អ៊ីរ៉ង់៖ ទីភ្នាក់ងារសារព័ត៌មានអ៊ីរ៉ង់បានចេញផ្សាយថា រដ្ឋមន្ត្រីការពារជាតិអ៊ីរ៉ង់ លោក អាមី ហាតាមី បានធ្វើដំណើរទៅដល់ប្រទេសស៊ីរីហើយកាលពីថ្ងៃអាទិត្យ ចុងសប្តាហ៍មុននេះ (ម៉ោងក្នុងតំបន់) ដើម្បីជួបពិភាក្សាការងារជាមួយក្រុមមន្ត្រីជាន់ ខ្ពស់ និងយោធាស៊ីរី។

សហរដ្ឋអាម៉េរិក៖ សមាជិកព្រឹទ្ធសភា និងជាអតីតបេក្ខជនប្រធានាធិបតីអាម៉េរិក មកពីបក្សសាធារណរដ្ឋ លោក ចន ម៉ាកខេន បានទទួលមរណភាពហើយ ក្នុងវ័យ ៨១ឆ្នាំ បន្ទាប់ពីទទួលការព្យាបាលជំងឺដុះដំុសាច់ក្នុងខួរក្បាលអស់រយៈពេលជាយូរមក។

សហរដ្ឋអាមេរិក៖ សេតវិមានសហរដ្ឋអាម៉េរិកបានលើកឡើងថា លោកប្រធានាធិបតី ដូណាល់ ត្រាំ បានពិភាក្សាគ្នាតាមទូរស័ព្ទជាមួយនាយករដ្ឋមន្ត្រីអូស្រ្ដាលីថ្មី លោក ស្កុត ម៉ូរីសុន ជាលើកដំបូងស្តីអំពីកិច្ចសហប្រតិបត្តិការនៅពេលអនាគត និង ទំនាក់ទំនងទ្វេភាគី ដែលលោកត្រាំផ្ទាល់ចាត់ទុកថា គ្មានមិត្តណា អស្ចារ្យជាងសហរដ្ឋអាមេរិក និងអូស្ត្រាលីឡើយ។

ឥណ្ឌូណេស៊ី៖ អាជ្ញាធរឥណ្ឌូណេស៊ី បានឱ្យដឹងនៅក្នុងថ្ងៃសុក្រសប្តាហ៍នេះថា តួលេខជនរងគ្រោះបាត់បង់ជីវិត ដោយសារគ្រោះរញ្ជួយដីជាបន្តបន្ទាប់វាយប្រហារ នៅឯកោះលុមបុក បានបន្តកើនឡើងដល់៥៥៥នាក់ហើយ និងជិត១,៥០០នាក់រង របួស ខណៈមនុស្ស៣៩០.០០០នាក់ផ្សេងទៀតកំពុងស្នាក់នៅតាមជម្រកស្នាក់នៅ បណ្ដោះអាសន្ននៅឡើយ។

សហរដ្ឋអាមេរិក៖ ប្រធានាធិបតីអាមេរិក លោក ដូណាល់ ត្រាំ បានបង្ហោះសារមួយ តាមបណ្តាញសង្គមធ្វីតធើ ដោយបញ្ជាក់ថា រូបលោកបានស្នើឲ្យរដ្ឋមន្រ្តីការបរទេស អាម៉េរិក លោក ម៉ៃ ប៉ុមប៉េអូ លុបចោលដំណើរទស្សនកិច្ចទៅកាន់ប្រទេសកូរ៉េខាងជើង​ នាសប្តាហ៍ក្រោយនេះ ដោយលើកហេតុផលថា ខ្វះខាតវឌ្ឍនភាពជុំវិញបញ្ហា រំសាយអាវុធនុយក្លេអ៊ែរនៅលើឧបទ្វីបកូរ៉េ។

សហរដ្ឋអាម៉េរិក៖ ប្រធានាធិបតីអាម៉េរិក លោក ដូណាល់ ត្រាំ បានចេញបញ្ជាឲ្យផ្តាច់ជំនួយ២០០លានដុល្លារ ដែលជាជំនួយសេដ្ឋកិច្ចសម្រាប់តំបន់ Gaza និង West Bank របស់ប៉ាឡេស្ទីន បង្វែរទៅកាន់កន្លែងផ្សេងវិញ ខណៈនាពេលកន្លងមកនេះ ទីក្រុងវ៉ាស៊ីនតោនក៏បានផ្អាកការផ្តល់ជំនួយចំនួន៦៥លានដុល្លាររួចទៅហើយ ទៅកាន់ទីភ្នាក់ងារជួយសង្រ្គោះរបស់អង្គការសហប្រជាជាតិ សម្រាប់ជនជាតិប៉ាឡេស្ទីនផងដែរ។

អូស្រា្តលី៖ លោក (ស្កុត ម៉ូរីសុន) Scott Morrison បានស្បថចូលកាន់តំណែង នាយករដ្ឋមន្រ្តីទី៣០ របស់ប្រទេសអូស្រ្តាលីជាផ្លូវការហើយ បន្ទាប់ពីរូបលោកបានទទួលជ័យជម្នះក្នុងការបោះឆ្នោតផ្ទៃក្នុង ដើម្បីជ្រើសរើសប្រធានថ្មីរបស់បក្សកាន់ អំណាចអូស្រ្តាលីជំនួសលោក (ម៉ាល់ខុម ធើនបូល) Malcolm Turnbull។

អូស្ត្រាលី៖ រដ្ឋមន្ត្រីហិរញ្ញវត្ថុអូស្រា្តលី លោក Scott Morrison (ស្កុត ម៉ូរីសុន) នឹង ក្លាយជានាយករដ្ឋមន្ត្រីអូស្រ្ដាលីថ្មី បន្ទាប់ពីរូបលោកបានទទួលជ័យជម្នះនៅក្នុងការបោះឆ្នោតជ្រើសរើសប្រធានគណបក្សសេរីនិយមថ្មី នៅក្នុងថ្ងៃសុក្រនេះ (ម៉ោងក្នុងតំបន់)។រដ្ឋមន្ត្រីហិរញ្ញវត្ថុអូស្រា្តលីរូបនេះ បានទទួលសំឡេងគាំទ្រ៤៥ទល់នឹង៤០សំឡេង នៅក្នុងការបោះឆ្នោតជ្រើសរើសប្រធានបក្សថ្មី ដែលមានបេក្ខជនពីរនាក់ទៀតចូលរួម ក្នុងនោះរួមមាន អតីតរដ្ឋមន្ត្រីមហាផ្ទៃលោក ភីតធើ ឌុតតុន និងរដ្ឋមន្រី្តការបរទេសអូស្ត្រាលី លោកស្រី ជូលី ប៊ីស៊ប ខណៈលោក ធើនបូល មិនបានចូលរួមនៅក្នុងការប្រកួតជែងនេះទេ។