អាជ្ញាធរខេត្តមួយចំនួនបានត្រៀមគ្រាប់ពូជទុកសម្រាប់ចែកជូនប្រជាពលរដ្ឋរបស់ខ្លួនឲ្យបង្កបង្កើនផលឡើង​វិញ ក្រោយពីដំណាំកសិកម្មរបស់ប្រជាកសិករ ជាពិសេសដំណាំស្រូវបានទទួលរងការខូចខាតដោយ​សារទឹកជំនន់។ លោក ម៉ែន គុង អភិបាលរងខេត្តស្ទឹងត្រែង បានប្រាប់បណ្ដាញព័ត៌មាន AMS ថាគណៈកម្មាធិការគ្រប់​គ្រង​គ្រោះមហន្តរាយខេត្តប្រចាំខេត្តស្ទឹងត្រែង បានត្រៀមពូជស្រូវ និងពូជដំណាំ ព្រមទាំងដំណាំរួមផ្សំមួយចំនួនប្រមាណ ៥តោន ដើម្បីចែកជូនប្រជាពលរដ្ឋដែលរងផលប៉ះពាល់ទឹកជំនន់ឲ្យបង្កបង្កើនផលឡើងវិញ។ ចំណែកអាជ្ញាធរខេត្តក្រចេះ និងខេត្តត្បូងឃ្មុំ បានបញ្ជាក់ថា កំពុងរង់​ចាំការវាយតម្លៃផលប៉ះពាល់ជាមុនសិន ទើបត្រៀមគ្រាប់ពូជចែកជូនដល់ប្រជាពលរដ្ឋដែលរងគ្រោះដោយសារទឹកជំនន់។ លោក សេង ជ័យវុធ នាយករដ្ឋបាលខេត្តត្បូងឃ្មុំ បានឲ្យដឹងផងដែរថា គ្រួសាររងផល​ប៉ះពាល់ដោយសារទឹកជំនន់នៅខេត្តត្បូងឃ្មុំមានសរុបចំនួន ១ ៤០០គ្រួសារ ប៉ះពាល់ដំណាំស្រូវ និងដំណាំផ្សេងៗចំនួន ១ ៩២៣ហិកតា ក្នុងនោះខូចខាតចំនួន ១ ១០០ហិកតា។ យោងតាមរបាយការណ៍អំពីស្ថានភាពទឹកជំនន់​ ​ខេត្តចំនួន ៤ របស់កម្ពុជាទទួលរងទឹកជំនន់ គឺខេត្តក្រចេះ ស្ទឹងត្រែង ត្បូងឃ្មុំ និងកំពង់ចាម ដោយប៉ះពាល់ពលរដ្ឋជាង ២ម៉ឺនគ្រួ​សា​រ ក្នុងនោះជម្លៀសទៅទួលសុវត្ថិភាពប្រមាណ ២ ពាន់គ្រួសារ។ ផ្ទះជាង ១ម៉ឺន៤ពាន់ខ្នង និងស្រូវជាង ៥ពាន់ហិកតា បានលិចលង់។ ខេត្តដែលរងផលប៉ះពាល់ខ្លាំងជាងគេ គឺខេត្តក្រចេះ និងត្បូងឃ្មុំ៕ សេង បារាំង AMS

សម្តេចធិបតី ហ៊ុន ម៉ាណែត​​ នាយករដ្ឋមន្ត្រីកម្ពុជា បានលាតត្រដាងពីទង្វើឈ្លានពានរបស់ថៃ មកលើទឹកដីកម្ពុជានាពេលកន្លងមកនៅចំពោះមុខមេដឹកនាំសភាប្រទេសនានា ក្នុងសន្និសីទប្រធានសភានៃអន្តរសភា លើកទី២ នៅកម្ពុជានា ព្រឹកថ្ងៃព្រហស្បតិ៍ ទី២៧ ខែសីហា ឆ្នាំ២០២៦។ សន្និសីទប្រធានសភានៃអន្តរសភាដែលកម្ពុជាធ្វើជាម្ចាស់ផ្ទះនៅពេលនេះ មានការចូលរួមពីថ្នាក់ដឹកនាំសភាមកពីចំនួន៤០ប្រទេស។ សម្តេចធិបតី បានសង្កត់ធ្ងន់​លើ​សន្តិភាព ដែលជាដើមទុនដ៏មានតម្លៃបំផុតរបស់ប្រទេសជាតិ ហើយជាមូលដ្ឋានគ្រិះ មិនអាចខ្វះបានសម្រាប់ស្ថាប័ន និងការរីកចម្រើនប្រកបដោយចីរភាព។ សម្រាប់កម្ពុជា សន្តិភាពដែលរកបានតាមរយៈនយោបាយឈ្នះ-ឈ្នះ ឆ្នាំ១៩៩៨ របស់សម្តេចតេជោ ហ៊ុន សែន បានបញ្ចប់សង្គ្រាមស៊ីវិលជាប្រវត្តិសាស្ត្រ និងបាននាំមកនូវផ្លែផ្កាយ៉ាងច្រើន ដូចជាការស្តារសេដ្ឋកិច្ច-សង្គម ការកាត់បន្ថយភាពក្រីក្រ ការវិនិយោគលើការអប់រំ និងសុខាភិបាល និងការធ្វើសមាហរណកម្មកាន់តែស៊ីជម្រៅទៅក្នុងទីផ្សារតំបន់ និងសកលលោក។ ទោះជាកម្ពុជាទទួលបានសន្តិភាពពេញលេញចំនួន២៦ ឆ្នាំ ប៉ុន្តែនៅឆ្នាំ ២០២៥ សង្គ្រាមព្រំដែនជាមួយថៃបានផ្ទុះឡើងវិញ ដោយប៉ះពាល់យ៉ាងធ្ងន់ធ្ងរដល់អធិបតេយ្យភាពជាតិ និងធ្វើឱ្យប្រជាពលរដ្ឋភៀសសឹកជាង ២ ម៉ឺននាក់មិនទាន់អាចត្រឡប់ទៅលំនៅឋានរបស់ពួកគេវិញបាន។ សម្តេចធិបតីបន្តថា  ទោះជាមានកិច្ចព្រមព្រៀង និងបទឈប់បាញ់នៅចុងឆ្នាំ២០២៥ ក៏ដោយ ក៏ស្ថានភាពនៅលើដីនៅតែមានភាពផុយស្រួយ ដោយសារកងទ័ពនៅតែប្រឈមមុខដាក់គ្នា ហើយគណៈកម្មការព្រំដែន (JBC) មិនអាចចាប់ផ្តើមការងារខណ្ឌសីមា និងការបោះបង្គោលព្រំដែនឡើងវិញនៅឡើយ។ លើសពីនេះ ភាគីថៃនៅតែបន្តកាន់កាប់ដី សាងសង់ហេដ្ឋារចនាសម្ព័ន្ធផ្សេងៗក្នុងទឹកដីកម្ពុជា ព្រមទាំងចេញប័ណ្ណកម្មសិទ្ធិដីធ្លីជូនប្រជាពលរដ្ឋរបស់ខ្លួន​។  សម្តេចធិបតី មានប្រសាសន៍ថា…

សម្ដេចតេជោ ហ៊ុន សែន ប្រធានព្រឹទ្ធសភាកម្ពុជា និងជាប្រធានសន្និសីទប្រធានសភានៃអន្តរសភាលើកទី២ បានស្នើឱ្យបង្កើតក្រុមអ្នកសង្កេតការណ៍សភាសម្រាប់បទឈប់បាញ់ ផ្គុំគ្នាជាមួយយន្តការដែលមានស្រាប់ ដើម្បីធានាថា ការត្រួតពិនិត្យជាអន្តរជាតិ មានភាពរឹងមាំគ្រប់គ្រាន់ក្នុងការទប់ស្កាត់ការប៉ះទង្គិចគ្នាតាមព្រំដែនខ្នាតតូចមិនឱ្យរីករាលដាលទៅជាសង្គ្រាមរ៉ាំរ៉ៃ។ ក្នុងពិធីបើកសន្និសីទប្រធានសភានៃអន្តរសភាលើកទី២ នៅថ្ងៃទី២៧ ខែសីហា នេះ សម្ដេចតេជោ ហ៊ុន សែន បានថ្លែងថា យើងត្រូវតែការពារយ៉ាងម៉ឺងម៉ាត់ នូវគោលការណ៍ដ៏ពិសិដ្ឋនៃអធិបតេយ្យរបស់រដ្ឋ បូរណភាពទឹកដី និងការដោះស្រាយជម្លោះដោយសន្តិវិធី