ដោយមើលឃើញពីសន្ទុះនៃឧស្សាហកម្មយានយន្តនៅកម្ពុជា វិទ្យាស្ថានបច្ចេកទេសឧស្សាហកម្ម (ITI) និងក្រុមហ៊ុន តូយ៉ូតា ស៊ុយស៊ូ មេនូហ្វេកឆឺរីង (ខេមបូឌា) បានចុះអនុស្សរណៈនៃការយោគយល់គ្នា (MoU) ដើម្បីបង្កើតក្របខ័ណ្ឌកិច្ចសហប្រតិបត្តិការភាពជាដៃគូសាធារណៈ និងឯកជន ក្នុងគោលបំណងលើកកម្ពស់គុណភាពអប់រំបណ្ដុះបណ្ដាលបច្ចេកទេស និងវិជ្ជាជីវៈលើជំនាញមេកានិចរថយន្តឱ្យឆ្លើយតបទៅនឹងស្ដង់ដារឧស្សាហកម្មទំនើប។ កិច្ចសហការនេះផ្ដោតសំខាន់លើការរៀបចំកម្មវិធីសិក្សាថ្មី ការអនុវត្តកម្មវិធីត្រឡប់ទៅឧស្សាហកម្មវិញ និងការផ្ដល់ឱកាសដល់សិស្ស-និស្សិតចុះកម្មសិក្សា និងហាត់ការផ្ទាល់ និងឱកាសការងារនៅក្រុមហ៊ុន។ បន្ថែមពីនេះ ក្រុមហ៊ុននឹងបញ្ជូនអ្នកបច្ចេកទេសមកធ្វើជាគ្រូឧទ្ទេស ដើម្បីចែករំលែកបទពិសោធន៍ និងបច្ចេកវិទ្យាថ្មីៗ ដែលកំពុងមានវត្តមាននៅលើទីផ្សារ ព្រមទាំងការបណ្ដុះបណ្ដាលបំពាក់ជំនាញបន្ថែម ក៏ដូចជាការផ្លាស់ប្តូរជំនាញដល់បុគ្គលិក និងតម្រង់ទិសដល់សិស្សានុសិស្ស។ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានអញ្ជើញជាសក្ខីភាពក្នុងពិធីចុះហត្ថលេខានេះ កាលពីរសៀលថ្ងៃទី២៣ ខែមករា ឆ្នាំ២០២៦ នៅទីស្តីការក្រសួង។ ហត្ថលេខីនៃ MoU នេះ រួមមាន លោក ជិន តារ៉ា នាយកវិទ្យាស្ថាន ITI និងឧកញ៉ា គង់ នួន ប្រធានក្រុមប្រឹក្សាភិបាលក្រុមហ៊ុន តូយ៉ូតា។ នាឱកាសនោះ ឯកឧត្តមរដ្ឋមន្ត្រី បានវាយតម្លៃខ្ពស់ចំពោះវិស័យឯកជនដែលជាដៃគូមិនអាចខ្វះបាន ក្នុងការកសាងមូលធនមនុស្ស…

(ភ្នំពេញ)៖ ក្នុងការអនុវត្តវិធានការបង្ក្រាបបទល្មើសឆ្លងដែន និងការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា នៅថ្ងៃទី២៣ ខែមករា ឆ្នាំ២០២៦ រាជរដ្ឋាភិបាលកម្ពុជាសម្រេចបណ្តេញជនបរទេសចំនួន ២០៩នាក់ ក្នុងនោះ មានជនជាតិកូរ៉េខាងខាងត្បូង ចំនួន៧៣នាក់ និងភូមាចំនួន ១៣៦នាក់ ចេញពីប្រទេស ដើម្បីឱ្យរដ្ឋាភិបាលរបស់ពួកគេ អនុវត្តនីតិវិធីបន្ត។ ផ្អែកតាមអគ្គនាយកដ្ឋានអន្តោប្រវេសន៍នៃក្រសួងមហាផ្ទៃ ក្នុងចំណោមជនបរទេសទាំង ២០៩នាក់នេះ មានទាំងជនរងគ្រោះ និងជនសង្ស័យប្រព្រឹត្តិបទល្មើសឆបោកតាមប្រព័ន្ធបច្ចេកវិទ្យាដែលសមត្ថកិច្ចបានឃាត់ខ្លួននាពេលកន្លងមក។ នេះមិនមែនជាលើកទី១ទេ ដែលកម្ពុជាបានបញ្ជូនជនបរទេស ជាពិសេសជនជាតិកូរ៉េខាងត្បូងទៅប្រទេសខ្លួនវិញ បន្ទាប់ពីពួកគេត្រូវបានសមត្ថកិច្ចរកឃើញថា មានជាប់ពាក់ព័ន្ធនឹងបទល្មើសឆបោកតាមប្រព័ន្ធបច្ចេកវិទ្យា ខណៈដែលកាលពីឆ្នាំ២០២៥កន្លងមក កម្ពុជាក៏បានបញ្ជូនជនជាតិកូរ៉េ ចំនួន ២៤៤នាក់ផងដែរ។ ការបញ្ជូនជនបរទេសខាងលើនេះ គឺជាការអនុវត្តនូវ វិធានការច្បាប់យ៉ាងម៉ឹងម៉ាត់របស់រាជរដ្ឋាភិបាលកម្ពុជា ក្នុងកិច្ចខិតខំបោសសម្អាត ដើម្បីលុបបំបាត់ឧក្រិដ្ឋកម្មតាមប្រព័ន្ធបច្ចេកវិទ្យា ធានាការពារសុវត្ថិភាពជូនប្រជាជនទាំងក្នុងតំបន់ និងសកលលោក ដោយគ្មានការលើកលែងឡើយចំពោះមេខ្លោង ដែលនៅពីក្រោយ ក៏ដូចជាជួយសង្គ្រោះជនរងគ្រោះ ដែលត្រូវមេខ្លោងបោកបញ្ឆោតឱ្យមកធ្វើការក្នុងសកម្មភាពឆបោកតាមប្រព័ន្ធបច្ចេកវិទ្យានេះ ឱ្យមានសេរីភាព និងអាចវិលត្រឡប់ទៅប្រទេសខ្លួនវិញ។ គួររម្លឹកថា គិតចាប់ពីថ្ងៃទី០១ ខែមករា ឆ្នាំ២០២៦ រហូតដល់ថ្ងៃទីទី២២ ខែមករា ឆ្នាំ២០២៦ កម្ពុជាបានបណ្តេញ ជនបរទេសសរុបចំនួន១៦២០នាក់មាន២១សញ្ជាតិដូចជា៖ ជនជាតិវៀតណាម ថៃ ចិន…

ភ្នំពេញ៖ ក្រសួងប្រៃសណីយ៍និងទូរគមនាគមន៍ (ក.ប.ទ.) សូមជម្រាបជូនដំណឹងអំពីលទ្ធផលជាប់ជាស្ថាពរ និងជាប់បម្រុង ដល់លោកគ្រូ-អ្នកគ្រូ ដែលជាបេក្ខជនប្រឡងជ្រើសរើសគ្រូបង្រៀនថ្នាក់ជំនាញឌីជីថលនៅតាមសាលាបឋមសិក្សាគោលដៅ១៩ទីតាំងបន្ថែមសម្រាប់ឆ្នាំសិក្សា ២០២៥-២០២៦ ក្នុងសម័យប្រឡងថ្ងៃទី២០ ខែធ្នូ ឆ្នាំ២០២៥ និងថ្ងៃទី១៧ ខែមករា ឆ្នាំ២០២៦ ដូចមានរាយនាមខាងក្រោម៖ ដោយ៖ ង៉ាន់ ទិត្យ

នាព្រឹកថ្ងៃទី ២២ ខែ មករា ឆ្នាំ ២០២៦ នៅទីស្តីការក្រសួងសេដ្ឋកិច្ច និង ហិរញ្ញវត្ថុ, ឯកឧត្តមបណ្ឌិតសភាចារ្យ ហ៊ាន សាហ៊ីប ទីប្រឹក្សាសម្តេចធិបតីនាយករដ្ឋមន្រ្តី និង ជាប្រធានក្រុមការងារជំរុញការវិនិយោគក្នុងភូមិភាគឦសាន (ក.វ.ឦសាន) បានដឹកនាំកិច្ចប្រជុំពិនិត្យសម្រេចលើការផ្តល់គោលការណ៍ លើកទឹកចិត្តពិសេស ជាលើកទី ៣ សម្រាប់គម្រោងវិនិយោគចំនួន ២២ ក្រោមទុនវិនិយោគសរុបប្រមាណ ៣៩៥ លានដុល្លារអាម៉េរិក និង អាចបង្កើតការងារបានប្រមាណ ៤ ១៦០ កន្លែង ។ ក្នុងចំណោមគម្រោងទាំង ២២ មានគម្រោងចំនួន ៥ នៅខេត្តក្រចេះ, ១០ នៅខេត្តស្ទឹងត្រែង, ២ នៅខេត្តរតនគិរី និង ៥ នៅខេត្តមណ្ឌលគិរី ដែលមានសកម្មភាពចម្រុះ មានជាអាទិ៍ គម្រោងវិនិយោគបណ្ដុំសហគ្រាសធុនតូច និង មធ្យម, គ្រឹះស្ថានឧត្តមសិក្សា, មន្ទីរពហុព្យាបាល, សណ្ឋាគារ និង រីសតភូមិទេសចរណ៍វប្បធម៌, កសិដ្ឋានចិញ្ចឹមសត្វ, កសិដ្ឋានដាំដំណាំកសិកម្ម…

ភ្នំពេញ៖កម្មវិធីជំនួបរវាងសម្ដេចធិបតីនាយករដ្ឋមន្រ្ដីជាមួយអ្នកសារព័ត៌មាន ដែលគ្រោងធ្វើឡើងនៅថ្ងៃទី៣ ខែឧសភា ឆ្នាំ២០២៦ តាមទម្លាប់តែងរៀបចំជារៀងរាល់ឆ្នាំនោះ ឆ្នាំនេះមិនមានការរៀបចំកម្មវិធីនោះទេ។នេះបើតាមការបញ្ជាក់របស់ឯកឧត្តម នេត្រ ភក្រ្តា រដ្ឋមន្រ្តីក្រសួងព័ត៌មាន។ ក្នុងពិធីបិទសន្និបាតបូកសរុបការងារឆ្នាំ២០២៥ និងលើកទិសដៅការងារឆ្នាំ២០២៦ របស់ក្រសួងព័ត៌មាន នារសៀលថ្ងៃទី២១ ខែមករា ឆ្នាំ២០២៦ រដ្ឋមន្រ្តីក្រសួងព័ត៌មានបានពន្យល់ជុំវិញការពុំបានរៀបចំកម្មវិធីជំនួបរវាងសម្ដេចធិបតីនាយករដ្ឋមន្រ្ដីជាមួយអ្នកសារព័ត៌នៅថ្ងៃទី៣ ខែឧសភាខាងមុខថា ឯកឧត្តមបានស្នើសុំការលើកពេល ហើយសម្ដេចធិបតីនាយករដ្ឋមន្រ្តីក៏បានឯកភាពដែរ។ ឯកឧត្តមបន្ថែមថា យើងអត់មានការជួបជុំជាទ្រង់ទ្រាយធំ ៥ពាន់នាក់ ៦ពាន់នាក់ដូចឆ្នាំកន្លងទៅនោះទេ ដោយសារតែប្រទេសជាតិរបស់យើងជួបប្រទះនូវការឈ្លានពាន។ ដូច្នេះ យើងសន្សំសំចៃថវិកាដើម្បីយកទៅជួយដល់ជនភៀសសឹករបស់យើង ,យកទៅជួយសាងសង់ឡើងវិញនូវហេដ្ឋារចនាសម្ព័ន្ធដែលបានបំផ្លិចបំផ្លាញដោយកងទ័ពឈ្លានពានរបស់ថៃ។ ពីវេទិកានេះរដ្ឋមន្រ្តីក្រសួងព័ត៌មានក៏បានសូមការយោគយល់ពីអ្នកសារព័ត៌មាន ពីព្រោះយើងនៅមានពេលវេលាធ្វើច្រើនទៀតសម្រាប់ការរៀបចំកម្មវិធីនេះ។ គួរបញ្ជាក់ថា ក្នុងអាណត្តិទី៦នៃរាជរដ្ឋាភិបាលសម្ដេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្រ្ដីនៃបានអនុញ្ញាតឱ្យរៀបចំកម្មវិធីជំនួបរវាងអ្នកសារព័ត៌មានជាមួយនាយករដ្ឋមន្រ្ដីនៅរៀងរាល់ថ្ងៃទី១៤ ខែមករា ដើម្បីផ្ដល់ឱកាសដល់អ្នកសារព័ត៌មានអាចជជែកពិភាក្សា និងការលើកឡើងពីបញ្ហានានា សំណូមពរ ឬកង្វល់ផ្សេងៗ ដើម្បីដាក់ជូនប្រមុខរាជរដ្ឋាភិបាលពិនិត្យ និងជួយដោះស្រាយ។ចាប់តាំងពីឆ្នាំ២០១៧ មកដល់ឆ្នាំ២០២៥ ជំនួបរវាងអ្នកកសារព័ត៌មានជាមួយនាយករដ្ឋមន្រ្ដី