ខេត្តព្រៃវែងរកឃើញអ្នកឆ្លងជំងឺកូវីដ-១៩ថ្មីចំនួន១៤នាក់ និងស្លាប់ម្នាក់ក្នុងរយៈពេល២៤ម៉ោងចុងក្រោយ។ នេះជាតួលេខឆ្លងថយចុះ៨នាក់បើប្រៀបធៀបនឹងម្សិលមិញដែលមានការឆ្លងថ្មីចំនួន២២នាក់។

ខេត្តស្វាយរៀង បានរកឃើញអ្នកឆ្លងកូវីដ១៩ថ្មីចំនួន៨៩នាក់ក្នុងរយៈពេល២៤ម៉ោងកន្លងមកនេះនិងមានករណី ស្លាប់ម្នាក់។

កម្ពុជានឹងត្រៀមទទួលវ៉ាក់សាំងពីប្រទេសចិនចំនួន២លានដូសនៅមុនដំណាច់ខែមិថុនានេះ ក្នុងនោះគឺមួយ លានដូសនឹងដឹកមកដល់កម្ពុជានៅថ្ងៃស្អែកទី២៦មិថុនានិងមួយលានដូសទៀត នឹងដឹកមកដល់ថ្ងៃទី២៨មិថុនា។ លោកស្រីយក់សម្បត្តិបានថ្លែងប្រាប់អ្នកសារព័ត៌មានថ្ងៃនេះ ជុំវិញការនឹងមកដល់បន្ថែមទៀតនូវវ៉ាក់សាំងចិន ទាំង២លានដូសនោះនៅមុនដំណាច់ខែមិថុនាជិតបញ្ចប់នេះ។

ធនាគារពិភពលោកបានប្រកាសផ្ដល់ឥណទាន ២០០លានដុល្លារអាមេរិក ដើម្បីជួយកម្ពុជា​បង្កាការឆ្លងជំងឺ កូវិដ-១៩ និងការកសាងសេដ្ឋកិច្ចកម្ពុជានៅពេលអនាគត។ ការប្រកាសផ្តល់ឥណទាននេះ បានបញ្ជាក់តាម សេចក្តីប្រកាសរបស់ខ្លួនថ្ងៃទី២៤មិថុនា។

គណៈកម្មាធិការជាតិគ្រប់គ្រងគ្រោះមហន្តរាយ ចេញសេចក្តីណែនាំ ស្តីពីការត្រៀមរៀបចំ ដើម្បីឆ្លើយតបគ្រោះមហន្តរាយទឹកជំនន់ ឆ្នាំ២០២១ ជូនដល់គណៈកម្មាធិការគ្រប់គ្រង គ្រោះមហន្តរាយរាជធានីខេត្ត។