ដែលមានចែងក្នុងធម្មនុញ្ញអង្គការសហប្រជាជាតិ ធម្មនុញ្ញអាស៊ាន ក៏ដូចជាស្មារតីអមតៈនៃលិខិតូបករណ៍សភា ដូចជា ធម្មនុញ្ញសន្តិភាពសកល ដែលត្រូវបានអនុម័តនៅរាជធានីភ្នំពេញនេះផ្ទាល់តែម្តង។  ជាងនេះទៅទៀត ដើម្បីឈានផុតពីការទូតបែបអកម្ម សម្តេចតេជោបានអំពាវនាវឲ្យមានការបង្កើតបណ្តាញអន្តរជាតិនៃអ្នកសម្រុះសម្រួលឆ្នើមសភា ដោយប្រមូលផ្តុំនូវសមាជិកសភាលេចធ្លោនានា ដែលអាចជំរុញការសម្រុះ​សម្រួល​ឱ្យមានសន្តិភាពដោយសកម្ម។ សម្ដេចតេជោមានប្រសាសន៍ថា ប្រធានអង្គនីតិប្បញ្ញត្តិទាំងអស់សុទ្ធសឹងជាឥស្សរជននយោបាយដែលមានបទពិសោធខ្ពស់ មានបណ្តាញទំនាក់ទំនងអន្តរជាតិយ៉ាងទូលំទូលាយ និងមានកិត្យានុភាព។ ដូច្នេះ បណ្តាញសម្រុះសម្រួលឯកទេសនេះត្រូវតែឈានជើងឱ្យផុតពីភាពរឹងត្អឹងនៃមនោគមវិជ្ជា ហើយអាចធ្វើសកម្មភាពដោយភាពរហ័សរហួន ដើម្បីសម្រុះសម្រួលផ្ទាល់ជាមួយភាគីជម្លោះ មុនពេលដែលការប៉ះទង្គិចគ្នាបន្តិចបន្តួចអាចផ្ទុះឡើង បង្កជាសង្គ្រាមទ្រង់ទ្រាយធំ។  សម្ដេចបានសង្កត់ធ្ងន់ថា ភ្លើងសង្គ្រាមក្នុងប្រទេសមួយលែងជារឿងដាច់ដោយឡែកទៀតហើយ ព្រោះវាអាចបក់ផ្សែងមកដល់ជើងមេឃ ដែលអាចខ្ទប់ដង្ហើមយ៉ាងងាយស្រួល។ ដូច្នេះ ដើម្បីជំនួសជាអចិន្ត្រៃយ៍នូវច្បាប់ព្រៃ «អ្នកខ្លាំងឈ្នះ» ​ស្ថាប័ននីតិប្បញ្ញត្តិត្រូវបន្តចេញសេចក្ដីថ្លែងការណ៍រួមដ៏មានឥទ្ធិពល និងបង្ហាញសាមគ្គីភាពឥតងាករេ។ សម្តេចប្រធានព្រឹទ្ធសភាសង្កត់ធ្ងន់ថា សហគមន៍ដែលគោរពច្បាប់ដូចបណ្តាញបណ្តាញសន្និសីទអន្តរសភានេះ គប្បីខិតខំស្វែងរកផ្លូវច្បាប់ដើម្បីទប់ស្កាត់ល្បិចកលប្រផេះ ដែលចង់ពង្រីកមហិច្ឆតាទឹកដី និងការត្រួតត្រាលើអធិបតេយ្យប្រទេសដទៃដោយបង្ខំ ដែលផ្ទុយនឹងច្បាប់អន្តរជាតិ។ ត្រង់ចំណុចនេះ សម្តេចតេជោបានរិះគន់ការប្រើប្រាស់ការអនុវត្តច្បាប់ក្រៅដែនអធិបតេយ្យ ចំពោះបទល្មើសឆ្លងដែន ដូចជាការឆបោកតាមអនឡាញ…

រដ្ឋបាលខេត្តស្ទឹងត្រែង គ្រោងនឹងបង្កើតផ្លូវថ្មើរជើងពេលរាត្រី​ ពង្រីកកន្លែងកម្សាន្ត កន្លែងហាត់ប្រាណ កែលម្អហេដ្ឋារចនាសម្ព័ន្ធ និងការរៀបចំឱ្យមានសណ្តាប់ធ្នាប់សាធារណៈឱ្យបានសា្អតបាតនៅក្នុងខេត្ត​ ដើម្បីបម្រើ​ដល់​ពលរដ្ឋ បង្កើនភាពអ៊ូអរ ក៏ដូចជា​ទាក់ទាញភ្ញៀវទេសចរ។   ​ឯកឧត្តម សរ សុពុត្រា អភិបាលខេត្តស្ទឹងត្រែង បានបញ្ជាក់​ពីគម្រោងនេះ ក្នុងពិធីបង្ហាញវឌ្ឍនភាពការងារសម្រេចបានប្រចាំឆមាសទី១របស់រដ្ឋបាលខេត្តស្ទឹងត្រែង កាល​ពីថ្ងៃទី២៦ ខែសីហា​ ឆ្នាំ២០២៦។  ឯកឧត្តម សរ សុពុត្រា ​គ្រោង​ដាក់ឈ្មោះ​ផ្លូវថ្មើរជើងកម្សាន្តពេលរាត្រី ក្នុងក្រុងស្ទឹងត្រែងនោះថា «ឦសានធានី»ដែលបើកបម្រើភ្ញៀវទេសចរនៅ​ចុងសប្តាហ៍។ លោក អ៊ន់ ប៉ោសឿន ប្រធានមន្ទីរទេសចរណ៍ខេត្តស្ទឹងត្រែង  បានបញ្ជាក់ប្រាប់បណ្តាញព័ត៌មាន AMS បន្ថែមថា រដ្ឋបាលខេត្តនឹងបង្កើតផ្សារសហគមន៍ទេសចរណ៍ និងរៀបចំហេដ្ឋារចនាសម្ព័ន្ធនៅរមណីយដ្ឋាន​ទេសចរណ៍​អន្លង់ផ្សោតត្បូងខ្លា ស្ថិតនៅក្នុងស្រុកសូមបូក ឱ្យកាន់តែទាក់ទាញបន្ថែមទៀតផងដែរ។ បើតាមលោក អ៊ន់ ប៉ោសឿន  គម្រោងពង្រីកហេដ្ឋារចនាសម្ព័ន្ធទេសចរណ៍ទាំងនេះ គ្រោងនឹងរៀបចំនៅ​ ខាងមុខនេះ ខណៈរដ្ឋបាលខេត្តកំពុងស្វែងរកដៃគូ​សហការរៀបចំ។ ក្នុងឆមាសទី១ ឆ្នាំ២០២៦នេះ ខេត្តស្ទឹងត្រែងទទួលបានភ្ញៀវទេសចរសរុបចំនួន​ជិត៦០ម៉ឺននាក់  គឺកើនឡើង៦៧ភាគរយ បើធៀបនឹងរយៈពេលដូចគ្នាក្នុងឆ្នាំ២០២៥។ នៅក្នុងខេត្តស្ទឹងត្រែង​ មានបឹងកាឡូ និង Resort ចំនួន២៥កន្លែង រមណីយដ្ឋានប្រវត្តិសាស្ត្រចំនួន៣កន្លែង រមណីយដ្ឋានធម្មជាតិកែច្នៃ ២កន្លែង រមណីយដ្ឋានទេសចរណ៍ធម្មជាតិ១កន្លែង រមណីយដ្ឋានកសិទេសចរណ៍ចំនួន១កន្លែង និងសហគមន៍អេកូទេសចរណ៍ចំនួន៧កន្លែង៕ សៅ សុខអេង

ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានអញ្ជើញចុះពិនិត្យជាក់ស្ដែងស្ថានភាពទឹកជំនន់ទន្លេមេគង្គ និងផលប៉ះពាល់ដល់ប្រជាពលរដ្ឋ នៅក្នុងខេត្តត្បូងឃ្មុំ និងខេត្តកំពង់ចាម នាព្រឹកថ្ងៃពុធទី២៦ ខែសីហា ឆ្នាំ២០២៦នេះ ដោយមានវត្តមានចូលរួមពីសំណាក់ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម និងអាជ្ញាធរមូលដ្ឋានជាច្រើនរូបផងដែរ។ ក្នុងរយៈពេលប៉ុន្មានថ្ងៃកន្លងមកនេះ ឥទ្ធិពលព្យុះ និងប្រព័ន្ធសម្ពាធទាបដែលកើតមាននៅភាគខាងលើអាងទន្លេមេគង្គ បានបណ្តាលឱ្យតំបន់ផ្ទៃរងទឹកភ្លៀងនៃទន្លេមេគង្គក្នុងប្រទេសថៃ ឡាវ វៀតណាម និងប្រទេសកម្ពុជាមានភ្លៀងធ្លាក់ច្រើននៅក្នុងអាងទន្លេមេគង្គ។ ស្ថានភាពនេះធ្វើឱ្យកម្ពស់ទឹកទន្លេមេគង្គមានការហក់ឡើងខ្លាំង បណ្តាលឱ្យជន់លិចតំបន់មួយចំនួននៅតាមដងទន្លេមេគង្គផ្នែកខាងលើ ក្នុងខេត្តស្ទឹងត្រែង ខេត្តក្រចេះ ខេត្តត្បូងឃ្មុំ និងខេត្តកំពង់ចាម។ ឯកឧត្តមរដ្ឋមន្ត្រី បានបញ្ជាក់ឱ្យដឹងថា នៅប្រទេសកម្ពុជា តាមស្ថិតិរបស់ក្រសួងចាប់ពីឆ្នាំ២០០០ ដល់ឆ្នាំ២០១៩ ទឹកទន្លេមេគង្គតែងតែឡើងខ្ពស់រហូត ប៉ុន្តែក្នុងរយៈពេល៥ឆ្នាំចុងក្រោយចាប់ពីឆ្នាំ២០២០ ដល់ឆ្នាំ២០២៥ ទឹកទន្លេមេគង្គមានកម្ពស់ទាប មិនបណ្តាលឱ្យលិចលង់ដល់ភូមិឋានប្រជាពលរដ្ឋ និងមិនប៉ះពាល់ដល់ហេដ្ឋារចនាសម្ព័ន្ធ។ ដោយឡែក នៅឆ្នាំ២០២៦ រំហូរទឹកទន្លេមេគង្គមានការប្រែប្រួលខ្លាំងខុសពីធម្មតា កម្ពស់ទឹកហក់ឡើងខ្ពស់នៅផ្នែកខាងលើរហូតដល់កម្រិតប្រកាសប្រុងប្រយ័ត្ន និងបណ្តាលឱ្យមានការជន់លិចនៅតំបន់មួយចំនួនតាមដងទន្លេមេគង្គ។ ឯកឧត្តមរដ្ឋមន្ត្រី ក៏បានបញ្ជាក់បន្ថែមថា ឥទ្ធិពលនៃបាតុភូតអែលនីញ៉ូ បានធ្វើឱ្យអាកាសធាតុមានការប្រែប្រួលខ្លាំង ជាក់ស្តែងនៅឆ្នាំនេះមានព្យុះរហូតដល់ ២១រួចហើយគិតត្រឹមចុងខែសីហា ដែលជាធម្មតារៀងរាល់ឆ្នាំចំនួននេះគឺកើតឡើងនៅខែកញ្ញាឬខែតុលា។ មួយវិញទៀតកម្ដៅកាន់តែឡើងខ្លាំង កន្លែងខ្លះភ្លៀងខ្លាំង…

ចាប់ពីពេលនេះតទៅ មន្ត្រីក្របខណ្ឌក្រសួងមហាផ្ទៃទាំងអស់ ទាំងស៊ីវិល ទាំងមន្ត្រីនគរបាលជាតិ និងមន្ត្រីពន្ធនាគារ ប្រសិនរកឃើញថាបានបើកបរទាំងស្រវឹង ហើយបង្កគ្រោះថ្នាក់ចរាចរណ៍នៅតាមដងផ្លូវ គឺមិនត្រឹមតែប្រឈមមុខច្បាប់ប៉ុណ្ណោះទេ ប៉ុន្តែក៏នឹងត្រូវប្រឈមការបណ្តេញចេញពីក្របខណ្ឌផងដែរ។ នេះបើតាមការលើកឡើងរបស់លោក ទូច សុខៈ អ្នកនាំពាក្យរងនៃក្រសួងមហាផ្ទៃ ដែលបញ្ជាក់ថា គោលការណ៍នេះត្រូវបានដាក់ចេញដោយឯកឧត្តម ស សុខា រដ្ឋមន្ត្រីក្រសួងមហាផ្ទៃ នៅថ្ងៃពុធ ទី២៦ ខែសីហា ឆ្នាំ២០២៦នេះ។    