(ភ្នំពេញ)៖ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ស៊ុន មេសា នៅព្រឹកថ្ងៃទី២៥ ខែវិច្ឆិកា ឆ្នាំ២០២៥នេះ បានអំពាវនាវដល់កម្មករនិយជិត បុគ្គលិកក្រុមហ៊ុនឱ្យប្តឹងមកក្រសួងការងារ និងបណ្តុះបណ្តាលវិជ្ជាជីវៈ ប្រសិនបើមានការប្រើប្រាស់ពាក្យសម្តីមិនសមរម្យនៅកន្លែងការងារ ដើម្បីក្រសួងចាត់វិធានការ។ លោក ស៊ុន មេសា ថ្លែងថា ៖ «ខ្ញុំសូមអំពាវនាវដល់ប្រធានរដ្ឋបាល ប្រធានផ្នែក ប្រធានក្រុមកាត់ដេរ និងជំនួយការនៅតាមសហគ្រាស ក្រុមហ៊ុន រោងចក្រទាំងអស់ មេត្តាប្រើពាក្យសម្តីឱ្យបានទន់ភ្លន់ក្នុងការបំពេញការងារជាមួយកម្មករនិយោជិត ជាពិសេស បងប្អូនអតីតពលករខ្មែរត្រឡប់មកពីប្រទេសថៃ សូមកុំមានការជេរប្រមាថ ហើយបងប្អូនកម្មករ ឬនិយោជិតទាំងអស់អាចប្តឹងមកក្រសួង មកអ្នកនាំពាក្យ ឬបណ្តឹងអនាមឹករបស់ក្រសួង»។ ការអំពាវនាវរបស់អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ គឺជាការជំរុញការយកចិត្តទុកដាក់ និងផ្តល់ភាពកក់ក្តៅជូនបងប្អូនអតីតពលករខ្មែរ ដែលត្រឡប់មកពីប្រទេសថៃ ទាំងពេលទំនាក់ទំនងផ្តល់ឱកាសការងារ និងពេលបំពេញការងារ ត្រូវមានភាពទន់ភ្លន់ យកចិត្តទុកដាក់ឱ្យដូចដែលរាជរដ្ឋាភិបាល ក្រសួង រដ្ឋបាលខេត្ត អាជ្ញាធរមានសមត្ថកិច្ចនៅតាមច្រកព្រំដែន យុវជនស្ម័គ្រចិត្ត នៃសហភាពសហព័ន្ធយុវជនកម្ពុជា និងយុវជនស្ម័គ្រចិត្តកាកបាទក្រហម ខិតខំផ្ដល់ជូនពេលបងប្អូនឈានជើងដំបូងចូលមកដល់បូរណភាពទឹកដីកម្ពុជា។ បើតាមអ្នកនាំពាក្យ លោក ស៊ុន មេសា សម្រាប់បណ្តឹង កម្មករនិយោជិតអាចប្តឹងមកបណ្តាញសង្គមក្រសួង…

(ភ្នំពេញ)៖ ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានអញ្ជើញទទួលជួបជាមួយ​លោកជំទាវ Alona Fisher-Kamm ឯកអគ្គរដ្ឋទូត​វិសាមញ្ញ និងពេញសមត្ថភាពនៃរដ្ឋអ៊ីស្រាអែល​ប្រចាំ​កម្ពុជា នៅទីស្តីការក្រសួងកសិកម្ម នៅព្រឹកថ្ងៃទី២៥ ខែវិច្ឆិកា ឆ្នាំ២០២៥ ។ ឯកឧត្តមរដ្ឋមន្រ្តី បានសម្តែងការស្វាគមន៍ចំពោះ​ការ​ពង្រឹងកិច្ចសហប្រតិបត្តិការលើវិស័យកសិកម្មរវាងប្រទេសទាំងពីរ និងបានលើកទឹកចិត្តដល់ភាគីអ៊ីស្រាអែល​ពិនិត្យលទ្ធភាពនៃការពង្រឹងការគាំទ្រនិស្សិតកសិកម្មកម្ពុជាក្នុងការចូលរួមកម្មវិធីហាត់ការនៅអ៊ីស្រាអែលប្រកបដោយសុខសុវត្ថិភាពខ្ពស់ និងទទួលបានចំណេះដឹង