រដ្ឋបាលខេត្តកំពតកំពុងរៀបចំ និងដាក់ឱ្យដំណើរការរដ្ឋបាលក្រុងបូកគោ ខេត្តកំពត។ ការបង្ហាញពីវឌ្ឍនភាពសម្រាប់បង្កើតរដ្ឋបាលក្រុងបូកគោនៃខេត្តកំពត បានធ្វើឡើង នៅថ្ងៃសុក្រ០១រោច ខែបឋមាសាឍ ឆ្នាំឆ្លូវ ត្រីស័ក ព.ស ២៥៦៥ ត្រូវថ្ងៃទី២៥ ខែមិថុនា ឆ្នាំ២០២១ នៅសាលាខេត្តកំពតរវាងអាជ្ញាធរខេត្ត និងប្រតិភូក្រសួងមហាផ្ទៃ។ឯកឧត្តម សក់ សេដ្ឋា រដ្ឋលេខាធិការប្រចាំការ ក្រសួងមហាផ្ទៃ បានបញ្ជាក់ថា កិច្ចប្រជុំពេលនេះ វត្ថុបំណងសំខាន់ គឺការពិនិត្យ វឌ្ឍនភាព និងការជំរុញរៀបចំដាក់ឲ្យដំណើរការរដ្ឋបាលក្រុងបូកគោនេះឲ្យបានលឿនឆាប់រហ័ស ដោយផ្អែកតាមអនុលោមច្បាប់ស្ដីពីការគ្រប់គ្រងរដ្ឋបាលរាជធានីខេត្តក្រុងស្រុកនិងតាមការជូនដំណឹងរបស់គណៈកម្មាធិការជាតិរៀបចំការបោះឆ្នោត(គជប) ដែលនឹងធ្វើការបោះឆ្នោតជ្រើសរើសក្រុមប្រឹក្សាក្រុងនៅថ្ងៃទី២៥ខែកក្កដា២០២១នេះ។ ហើយបន្ទាប់មកការប្រកាសចូលកាន់មុខតំណែង តួនាទីក្រុមប្រឹក្សានិងគណៈអភិបាលក្រុង ក៏នឹងជំរុញឲ្យបានលឿនយ៉ាងយូរនៅថ្ងៃទី០១ខែសីហា២០២១ ខាងមុខនេះ។ក្នុងឱកាសនោះដែរ ឯកឧត្តមរដ្ឋលេខាធិការ ក៏បានបញ្ជាក់ដែរថាការអភិវឌ្ឍនៅក្នុងតំបន់ ទីក្រុងបូកគោគឺអភិវឌ្ឍន៍ទៅតាមអ្វីដែលប្លង់គោលរបស់ក្រសួងរៀបចំដែនដីនិងនគររូបនីយកម្ម បានអនុម័ត។ ក៏ប៉ុន្តែតំបន់ការពារធម្មជាតិសូមអោយអាជ្ញាធរគ្រប់លំដាប់ថ្នាក់ ចូលរួមសហការគ្នាឲ្យបានល្អដើម្បីថែរក្សាឲ្យបានគង់វង្សជៀសវាងកាប់ឆ្កាអនាធិបតេយ្យខុសច្បាប់កំណត់។ បន្ទាប់មកប្រតិភូក្រុមការងារក៏បានអញ្ជើញចុះពិនិត្យជាក់ស្ដែងទីតាំងសម្រាប់សាងសង់អគាររដ្ឋបាលក្រុងបូកគោនៅជិតផ្លូវឡើងឧទ្យានជាតិព្រះមុនីវង្សបូកគោនិងទីតាំងអាគាររដ្ឋបាលបណ្ដោះអាសន្ននៅជិតនោះផងដែរ៕ Sila Sarin

​ថ្ងៃទី​២៥ ខែ​មិថុនា ឆ្នាំ​២០២១ ស្ថានឯកអគ្គរាជទូត​កម្ពុជា​ប្រចាំ​សាធារណរដ្ឋសហភាព​មីយ៉ាន់ម៉ា បាន​សម្រប​សម្រួល​ជូន​ប្រជាពលរដ្ឋខ្មែរមួយក្រុមទៀត ដែលបានបញ្ចប់បេសកកម្មការងារ និងជាប់គាំងនៅក្នុងប្រទេសមីយ៉ាន់ម៉ា  ត្រឡប់ទៅប្រទេសកម្ពុជាវិញ តាមជើងហោះហើរសង្គ្រោះ ដែល​រៀបចំដោយ​រដ្ឋាភិបាលមីយ៉ាន់ម៉ា ដើម្បី​ធ្វើ​មាតុភូមិនិវត្តន៍​ប្រជាពលរដ្ឋ​មីយ៉ាន់ម៉ា​ពីប្រទេស​កម្ពុជា។  នេះ​គឺ​ជាការ​រៀបចំ​​ជើងហោះហើរ​សង្គ្រោះ​លើក​ទី​៦ពីប្រទេសមីយ៉ាន់ម៉ា ហើយដែលនឹង​ដឹកជញ្ជូន​​​​ពលរដ្ឋ​មីយ៉ាន់ម៉ា​ប្រមាណជាង ១៤០ នាក់ ពី​ប្រទេស​កម្ពុជា ត្រឡប់​ទៅកាន់​ប្រទេស​មីយ៉ាន់ម៉ាវិញផងដែរ។ គិត​ត្រឹម​ថ្ងៃទី​២៥ ខែ​មិថុនា ឆ្នាំ​២០២១ នេះ ស្ថានឯកអគ្គរាជទូត​កម្ពុជា បាន​សហការជាមួយ​ ក្រសួងការបរទេស​មីយ៉ាន់ម៉ា និងស្ថានឯកអគ្គរដ្ឋទូត​មីយ៉ាន់ម៉ា​​នៅ​រាជធានីភ្នំពេញ ក្នុង​ការ​រៀបចំ​ជើង​ហោះហើរ​សង្គ្រោះ​ ចំនួន ៦ លើក និង​បានស​ម្របសម្រួល​​ក្នុង​ការ​រៀបចំ​ជើងហោះហើរ​​ឯកជន (Charter Flight) ចំនួន ២ លើក ជូនបងប្អូនពលរដ្ឋខ្មែរនៅប្រទេសមីយ៉ាន់ម៉ា ​សរុប​ចំនួន ១៨៣ នាក់ ក្នុង​នោះ​រួមមាន​ព្រះសង្ឃ ៥០ អង្គ និង​ដូនជី ៣ នាក់៕

