អាល្លឺម៉ង់៖ គម្រោងតភ្ជាប់បណ្តាញបំពង់ផ្គត់ផ្គង់ឧស្ម័ន ណត ស្រ្ទីម ធូ ពីប្រទេស រុស្ស៊ីទៅកាន់អាល្លឺម៉ង់ បានចាប់ផ្តើមដំណើរការសាងសង់ហើយ នៅក្នុងដែនសមុទ្រប្រទេសអាល្លឺម៉ង់ បើទោះបីជាសកម្មភាពនេះ អាចប្រឈមមុខនឹងបញ្ហាជាមួយ ទីក្រុងវ៉ាស៊ីនតោន ។ បើតាមប្រព័ន្ធផ្សព្វផ្សាយរុស្ស៊ី គម្រោង ណត ស្រ្ទីម ធូ មានគោលដៅផ្គត់ផ្គង់ឧស្ម័ន ធម្មជាតិរុស្ស៊ីចំនួន៥៥ពាន់លានម៉ែត្រគូបក្នុងមួយឆ្នាំ ឆ្លងកាត់សមុទ្របាល់ទិចមក កាន់ប្រទេសអាល្លឺម៉ង់ ហើយបណ្តាញបំពង់ផ្គត់ផ្គង់ឧស្ម័ន ដែលជាការពង្រីកបន្ថែម ពីលើបណ្តាញបំពង់ផ្គត់ផ្គង់ឧស្ម័ន ណត ស្រ្ទីម ទីមួយដែលមានរួចស្រេចនេះ នឹង រត់ឆ្លងកាត់ទឹកដីរបស់រុស្ស៊ី ហ្វាំងឡង់ ស៊ុយអែត ដាណឺម៉ាក និងអាល្លឺម៉ង់ ហើយ ត្រូវគេកំណត់ថា នឹងអាចចាប់ផ្តើមធ្វើប្រតិបត្តិការបាននៅចុងឆ្នាំ២០១៩ខាងមុខ ។គួរបញ្ជាក់ថា ដំណាក់កាលដំបូងនៃដំណើរការសាងសង់បណ្តាញផ្តត់ផ្គង់ឧស្ម័ន ណត ស្រ្ទីម ធូ មកកាន់តំបន់អឺរ៉ុប ត្រូវបានគេរាយការណ៍ថា កំពុងតែចាប់ផ្តើមប្រព្រឹត្តទៅហើយ នៅក្នុងដែនសមុទ្រប្រទេសអាល្លឺម៉ង់ ទោះបីជាមានការគំរាម កំហែងដាក់ទណ្ឌកម្មពីសំណាក់សហរដ្ឋអាមេរិក ក៏ដូចជាការជំទាស់ពីប្រទេសអឺរ៉ុប មួយចំនួន ៕  

សហរដ្ឋអាម៉េរិក៖ ប្រព័ន្ធផ្សព្វផ្សាយក្នុងតំបន់បានរាយការណ៍ថា មនុស្ស៤នាក់បានបាត់បង់ជីវិត បន្ទាប់ពីយន្តហោះស៊ីវិលខ្នាតតូចមួយគ្រឿង បានធ្លាក់នៅមូលដ្ឋានទ័ពអាកាស អេគ្លីន ក្នុងរដ្ឋផ្លូរីដា ។ ជាមួយគ្នានេះ អាជ្ញាធរ អាម៉េរិកក្នុងតំបន់បាននិយាយថា ការស៊ើបអង្កេតកំពុងប្រព្រឹត្តទៅ ហើយពួកគេមិនទាន់កំណត់អត្តសញ្ញាណជនរងគ្រោះទាំង០៤នាក់ ដែលចេញដំណើរមកពីភាគរដ្ឋភាគកណ្តាល អូហៃយ៉ូ បាននៅឡើយទេ។ យន្តហោះធុនស្រាល ប៊ីចក្រាហ្វ បានធ្លាក់ចំកន្លែងគ្មានមនុស្សនៅចម្ងាយប៉ុន្មានគីឡូម៉ែត្រពីផ្លូវរត់ហោះឡើង-ចុះនៃបន្ទាយទ័ពអាកាស អេគ្លីន ដោយយន្តហោះដែលធ្លាក់នោះ ត្រូវគេរកឃើញនៅក្នុងតំបន់មានព្រៃហ៊ុមព័ទ្ធជុំវិញ។ ដោយឡែក អាជ្ញាធរអាកាសចរណ៍ស៊ីវិលអាម៉េរិក បានឲ្យដឹងដែរថា យន្តហោះខាងលើបានធ្លាក់ នៅអំឡុងពេលសំដៅឆ្ពោះទៅចុះចតនៅអាកាសយានដ្ឋាន ឌែស្ទីន ដែលស្ថិតនៅក្បែរមូលដ្ឋានយោធា អេគ្លីន៕

បរទេស៖ បេសកជនរុស្ស៊ីប្រចាំអង្គការសហប្រជាជាតិបានឱ្យដឹងថា រុស្ស៊ីបានរារាំងការបោះពុម្ពផ្សាយរបាយការណ៍របស់អង្គការសហប្រជាជាតិ ស្តីពីការអនុវត្តទណ្ឌកម្មប្រឆាំងនឹងកូរ៉េខាងជើង ដោយសារតែរុស្ស៊ីមិនពេញចិត្តចំពោះលទ្ធផលមួយចំនួន។