និងចំណេះជំនាញពេញលេញ។ ឯកឧត្តមរដ្ឋមន្រ្តី ក៏បានលើកឡើងពីលទ្ធភាព នៃការ​ពង្រឹង​កិច្ចសហប្រតិបត្តិការលើការស្រាវជ្រាវ និង​អភិវឌ្ឍន៍​បច្ចេកវិទ្យាកសិកម្មជាមួយភាគីអ៊ីស្រាអែល តាមរយៈគ្រឹះស្ថានអប់រំកសិកម្មទាំង៣ និងបណ្ឌិត្យ​សភាវិទ្យាសាស្រ្តកសិកម្មនៅពេលអនាគត ដើម្បីចែក​រំលែកចំណេះដឹងបច្ចេកវិទ្យាទំនើប និងនវានុវត្តន៍ថ្មីៗ សំដៅលើកស្ទួយវិស័យកសិកម្ម និងផ្តល់ផលប្រយោ​ជន៍​ទៅវិញទៅមករវាងប្រទេសទាំងពីរ។ ឯកឧត្តមរដ្ឋមន្ត្រីបានផ្ដាំផ្ញើភាគីអ៊ីស្រាអែលបន្តយកចិត្តទុកដាក់សុខសុវត្ថិភាពរបស់និស្សិតកសិកម្មកម្ពុជាដែលកំពុងបំពេញកម្មសិក្សានៅឯអ៊ីស្រាអែល ៕ ប្រភព ៖ ក្រសួងកសិកម្ម

(ខេត្តសៀមរាប)៖ ឯកឧត្តម ហួត ហាក់ រដ្ឋមន្រ្តីក្រសួង​ទេសចរណ៍ និងជាប្រធានក្រុមការងារអន្តរក្រសួង​គ្រប់​គ្រង និងអភិវឌ្ឍសហគមន៍ទេសចរណ៍ និងអេកូទេស​ចរ​ណ៍ និង ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ និងជាអនុប្រធាន នៃ ក.គ.អ.អ កាលពីថ្ងៃទី២៤ ខែវិច្ឆិកា ឆ្នាំ២០២៥ បាន​អញ្ជើញ​បើកវេទិកាជាតិអេកូទេសចរណ៍លើកទី៤ នៅខេត្តសៀមរាប។ ក្នុងឱកាសចូលរួមពិធីបើកវេទិកាជាតិអេកូទេសចរណ៍ ឆ្នាំ២០២៥ ឯកឧត្តមរដ្ឋមន្រ្តី ឌិត ទីណា បានរំលេចអំពី​កិច្ចការអភិរក្សរបស់ក្រសួងកសិកម្ម ជាពិសេសកិច្ច​ខិត​ខំប្រឹងប្រែងការពារ គ្រប់គ្រង និងអភិរក្សសត្វផ្សោត​ទន្លេ​មេគង្គ ដែលជារតនៈសម្បត្តិធម្មជាតិ និងជាការទាក់​ទាញ​ដ៏ធំមួយសម្រាប់អេកូទេសចរណ៍នៅកម្ពុជា។ ឯកឧត្តមរដ្ឋមន្រ្តី បានបញ្ជាក់បន្ថែមថា «ទេសចរណ៍​ក៏ជា​​ផ្នែកមួយនៃការធ្វើពិពិធកម្មសម្រាប់​រកចំណូល​បន្ថែមជូនប្រជាកសិករ តាមរយៈផ្គត់ផ្គង់ផលិតផលជូន​ភ្ញៀវ​ទេសចរផ្ទាល់ ដែលជាការនាំចេញនៅនឹងកន្លែង» ។ ឯកឧត្តមរដ្ឋមន្រ្តី សូមកោតសរសើរ និងវាយតម្លៃខ្ពស់​នូវ​ការ​ដឹកនាំរបស់ក្រសួងទេសចរណ៍ និងការចូលរួមពីក្រ​សួង​កសិកម្ម រុក្ខាប្រមាញ់ និងនេសាទ ក្រសួងបរិស្ថាន និងគ្រប់តួអង្គពាក់ព័ន្ធទាំងអស់ ដែលបានសហការ​ដើម្បី​​ជំរុញវិស័យអេកូទេសចរណ៍ឱ្យកាន់តែរឹងមាំ និង​មាននិរន្តរភាពធនធានធម្មជាតិនិងបរិស្ថាន៕ ប្រភព ៖ ក្រសួងកសិកម្ម

