អេមីរ៉ាត់អារ៉ាប់រួម៖ ទីភ្នាក់ងារសារព័ត៌មានរដ្ឋរបស់ប្រទេសអេមីរ៉ាត់អារ៉ាប់រួមបានចុះផ្សាយថា សហរដ្ឋអាមេរិក និងអេមីរ៉ាត់អារ៉ាប់រួមកំពុងសម្លឹងមើលទៅលើឱកាសរឹតចំណងវិស័យការពារជាតិរវាងប្រទេសទំាងពីរ ស្របពេលដែលអនុមេបញ្ជាការកំពូលនៃកងទ័ពអេមីរ៉ាត់អារ៉ាប់រួម បានជួបពិភាក្សាជាមួយគ្នារដ្ឋមន្រ្តីការពារជាតិអាមេរិក នៅក្នុងថ្ងៃសុក្រសប្តាហ៍នេះ (ម៉ោងក្នុងតំបន់) ។បើតាមទីភ្នាក់ងារសារព័ត៌មានរដ្ឋរបស់ប្រទេសអេមីរ៉ាត់អារ៉ាប់រួម នៅក្នុងកិច្ចប្រជុំរវាងលោក Sheikh Mohamed bin Zayed Al Nahyan និងលោក ចែម ម៉ាត់ទីស បានធ្វើកិច្ចពិភាក្សាគ្នាដោយផ្តោតសំខាន់ទៅលើវិធីសាស្រ្តក្នុងការលើកកម្ពស់កិច្ចសហប្រតិបត្តិការ និងទំនាក់ទំនងរវាងប្រទេសទំាងពីរ ជាពិសេសនៅក្នុងវិស័យការពារជាតិ និងយោធា ។ជាមួយគ្នានេះ លោកទំាងពីរថែមទំាងបានធ្វើការពិគ្រោះយោបល់គ្នាផងដែរ ស្តីពីការអភិវឌ្ឍន៍ក្នុងតំបន់នាពេលបច្ចុប្បន្ន ក៏ដូចជាផ្លាស់ប្តូរទស្សនៈគ្នាទៅវិញទៅមកលើកិច្ចខិតខំប្រឹងប្រែងដែលត្រូវបានធ្វើឡើងដើម្បីដោះស្រាយ ហើយនឹងការស្វែងរកដំណោះស្រាយបញ្ហាប្រឈម ។ បន្ថែមលើនេះ ពួកលោកក៏បានពិនិត្យមើលទៅលើយន្តការនៃកិច្ចសហប្រតិបត្តិការ និងការសម្របសម្រួលរួមគ្នា ដើម្បីប្រយុទ្ធប្រឆំាងនឹងភាពជ្រុលនិយម និងអំពើភេវរកម្មផងដែរ ៕

ជប៉ុន៖ ភ្លៀងធ្លាក់ខ្លំាងបាននឹងកំពុងបង្កជាឧបសគ្គយ៉ាងខ្លំាងនៅតាមបណ្តាតំបន់ជាច្រើនរបស់ប្រទេសជប៉ុន ខណៈមន្រ្តីផ្នែកអាកាសធាតុបានព្រមានថា ប្រសិន បើភ្លៀងនៅតែបន្តធ្លាក់ចុះខ្លំាងបែបនេះ នោះវាអាចនឹងបណ្តាលអោយកើតមានគ្រោះបាក់ដី និងទឹកជំនន់ជាដើម ។ទីភ្នាក់ងារឧតុនិយមជប៉ុនបានធ្វើការបង្ហាញទិន្នន័យតាមប្រព័ន្ធរ៉ាដា ដែលបានឱ្យដឹងពីការធ្លាក់ភ្លៀងខ្លំាងនៅក្នុងតំបន់ដែនកោះ អូសាកា ក្យូតូ និងហ៊ីយ៉ូហ្គោ គិតត្រឹមព្រឹកថ្ងៃសៅរ៍ចុងសប្តាហ៍នេះ (ម៉ោងក្នុងតំបន់) ស្របពេលដែលពួកគេបានរំពឹងថា នៅភាគខាងលិច និងខាងកើតប្រទេសជប៉ុន ទំនងជាមានភ្លៀងធ្លាក់ខ្លំាងក្នុងរយៈពេលជាច្រើនម៉ោងផងដែរ នៅក្នុងថ្ងៃ ច័ន្ទ ដើមសប្តាហ៍ក្រោយនេះ ។បន្ថែមលើនេះ ទីភ្នាក់ងារឧតុនិយមជប៉ុនធ្វើការព្យាការណ៍ថា ភ្លៀងធ្លាក់ខ្លំាងនឹងបង្កការគំរាមកំហែងនៅក្នុងតំបន់ Shikoku Tokai Kinki Hokuriku និង Kanto-Koshin នៅក្នុងរយៈពេល២៤ម៉ោង គិតចាប់ពីល្ងាចថ្ងៃ សៅរ៍ ចុងសប្តាហ៍នេះ ហើយពួកគេក៏បានធ្វើការអំពាវនាវយ៉ាងទទួចអោយប្រជាពលរដ្ឋទំាងអស់ ត្រូវបង្កើនការប្រុងប្រយ័ត្នខ្ពស់ជាប់ជានិច្ច ដើម្បីបង្កាគ្រោះថ្នាក់ដែលបង្កឡើងដោយ សារតែការរអិលបាក់ដី ជំនន់ទឹកទន្លេ ខ្យល់កន្ត្រាក់ និងគ្រោះទឹកជំនន់ផងដែរ ៕

អ៊ីរ៉ង់៖ នៅក្នុងសេចក្តីថ្លែងការណ៍រួមគ្នាមួយ ប្រធានាធិបតីអ៊ីរ៉ង់ រុស្ស៊ី និងទួរគីនៅក្នុងថ្ងៃសុក្រសប្តាហ៍នេះ បានឯកភាពធ្វើការងាររួមគ្នាក្នុងស្មារតីនៃកិច្ចសហប្រតិ បត្តិការ ដើម្បីព្យាយាមរក្សាស្ថេរភាពនៃស្ថានភាពនៅក្នុងខេត្តអ៊ីដលីប របស់ប្រទេសស៊ីរី ដែលការព្រមព្រៀងគ្នានេះ កើតឡើងក្រោយកិច្ចប្រជុំកំពូលត្រីភាគីក្នុងរដ្ឋធានីតេហេរ៉ង់ ។នាឱកាសនោះដែរ ប្រធានាធិបតីអ៊ីរ៉ង់ លោក ហាសាន់ រូហាន់នី បានគូសបញ្ជាក់ថា  សហរដ្ឋអាមេរិកគួរតែបញ្ឈប់វត្តមានដោយខុសច្បាប់របស់ខ្លួននៅស៊ីរី ហើយចាកចេញទៅវិញទៅ ។ លោក រូហាន់នី បានសង្កត់ធ្ងន់ថា តួនាទីដែលជះផលអវិជ្ជមាន និងគ្មានភាពស្ថាបនារបស់ទីក្រុងវ៉ាស៊ីនតោន បូករួមជាមួយការគាំទ្ររបស់អាមេរិកចំពោះអ៊ីស្រាអ៊ែល ក្នុងការដណ្តើមកាន់កាប់ទឹកដីនៅក្នុងតំបន់នោះ គ្មានជួយអ្វីបានក្រៅតែពីថែមបន្ទុកបញ្ហាអោយកាន់តែស្មុគស្មាញប៉ុណ្ណោះ នៅប្រទេសស៊ីរី ។ប្រធានាធិបតីអ៊ីរ៉ង់រូបនេះ ថែមទំាងបាននិយាយអះអាងដែរថា ការប្រយុទ្ធប្រឆំាងនឹងអំពើភេវរកម្មនៅខេត្តអ៊ីដលីប នឹងនៅតែបន្តធ្វើឡើង ហើយថា ទន្ទឹមគ្នានេះ ជនស៊ីវិលស្លូតត្រង់ក៏គួរតែត្រូវបានការពារពីការបង្ហូរឈាមនេះផងដែរ ៕

