វ៉ាស៊ីនតោន ៖ អាមេរិកបានទទួលរបាយការណ៍ចារកម្មថ្មីដែលបង្ហាញថា អ៊ីស្រាអែលកំពុងរៀបចំការវាយលុកទីតាំងនុយក្លេអ៊ែរអ៊ីរ៉ង់ សូម្បីតែរដ្ឋបាលលោក Trump បាននិងកំពុងបន្តកិច្ចព្រមព្រៀងការទូតជាមួយទីក្រុងតេអេរ៉ង់ក៏ដោយ នេះបើតាម CNN ដកស្រង់ប្រភពពីមន្ត្រីអាមេរិកជាច្រើននាក់ ដែលដឹងពីព័ត៌មានសម្ងាត់មួយនេះ។ ក្រុមមន្ត្រីអាមេរិកបានគូសបញ្ជាក់ថា ការវាយប្រហារណាមួយ នឹងក្លាយជាការបំបែកបំបាក់រវាងអ៊ីស្រាអែលជាមួយលោកប្រធានាធិបតីអាមេរិក Donald Trump។ បញ្ហានេះទៀតសោត ក៏អាចប្រថុយនឹងការបញ្ចៀសជម្លោះក្នុងតំបន់កាន់តែរាលដាលនៅមជ្ឈិមបូព៌ា ហើយវាជាអ្វីមួយដែលអាមេរិកបានព្យាយាមជៀសវាងចាប់តាំងពីសង្គ្រាមនៅតំបន់ហ្កាហ្សាបានផ្ទុះឡើងភាពតានតឹងដែលបានចាប់ផ្តើមនៅឆ្នាំ២០២៣។ ក្រុមមន្ត្រីអាមេរិកបានព្រមានថា គេមិនច្បាស់ថាមេដឹកនាំអ៊ីស្រាអែលបានសម្រេចចិត្តចុងក្រោយឬយ៉ាងណានោះទេ ហើយថាតាមពិត មានការខ្វែងគំនិតគ្នាយ៉ាងខ្លាំងក្នុងជួររដ្ឋាភិបាលអាមេរិក អំពីលទ្ធភាពដែលអ៊ីស្រាអែលនឹងធ្វើនៅទីបំផុត ថាតើការវាយប្រហាររបស់អ៊ីស្រាអែល និងរបៀបណា នឹងអាស្រ័យលើអ្វីដែលខ្លួនគិត ចំពោះការចរចារបស់អាមេរិកជាមួយអ៊ីរ៉ង់ ជុំវិញកម្មវិធីនុយក្លេអ៊ែរ។ បុគ្គលម្នាក់ទៀតដែលបានដឹងព័ត៌មានពីចារកម្មអាមេរិកអំពីបញ្ហានេះ បាននិយាយថា ឱកាសនៃការវាយប្រហាររបស់អ៊ីស្រាអែលលើទីតាំងនុយក្លេអ៊ែរអ៊ីរ៉ង់បានកើនឡើងយ៉ាងខ្លាំងក្នុងរយៈពេលប៉ុន្មានខែថ្មីៗនេះ។ ជាក់ស្តែង ទីភ្នាក់ងារស៊ើបការណ៍សម្ងាត់អាមេរិកកាលពីខែកុម្ភៈ ក៏បានព្រមានផងដែរថា អ៊ីស្រាអែលទំនងជាប៉ុនប៉ងវាយប្រហារទីតាំងសំខាន់ៗនៃកម្មវិធីនុយក្លេអ៊ែររបស់អ៊ីរ៉ង់នៅឆ្នាំនេះ នេះបើតាម CNN ចេញផ្សាយកាលពីពេលមុន។ មន្ត្រីអាមេរិកម្នាក់បានកត់សម្គាល់ថា វាជាជំហរជាក់លាក់របស់អ៊ីស្រាអែល ដែលជម្រើសយោធានៅតែជាជម្រើសតែមួយគត់ ដើម្បីបញ្ឈប់កម្មវិធីនុយក្លេអ៊ែរយោធារបស់អ៊ីរ៉ង់៕ ប្រភព ៖ CNN ប្រែសម្រួល ៖ ឈឹម ទីណា