(ភ្នំពេញ)៖ ក្រសួងអប់រំ យុវជន និងកីឡា បានចេញសេ​ចក្តី​ណែនាំមួយអំពីដំណើរការបង្រៀន និង រៀនពេញ​មួយ​ថ្ងៃ សម្រាប់គ្រឹះស្ថានមធ្យមសិក្សា​ចំណេះទូទៅ​សា​ធារណៈ ដោយបានអះអាងអំពីការកំពុង​អនុវត្តកំ​ណែ​ទម្រង់​ការគ្រប់គ្រងសាលារៀនយ៉ាងសកម្មតាមរយៈ ការ​លើកទឹកចិត្តឱ្យគណៈគ្រប់គ្រងសាលារៀន គ្រូបង្រៀន ក្នុងការបង្កើនស្វ័យភាព គណនេយ្យភាព និងភាពជាអ្នក ដឹកនាំក្នុងការគ្រប់គ្រងសេវាអប់រំនៅកម្រិតសាលារៀន។ ក្នុងសេចក្តីណែនាំនេះក្រសួងអប់រំបានបញ្ជាក់ថា ការ​រៀប​ចំ​ឱ្យមានដំណើរការបង្រៀន និងរៀនពេញមួយថ្ងៃ ជាការឆ្លើយតបទៅនឹងតម្រូវការពិតប្រាកដរបស់សហគមន៍ មាតាបិតា ឬ អ្នកអាណាព្យាបាល នាពេលបច្ចុប្បន្ន និងការបង្ហាញពីលទ្ធផលសិក្សារបស់សិស្សមានការរីកចម្រើនជាប្រចាំ ជាក់ស្តែង និងជឿទុកចិត្តបាន។ ដូច​នេះ គ្រឹះស្ថានមធ្យមសិក្សាចំណេះទូទៅ ដែលមាន​ធន​ធានគ្រប់គ្រាន់អាចដំណើរការកម្មវិធីបង្រៀន និងរៀន​ពេញមួយថ្ងៃ ។ ក្នុងសេចក្តីណែនាំនេះ​ដែរក្រ​សួង​អប់​រំ​បានបញ្ជាក់អំពីការគ្រប់គ្រង និងការទ្រទ្រង់ដំណើរការ ។ ជាមួយគ្នានេះបានណែនាំឱ្យ មន្ទីរអប់រំ យុវជន និង​កីឡារាជធានី ខេត្ត និងការិយាល័យអប់រំ យុវជន និង​កីឡា នៃរដ្ឋបាលក្រុង ស្រុក ខណ្ឌសម្រប​សម្រួល​ការ​ចូលរួមគាំទ្រពីអាជ្ញាធរមូលដ្ឋាន សហគមន៍ មាតា​បិតា ឬអ្នកអាណាព្យាបាលសិស្ស និងគ្រូបង្រៀនព្រមទាំង​កៀរគរធនធាននានាក្នុងកិច្ចដំណើរការសាលារៀនឱ្យមានប្រសិទ្ធភាព។ ដោយឡែកចំពោះពេលវេលារៀន និងបង្រៀនក្រសួង​អប់រំបានបញ្ជាក់ថាគ្រឹះស្ថានមធ្យមសិក្សាចំណេះទូទៅត្រូវកំណត់ម៉ោងសិក្សាដោយពេលព្រឹកចូលម៉ោង ៧:០០ ចេញម៉ោង ១១:០០ និងរសៀលចូលម៉ោង…

​(ភ្នំពេញ)៖ កាលពីថ្ងៃទី២៤ ខែវិច្ឆិកា ឆ្នាំ២០២៥ ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួង​រៀបចំដែនដី នគរូបនីយកម្ម និងសំណង់ បានអនុញ្ញាតឲ្យលោកស្រី Shao Liyu ប្រធានក្រុមហ៊ុន CENTRAL GAIN ​និងក្រុមការងារ ចូលជួបសម្ដែងការគួរសម និងរាយការណ៍ជូនអំពីវឌ្ឍនភាពនៃគម្រោង​វិនិយោគ​លើ​វិស័យថាមពលអគ្គិសនីរបស់​ក្រុមហ៊ុននេះនៅខេត្តព្រះសីហនុ។ លោកស្រី Shao Liyu បានកោតសរសើរចំពោះភាពទាក់ទាញនៃបរិយាកាសវិនិយោគនៅប្រទេសកម្ពុជា ដែល​កំពុងមាន​សន្តិសុខ និងស្ថិរភាពនយោបាយ ​ ហើយប្រជាជន​មានជីវភាពរស់នៅសមរម្យ មានភាពរួសរាយរាក់​ទាក់ ​និង​មាន​សាមគ្គីភាពល្អ។ ​លោកស្រី​បញ្ជាក់ថា