ជប៉ុន៖ ព្យុះទីហ្វុង Cimaron (ស៊ីម៉ារុន) ត្រូវបានគេរាយការណ៍នៅថ្ងៃព្រហស្បតិ៍តនេះ ថា បានធ្វើដំណើរឆ្ពោះទៅកាន់តំបន់ប៉ែកខាងលិចប្រទេសជប៉ុន ជាទីដែលអាជ្ញាធរឧតុនិយមព្រមានពីភ្លៀងធ្លាក់ខ្លាំង និងគ្រោះបំណាក់ដី។ យោងតាមប្រភពអាជ្ញាធរឧតុនិយមជប៉ុន បានបញ្ជាក់ថា ព្យុះទីហ្វុងដ៏កំណាចនេះ អាចនឹងវាយប្រហារផងដែរទៅលើតំបន់ដែលទើបតែរងគ្រោះដោយសារតែទឹកជំនន់ ដែលបានផ្ដាច់ជីវិតមនុស្សច្រើនជាង២២០នាក់កាលពីខែកក្កដាកន្លងទៅនេះ។ បើតាមអាជ្ញាធរឧតុនិយមជប៉ុននោះ ព្យុះទីហ្វុង Cimaron (ស៊ីម៉ារុន) កំពុងស្ថិតនៅ ចម្ងាយប្រមាណ២៨០គីឡូម៉ែត្រពីកោះGoto(ហ្គោតូ) ខេត្តNagasaki(ណាហ្គាសាគី) ជាមួយល្បឿនខ្យល់បក់រហូតដល់ទៅ២១៦គីឡូម៉ែត្រក្នុងមួយម៉ោង។ ព្យុះទីហ្វុងនេះដែរ ទំនងជានឹងធ្វើការវាយប្រហារទៅលើតំបន់ដីគោកនៅល្ងាចថ្ងៃព្រហស្បតិ៍តនេះ (ម៉ោងក្នុងតំបន់) មុននឹងបន្តដំណើរឆ្ពោះទៅកាន់តំបន់ប៉ែកខាងជើង៕

ចិន៖ ក្រុមប្រឹក្សារដ្ឋនៃគណៈកម្មការពន្ធគយចិន បានឱ្យដឹងថា ការដំឡើងពន្ធ១៦ពាន់លានដុល្លារលើផលិតផលនាំចូលពីសហរដ្ឋអាម៉េរិកបានចូលជាធរមានហើយនៅថ្ងៃព្រហស្បតិ៍នេះ (ម៉ោងក្នុងតំបន់) ដើម្បីសងសឹកទៅនឹងការដំឡើងពន្ធដូចគ្នានេះ ពីសំណាក់ទីក្រុងវ៉ាស៊ីនតោន។

សហរដ្ឋអាម៉េរិក៖ សេតវិមានសហរដ្ឋអាម៉េរិកបានលើកឡើងថា ប្រធានាធិបតី ដូណាល់ ត្រាំ នៅព្រឹកថ្ងៃពុធនេះ (ម៉ោងក្នុងតំបន់) បានធ្វើកិច្ចពិភាក្សាតាមទូរសព្ទជាមួយនាយករដ្ឋមន្រ្តីជប៉ុន លោក ស៊ីន ហ្សូអាបេ ដោយផ្តោតសំខាន់លើបញ្ហាកូរ៉េខាងជើង និងជំនួបរវាងមេដឹកនាំទាំងពីរនៅឯមហាសន្និបាត អង្គការសហប្រជាជាតិ នាខែកញ្ញាខាងមុខនេះ។

រុស្ស៊ី៖ វិមានក្រឹមឡំាងរបស់រុស្ស៊ីបានលើកឡើងនៅថ្ងៃពុធសប្តាហ៍នេះថា ខ្លួនត្រូវការយល់ច្បាស់សិន ថាតើគោលនយោបាយរបស់អាម៉េរិកពិតជាមានបំណងចង់ធ្វើកិច្ចសហប្រតិបត្តិការជាមួយរុស្ស៊ីដែរឬទេ នៅមុនពេលរៀបចំកិច្ចជំនួបរវាងទីប្រឹក្សាសន្តិសុខជាតិអាម៉េរិក លោក ចន បូលតុន និងសមភាគីរុស្ស៊ី លោក នីកូលៃ ផាទ្រូសេវ ខណៈពួកលោកទាំងពីរនឹងជួបពិភាក្សាគ្នានៅក្នុងទីក្រុងហ្ស៊ឺណែវ នៅថ្ងៃ ព្រហស្បត្តិ៍សប្តាហ៍នេះ។