ឡាវ៖ យោងតាមប្រព័ន្ធផ្សព្វផ្សាយក្នុងតំបន់បានរាយការណ៍ថា គ្រោះមហន្តរាយទឹកជំនន់ដ៏អាក្រក់នៅភាគខាងត្បូងប្រទេសឡាវ បានធ្វើឲ្យមនុស្ស០៦នាក់ បាត់បង់ជីវិត និងលំនៅដ្ឋានសរុប៩១៦ខ្នង រួមទាំងភូមិចំនួន៥៨នៅក្នុងស្រុកចំនួន០៥ ក៏ត្រូវទទួលរងការបំផ្លិចបំផ្លាញធ្ងន់ផងដែរ។ បើតាមអាជ្ញាធរឡាវ ប្រជាជនប្រមាណ៨២,៤៦០គ្រួសារ ក្នុងចំណោមប្រជាជន ២៣៦,១៨៨នាក់ នៅក្នុងស្រុកចំនួន៧៩ ខេត្តចំនួន១៤ បានទទួលរងផលប៉ះពាល់ពីគ្រោះទឹកជំនន់ បន្ទាប់ពីការវាយប្រហារដោយព្យុះទីហ្វុង សុនទីញ និង បេប៊ីនកា ចាប់ពីពាក់កណ្ដាលខែកក្កដា រហូតដល់ពាក់កណ្ដាលខែសីហាកន្លងមកនេះ។

សហរដ្ឋអាម៉េរិក៖ ប្រធានាធិបតីអាម៉េរិកលោក ដូណាល់ ត្រាំ បានក្រើនរំលឹកក្រសួងយុត្តិធម៌ និងការិយាល័យស៊ើបអង្កេតសហព័ន្ធ FBI ឱ្យចាប់ផ្ដើមធ្វើការងាររបស់ពួកគេឱ្យបានល្អ និងយុត្តិធ៌ម បើពុំដូច្នោះទេ រូបលោកនឹងលូកដៃចូលដោះស្រាយបញ្ហាទាំងឡាយជាមិនខាន។ កន្លងមក លោក ដូណាល់ ត្រាំ ធ្លាប់បានរិះគន់ជាបន្តបន្ទាប់លើក្រសួងយុត្តិធម៌ និងការិយាល័យស៊ើបអង្កេតសហព័ន្ធ FBI ជុំវិញការស៊ើបអង្កេតលើសំណុំរឿងតួនាទីរបស់រុស្ស៊ី នៅក្នុងការបោះឆ្នោតប្រធានាធិបតីអាម៉េរិកកាលពីឆ្នាំ២០១៦។ បន្ថែមលើនេះ លោក ត្រាំ ក៏បានចោទប្រកាន់ដែរថា ការស៊ើបអង្កេតបច្ចុប្បន្នរបស់រដ្ឋអាជ្ញាពិសេសអាម៉េរិក លោក រ៉ូប៊ឺត ម៊ូឡឺ ប្រឆាំងនឹងរូបលោក គឺកំពុងធ្វើឡើងដោយខុសច្បាប់។ 

ស្វីស៖ បេសកជនពិសេសអង្គការសហប្រជាជាតិ ទទួលបន្ទុកកិច្ចការប្រទេសស៊ីរី បានប្រកាសព្រមានប្រឆាំងនឹងការប្រើប្រាស់អាវុធគីមីដ៏មានគ្រោះថ្នាក់បំផុត ក្នុងវិបត្តិសង្គ្រាមស៊ីវិលនៅស៊ីរី។ នេះបើតាមការអះអាងលោក ស្ទេហ្វែន ឌឺ មីសស្ទូរ៉ា ទៅកាន់អ្នកយកព័ត៌មានក្នុងទីក្រុងហ្សឺណែវ ប្រទេសស្វីស នៅក្នុងថ្ងៃព្រហស្បត្តិ៍ សប្តាហ៍នេះ (ម៉ោងក្នុងតំបន់)។

រុស្ស៊ី៖ រដ្ឋមន្ត្រីការបរទេសរុស្ស៊ី លោក សឺហ្គៃ ឡាវរ៉ូវ បានព្រមានទីក្រុងវ៉ាស៊ីនតោន កុំឱ្យលេងជាមួយភ្លើងនៅក្នុងប្រទេសស៊ីរី តាមរយៈការប្រើប្រាស់ការវាយប្រហារ ដោយអាវុធគីមី ជាលេសដើម្បីបើកការវាយប្រហារប្រឆាំងនឹងកងកម្លាំងរដ្ឋាភិបាលទីក្រុងដាម៉ាស់។ 

សហរដ្ឋអាម៉េរិក៖ លោក ដូណាល់ ត្រាំ បានព្រមានថា រូបលោកនឹងដកសហរដ្ឋអាម៉េរិកចេញពីអង្គការពាណិជ្ជកម្មពិភពលោក (WTO) បើសិនជាអង្គការមួយនេះ មិនផ្លាស់ប្ដូររបៀបដែលកំពុងដោះស្រាយជាមួយអាម៉េរិកទេនោះ ដោយការព្រមាននេះ ធ្វើឡើងនៅក្នុងបទសម្ភាសន៍ជាមួយស្ថានីយទូរទស្សន៍ក្នុងស្រុកមួយ នៅថ្ងៃព្រហស្បតិ៍តសប្ដាហ៍នេះ (ម៉ោងក្នុងតំបន់)។