ដោយសារតែកត្តាអំណោយផលទាំងនេះ​ហើយទើប​ក្រុមហ៊ុន CENTRAL GAIN មានបំណង​មក​បណ្ដាក់​ទុននៅកម្ពុជា។ នៅខេត្តព្រះសីហនុ ក្រៅពីថាមពល​អគ្គិសនី ក្រុមហ៊ុនរបស់​លោកស្រី​ក៏មាន​ចំណាប់​អារម្មណ៍វិនិយោគលើវិស័យ​សំខាន់ៗជាច្រើនទៀតដូចជា៖ ថាមពល​កកើតឡើងវិញ ការចម្រាញ់ប្រេង រួមទាំង​បញ្ញា​សិប្បនិមិត្ត និងការរៀបចំទីក្រុងជាដើម។  លោកស្រី​សង្ឃឹមថា គម្រោង​ទាំង​នេះ​នឹងទទួលបានការគាំទ្រ​ពីរាជរដ្ឋាភិបាល​កម្ពុជា។ ជាការឆ្លើយតប ឯកឧត្តមឧបនាយករដ្ឋមន្រ្តី សាយ សំអាល់ ​បានបង្ហាញការស្វាគមន៍​យ៉ាងកក់ក្តៅ​ចំពោះ​គម្រោង​​វិនិយោគរបស់ក្រុមហ៊ុនចិន​ CENTRAL GAIN ហើយលើកទឹកចិត្តឱ្យមានការកៀរគរ​អ្នកវិនិយោគ​កាន់​តែ​​​ច្រើន​មកបណ្ដាក់ទុននៅតំបន់ឆ្នេររបស់កម្ពុជា ជាពិសេសខេត្តព្រះសីហនុ ដោយហេតុថា កម្ពុជាកំពុងរៀបចំ​តំបន់​ឆ្នេរ​សមុទ្រឱ្យទៅជារបៀងសេដ្ឋកិច្ចដ៏សំខាន់មួយ។…

ភ្នំពេញ៖នៅរសៀលថ្ងៃទី២៤ ខែវិច្ឆិកា ឆ្នាំ២០២៥​ក្រសួងការបរទេសនិងសហប្រតិបត្តិការអន្តរជាតិបានធ្វើការបំភ្លឺ​ថា​ពុំមានការសាងសង់ផ្លូវកាត់សមុទ្ររំលោភនឹងកិច្ចព្រមព្រៀងរវាងប្រទេសទាំងពីរ ដោយវៀតណាមដូចការផ្សព្វផ្សាយលើ​បណ្តាញ​សង្គមនោះទេ។ចំណែករូបភាពសំណង់ផ្លូវកាត់សមុទ្រ ដែលឃើញចែកផ្សព្វផ្សាយនៅក្នុងបណ្តាញសង្គម គឺជា​សំណង់ផ្លូវចេញពីដីគោកនៃសង្កាត់ហា​ទៀង (Ha Tien) ខេត្តអានយ៉ាង (An Giang) ទៅកាន់កំពង់ផែពហុ​បំណង​នៃទីក្រុងហាទៀង ដែលស្ថិតក្នុងទឹកដីវៀតណាម។ យោងតាមសេចក្តីថ្លែងការណ៍របស់អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ ឆ្លើយតបនឹងការសាក​សួ​​ររបស់អ្នកសារព័ត៌មានអំពីការផ្សព្វផ្សាយក្នុងបណ្តាញ​សង្គមថ្មីៗនេះដែលថា វៀតណាមកំពុងតែអនុវត្ត​នូវគម្រោង​សាងសង់ផ្លូវកាត់សមុទ្រ ភ្ជាប់ពីកោះទៀនហៃ(Tien Hai) នៃខេត្តអានយ៉ាង (An Giang) ទៅកាន់កោះហ្វូគក់ (កោះត្រល់) ផ្ទុយនឹងកិច្ចព្រមព្រៀងដែនទឹកប្រវត្តិ​សាស្ត្រកម្ពុជា-វៀតណាម ឆ្នាំ១៩៨២ អ្នកនាំពាក្យក្រសួងការបរទេស និងសហប្រតិបត្តិការអន្តរ​ជាតិ សូមធ្វើការបំភ្លឺថា តាមការបញ្ជាក់ពីឯកឧត្តមឯកអគ្គរដ្ឋទូតវៀតណាម និងព័ត៌មានផ្ដល់​ដោយ​ស្ថានទូតវៀតណាមនៅភ្នំពេញ គឺពុំមានការសាងសង់ផ្លូវកាត់សមុទ្ររំលោភនឹងកិច្ចព្រមព្រៀងរវាងប្រទេសទាំងពីរ ដូចការផ្សព្វផ្សាយលើបណ្តាញសង្គមនោះទេ។រូបភាពសំណង់ផ្លូវកាត់សមុទ្រ ដែលឃើញចែកផ្សព្វផ្សាយនៅក្នុង​បណ្តាញ​សង្គម គឺជាសំណង់ផ្លូវចេញពីដីគោកនៃសង្កាត់ហាទៀង (Ha Tien) ខេត្តអានយ៉ាង (An Giang) ទៅកាន់កំពុងផែពហុបំណងនៃទីក្រុងហាទៀង ដែលស្ថិតក្នុងទឹកដីវៀតណាម។ ជាមួយគ្នានេះ​ក្រសួងការបរទេស និងសហប្រតិបត្តិការអន្តរជាតិបានសូមស្នើឱ្យបញ្ឈប់ការចែកផ្សាយព័ត៌មាន​ខុស​ការពិតនេះ ដែលអាចបង្កឱ្យមានការយល់ខុស និងធ្វើឱ្យប៉ះពាល់ដល់ទំនាក់ទំនងមិត្តភាពរវាងព្រះរាជាណាចក្រ​កម្ពុជា និងសាធារណរដ្ឋសង្គមនិយមវៀតណាម៕ដោយ៖មុនី

បាត់ដំបង៖ទំនប់ដូនទ្រី ដែលស្ថិតនៅឃុំបាសាក់ ស្រុករុក្ខគិរី ខេត្តបាត់ដំបង បានសាងសង់រួចរាល់ហើយ។ ជាមួយនឹងលទ្ធភាព​អាចស្តុកទឹកបានប្រមាណ ១៦៣លានម៉ែត្រគូប បានផ្តល់នូវក្តី​សង្ឃឹមជាចម្បងដល់កសិករនៅស្រុកចំនួនបីនៃខេត្តចំនួន​ពីរ​ដែលនៅជាប់គ្នាគឺខេត្តបាត់ដំបង និងខេត្តពោធិ៍សាត់។ ឯកឧត្តម សុខ លូ អភិបាលខេត្តបាត់ដំបងបានឱ្យដឹងថា ទំនប់ដូនទ្រី គឺជាទំនប់ធំទីពីររបស់ខេត្តបាត់ដំបង ដែលអាច​ស្តុក​ទឹកបាន១៦៣លានម៉ែត្រគូប ហើយក៏ជាចំណងដៃមហា​សាល​របស់សម្តេចធិបតី ហ៊ុន ម៉ាណែត នាយករដ្ឋមន្រ្តីចំពោះខេត្ត​បាត់ដំបង។ទំនប់មានសក្តានុពលក្នុងការផ្គត់​ផ្គង់ទឹកស្រោចស្រព​លើផ្ទៃដី​ដាំដុះកសិកម្ម​នៅរដូវវស្សាប្រមាណ ៣៣ ០០០ហិកតានិង​រដូវប្រាំងប្រមាណ ៤ ៥០០ហិកតា ក្នុងឃុំចំនួន១៥ នៃស្រុកចំនួនបី គឺស្រុកមោងឬស្សី និងស្រុករុក្ខគិរី ខេត្តបាត់ដំបង និងស្រុកបាកាន ខេត្តពោធិ៍សាត់។ គម្រោងអភិវឌ្ឍន៍ទំនប់ដូនទ្រី ស្ថិតក្នុងស្រុករុក្ខគិរី ខេត្តបាត់ដំបង។គម្រោងនេះ​ទទួលហិរញ្ញប្បទានសម្បទាន​ពី​សាធារណរដ្ឋកូរ៉េ។គម្រោងអភិវឌ្ឍន៍ទំនប់ដូនទ្រីបានប្រើរយៈពេលសាងសង់៩០ខែ ដោយចាប់ផ្ដើមក្នុងខែមិថុនា ឆ្នាំ២០១៨ ។ ការងារសំខាន់ៗរបស់​គម្រោងរួមមាន៖សំណង់ទំនប់មេប្រវែង ៦៥៤ម៉ែត្រ ,សំណង់បង្ហៀរ​ប្រវែង ៤១៤ ម៉ែត្រ , រូងទូនេលពង្វាងទឹករាងជាក្រចកជើងសេះ​ប្រវែង៤៦២ ម៉ែត្រ ,សំណង់គ្រប់គ្រងទឹកជាប្រភេទសំណង់​ប៉ម​មានទ្វារទឹកច្រើនថ្នាក់ ដែលមានទ្វារទឹកចំនួន៥ និងស្ពានសម្រាប់​ឆ្លងទៅប៉មប្រវែង ៥៥ម៉ែត្រ ផ្លូវក្រាលថ្មភ្នំប្រវែង ១៧,៣គីឡូម៉ែត្រ និងសំណង់ដោះទឹកចំនួន ៨កន្លែង និងស្ពានបណ្តោះអាសន្នចំនួន ៣កន្លែង។…