កូរ៉េខាងត្បូង៖ ប្រធានាធិបតីកូរ៉េខាងត្បូង លោក មូន ជែអ៊ីន បានសម្រេចធ្វើការតែងតាំងប្រធានសេនាធិការយោធាលោក ជឹង គ្យុងឌូ ជារដ្ឋមន្ត្រីការពារជាតិថ្មី ខណៈលោក គ្យុងឌូ នឹងក្លាយជាប្រមុខការពារជាតិកូរ៉េខាងត្បូងដំបូងគេបំផុតដែល មកពីកងទ័ពអាកាសក្នុងរយៈពេល២៤ឆ្នាំមកនេះ ។

សហរដ្ឋអាម៉េរិក៖ ការព្រមានរបស់លោក ដូណាល់ ត្រាំ ទៅលើក្រុមហ៊ុន Google កំពុងក្លាយជារឿងធំមួយនៅលើបណ្តាញសារព័ត៌មាន ប៉ុន្តែលោក ត្រាំ អាចនឹងត្រូវប្រឈមមុខជាមួយបញ្ហាដ៏លំបាក ប្រសិនរដ្ឋបាលរបស់លោកនៅតែព្យាយាមដាក់ ការត្រួតត្រាទៅលើ Google ។

រុស្ស៊ី៖ សារព័ត៌មានរុស្ស៊ីបានចេញផ្សាយថា ក្នុងអំឡុងវេទិកាស្ដីពីសន្តិភាពអន្តរជាតិក្នុងទីក្រុងវ៉ាស៊ីនតោននៅសប្ដាហ៍នេះ ជំនួយការរដ្ឋមន្ត្រីការពារជាតិអាម៉េរិក លោក រ៉េនដល ស្គ្រីវើ បានឱ្យដឹងថា ប្រទេសលោកពិតជាការព្រួយបារម្ភ ចំពោះគម្រោងរបស់ឥណ្ឌាក្នុងការទិញអាវុធពីរុស្ស៊ី ជាពិសេសប្រព័ន្ធមីស៊ីលការពារដែនអាកាស S-400 ហើយថា បើសិនជាទីក្រុងញ៉ូវដេលី ហ៊ានទិញប្រព័ន្ធមីស៊ីលនេះ នោះទីក្រុងវ៉ាស៊ីនតោននឹងពិចារណាដាក់ទណ្ឌកម្ម។ 

អង្គការសហប្រជាជាតិ៖ អគ្គលេខាធិការអង្គការសហប្រជាជាតិលោក អាន់តូនីញ៉ូ ហ្គួទែរេស បានបង្ហាញការព្រួយបារម្ភយ៉ាងខ្លាំងថា ការវាយប្រហារយោធាទ្រង់ទ្រាយនៅក្នុងខេត្តអ៊ីដលីប អាចនឹងបង្កឲ្យមានគ្រោះមហន្តរាយមនុស្សជាតិ ហើយលោកថែមទាំងបានអំពាវនាវឲ្យគ្រប់ភាគីទាំងអស់ ជួយគ្នាថែរក្សាតំបន់ដ៏តានតឹងតែមួយចុងក្រោយនេះនៅស៊ីរី។ 

អូស្ត្រាលី៖ ប្រជាពលរដ្ឋនៅទីក្រុងម៊ែលប៊ន បានឃើញ និងស្រូបផ្សែងឆួលខ្មៅ ដែលភាយចេញពីរោងចក្រផលិតស្បែកជើងមួយកន្លែង ដែលគេសង្ស័យថា ផ្ទុះឆេះបង្កជាអគ្គិភ័យ និងមានអណ្តាតភ្លើងឆេះសន្ធោរសន្ធៅ។ ជាមួយគ្នានេះ ក៏មានក្រុមពន្លត់អគ្គិភ័យប្រមាណជាង១២០នាក់ និងរថយន្តពន្លត់អគ្គិភ័យមិនតិចជាង៣០គ្រឿងឡើយ ដែលបានព្យាយាមពន្លត់អគ្គិភ័យដ៏អាក្រក់នេះ។ 

សហរដ្ឋអាម៉េរិក៖ អ្នកនាំពាក្យមន្ទីរបញ្ចកោណ លោកស្រី ណាដា វ៉ាយ បានលើកឡើងថា សហរដ្ឋអាម៉េរិកគ្មានឡើយការផ្លាស់ប្តូរគោលជំហរយោធារបស់ខ្លួនទាក់ទងនឹងឧបទ្វីបកូរ៉េ បន្ទាប់ពីជំនួបជាប្រវត្តិសាស្រ្តរវាងប្រធានាធិបតីអាម៉េរិក លោក ដូណាល់ ត្រាំ និងមេដឹកនាំកំពូលលោក គីម ជុងអ៊ុន នៅសង្ហិបុរី កាលពីខែមិថុនា។

មីយ៉ាន់ម៉ា់៖ អ្នកនាំពាក្យរដ្ឋាភិបាលមីយ៉ាន់ម៉ា បានធ្វើការច្រានចោលទាំងស្រុង ចំពោះរបាយការណ៍របស់ក្រុមស៊ើបអង្កេតអង្គការសហប្រជាជាតិ ដែលបានអំពាវនាវឲ្យកាត់ទោសក្រុមឧត្តមសេនីយ៍កំពូលៗរបស់ប្រទេសខ្លួន ពីបទប្រល័យពូជសាសន៍ ហើយថែមទាំងអះអាងថា សហគមន៍អន្តរជាតិបានចោទប្រកាន់ខុសហើយ។

អ៊ីរ៉ង់៖ មេដឹកនាំកំពូលអ៊ីរ៉ង់ លោក អាយ៉ាតុលា អាលី ខាំមិនណៃ បាននិយាយថា រដ្ឋាភិបាលរបស់លោកបានប្រុងប្រៀបខ្លួនរួចជាស្រេចហើយ ដើម្បីបោះបង់ចោលកិច្ចព្រមព្រៀងនុយក្លេអ៊ែរឆ្នាំ២០១៥ ប្រសិនបើកិច្ចព្រមព្រៀងនេះ លែងមានប្រសិទ្ធភាពចំពោះភាគីពាក់ព័ន្ធហើយនោះ។

សហរដ្ឋអាម៉េរិក៖ ប្រធានាធិបតីអាម៉េរិកលោក ដូណាល់ ត្រាំ បានអះអាងថា រូបលោកកំពុងមានទំនាក់ទំនងល្អជាមួយមេដឹកនំាកំពូលកូរ៉េខាងជើងលោក គីម ជុង អ៊ុន ហើយថា ក្នុងពេលនេះ គ្មានហេតុផលណាមួយដែលត្រូវចំណាយលុយដ៏ច្រើន ទៅលើការធ្វើសមយុទ្ធយោធាជាមួយកូរ៉េខាងត្បូងទៀតនោះទេ។