ជាងនេះទៅទៀត វិធានការក្តៅនេះមិនមែនអនុវត្តតែក្នុងរឿងគ្រោះថ្នាក់ចរាចរណ៍ឡើយ។ លោក ទូច សុខៈ បញ្ជាក់បន្ថែមថា មន្ត្រីទាំង៣ប្រភេទនេះ បើសិនជាទទួលទានគ្រឿងស្រវឹងហើយ ទៅរករឿងអ្នកដទៃ ដែលបង្កសកម្មភាពអសីលធម៌ក្នុងសង្គមតាមទីសាធារណៈនានា ក៏នឹងត្រូវប្រឈមមុខនឹងការបណ្ដេញចេញពីក្របខ័ណ្ឌដូចគ្នាផងដែរ។  ការដាក់ចេញ​វិធានការដ៏តឹងរ៉ឹងនេះ ធ្វើឡើងស្របពេលដែលកន្លងមក មានមន្រ្តីនគរបាលខ្លះ បន្ទាប់ពីស្រាចូលខ្លួន បានប្តូរអត្តចរិត ហើយប្រព្រឹត្តិល្មើសតួនាទី ដោយបង្កហិង្សាលើជនស៊ីវិល។ ​វាក៏ស្របពេលជាមួយការរឹតបន្តឹងច្បាប់ចរាចរណ៍ផ្លូវគោក ដែលនឹងចាប់ផ្តើមអនុវត្តឡើងវិញនៅថ្ងៃទី០១ ខែកញ្ញា ខាងមុខនេះ។ ក្នុងរយៈពេល៧ខែឆ្នាំ២០២៦នេះ គ្រោះថ្នាក់ចរាចរណ៍នៅទូទាំងប្រទេសបានកើតឡើងចំនួន ១ ៥៩០លើក មានអ្នកស្លាប់ជិត ១ពាន់នាក់ និងរងរបួសជាង ២ ៣០០នាក់៕ សៅ សុខអេង 

ក្រុមហ៊ុនវៀតណាមមួយបានផ្តួចផ្តើមបង្កើតកញ្ចប់ទេសចរណ៍ “ទីក្រុងបុរាណ ៣ ក្នុងប្រទេស ៣” រវាងកម្ពុជា វៀតណាម និងឡាវ ដើម្បីជំរុញការទាក់ទាញភ្ញៀវទេសចរ។ កញ្ចប់ទស្សនកិច្ចថ្មីនេះត្រូវបានរំពឹងថា អាចជំរុញកំណើនភ្ញៀវទេសចររវាងប្រទេសទាំង៣ ប្រទេសទី៣ និងពីគ្រប់ទិសទីនៃពិភពលោក។ លោក Nguyễn Quốc Kỳ ប្រធានក្រុមហ៊ុន Vietravel Corporation ដែលជាក្រុមហ៊ុនទេសចរណ៍នាំមុខគេជាង៣ទសវត្សនៅវៀតណាម បានលើកយកគំនិតផ្តួចផ្តើមនេះមកពិភាក្សាជាមួយឯកឧត្តម ហួត ហាក់ រដ្ឋមន្រ្តីក្រសួងទេសចរណ៍កម្ពុជា ក្នុងពេលដែលឯកឧត្តមបំពេញទស្សនកិច្ចការងារ នៅទីក្រុងហូជីមិញ ប្រទេសវៀតណាម កាលពីថ្ងៃទី២៥ ខែសីហា។ កញ្ចប់ទេសចរណ៍ថ្មីនេះនឹងភ្ជាប់ទីក្រុងវេ (Huế) របស់វៀតណាម ទីក្រុងសៀមរាបរបស់កម្ពុជា និងទីក្រុងហ្លួងព្រះបាងរបស់ឡាវ ដើម្បីបង្កើតជាផលិតផលទេសចរណ៍ឆ្លងប្រទេស ប្រកបដោយភាពទាក់ទាញ និងច្នៃប្រឌិតជាមួយជើងហោះហើរថ្មីសម្រាប់ទីក្រុងបុរាណទាំង៣។ ទន្ទឹមនេះ ក្រុមហ៊ុនទេសចរណ៍វៀតណាម បានបង្ហាញការចាប់អារម្មណ៍ចំពោះសក្តានុពល និងភាពសម្បូរបែបនៃវិស័យទេសចរណ៍កម្ពុជា