យេម៉ែន៖ ក្រុមអ្នកជំនាញសិទ្ធិមនុស្សអង្គការសហប្រជាជាតិ មានជំនឿយ៉ាងមុតមាំថា ឧក្រិដ្ឋកម្មសង្រ្គាមអាចនឹងបង្កឡើងដោយភាគីពាក់ព័ន្ធទាំងអស់នៅជម្លោះក្នុងសង្រ្គាមយេម៉ែន។ ក្នុងរបាយការណ៍ដំបូង ពួកគេបានចោទប្រកាន់កងកម្លាំងរដ្ឋាភិបាលយេម៉ែន កងកម្លាំងចម្រុះដឹកនាំដោយអារ៉ាប៊ីសាអូឌីត ដែលគាំទ្រពួកគេ និងក្រុមចលនាឧទ្ទាម ហ៊ូធីថា បានធ្វើរឿងតិចតួចណាស់ដើម្បីបញ្ចៀសផុតពីគ្រោះថ្នាក់ដល់ជនស៊ីវិល ក្នុងកម្រិតទាបបំផុត។ ក្រុមអ្នកជំនាញសិទ្ធិមនុស្សអង្គការសហប្រជាជាតិ ចង់សំដៅលើការទម្លាក់គ្រាប់បែក និងការផ្លោងគ្រាប់កាំភ្លើងធំមកលើសាលារៀន មន្ទីរពេទ្យ និងផ្សារ ដែលបណ្តាលឲ្យមនុស្សរាប់ពាន់នាក់បាត់បង់ជីវិត។ លើសពីនេះ ក្រុមអ្នកជំនាញក៏បានធ្វើការព្រមានផងដែរថា ការបិទច្រកតាមទឹក និងអាកាសរបស់កងកម្លាំងចម្រុះអាចជាឧក្រិដ្ឋកម្មសង្រ្គាមផងដែរ។ សូមបញ្ជាក់ផងដែរថា ក្រុមជំនាញសិទ្ធិមនុស្សទាំងនេះ នឹងបង្ហាញរបាយការណ៍របស់ពួកគេ ដល់ក្រុមប្រឹក្សាសិទ្ធិមនុស្សអង្គការសហប្រជាជាតិនៅខែក្រោយនេះ៕

ឥណ្ឌូណេស៊ី៖ សូមរំលឹកថា កោះលុមបុក របស់ប្រទេសឥណ្ឌូណេស៊ី នាអំឡុងប៉ុន្មានសប្តាហ៍កន្លងទៅនេះ បានទទួលរងការវាយប្រហារយ៉ាងធ្ងន់ដោយសារតែគ្រោះរញ្ជួយដីដ៏កក្រើកជាបន្តបន្ទាប់ ចាប់តាំងពីចុងខែកក្កដាមក ដែលបានបណ្តាលឲ្យមនុស្សសរុបជិត៥០០នាក់បាត់បង់ជីវិត។

តួកគី៖ ប្រធានាធិបតីតួកគី រុស្ស៊ី និងអ៊ីរ៉ង់ មានគម្រោងជួបគ្នានៅថ្ងៃទី៧ ខែកញ្ញាខាងមុខនេះ នៅក្នុងប្រទេសអ៊ីរ៉ង់ ដើម្បីចួលរួមកិច្ចប្រជុំកំពូលត្រីភាគីមួយ ក្នុងគោលបំណងស្វែងរកដំណោះស្រាយបញ្ចប់ការប៉ះទង្គិចគ្នានៅក្នុងប្រទេសស៊ីរី។

បារាំង៖ រដ្ឋាភិបាលបារាំងបានអះអាងក្នុងថ្ងៃច័ន្ទ ដើមសប្តាហ៍នេះថា កងកម្លាំងខ្លួនបានសម្លាប់មន្រ្តីកំពូលមួយរូបរបស់ពួកឧទ្ទាមរដ្ឋអ៊ីស្លាម ISIL នៅតំបន់អាហ៊្វ្រិកខាងលិច ក្នុងអំឡុងប្រតិបត្តិការដ៏ក្តៅគគុកមួយនៅក្នុងប្រទេសម៉ាលី ហើយថែមទាំងធ្វើឱ្យសមាជិកនៃក្រុមភេវរករផ្សេងទៀត និងជនស៊ីវិល២នាក់បាត់បង់ជីវិតផងដែរ។

