមដែលកំពុងធ្វើឱ្យប្រជាជនយ៉េមែនជាច្រើនជួបហានិភ័យនៃអសន្តិសុខស្បៀងអាហារ។ ប៉ុន្តែរឹតតែសំខាន់ទៅទៀតនោះ គឺថាការគំរាមកំហែងកាន់តែកើនឡើងជាលំដាប់ បណ្ដាលមកពីការវាយប្រយុទ្ធគ្នាឥតឈប់ឈរនៅឯទីក្រុងកំពង់ផែ Hudaydah ត្បិតទីក្រុងគ្រប់គ្រងដោយក្រុមឧទ្ទាមហ៊ូទីមួយនេះ គឺជាច្រកចូលដ៏សំខាន់សម្រាប់ការដឹកជញ្ជូនជំនួយផ្សេងៗឲ្យប្រជាជនយ៉េមែន។ គួរបញ្ជាក់ថា បើតាមអង្គការសហប្រជាជាតិ សង្រ្គាមនៅក្នុងប្រទេសយ៉េមែន រវាងក្រុមឧទ្ទាមហ៊ូទី និងរដ្ឋាភិបាលគាំទ្រដោយអារ៉ាប៊ីសាអូឌីត ដែលផ្ទុះឡើងកាលពីឆ្នាំ២០១៥ បានសម្លាប់ជីវិតមនុស្សជាង១០,០០០នាក់ ក្នុងនោះ២ភាគ៣គឺជាជនស៊ីវិល និង៥៥,០០០នាក់ផ្សេងទៀតរងរបួស៕

សហរដ្ឋអាម៉េរិក៖ ប្រធានាធិបតីអាម៉េរិក លោក ដូណាល់ ត្រាំ កំពុងតែបញ្ឆេះសង្គ្រាមពាណិជ្ជកម្មជាមួយប្រទេសចិនកាន់ខ្លាំងហើយ ដោយក្នុងនោះ រដ្ឋបាលរបស់លោកបានប្រកាសកាលពីថ្ងៃចន្ទម្សិលមិញថា សហរដ្ឋអាម៉េរិកនឹងបន្ថែមពន្ធលើផលិតផលអាម៉េរិក១០ភាគរយបន្ថែមទៀត ក្នុងខែកញ្ញានេះ ពោលគឺលើទំនិញតម្លៃ២០០ពាន់លានដុល្លារអាម៉េរិក ដោយនឹងបង្កើន២៥ភាគរយនៅចុងឆ្នាំ២០១៨នេះ។ ពន្ធដែលត្រូវដំឡើងបន្ថែមទៀតនេះ គឺជាការបន្ថែមបន្ទុកទៀតលើផលិតផលចិននាំចូលទៅអាម៉េរិក ដោយកាលពីដើមឆ្នាំ២០១៨នេះ ទំនិញចិន៥០ពាន់លានដុល្លារអាម៉េរិកត្រូវបានអាម៉េរិកដំឡើងពន្ធរួចហើយនោះ។ ប្រធានាធិបតីអាម៉េរិក លោក ដូណាល់ ត្រាំ បានធ្វើការដំឡើងពន្ធចំនួន២៥ភាគរយលើការនាំចូលដែកថែប និង១០ភាគរយទៀតលើអាលុយមីញ៉ូម ព្រមទាំងការដំឡើងពន្ធ២៥ភាគរយលើមុខទំនិញចូលពីប្រទេសចិន។ សរុបទាំងមុន និងលើកនេះ មានន័យថា រៀងរាល់ឆ្នាំផលិតផលពាក់កណ្តាលរបស់ចិនលក់នៅសហរដ្ឋអាម៉េរិក នឹងត្រូវរងផលប៉ះពាល់ដោយសារតែដំឡើងពន្ធនេះ៕ម.ន