ការឆ្លងថ្មីនៅថ្ងៃនេះបានកើតឡើងលើប្រទេសចំនួន៨គឺប្រទេសឥណ្ឌូនេស៊ី, ហ្វីលីពីន, ម៉ាឡេស៊ី, មីយ៉ាន់ម៉ា,សឹង្ហបុរី, ថៃ, កម្ពុជា, និងប្រទេសវៀតណាម។ ប្រទេសដែលមានការស្លាប់ថ្មីមាន៧ប្រទេស គឺប្រទេសឥណ្ឌូណេស៊ី, ហ្វីលីពីន, មីយ៉ាន់ម៉ា, ថៃ, ម៉ាឡេស៊ី, វៀតណាម, និងប្រទេសកម្ពុជា។ប្រទេសឥណ្ឌូនេស៊ីនៅក្នុងរយ:ពេល២៤ម៉ោងចុងក្រោយនេះមានការឆ្លងថ្មីចំនួន១ម៉ឺន៨ពាន់៨៧២ករណីដែលនាំឲ្យការឆ្លងសារុបមានចំនួន២លាន៧ម៉ឺន២ពាន់៨៦៧ករណី។ ចំណែកការស្លាប់ថ្មីវិញមានចំនួន៤២២នាក់ដែលនាំឲ្យការស្លាប់សារុបមានចំនួន៥ម៉ឺន៦ពាន់៣៧១ករណី។ ប្រទេសឥណ្ឌូនេស៊ីគឺ ជាប្រទេសដែលមានការឆ្លងនិងការស្លាប់ច្រើនជាងគេក្នុងចំណោមប្រទេសអាស៊ានទាំង១០។នៅក្នុងប្រទេសហ្វីលីពីនមានការឆ្លងថ្មីចំនួន៦ពាន់៨១២ករណីដែលនាំឲ្យការឆ្លងសារុបមានចំនួន១លាន៣៨ម៉ឺន៥ពាន់៥៣ករណី។ ចំណែកការស្លាប់ថ្មីនៅថ្ងៃនេះមានចំនួន១១៦នាក់ដែលនាំឲ្យការស្លាប់សារុបមានចំនួន២ម៉ឺន៤ពាន់១៥២នាក់។ចំណែកប្រទេសម៉ាឡេស៊ីនៅក្នុងរយ:ពេល២៤ម៉ោងចុងក្រោយនេះមានការឆ្លងថ្មី ចំនួន៥ពាន់៨១២ករណីដែលនាំឲ្យការឆ្លងសារុបចំនួន៧២ម៉ឺន២ពាន់៦៥៩ករណី។ ចំណែកការស្លាប់ថ្មីវិញ មានចំនួន៨២នាក់ដែលនាំឲ្យការស្លាប់សារុបមានចំនួន៤ពាន់៨០៣នាក់។ប្រទេសថៃមានការឆ្លងថ្មីចំនួន៣ពាន់៦៤៤ករណីដែលនាំឲ្យការឆ្លងសារុបមានចំនួន២៣ម៉ឺន៦ពាន់២៩១ករណី។ ចំណែកការស្លាប់ថ្មីមានចំនួន៤៤ករណីដែលនាំឲ្យការស្លាប់សារុបមានចំនួន១ពាន់៨១៩ករណី។ប្រទេសមីយ៉ាន់ម៉ានមានការឆ្លងថ្មីចំនួន៧៨៧ករណីដែលនាំឲ្យការឆ្លងសារុបមានចំនួន១៥ម៉ឺន៧១៤ករណី។ ចំណែកការស្លាប់ថ្មីមានចំនួន៦នាក់ដែលនាំឲ្យការស្លាប់សារុបមានចំនួន៣ពាន់២៧៥នាក់។ប្រទេសសឹង្ហបុរីមានការឆ្លងថ្មីចំនួន២០ករណីដែលនាំឲ្យការឆ្លងសារុបមានចំនួន៦ម៉ឺន២ពាន់៥១៣ករណី។ប្រទេសកម្ពុជាមានការឆ្លងថ្មីចំនួន៦៩៩ករណីដែលនាំឲ្យការឆ្លងសារុបមានចំនួន៤ម៉ឺន៦ពាន់៦៥ករណី។ ចំណែកការស្លាប់ថ្មី១៦ដែលនាំឲ្យការស្លាប់សារុបមានចំនួន៥០៩នាក់។ប្រទេសវៀតណាមមានការឆ្លងថ្មី៩១ករណីដែលនាំឲ្យការឆ្លងសារុបចំនួន១ម៉ឺន៤ពាន់៣២៣ករណី។ចំណែកការស្លាប់ថ្មីមាន២នាក់ដែលនាំឲ្យការស្លាប់សារុបមានចំនួន៧២នាក់។ប្រទេសដែលមិនរងការឆ្លងថ្មីនោះគឺប្រទេសឡាវ និងប្រទេសប្រុយណេ។គិតសារុបរួមនៃប្រទេសទាំង១០អាស៊ាននាពេលនេះ មានការឆ្លងសារុបមាន៤លាន៦៩ម៉ឺន២ពាន់៨២១ករណី, និងការស្លាប់មាន៩ម៉ឺន១ពាន់៤២នាក់។បើគិតសារុបនៅលើសាកលលោកនោះវិញការឆ្លងវីរុសកូវីដ១៩សារុបមានចំនួនជាង ១៨០លានករណី, និងការស្លាប់មានជាង៣លាន៩១ម៉ឺននាក់។

