សហរដ្ឋអាម៉េរិក៖ ក្រសួងការបរទេសអាម៉េរិកបានលើកឡើងថា ខ្លួនមិនមានផែនការ និងការរំពឹងទុកសម្រាប់កិច្ចប្រជុំដែលនឹងអាចកើតឡើងរវាងរដ្ឋមន្រ្តីការបរទេសអាម៉េរិក លោក ម៉ៃ ប៉ុមប៉េអូ និងមេដឹកនាំកំពូលកូរ៉េខាងជើង លោក គីម ជុង អ៊ុននោះឡើយ នាអំឡុងលោក ប៉ុមប៉េអូ បំពេញទស្សនកិច្ចនៅទីក្រុងព្យុងយ៉ាងនាសប្តាហ៍ក្រោយនេះ។

សហរដ្ឋអាម៉េរិក៖ មន្រ្តីក្រសួងការពារជាតិអាម៉េរិកបានបង្ហាញការព្រួយបារម្ភថា ការដំឡើងពន្ធរបស់ទីក្រុងវ៉ាស៊ីនតោន ប្រឆាំងនឹងការនំាចូលរថយន្តដែលផលិតនៅបរទេសនោះ អាចនឹងបង្កផលប៉ះពាល់ដល់កិច្ចខិតខំប្រឹងប្រែងក្នុងការទិញជួញដូរគ្រឿងសព្វាវុធ។

ហ្វីលីពីន៖ វិទ្យាស្ថានស្រាវជ្រាវភ្នំភ្លើង និងសណ្ឋានដីរបស់ហ្វីលីពីន ហៅកាត់ថា (ភីវុល) បានឱ្យដឹងថា គ្រោះរញ្ជួយដីក្នុងកម្រិត៥.២រ៉ិកទ័របានបង្កការញប់ញ័រនៅខេត្តសាម៉ាខាងកើត ស្ថិតនៅភាគកណ្តាលប្រទេសហ្វីលីពីននៅក្នុងថ្ងៃសុក្រនេះ (ម៉ោងក្នុងតំបន់)។

ចិន៖ នៅក្នុងសេចក្តីថ្លែងការណ៍របស់ខ្លួន ក្រសួងពាណិជ្ជកម្មចិនបានបញ្ជាក់ថា មន្រ្តីជាន់ខ្ពស់ចិន និងសហរដ្ឋអាម៉េរិកបានធ្វើការពិភាក្សាគ្នាប្រកបដោយលក្ខណៈ ស្ថាបនា និងស្មោះត្រង់ ដោយផ្តោតសំខាន់លើបញ្ហាសេដ្ឋកិច្ច និងជម្លោះពាណិជ្ជកម្មរវាងមហាយក្សសេដ្ឋកិច្ចទាំងពីរនាពេលបច្ចុប្បន្ន។ មិនតែប៉ុណ្ណោះ ភាគីទាំងពីរក៏បានព្រមព្រៀងគ្នាផងដែរថា នឹងបន្តរក្សាទំនាក់ទំនងសម្រាប់កិច្ចពិភាក្សានៅជំហានបន្ទាប់។

ស្វីស៖ ទីប្រឹក្សាសន្តិសុខជាតិអាម៉េរិក លោក ចន បូលតុន បានអះអាងថា រូបលោកបានព្រមានរុស្ស៊ី ជុំវិញការជ្រៀតជ្រែកក្នុងកិច្ចការបោះឆ្នោតពាក់កណ្តាលអាណត្តិរបស់សហរដ្ឋអាម៉េរិក ដែលនឹងប្រព្រឹត្តទៅនាខែវិច្ឆិកាខាងមុខនេះ។

សហរដ្ឋអាម៉េរិក៖ នាវាចម្បាំង នាវាមុជទឹក និងយន្តហោះចម្បាំងអាម៉េរិក ដែលឈរជើងនៅរដ្ឋហាវ៉ៃ ត្រូវបានបញ្ជាឲ្យផ្លាស់ទីចេញជាបន្ទាន់ ស្របពេលដែលព្យុះហឺរីខិនដ៏កំណាចមានឈ្មោះថា លេន កំពុងបោកបក់ឆ្ពោះមកកាន់កោះនេះ។

សហរដ្ឋអាម៉េរិក៖ រដ្ឋមន្ត្រីការបរទេសអាម៉េរិកលោក ម៉ៃ ប៉ុមប៉េអូ ថ្លែងថា រូបលោកនឹងធ្វើទស្សនកិច្ចនៅកូរ៉េខាងជើងនាសប្តាហ៍ក្រោយនេះ ដើម្បីធ្វើកិច្ចចរចាស្តីពីការរំសាយអាវុធនុយក្លេអ៊ែរនៅក្នុងទីក្រុងព្យុងយ៉ាង ដែលវានឹងក្លាយជាដំណើរទស្សនកិច្ចលើកទី៤របស់លោកទៅកាន់ប្រទេសកូរ៉េខាងជើងនៅឆ្នាំនេះ។

បរទេស៖ ក្រុមភេវរកររដ្ឋអ៊ីស្លាមបានបញ្ចេញនូវអ្វីដែលខ្លួនបានអះអាងថា ជាសម្តីផ្ទាល់នៃមេដឹកនាំកំពូល អាប៊ូ បាក អាល់ បាដាឌី របស់ពួកគេជាលើកដំបូងក្នុងរយៈពេលជិតមួយឆ្នាំមកនេះ។ ខ្សែអាត់សំឡេងនេះ ត្រូវបានគេបង្ហោះតាមប្រព័ន្ធអ៊ីនធើណិតកាលពីថ្ងៃពុធសប្តាហ៍នេះ ដែលមានរយៈពេលជាង៥០នាទី។