ឥណ្ឌា៖ រដ្ឋាភិបាលឥណ្ឌាបានសម្រេចចិត្តច្រានចោលជំនួយ១០០លានដុល្លារអាម៉េរិករបស់ប្រទេសអេមីរ៉ាត អារ៉ាប់រួម សម្រាប់មូលនិធិពិសេសជួយដល់រដ្ឋ ខឺរ៉ាឡា ដែលបាននិងកំពុងរងគ្រោះដោយសារទឹកជំនន់ដ៏ធ្ងន់ ដែលបានធ្វើឲ្យពលរដ្ឋឥណ្ឌាច្រើនជាង៤០០នាក់បាត់បង់ជីវិត។

កូរ៉េខាងត្បូង៖ ក្រុមគ្រួសារកូរ៉េខាងត្បូងដែលបានព្រាត់ប្រាស់ នៅអំឡុងសម័យសង្រ្គាមកូរ៉េឆ្នំា១៩៥០-១៩៥៣ពីសាច់ញាតិដែលកំពុងរស់នៅក្នុងប្រទេសកូរ៉េខាងជើងនោះ បានវិលត្រឡប់ទៅផ្ទះវិញហើយ បន្ទាប់ពីធីជួបជុំគ្រួសារកូរ៉េជុំទីមួយរយៈពេលបីថ្ងៃបិទបញ្ចប់។​ គ្រួសារកូរ៉េខាងត្បូង៨៩នាក់ ភាគច្រើនមានអាយុ៨០ឆ្នាំ បានធ្វើដំណើរចាកចេញទាំងទឹកភ្នែកពីតំបន់ភ្នំ គុមហ្កាង របស់កូរ៉េខាងជើង ត្រឡប់ទៅកាន់ទីក្រុង សុកឆូ ប្រទេសកូរ៉េខាងត្បូងវិញ នៅក្នុងថ្ងៃពុធសប្តាហ៍នេះ ក្រោយពួកគេបានជួបជុំសាច់ញាតិកំពុងរស់នៅកូរ៉េខាងជើងជាលើកដំបូង ចាប់តាំងពីសង្រ្គាមកូរ៉េបានបញ្ចប់ កាលពីឆ្នាំ១៩៥៣មក។ គួរបញ្ជាក់ផងដែរថា ពិធីជួបជុំគ្រួសារកូរ៉េជុំទី០២ គ្រោងនឹងធ្វើឡើងពីថ្ងៃសុក្រ រហូតដល់ថ្ងៃអាទិត្យចុងសប្ដាហ៍នេះ នៅឯតំបន់ គុមហ្កាង ជាមួយការចូលរួមពីគ្រួសារកូរ៉េខាងជើង៨៣នាក់ ដែលបានដាក់ពាក្យសុំជួបសាច់ញាតិបងប្អូននៅកូរ៉េខាងត្បូង៕

រុស្ស៊ី៖ ស្របពេលសហរដ្ឋអាម៉េរិកសន្យាថា នឹងបញ្ជូនកញ្ចប់កាដូទណ្ឌកម្មបន្ថែមឱ្យរុស្ស៊ីទៀតនោះ ប្រធានាធិបតីរុស្ស៊ី លោក វ្ល៉ាឌីមៀ ពូទីន បានចាត់ទុកថា ការដាក់ទណ្ឌកម្មរបស់អាម៉េរិកប្រឆាំងនឹងរុស្ស៊ី គឺគ្មានប្រយោជន៍អ្វីទាំងអស់ ហើយមានតែបង្កជាផលវិបាកតែប៉ុណ្ណោះ។

សហរដ្ឋអាម៉េរិក៖ ប្រធានាធិបតីអាម៉េរិក លោក ដូណាល់ ត្រាំ បានអះអាងថា រូបលោកមិនបានធ្វើអ្វីខុសទេ បន្ទាប់ពីមេធាវីយូរអង្វែងរបស់លោក បានយកលោកមកជាប់ពាក់ព័ន្ធក្នុងការទូទាត់លុយបំបិទមាត់ដោយខុសច្បាប់ ដែលបានធ្វើឡើងមុនការបោះឆ្នោតកាលពីឆ្នាំ២០១៦ ខណៈក្រុមអ្នកជំនាញបានព្រមានថា ស្ថានភាពបណ្តឹងផ្លូវច្បាប់ដែលកំពុងកើតឡើង នៅជុំវិញមេដឹកនាំរបស់បក្សសាធារណរដ្ឋរូបនេះ អាចគំរាមកំហែងដល់តំណែងប្រធានាធិបតីរបស់លោក។