ដែលបានជំរុញឱ្យក្រុមហ៊ុនបង្កើតកិច្ចសហការជាមួយក្រសួងទេសចរណ៍ និងវិស័យឯកជនកម្ពុជា ដើម្បីជំរុញការផ្លាស់ប្តូរភ្ញៀវទេសចរ ការផ្សព្វផ្សាយគោលដៅទេសចរណ៍ និងការអភិវឌ្ឍផលិតផលទេសចរណ៍រួមរវាងប្រទេសទាំងពីរ។ សូមបញ្ជាក់ថា ក្នុងជំនួបខាងលើ ភាគីទាំងពីរក៏បានឯកភាពជំរុញកិច្ចសហប្រតិបត្តិការជាក់ស្តែង ដោយគ្រោងចុះ អនុស្សរណៈនៃការយោគយល់គ្នា (MoU) ស្តីកិច្ចសហប្រតិបត្តិការក្នុងវិស័យទេសចរណ៍ ដោយថ្នាក់ដឹកនាំជាន់ខ្ពស់របស់ក្រុមហ៊ុននឹងមកស្វែងយល់ពីសក្តានុពលទេសចរណ៍ក្នុងខេត្តសៀមរាប…

ឯកឧត្តម ចាន់ រតនា អ្នកនាំពាក្យក្រសួងការបរទេសកម្ពុជា បានប្រាប់បណ្តាញព័ត៌មាន AMS នៅថ្ងៃពុធទី២៦ សីហា ឆ្នាំ២០២៦នេះថា ភាគីថៃនឹងដោះលែងអ្នកនេសាទខ្មែរចំនួន ២នាក់ក្នុងចំណោម ៣នាក់ នៅថ្ងៃទី២៩ សីហាខាងមុខ នៅច្រកព្រំដែនខ្លងយ៉ៃ ប្រទេសថៃ ជាប់ច្រកព្រំដែនអន្តរជាតិចាំយាម ក្នុងខេត្តកោះកុងរបស់កម្ពុជា។ អ្នកនាំពាក្យក្រសួងការបរទេសកម្ពុជា បញ្ជាក់ថា អគ្គកុង​ស៊ុលកម្ពុជាប្រចាំខេត្តស្រះកែវ នឹងទៅ​ទទួលពួកគេនៅទីនោះ ដើម្បីជួយចាត់ចែងបញ្ជូនត្រឡប់មកកម្ពុជា ខណៈអ្នកនេសាទម្នាក់ទៀតត្រូវពន្យាពេលដោះលែងរហូតដល់ថ្ងៃទី៧ ខែវិច្ឆិកា ឆ្នាំ២០២៦។ ការដោះលែងអ្នកនេសាទខ្មែរចំនួន ២នាក់មកមុននេះ ត្រូវបានមន្រ្តីពន្ធនាគារប្រទេសថៃបញ្ជាក់ថា ដោយសារមានសាលក្រមសម្រេចឲ្យដោះលែងពីតុលាការថៃ។ នេះបើតាមឯកឧត្តម ចាន់ រតនា ដែលទទួលបានដំណឹងនេះពីអគ្គកុង​ស៊ុលកម្ពុជាប្រចាំខេត្តស្រះកែវ។ ចំពោះអ្នកនេសាទម្នាក់ទៀ​ត គឺត្រូវ​រងចាំដីការសម្រេចដោះលែងពីតុលាការថៃសិន។ តុលាការខេត្តត្រាត ប្រទេសថៃ បានកាត់ទោសអ្នកនេសាទទាំង ៣នាក់ ក្នុងនោះ ២នាក់កាត់ទោសឱ្យជាប់ពន្ធនាគារចំនួន ៤ខែ និងពិន័យជាប្រាក់ក្នុងម្នាក់ ៩ម៉ឺនបាត ស្មើប្រមាណណ ១០លានរៀល និងអ្នកបើកទូកនេសាទម្នាក់ទៀត ត្រូវបានតុលាការកាត់ទោសឱ្យជាប់ពន្ធនាគារចំនួន ១ឆ្នាំ ៤ខែ និងពិន័យជាប្រាក់ជាង ១២ម៉ឺនបាត ឬ ស្មើប្រមាណ ១៤លានរៀល។ ពួកគេត្រូវបានទាហានជើងទឹកថៃចាប់នៅក្បែរកោះយ៉រ ខេត្តកោះកុង កាល​ពី…