អាហ្គានីស្ថាន៖ រដ្ឋមន្រ្តីការបរទេសអាមេរិក លោក ចែម ម៉ាត់ទីស បានធ្វើដំណើរទៅដល់រដ្ឋធានីកាប៊ុល ប្រទេសអាហ្គានីស្ថានហើយនៅក្នុងថ្ងៃសុក្រនេះ ដើម្បីជួបពិភាក្សាជាមួយមេបញ្ជាការថ្មី នៃកងកម្លំាងអង្គការណាតូប្រចំាប្រទេសអាហ្គានីស្ថាន ខណៈទីក្រុងវ៉ាស៊ីនតោនកំពុងប្រឈមមុខនឹងការកើនឡើងនូវសំណួរជាច្រើន ពាក់ព័ន្ធនឹងយុទ្ធសាស្រ្តរបស់សហរដ្ឋអាមេរិក ក្នុងការបង្ខំឱ្យពួកឧទ្ទាមតាលីបង់ងាកមករកតុចរចាដើម្បីបញ្ចប់សង្គ្រាម ។លោក ចែម ម៉ាត់ទីស និងលោក ស្កុត មីលល្លឺ ដែលត្រូវបានតែងតំាងជាមេបញ្ជាការកងកម្លំាងអង្គការណាតូ នៅក្នុងថ្ងៃ អាទិត្យ ចុងសប្តាហ៍នេះ ត្រូវបានគេរំពឹងថា នឹងធ្វើកិច្ចពិភាក្សាគ្នាស្តីពីដំណើរការសម្រាប់កិច្ចចរចាជាមួយក្រុមភេវរករតាលីបង់ បើទោះបីជាបញ្ហាសន្តិសុខ និងភាពចលាចលកាន់តែយ៉ាប់យ៉ឺននៅក្នុងរដ្ឋាភិបាលអាហ្គានីស្ថានក៏ដោយ ។គួរបញ្ជាក់ថា នៅក្នុងឆ្នំា២០១៨នេះ សហរដ្ឋអាមេរិកបានបង្កើនសម្ពាធលើពួកឧទ្ទាមតាលីបង់ តាមរយៈការបង្កើនការវាយប្រហារតាមអាកាស និងការបញ្ជូនកងទ័ពរាប់ពាន់នាក់ ដើម្បីហ្វឹកហាត់ ក៏ដូចជាផ្តល់យោបល់ដល់កងកម្លាំងរដ្ឋាភិបាលអាហ្គានីស្ថាន ។ ប៉ុន្តែកិច្ចខិតខំប្រឹងប្រែងនេះ មិនទាន់បានធ្វើឱ្យអាហ្គានីស្ថានមានសុវត្ថិភាព និងស្ថេរភាពនៅឡើយទេ ខណៈសង្រ្គាមក្នុងរយៈពេល១៧ ឆ្នាំមកនេះ គឺជាជម្លោះដ៏យូរបំផុតសម្រាប់សហរដ្ឋអាមេរិក ៕

កូរ៉េខាងត្បូង៖ កម្រិតប្រជាប្រិយភាពរបស់ប្រធានាធិបតីកូរ៉េខាងត្បូង លោក មូន ជែអ៊ីន បានធ្លាក់ថុះក្រោម៥០ភាគរយជាលើកដំបូង គិតចាប់តាំងតែពីលោកបានឡើងកាន់អំណាចកាលពីខែឧសភាឆ្នាំ២០១៧ ។ បើតាមការស្ទង់មតិរបស់ក្រុមហ៊ុន ហ្គលអ៊ាប់ កូរៀ បានឱ្យដឹងថា កម្រិតនៃការគាំទ្រចំពោះលោក មូន បានថយមកត្រឹម៤៩ភាគរយនៅសប្តាហ៍នេះ ដែលជាកម្រិតក្រោម៥០ភាគរយលើកដំបូង ។ លទ្ធផលស្ទាបស្ទង់នេះ មានការចូលរួមពីប្រជាជនកូរ៉េខាងត្បូងចំនួន១.