អាហ្វហ្គានីស្ថាន៖ យោងតាមសេចក្តីប្រកាសរបស់ក្រុមឧទ្ទាមតាលីបង់បានឱ្យដឹង ថា លោក ចាឡាលូដឌីន ហាកកានី (Jalaluddin Haqqani) ដែលជាបិតាស្ថាបនិកនៃបណ្តាញក្រុមសកម្មប្រយុទ្ធ Haqqani ដ៏មានឥទ្ធិពលនៅអាហ្វហ្គានីស្ថាន បានបាត់បង់ជីវិតហើយ ដោយសារតែការធ្លាក់ខ្លួនឈឺអស់រយៈពេលជាយូរ។ លោក Haqqani ដែលបានបង្កើតបណ្តាញក្រុមសកម្មប្រយុទ្ធខាងលើ តាំងតែពីអំឡុងទសវត្សរ៍ឆ្នាំ១៩៧០មកម្ល៉េះនោះ បានប្រគល់តួនាទីដឹកនាំក្រុមសកម្មប្រយុទ្ធ Haqqani កាលពីប៉ុន្មានឆ្នាំមុន ទៅឲ្យកូនប្រុសរបស់ខ្លួនឈ្មោះថា ស៊ីរ៉ាជូដឌីន ហាកកានី (Sirajuddin Haqqani) ដែលបច្ចុប្បន្នជាមេដឹកនាំរងរបស់ក្រុមឧទ្ទាមតាលីបង់ ប្រចាំនៅប្រទេសអាហ្វហ្គានីស្ថាន។គួរជម្រាបថា បច្ចុប្បន្នបណ្តាញក្រុមសកម្មប្រយុទ្ធ Haqqani កំពុងតស៊ូប្រយុទ្ធប្រឆាំងជាមួយកងកម្លាំងអង្គការ NATO ដែលដឹកនាំដោយសហរដ្ឋអាមេរិក ព្រមទាំងកងទ័ពរដ្ឋាភិបាលអាហ្វហ្គានីស្ថាន ហើយក្រុមនេះជាសម្ព័ន្ធមិត្តនឹងក្រុមតាលីបង់ ក៏ដូចជាក្រុមអាល់កៃដា៕

យ៉េមែន៖ ក្រុមឃ្លាំមើលសិទ្ធិមនុស្ស HRW បានធ្វើការអំពាវនាវយ៉ាងទទូចឲ្យបញ្ចប់ការលក់អាវុធទាំងអស់ឲ្យទៅអារ៉ាប៊ីសាអ៊ូឌីត បន្ទាប់ពីមានករណីទម្លាក់គ្រាប់បែកត្រូវចំរថយន្តក្រុងដឹកសិស្សសាលាកាលពីខែមុន ដោយបានសម្លាប់មនុស្ស៥១នាក់ ក្នុងនោះរួមមានកុមារ៤០នាក់ផងដែរ។

អាល្លឺម៉ង់៖ មន្ត្រីការទូតជើងចាស់អាល្លឺម៉ង់ លោក Wolfgang Ischinger បានកត់សម្គាល់ថា គោលនយោបាយ និងការប្រកាន់គំនិតគាំពារនិយមបច្ចុប្បន្នរបស់ប្រធានាធិបតីអាម៉េរិក លោក ដូណាល់ ត្រាំ កំពុងបង្ខំឱ្យអាល្លឺម៉ង់ ដើរចេញកាន់តែឆ្ងាយពីសហរដ្ឋអាម៉េរិក ហើយងាកទៅរកចិន និងរុស្ស៊ី។ 