ត្រូវបានធ្វើឡើងចំនួន៧លើករួចមកហើយ ប៉ុន្តែត្រូវបានខកខានការប្រារព្ធនៅឆ្នាំ២០២១ និង ឆ្នាំ២០២២ ដោយសារការរីករាលដាលនៃជំងឺកូវីដ១៩។ ដោយឡែកអាណត្តិទី៧ នៃរាជរដ្ឋាភិបាល ជំនួបជាមួយអ្នកសារព័ត៌មានត្រូវបានប្តូរមកធ្វើនៅថ្ងៃទី៣ ខែឧសភាជារៀងរាល់ឆ្នាំវិញ ដើម្បីឳ្យស្របជាមួយទិវាសេរីភាពសារព័ត៌មាន៕ ដោយ៖ម៉ាដេប៉ូ,រូបភាព៖ លោក…

មន្ទីរពេទ្យបង្អែកចំនួន៣ បានជាប់ជ័យលាភីគម្រោងនវានុវត្តន៍សម្រាប់ការកែលម្អការផ្តល់សេវាជួរមុខពីគណៈកម្មការវាយតម្លៃអង្គភាពផ្តល់សេវាសាធារណៈថ្នាក់ជាតិ (គ.វ.ជ) ក្នុងនោះមាន៖ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានគណៈកម្មការវាយតម្លៃអង្គភាពផ្តល់សេវាសាធារណៈថ្នាក់ជាតិ បានចុះហត្ថលេខាលើសេចក្តីសម្រេចស្តីពីការជ្រើសរើស និងទទួលស្គាល់ជ័យលាភីនៃគម្រោងនេះ។ ការសម្រេចនេះ ធ្វើឡើងបន្ទាប់ពីអង្គភាពទាំងអស់បានឆ្លងកាត់វគ្គបណ្តុះបណ្តាលស្តីពីបរិវត្តកម្មនៃការគ្រប់គ្រង និងការផ្តល់សេវានៃជួរមុខរបស់មន្ទីរពេទ្យបង្អែករយៈពេល៤ថ្ងៃ កាលពីខែធ្នូ ឆ្នាំ២០២៥ កន្លងទៅ។ វគ្គបណ្តុះបណ្តាលនោះទទួលបានការចូលរួមពីថ្នាក់ដឹកនាំមន្ទីរពេទ្យ និងមន្ត្រីទទួលបន្ទុកផ្នែកផ្តល់សេវាជួរមុខជាស្ត្រី មកពីទូទាំងប្រទេស។ បន្ទាប់មក មានមន្ទីរពេទ្យបង្អែកចំនួន១៦ បានដាក់ពាក្យចូលរួមប្រឡងប្រជែង ដើម្បីទទួលបានការគាំទ្រលើគម្រោងនវានុវត្តន៍សម្រាប់ការកែលម្អការផ្តល់សេវាជួរមុខពី គ.វ.ជ.។ ការវាយតម្លៃត្រូវបានធ្វើឡើងផ្អែកលើលក្ខណៈវិនិច្ឆ័យចំនួន៥ រួមមាន៖ (១)គោលបំណង, (២)នវានុវត្តន៍, (៣)សមិទ្ធកម្ម, (៤)ផែនការសកម្មភាព និង (៥)និរន្តរភាពនិងលទ្ធភាពនៃការចែករំលែកការអនុវត្តទៅអង្គភាពដទៃ។ ជាការកត់សម្គាល់ ក្នុងការវិនិច្ឆ័យនីមួយៗ ទោះបីជាការចូលរួមគាំទ្រគម្រោងអនុវត្តទាំងនេះមានទំហំក្នុងកម្រិតណា ក៏អង្គភាពនីមួយៗសុទ្ធតែមានការចូលរួមជាថវិកាបដិភាគរបស់ខ្លួនរៀងៗខ្លួន ដើម្បីធ្វើយ៉ាងណាឱ្យគម្រោងនីមួយៗសម្រេចបានជោគជ័យ និងមានសមិទ្ធកម្មជាក់លាក់។ ជ័យលាភី និងគណៈកម្មការគ្រប់គ្រងអង្គភាពរបស់បេក្ខជនជ័យលាភី ត្រូវទទួលអនុវត្តគម្រោង និងអនុវត្តឱ្យបានតាមសេចក្តីសម្រេចដូចមានភ្ជាប់ជូន៕ ដោយ៖ង៉ាន់ ទិត្យ