ទឹកជំនន់ទឹកស្ទឹងសង្កែ ខេត្តបាត់ដំបង និងបន្តជន់ឡើងបន្តិច ខណៈដែលភ្លៀងធ្លាក់ច្រើននៅផ្នែកខាងលើ។គិតត្រឹមម៉ោង១៣,០០ថ្ងៃត្រង់ នៃ ថ្ងៃទី៣០ខែកក្កដាឆ្នាំ២០២១នេះ កម្ពស់ទឹកស្ទឹងសង្កែបានជន់ហក់ឡើងរហូតដល់កម្ពស់០៨,៧០ម៉ែត្រ។       ដោយឡែក តាមការគូសបញ្ជាក់ពីលោកឡុង ផលគុណ ប្រធានមន្ទីរធនធានទឹក និងឧត្តនិយម ខេត្តបាត់ដំបង លោកបានប្រាប់ឲ្យដឹងថា៖ស្ថានភាពជំនន់ទឹកស្ទឹងសង្កែ អាចហក់ជន់ឡើងបន្ថែមទៀត ដោយសារតែនៅប៉ែកខាងលើនៃខេត្តបាត់ដំបង កំពុងមានភ្លៀងធ្លាក់ជាបន្តបន្ទាប់ ទើបធ្វើឲ្យជំនាញបន្ធូរ (បើក) ទ្វារទំនប់ទឹកអាងពហុបំណងសេកសក នៅក្នុងស្រុករតនមណ្ឌល របស់ ខេត្តបាត់ដំបង ដើម្បីទម្លាក់ទឹកឲ្យចុះមកផ្នែកខាងក្រោម ក្នុងស្ទឹងសង្កែ ទើបធ្វើឲ្យកម្ពស់ទឹកស្ទឹងសង្កែមានការជន់ឡើងបន្តិច។       លោកប្រធានមន្ទីរធនធានទឹក អះអាងទៀតថា៖ ទឹកស្ទឹងសង្កែអាចបន្តជន់ឡើងថែមទៀត ប្រសិន បើស្ថានភាពទឹកភ្លៀងនៅផ្នែកខាងលើនៅតែបន្តធ្លាក់ចុះថែមទៀតនោះ។        ជាការកត់សម្គាល់ ពីស្ថានភាពជំនន់ទឹកស្ទឹងសង្កែ ក្នុងឆ្នាំ២០២១នេះ គឺទឹកស្ទឹងសង្កែ ខេត្តបាត់ដំបង មានការជន់ឡើងនូវជំនន់ទឹកភ្លៀង ជាលើកទី០២ហើយ នៅក្នុងរដូវវស្សា ឆ្នាំ២០២១នេះ៕  ( អត្ថបទ-រូបភាព៖ អ៊ុក សំអាន បប )

ពិធីបិទវគ្គបំប៉នសមត្ថភាពថ្នាក់រាជធានី ខេត្ត កម្មវិធីធុរកិច្ចជាតិសម្រាប់យុវជន ដែលមានរយៈពេល ៣ថ្ងៃ បានប្រព្រឹត្តទៅក្នុងទម្រង់អនឡាញ ក្រោមអធិបតីភាព ឯកឧត្តម ជីវ រដ្ឋា អគ្គនាយករង នៃអគ្គនាយកដ្ឋានយុវជន និងជាប្រធានគណៈគ្រប់គ្រងនាយកដ្ឋានយុវជន ក្រសួងអប់រំ យុវជន និងកីឡា។ ជាជំហ៊ានបន្ទាប់ សិក្ខាកាមបង្គោលចូលរួមនាពេលនេះ នឹងបន្តធ្វើការបណ្តុះបណ្តាល ស្តីពីធុរកិច្ច ដល់យុវជនគោលដៅទាំង ២៥ រាជធានី ខេត្ត ចំនួន ប្រមាណ ៦០០០នាក់ មុនពេលការរៀបចំសិក្ខាសាលាទិវាសហគ្រិនភាព ២១ កញ្ញា ដែលនឹងមានការប្រកួតប្រជែងផែនការអាជីវកម្មរបស់ក្រុមយុវជនជាសិក្ខាកាម។ គួរបញ្ជាក់ថា កម្មវិធី NOBY រៀបចំឡើងក្នុងគោលបំណងផ្តល់នូវចំណេះដឹង ជំនាញ និងសមត្ថភាពដល់យុវជនកម្ពុជា ឱ្យក្លាយទៅជាសហគ្រិនវ័យក្មេង ដែលជាធនធានមនុស្សប្រកបដោយសក្តានុពលក្នុងការអភិវឌ្ឍសេដ្ឋកិច្ចសង្គមជាតិ។ដោយ -រ៉ាវុធ

ដីឥដ្ឋ ៖ ឯកឧត្តម ឧត្តមសេនីយ៍ទោ អេង គឹមសាន អនុប្រធានបណ្ឌិត្យសភានគរបាលកម្ពុជា បានដឹកនាំកិច្ចប្រជុំ ដើម្បីពិនិត្យ កែសម្រួលខ្លឹមសារបញ្ចប់លើសេចក្តីព្រាងរៀបចំគោលការណ៍ណែនាំស្តីពីនីតិវិធីនៃដំណើរការស្រាវជ្រាវរបស់វិទ្យាស្ថាន ដោយមានការចូលរួមពីលោកនាយក លោក នាយករង លោកប្រធានការិយាល័យ និងមន្ត្រីនៃវិទ្យាស្ថានៅថ្ងៃទី២៩ ខែ កក្កដា ឆ្នាំ ២០២១ ។ ជាកិច្ចចាប់ផ្តើម ឯកឧត្តមប្រធានអង្គប្រជុំ បានសម្តែងការស្វាគមន៍ដល់សមាជិកនៃអង្គប្រជុំនិងបានបន្តដំណើរការប្រជុំ ដោយអង្គប្រជុំបានត្រួតពិនិត្យ កែសម្រួលលើសេចក្តីព្រាងរៀបចំគោលការណ៍ណែនាំស្តីពីនីតិវិធីនៃដំណើរការស្រាវជ្រាវរបស់វិទ្យាស្ថាន ប្រកបដោយស្មារតីយកចិត្តទុកដាក់បំផុត។ បន្ទាប់ពីបានពិនិត្យ កែសម្រួលបន្ថែមមាតិកា និងខ្លឹមសាររួចរាល់លើសេចក្តីព្រាងរៀបចំគោលការណ៍ណែនាំស្តីពីនីតិវិធីនៃដំណើរការស្រាវជ្រាវ អង្គប្រជុំបានសម្រេចឯកភាពទាំងស្រុងលើខ្លឹមសារដែលបានកែសម្រួលបញ្ចប់។ជាចុងក្រោយ ឯកឧត្តមប្រធានអង្គប្រជុំ បានណែនាំនូវការងារមួយចំនួនដូចខាងក្រោម: ថ្នាក់ដឹកនាំនិងមន្ត្រី ត្រូវពង្រឹងការគោរពវិន័យការងារ ថ្នាក់ដឹកនាំនិងមន្ត្រីទាំងអស់ ត្រូវតាមដាននូវសុខភាពរបស់ខ្លួននិងអនុវត្តវិធានការណ៍ ៣កុំ ៣ការពារឱ្យបានខ្ជាប់ខ្ជួន។ដោយ-រ៉ាវុធ