ចិន៖ យោងតាមប្រភពរបស់មជ្ឈមណ្ឌលបណ្ដាញគ្រោះរញ្ជួយដីចិន ហៅកាត់ថា (CENC) នៅក្នុងថ្ងៃអង្គារ៍នេះ បានរាយការណ៍ថា គ្រោះរញ្ជួយដីក្នុងកម្រិត៥.៥រ៉ិចទ័រ បានធ្វើការវាយប្រហារទៅលើតំបន់ Jiashi ស្ថិតនៅក្នុងតំបន់ប្រជុំកោះ Kashgar  នៃតំបន់ស្វយ័ត Uygur Xinjiang ភាគអាគ្នេយ៍ប្រទេសចិន។ បើតាមសេចក្តីថ្លែងការណ៍របស់មជ្ឈមណ្ឌលបណ្ដាញគ្រោះរញ្ជួយដីចិន (CENC) គ្រោះរញ្ជួយដីខាងលើនេះ បានកើតឡើងនៅម៉ោង៥និង៥២ព្រឹកថ្ងៃអង្គារ៍នេះ (ម៉ោងក្នុងតំបន់) មានជម្រៅរញ្ជួយទៅក្នុងដី០៨គីឡូម៉ែត្រ ប៉ុន្តែភ្លាមៗពុំទាន់មានសេចក្ដីរាយការណ៍ពីជនរងគ្រោះ ឬការបំផ្លិចបំផ្លាញនៅឡើយទេ៕ម.ន

ហ្វីលីពីន៖ មន្រ្តីប៉ូលិសហ្វីលីពីនបានរាយការណ៍ថា ចំនួនអ្នកស្លាប់ដោយសារករណីផ្ទុះដ៏ធំសម្បើមមួយ ដែលកើតឡើងនៅទីក្រុងភាគខាងត្បូងប្រទេស កាលយប់ថ្ងៃអាទិត្យ សប្តាហ៍មុននេះ (ម៉ោងក្នុងតំបន់) បានបន្តកើនដល់២នាក់ហើយ។

សហរដ្ឋអាម៉េរិក៖ យោងតាមអាជ្ញាធរក្នុងតំបន់បានឱ្យដឹងថា ជនរងគ្រោះ៤នាក់ បាននិងកំពុងបាត់ខ្លួន ហើយមនុស្ស៩នាក់ផ្សេងទៀតទទួលរងរបួស ក្នុងនោះមាន ២នាក់រងរបួសធ្ងន់ បន្ទាប់ពីទូកធ្វើដំណើរ០២គ្រឿងបានបុកគ្នាយ៉ាងពេញទំហឹង កាលពីយប់ថ្ងៃ សៅរ៍សប្តាហ៍មុននេះ (ម៉ោងក្នុងតំបន់) នៅឯទន្លេ កូឡូរ៉ាដូ ស្ថិតនៅចម្លោះរវាងរដ្ឋកាលីហ្វ័រញ៉ា និងរដ្ឋអារីហ្សូណា។

សហរដ្ឋអាម៉េរិក៖ យោធាសហរដ្ឋអាម៉េរិកបាននិយាយថា ពួកគេនឹងលប់ចោលជំនួយ៣០០លានដុល្លារដល់ប៉ាគីស្ថាន ដោយសារតែរដ្ឋាភិបាលប្រទេសនេះ មិនអាចចាត់វិធានការប្រឆាំងនឹងក្រុមជីវពលបះបោរបាន។ ការសម្រេចចិត្តបែបនេះ គឺត្រូវការការឯកភាពពីសភាអាម៉េកដែរនោះ គឺជាផ្នែកមួយនៃការពន្យារពេលផ្តល់ជំនួយសន្តិសុខទូលំទូលាយជាងមុន ដែលត្រូវបានគេប្រកាសកាលពីខែ មករា ដើមឆ្នាំនេះ។ បើតាមអ្នកនាំពាក្យមន្ទីរបញ្ចកោណ លោក កូណេ ហ្វូកនឺ បាននិយាយថា យោធាសហរដ្ឋអាម៉េរិកមានគោលដៅចំណាយលុយទៅលើអាទិភាពបន្ទាន់ៗដទៃទៀត។