០០០នាក់ចាប់ពីថ្ងៃអង្គារដល់ថ្ងៃព្រហស្បតិ៍សប្តាហ៍នេះ។ក្នុងការស្ទង់មតិនេះដែរ ក្រុមអ្នកដែលគាំទ្រលោក មូន ដែលសម្តែងការយល់ឃើញវិជ្ជមាន ចំពោះគោលនយោបាយរបស់ប្រធានាធិបតីរូបនេះ ជុំវិញបញ្ហាកូរ៉េខាងជើង រួមជាមួយកិច្ចប្រឹងប្រែងរបស់លោក ក្នុងការពង្រីកកម្មវិធីសុខុមាលភាពសង្គម ខណៈក្រុមអ្នកអភិរក្សនិយមបានបែរខ្នងដាក់លោក មូន ដោយសារការរិះគន់ពីបណ្តាញសារព័ត៌មាន ជុំវិញគោលនយោបាយសេដ្ឋកិច្ចរបស់លោក ដែលមានគោលដៅជំរុញកំណើនសេដ្ឋកិច្ច តាមរយៈការបង្កើនចំណូលក្នុងគ្រួសារ ៕

ចិន៖ អ្នកនំាពាក្យក្រសួងការពារជាតិចិនលោក រិន ហ្គូហ្គៀន បានលើកឡើងថា ប្រទេសលោកបានសម្តែងការមិនពេញចិត្តជាខ្លំាង ព្រមទំាងប្រកាសប្រឆំាងយ៉ាងដាច់ណាត់ បន្ទាប់ពីនាវាចម្បំាងរបស់ចក្រភពអង់គ្លេស ធ្វើដំណើរមកក្បែរតំបន់ដែនទឹកជម្លោះនៅកោះ ស៊ីសា ។ នាវាចម្បាំងអង់គ្លេស HMS អាល់បៀន ដែលមានទម្ងន់២២.០០០តោនត្រូវបានគេរាយការណ៍ថា បានធ្វើការចល័តនៅក្បែរតំបន់ទីប្រជុំកោះ ផារ៉ាសែល ក្នុងតំបន់សមុទ្រចិនខាងត្បូងកាលពីខែសីហាកន្លងទៅ ដោយបង្កឱ្យចិនខឹងសម្បារយ៉ាងខ្លាំង ហើយចាត់ទុកថា វាគឺជាសកម្មភាពបង្ករឿង ។ ជុំវិញបញ្ហានេះដែរ សារព័ត៌មានរដ្ឋចិនបានចុះផ្សាយថា ការធ្វើនាវាចរណ៍របស់នាវាចម្បាំងអង់គ្លេស នៅក្បែរតំបន់ទីប្រជុំកោះក្នុងតំបន់សមុទ្រចិនខាងត្បូងដែលជាកម្មសិទ្ធិរបស់ចិន អាចនឹងបំផ្លាញដល់រាល់កិច្ចចរចាស្ដីពីកិច្ចព្រមព្រៀងពាណិជ្ជកម្មសេរីរវាងចិន និងអង់ គ្លេស បន្ទាប់ពីទីក្រុងឡុងចាកចេញពីសហភាពអឺរ៉ុប ។ ការព្រមានបែបនេះរបស់សារព័ត៌មានរដ្ឋចិននេះ ធ្វើឡើងបន្ទាប់ពីទីក្រុងឡុង និងទីក្រុងប៉េកាំងបានព្រមព្រៀងគ្នាកាលពីខែសីហាកន្លងទៅថា នឹងខិតខំប្រឹងប្រែងធ្វើយ៉ាងណា ដើម្បីឈានដល់ការឯកភាពគ្នា ក្នុងការបើកកិច្ចចរចាស្ដីពីពាណិជ្ជកម្មសេរីមួយ នៅក្រោយអង់គ្លេសចាកចេញជាផ្លូវការជាមួយសហភាពអឺរ៉ុប ៕