សហរដ្ឋអាម៉េរិក៖ លោក ដូណាល់ ត្រាំ បានបញ្ជាឱ្យក្រុមមន្ត្រីបង្ហូតទង់ជាតិមកត្រឹមពាក់កណ្ដាលដង ដើម្បីជាកិច្ចគោរពដល់វិញ្ញាណក្ខន្ធរបស់អតីតបេក្ខជនប្រធានាធិបតី និងជាសមាជិកព្រឹទ្ធសភាអាម៉េរិកលោក ចន ម៉ាខេន។ លោក ម៉ាខេន បានទទួលមរណភាពក្នុងវ័យ៨១ឆ្នាំ ដោយសារជំងឺដុះដុំសាច់ក្នុងខួរក្បាល កាលពីថ្ងៃសៅរ៍ សប្ដាហ៍មុន នៅឯគេហដ្ឋានរបស់លោកក្នុងរដ្ឋអារីហ្សូណា។

ជប៉ុន៖ នៅក្នុងសៀវភៅសប្រចាំឆ្នាំរបស់ខ្លួន ក្រសួងការពារជាតិជប៉ុនបានអះអាងថា កូរ៉េខាងជើងនៅតែជាការគំរាមកំហែងដ៏ធំដល់សន្តិសុខជាតិរបស់ប្រទេសខ្លួន បើទោះបីជាទីក្រុងព្យុងយ៉ាងផ្អាកការធ្វើតេស្ដមីស៊ីល និងអាវុធនុយក្លេអ៊ែរ ព្រមទាំងមានការសន្យាពីលោក គីម ជុងអ៊ុន ថា នឹងលុបបំបាត់អាវុធនុយក្លេអ៊ែរចេញពីឧបទ្វីបកូរ៉េ។

គណៈប្រតិភូមកពីប្រទេសកេនយ៉ា អ៊ុយហ្គង់ដា តាន់សានី និងមូសំប៊ិក​ ដែលដឹកនាំដោយលោក Javier Montano មន្រ្តីសម្របសម្រួលថ្នាក់តំបន់នៃកម្មវិធីត្រួតពិនិត្យកុងតឺន័រ ដែលជាកម្មវិធីរួមនៃការិយាល័យផ្នែកគ្រឿងញៀន និងឧក្រិដ្ឋកម្ម នៃអង្គការសហប្រជាជាតិ (UNODC) និងអង្គការគយ ពិភពលោក នៅថ្ងៃ២៧ សីហា ម្សិលមិញបានចូលជួបប្រជុំជាមួយ ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃអគ្គនាយកដ្ឋានគយ​ និងរដ្ឋាករកម្ពុជា លោកបណ្ឌិត គុណ ញឹម នៅអគ្គនាយកដ្ឋានគយ និងរដ្ឋាករកម្ពុជា។

មីយ៉ាន់ម៉ា៖ យោងតាមប្រភពរបស់ក្រុមហ៊ុន Facebook បានបញ្ជាក់ថា ខ្លួនបានសម្រេចចិត្តលុបចោលគណនី Facebook និង Instagram របស់ក្រុមមន្ត្រីយោធាមីយ៉ាន់ម៉ាជាន់ខ្ពស់មួយចំនួន ក្នុងគោលបំណងទប់ស្កាត់ការរីករាលដាលនៃព័ត៌មានមិនពិត និងការស្អប់ខ្ពើម បន្ទាប់ពីការត្រួតពិនិត្យឡើងវិញនូវខ្លឹមសារ ដែលមន្ត្រីយោធាទាំងនោះ បានបង្ហោះនាពេលកន្លងមក។  

សហរដ្ឋអាម៉េរិក៖ យោងតាមរបាយការណ៍ថ្មីមួយរបស់អង្គការសហប្រជាជាតិបានឱ្យដឹងថា ថ្នាក់ដឹកនាំយោធាកំពូលៗរបស់រដ្ឋាភិបាលមីយ៉ាន់ម៉ាមួយចំនួនគួរតែត្រូវបានស៊ើបអង្កេតពីបទប្រល័យពូជសាសន៍លើជនជាតិដើមភាគតិចរ៉ូហ៊ីងយ៉ា នៅក្នុងរដ្ឋរ៉ាឃីន រួមទាំងបទឧក្រិដ្ឋប្រឆាំងនឹងមនុស្សជាតិនៅក្នុងតំបន់ដទៃទៀត។