វ៉ាស៊ីនតោន ៖ លោកប្រធានាធិបតីអាមេរិក លោក Donald Trump បានប្រកាសជាផ្លូវការនូវផែនការអភិវឌ្ឍកម្មវិធីប្រព័ន្ធការពារមីស៊ីល Golden Dome នាពេលអនាគត មានតម្លៃ ១៧៥ពាន់លានដុល្លារ ដោយគម្រោងនោះ អាចដំណើរការនៅចុងបញ្ចប់អាណត្តិទីពីររបស់លោក។ លក្ខណៈពិសេសរបស់ប្រព័ន្ធ Golden Dome នឹងរួមបញ្ចូលសមត្ថភាពទប់ស្កាត់ និងបំផ្លាញមីស៊ីល ទាំងនៅលើដីគោក និងលំហនៅគ្រប់ដំណាក់កាលសំខាន់ៗនៃការវាយប្រហារដែលអាចកើតមាន ក្នុងនោះរួមមានការរុករក និងបំផ្លាញមីស៊ីលសត្រូវមុនពេលបាញ់បង្ហោះ, ស្ទាក់ចាប់មីស៊ីលក្នុងដំណាក់កាលដំបូងនៃការហោះហើរ, បញ្ឈប់មីស៊ីលនៅពាក់កណ្តាលអាកាស ឬ បញ្ឈប់មីស៊ីលនៅនាទីចុងក្រោយ មុនពេលបាញ់ដល់គោលដៅមួយ។ លោកប្រធានាធិបតី Trump បានថ្លែងចេញពីសេតវិមាននៅថ្ងៃអង្គារថា ប្រព័ន្ធនេះ នឹងបំពាក់នូវបច្ចេកវិទ្យាជំនាន់ចុងក្រោយ ដែលមានសមត្ថភាពស្ទាក់ចាប់ និងបំផ្លាញមីស៊ីលទាំងនៅលើដីគោក សមុទ្រ និងលំហ រួមទាំងឧបករណ៍ចាប់សញ្ញា និងឧបករណ៍ស្ទាក់ចាប់តាមលំហ។ មេដឹកនាំអាមេរិករូបនេះ បានគូសបញ្ជាក់ថា ប្រព័ន្ធនេះក៏អាចមានសមត្ថភាពស្ទាក់ចាប់មីស៊ីល ដែលបាញ់ចេញពីផ្នែកម្ខាងទៀតនៃពិភពលោក ឬបាញ់ចេញពីលំហអាកាស។ ហើយគម្រោងខ្នាតយក្សនេះ ត្រូវបានបំផុសគំនិតចេញពីប្រព័ន្ធខែលការពារមីស៊ីល Iron Dome របស់អ៊ីស្រាអែល ដែលប្រទេសនេះបានប្រើដើម្បីស្ទាក់ចាប់គ្រាប់រ៉ុក្កែត និងមីស៊ីលសត្រូវតាំងពីឆ្នាំ២០១១។ ជាមួយគ្នានេះ លោកប្រធានាធិបតី Trump ក៏ប្រកាសដែរថា…

បរទេស៖ អឺរ៉ុបនិងអង់គ្លេស ដែលសុទ្ធតែជាសម្ព័ន្ធមិត្តរបស់អាមេរិក កាលពីថ្ងៃអង្គារ បានសម្រេចរួមដៃគ្នា ដាក់ទណ្ឌកម្មថ្មី លើប្រទេសរុស្ស៊ី ដោយមិនរង់ចាំការសម្រេច ពីលោកប្រធានាធិបតី Donald Trump ក្នុងការចូលរួមដាក់ទណ្ឌកម្ម ឬ អត់នោះទេ នេះបើតាមចុះផ្សាយរបស់ទីភ្នាក់ងារព័ត៌មាន CNA។ អឺរ៉ុប និង រដ្ឋាភិបាលក្រុងឡុងដ៍ បានអះអាងថា ទណ្ឌកម្មថ្មីៗនេះ ដាក់ចំពោះបណ្តាក្រុមហ៊ុនហិរញ្ញវត្ថុ និង ក្រុមហ៊ុននាវាដឹកប្រេង ដែលសហការជាមួយទីក្រុងមូស្គូ កន្លងមក ហើយគេជឿថា ជាដៃគូ ដែលធ្លាប់ជួយឲ្យរុស្ស៊ី អាចដកដង្ហើមបាន ទោះមានទណ្ឌកម្ម បន្តបន្ទាប់ ក៏ដោយ។ ការដាក់សំពាធចុងក្រោយនេះ ត្រូវបានបង្ហាញ ទាំងគ្មានការប្រកាសអំពីជំហានដែលត្រូវគ្នាពីទីក្រុងវ៉ាស៊ីនតោន បើទោះបីជា មានការបញ្ចុះបញ្ចូល ជាសាធារណៈយ៉ាងខ្លាំងក្លា ពីមេដឹកនាំនៃបណ្តាប្រទេសអឺរ៉ុប ដែលចង់ឲ្យរដ្ឋបាល Trump ឱ្យចូលរួម ជាមួយពួកគេ នាពេលកន្លងមក ក៏ដោយ។រដ្ឋមន្ត្រីការបរទេសអាល្លឺម៉ង់ លោក Johann Wadephul បាននិយាយ នៅក្រៅកិច្ចប្រជុំជាមួយសមភាគី សហភាពអឺរ៉ុប នៅទីក្រុង ប្រ៊ុចសែលថា «យើងបានបញ្ជាក់…

កៀវ ៖ ប្រធានាធិបតីអ៊ុយក្រែន លោក Volodymyr Zelensky នៅថ្ងៃអង្គារ បានចោទប្រកាន់រុស្ស៊ីថា ខ្វះការតាំងចិត្តខ្ពស់ក្នុងកិច្ចចរចាសន្តិភាព ហើយចង់បន្តការឈ្លានពានតទៅមុខទៀត ទោះបីអាមេរិកជំរុញឱ្យមានការឈប់បាញ់ក៏ដោយ។ លោក Zelensky បានបង្ហោះវីដេអូលើបណ្តាញសង្គមថា ច្បាស់ណាស់ រុស្ស៊ីកំពុងព្យាយាមទិញពេលវេលាថែមទៀត ដើម្បីបន្តសង្រ្គាម និងការទន្ទ្រានកាន់កាប់ទឹកដីអ៊ុយក្រែន។ មេដឹកនាំអ៊ុយក្រែនរូបនេះបន្ថែមថា អ៊ុយក្រែនបានត្រៀមខ្លួនរួចជាស្រេច រាល់ទម្រង់នៃការចរចាណាមួយឆ្ពោះទៅរកលទ្ធផលជាផ្លែផ្កា។ ហើយប្រសិនបើរុស្ស៊ីបន្តដាក់ចេញនូវលក្ខខណ្ឌមិនប្រាកដប្រជា និងធ្វើឱ្យខូចដល់វឌ្ឍនភាព នោះពួកគេត្រូវតែប្រឈមមុខនឹងទណ្ឌកម្មធ្ងន់ធ្ងរ។ ប្រធានាធិបតីអាមេរិក លោក Donald Trump បាននិយាយទូរស័ព្ទទាំងជាមួយលោក Zelensky និងលោក Putin ទាក់ទិនសង្រ្គាមអ៊ុយក្រែន កាលពីថ្ងៃចន្ទ ហើយមន្រ្តីរុស្ស៊ី និងអ៊ុយក្រែនបានជួបប្រជុំគ្នានៅទីក្រុងអ៊ីស្តង់ប៊ុល កាលពីថ្ងៃសុក្រសប្តាហ៍មុន សម្រាប់ការចរចាដោយផ្ទាល់ជាលើកដំបូងក្នុងរយៈពេលជាង ៣ឆ្នាំ។ ប៉ុន្តែកិច្ចចរចានៅទីក្រុងអ៊ីស្តង់ប៊ុលបានបរាជ័យ ក្នុងការទទួលបានបទឈប់បាញ់ ហើយលោក Zelensky បានចោទប្រកាន់លោក Putin ថា បានបញ្ជូនមន្រ្តីតូចតាចប៉ុណ្ណោះមកចរចា៕ ប្រភព ៖ AFP ប្រែសម្រួល ៖ ឈឹម ទីណា