អ្នកដែលធ្លាប់បានទៅឬមានទំនាក់ទំនងជាមួយម្ចាស់តូប ឬលេងជាមួយកូនម្ចាស់តូបតូបលេខ MS27 នៃ ផ្សារទំនើប ផេនសុលមាត់ទន្លេ ត្រូវប្រញាប់ធ្វើចត្តាឡីស័ក និងតាមដានសុខភាព។ តូបលេខ MS27 នៃ ផ្សារទំនើប ផេនសុលមាត់ទន្លេ ដែលមានទីតាំងស្ថិតនៅផ្លូវព្រះស៊ីសុវត្ថិ ,សង្កាត់ចតុមុខ ,ខណ្ឌដូនពេញរាជធានីភ្នំពេញ។ អនុគណៈកម្មការស្រាវជ្រាវជំងឺកូវីដ-១៩ នៅថ្ងៃទី២៥មិថុនាឆ្នាំ២០២១នេះ បានជូនដំណឹងថា អ្នកជំងឺកូវីដ១៩ គឺជាអ្នកលក់នៅតូបលេខ MS27 នៃ ផ្សារទំនើប ផេនសុលមាត់ទន្លេ នោះ កាលពីថ្ងៃទី ១៣ ដល់ថ្ងៃទី ២០ ខែមិថុនា ។ អនុគណៈកម្មការស្រាវជ្រាវជំងឺកូវីដ-១៩ បានអំពាវនាវដល់ប្រជាពលរដ្ឋ ដែលធ្លាប់បានទៅទីកន្លែង និងពេល វេលានោះ ត្រូវដាក់ខ្លួន ដាច់ដោយឡែក និងយកចិត្តទុកដាក់ តាមដានសុខភាពរបស់ខ្លួនរយៈពេល ១៤ ថ្ងៃ។