កូរ៉េខាងជើង៖ មេដឹកនាំកូរ៉េខាងជើងលោក គីម ជុងអ៊ុន នៅថ្ងៃអង្គារនេះ បានបង្កភាពភ្ញាក់ផ្អើលយ៉ាងខ្លាំង ដោយលោកបានចេញមកទទួលប្រធានាធិបតីកូរ៉េខាងត្បូងលោក មូន ជែអ៊ីន ដោយផ្ទាល់ នៅឯអាកាសយានដ្ឋានអន្តរជាតិទីក្រុងព្យុងយ៉ាង។ លោក គីម ជុងអ៊ុន និងលោក មូន ជែអ៊ីន បានចាប់ដៃគ្នាទៅវិញទៅមក ក្រោមទឹកញញឹម ខណៈប្រជាជនកូរ៉េទាំងពីររំពឹងថា ប្រទេសជាបងប្អូនបង្កើតទាំងពីរអាចនឹងផ្សះផ្សាគ្នាឡើងវិញ។

អ៊ីរ៉ង់៖ មន្ត្រីជាន់ខ្ពស់ និងជាអ្នកតំណាងប្រទេសអ៊ីរ៉ង់ក្នុងអង្គការអន្តរជាតិនៃបណ្តាប្រទេសនាំចេញប្រេងហៅកាត់ថា OPEC (អូពិក) បានចោទប្រកាន់អារ៉ាប់ប៊ីសាអ៊ូឌីត និងរុស្ស៊ីថា កំពុងព្យាយាមក្តាប់យកចំណែកទីផ្សារបស់អ៊ីរ៉ង់ ជាប្រទេសនៃឈូងសមុទ្រពែកស៍ ខណៈប្រធានាធិបតីអាម៉េរិក លោក ដូណាល់ ត្រាំ ព្យាយាមដាក់ទណ្ឌកម្មកាន់ខ្លាំងលើការលក់ប្រេងរបស់អ៊ីរ៉ង់។

អ៊ីរ៉ង់៖ រដ្ឋមន្រ្តីការបរទេសអ៊ីរ៉ង់នៅក្នុងថ្ងៃច័ន្ទដើមសប្តាហ៍នេះ បានប្រកាសច្រានចោលនូវលទ្ធភាពនៃការចរចាជាមួយសហរដ្ឋអាមេរិកនាពេលអនាគត ហើយថា កិច្ចពិភាក្សាជាមួយទីក្រុងវ៉ាស៊ីនតោន គឺមិនមែនជារបៀបវារៈដែលត្រូវចាប់ផ្តើមក្នុងពេលបច្ចុប្បន្នឡើយ ។ ថ្លែងក្នុងសន្និសិទសារព័ត៌មានខ្លីមួយប្រចំាសប្តាហ៍ អ្នកនាំពាក្យក្រសួងការបរ ទេសអ៊ីរ៉ង់ លោក Bahram Qasemi បានសង្កត់ធ្ងន់ថា កិច្ចចរចាជាមួយសហរដ្ឋអាមេរិកប្រហែលជាអាចកើតឡើង ប្រសិនបើទីក្រុងវ៉ាស៊ីនតោនសម្រេចចិត្តវិលមករកកិច្ចព្រមព្រៀងនុយក្លេអ៊ែរ ។ ក្រៅពីនេះ ទីក្រុងតេហេរ៉ង់ក៏នឹងមិនចូលរួមតុចរចាជាមួយទីក្រុងវ៉ាស៊ីនតោនសារជាថ្មីដាច់ខាត ខណៈណាសហរដ្ឋអាមេរិកនឹងនៅតែដាក់ទណ្ឌកម្មប្រឆំាងនឹងអ៊ីរ៉ង់ ។ សូមរំលឹកថា ប្រធានាធិបតីអាមេរិក លោក ដូណាល់ ត្រាំ បានបង្ហាញការត្រៀមខ្លួនរួចរាល់ហើយ ដើម្បីជួបជាមួយមេដឹកនំាអ៊ីរ៉ង់ ដោះស្រាយបញ្ហាដែលកំពុងបន្តកើតមានរវាងប្រទេសទំាងពីរ ។ ជាការឆ្លើយតបវិញនោះ មេដឹកនំាកំពូលអ៊ីរ៉ង់ លោក អាយ៉ាតុលា អាលី ខាមិនណៃ បាននិយាយថា សាធារណៈរដ្ឋអ៊ីស្លាមនឹងមិនរៀបចំកិច្ចចរចាថ្មីជាមួយសហរដ្ឋអាមេរិកជាដាច់ខាត ពោលគឺមិនកែប្រែកិច្ចព្រមព្រៀងនុយក្លេអ៊ែរអ៊ីរ៉ង់ឆ្នំា២០១៥ជាដាច់ខាត ហើយលោក ខាមិនណៃ ថែមទំាងនិយាយទៀតថា ទីក្រុងតេហេរ៉ង់នឹងមិនចូលរួមតុចរចាម្តងទៀតជាមួយរដ្ឋាភិបាលបោកប្រាស់នោះឡើយ ៕

ហ្វីលីពីន៖ ប្រធានាធិបតីហ្វីលីពីន លោក រ៉ូឌ្រីហ្គោ ឌូទើតេ បាននិយាយអះអាងថា រូបលោកចង់បញ្ឈប់ប្រតិបត្តិការរុករករ៉ែនានានៅទូទំាងប្រទេស ក្រោយហេតុ ការណ៍រអិលបាក់ដីបានផ្តាច់ជីវិតកម្មកររុករករ៉ែយ៉ាងហោចណាស់ ៣៣ នាក់ និង២៩នាក់ផ្សេងទៀតកំពុងបាត់ខ្លួននៅក្នុងខេត្ត Benguet តែមួយប៉ុណ្ណោះ ។លោក ឌូទើតេ បានថ្លែងបែបនេះ ក្នុងអំឡុងកិច្ចប្រជុំមួយជាមួយក្រុមការងារឆ្លើយតបនឹងគ្រោះមហន្តរាយរបស់រដ្ឋាភិបាលនៅក្នុងខេត្ត Benguet ពីរថ្ងៃក្រោយព្យុះទីហ្វុងដ៏មហិមារ មំាងឃុត វាយប្រហារយ៉ាងសង្គ្រាប់លើប្រទេសអាស៊ីអាគ្នេយ៍មួយនេះ ។ ជាមួយគ្នានេះ លោក ឌូទើតេ បានទទួលស្គាល់ប្រាក់ចំណូលដែលមានចំនួនប្រមាណ៧០ប៊ីលានប៉េសូ ឬស្មើនឹង១.៣ប៊ីលានដុល្លារអាមេរិក ដែលរកបានតាមរយៈឧស្សាហកម្មរ៉ែ ប៉ុន្តែបានសួរថាតើវាមានតម្លៃសិក្តសមនឹងការខូចខាត ដែលបណ្តាលមកពីការធ្វើអាជីវកម្មរ៉ែខុសច្បាប់ ឬយ៉ាងណា ។  ជុំវិញបញ្ហានេះដែរ រដ្ឋលេខាធិការធនធានធម្មជាតិ និងបរិស្ថានហ្វីលីពីន លោក Roy Cimatu បានថ្លែងប្រាប់ក្នុងសិន្នសិទសារព័ត៌មានមួយថា រូបលោកបានដាក់ចេញនូវបទបញ្ជាអោយបញ្ឈប់ និងបិទដំណើរការប្រតិបត្តិការរុករករ៉ែខុសច្បាប់ទំាងអស់នៅលើកោះ Luzon ដោយយោងលើស្ថានភាពបច្ចុប្បន្ន ខណៈរូបលោកក៏ចេញបញ្ជាអោយយោធា និងប៉ូលិសចូលរួមនៅក្នុងប្រតិបត្តិការនេះដែរ ។ គួរបញ្ជាក់ថា មំាងឃុត គឺជាព្យុះខ្លាំងក្លាទី១៥ហើយ ដែលបានបោកបក់មកលើប្រទេសហ្វីលីពីននៅក្នុងឆ្នាំ២០១៨នេះ ហើយបច្ចុប្បន្នកម្លាំងរបស់វាកំពុងតែវាយប្រហារបណ្តាទីក្រុង និងខេត្តជាប់ឆ្នេរសមុទ្រភាគនិរតី និងខាងកើតប្រទេសចិនដូចជា ខេត្តហាយណាំ…

ប៉ាឡេស្ទីន៖ ប្រធានាធិបតីប៉ាឡេស្ទីន លោក ម៉ាសមូដ អាបាស់ បាននិយាយកាលពីថ្ងៃអាទិត្យថា ការសម្លាប់ ការពង្រីកការតាំងទីលំនៅ ការបំផ្លិចបំផ្លាញ និងការបណ្តេញចេញពលរដ្ឋប៉ាឡេស្ទីន នឹងមិនអាចនាំមកនូវសន្តិភាព ឬសន្តិសុខនៅក្នុងតំបន់ទេ។ ប្រធានាធិបតីប៉ាឡេស្ទីនបានធ្វើការកត់សម្គាល់នេះ នៅក្នុងកិច្ចប្រជុំមួយនៅការិយាល័យរបស់លោក ជាមួយប្រតិភូដែលតំណាងសមាជិកសភាអ៊ីស្រាអែល ដោយលោក អាបាស់ បានពិនិត្យឡើងវិញនូវការវិវត្តនយោបាយចុងក្រោយបំផុត និងការជាប់គាំងធ្ងន់ ដែលកំពុងប្រឈមនឹងដំណើរការនយោបាយដោយសារគោលនយោបាយរបស់រដ្ឋាភិបាលអ៊ីស្រាអែល និងការគាំទ្រដែលលម្អៀងរបស់សហរដ្ឋអាម៉េរិក។

ស៊ីរី៖ ប្រជាពលរដ្ឋស៊ីរីបាននាំគ្នាទៅបោះឆ្នោតជ្រើសរើសក្រុមប្រឹក្សាឃុំសង្កាត់ជាលើកដំបូងរបស់ខ្លួន ចាប់តាំងពីសង្គ្រាមស៊ីវិលអូសបន្លាយរយៈពេល៧ឆ្នាំកន្លងមកនេះ។ ការបោះឆ្នោតនេះដែរ កើតឡើងក្រោយពេលអ៊ីស្រាអែលបើកការវាយប្រហារតាមដែនអាកាសទៅលើអាកាសយានដ្ឋាននៅទីក្រុង ដាម៉ាស់។ ការិយាល័យបោះឆ្នោតចំនួន៦,៥៥១កន្លែងបានបើកទ្វារនៅថ្ងៃទី១៦ ខែកញ្ញានេះ ហើយប្រជាពលរដ្ឋស៊ីរីបានបោះឆ្នោតជ្រើសរើសតំណាងរបស់ខ្លួន នៅក្នុងក្រុមប្រឹក្សាឃុំសង្កាត់។ បើតាមសារព័ត៌មានសាណារបស់ស៊ីរី មានបេក្ខភាពឃុំសង្កាត់មានជាង៤ម៉ឺននាក់ប្រកួតប្រជែងដណ្តើមតំណែងកៅអីឃុំសង្កាត់ចំនួន១៨,៤៧៨កៅអី។ ការបោះឆ្នោតបានបិទទ្វារវិញ នៅវេលាម៉ោង៧យប់ថ្ងៃដដែលនេះ (ម៉ោងក្នុងតំបន់) ហើយមន្ត្រីទទួលខុសត្រូវបានបង្កើនការយាមល្បាតរក្សាសុវត្ថិភាព ក៏ដូចជាធុងឆ្នោតផងដែរ។ ការបោះឆ្នោតខាងលើ គឺជាលើកដំបូងហើយ ចាប់តាំងពីឆ្នាំ២០១១រហូតមកទល់ពេលនេះ ហើយការបោះឆ្នោតកើតឡើងក្នុងពេលដែលតំបន់ជាច្រើននៅតែបន្តកើតមានអំពើហិង្សា និងការវាយប្រហារគ្នាជាបន្តបន្ទាប់។ មិនតែប៉ុណ្ណោះ អ៊ីស្រាអែលបានបើកការវាយប្រហារតាមដែនអាកាសទៅលើអាកាសយានដ្ឋាន នៅទីក្រុងដាម៉ាស់ សំដៅទៅលើឃ្លាំងអាវុធនៅក្បែរអាកាសយានដ្ឋាន៕ម.ន

ចិន៖ យោងតាមអាជ្ញាធរក្នុងតំបន់បានរាយការណ៍ថា មនុស្ស៤នាក់ត្រូវបានគេអះអាងថា បានបាត់បង់ជីវិតនៅក្វាងទុង ស្របពេលដែលព្យុះទីហ្វុង មាំងឃុត បានវាយប្រហារទៅលើខេត្តភាគខាងត្បូងប្រទេសចិនមួយនេះ។ ព្យុះទីហ្វុងដ៏មហិមារនេះ បានចុះដល់ដីនៅម៉ោងប្រមាណ៥ល្ងាចថ្ងៃអាទិត្យសប្តាហ៍មុននេះ នៅឯតំបន់ឆ្នេរទីក្រុងជំាងមិន ខេត្តក្វាងទុង ក្នុងល្បឿន១៦២គីឡូម៉ែត្រក្នុងមួយម៉ោង។ នេះបើយោងតាមស្ថានីយឧតុនិយមខេត្ត។ ដោយឡែកអាជ្ញាធរផ្តល់ជំនួយគ្រោះមហន្តរាយខេត្តក្វាងទុង បានបញ្ជាក់ថា គិតត្រឹមម៉ោង១១យប់ថ្ងៃអាទិត្យ ម្សិលមិញនេះ មានមនុស្សប្រមាណជាង៣,១១លាននាក់បានបង្ខំចិត្តភៀសខ្លួនទៅកាន់ទីសុវត្ថិភាព ខណៈដែលទូកនេសាទប្រហែល៤៥,០០០នាក់ ត្រូវបានហៅឲ្យវិលត្រឡប់ពីសមុទ្រមកកំពង់ផែនៅក្នុងខេត្តវិញ។ មជ្ឈមណ្ឌលឧតុនិយមជាតិរបស់ចិនបានបញ្ជាក់ថា ព្យុះទីហ្វុង មាំងឃុត បានធ្វើដំណើរឆ្លងកាត់តំបន់ស្វយ័ត ក្វាងស៊ី ឆ័ន ហើយរំកិលខ្លួនឆ្ពោះទៅកាន់ភាគពាយ័ព្យក្នុងល្បឿន២០គីឡូម៉ែត្រក្នុងមួយម៉ោងគិតត្រឹមព្រឹកថ្ងៃច័ន្ទនេះ ហើយបើតាមការិយាល័យកិច្ចការស៊ីវិលក្នុងតំបន់នោះ មានមនុស្សប្រមាណ៦៩,៤០០នាក់បានទទួលរងគ្រោះ និងប្រហែល៤៥,០០០នាក់ផ្សេងទៀតបង្ខំចិត្តភៀសខ្លួនចេញពីផ្ទះសម្បែងរបស់ពួកគេ ដោយសារតែឥទ្ធិពលព្យុះទីហ្វុង មាំងឃុត នេះ៕ម.ន