ខេត្តសៀមរាប៖ អ្នកធ្វើដំណើរចេញពីតំបន់ដែលមានការផ្ទុះឆ្លងរីករាលដាលដ៏ធ្ងន់ធ្ងរនៃជំងឺកូវីដ-១៩ ហើយចូលមកខេត្តសៀមរាប ត្រូវមានលិខិតបញ្ជាក់ពីអាជ្ញាធរ ឬមន្រ្តីសុខាភិបាលដែលសាមីខ្លួនកំពុងរស់នៅ យកសំណាកតេស្ត និងត្រូវធ្វើចត្តាឡីស័ក១៤ថ្ងៃជាដាច់ខាត នេះបើតាមប្រសាសន៍ លោកនាក់ ណេរ៉ុនអភិបាលរងខេត្តសៀមរាប ក្នុងឱកាស ដឹកនាំរៀបចំកែសម្រួលប្រព័ន្ឋគ្រប់គ្រងទិន្នន័យអ្នកធ្វើដំណើរឆ្លងកាត់ចូលមកខេត្តនេះឱ្យកាន់តែមានភាពសុក្រិតនិងរហ័សជាងមុន នៅព្រំប្រទល់ស្រុកជីក្រែងនិងស្រុកស្ទោង កាលពីថ្ងៃទី៥ ខែឧសភាឆ្នាំ២០២១នេះ លោកនាក់ ណេរ៉ុន អភិបាលរងខេត្តតំណាងឯកឧត្តម ទៀ សីហា អភិបាលនៃគណៈអភិបាលខេត្តសៀមរាប និង លោក ស៊ុន ចំណាន នាយកទីចាត់ការរដ្ឋបាលខេត្ត រួមជាមួយ លោកអភិបាលស្រុកលោកស្រីអភិបាលរងស្រុកជីក្រែង ក្រុមយុវជនមកពីសាលាហ្គូ ក្លូប៊ល ព្រមទាំងក្រុមការងារប្រចាំការនៅប៉ុស្តិត្រួតពិនិត្យសុខភាពបឋមស្ថិតនៅព្រំប្រទល់ស្រុកជីក្រែងខេត្តសៀមរាប និងស្រុកស្ទោងខេត្តកំពង់ធំនោះ ឱ្យកាន់តែច្បាស់លាស រហ័សនិងមានភាពសុក្រិត សុវត្ថិភាព និងបញ្ចៀសពីភាពកកស្ទះនិងរង់ចាំយូររបស់បងប្អូនអ្នកដំណើរឆ្លងកាត់ចូលក្នុងខេត្កនៃកំឡុងជួបវិបត្តិជំងឺឆ្លងកូវីដ-១៩។ ថ្មិៗនេះ មានការសំណូមពររបស់អ្នកធ្វើដំណើរឆ្លងចូលទៅភូមិសាស្ត្រខេត្តសៀមរាបថានមានភាពយឹតយ៉ាវចំពោះការស្រង់ទិន្នន័យសម្រាប់ពួកគាត់។ លោក នាក់ ណេរ៉ុន ទទួលស្គាល់ថា ពិតជាមានភាពយឹតយ៉ាវខ្លះពាក់ព័ន្ឋទៅនឹងបច្ចេកទេសនៃប្រព័ន្ឋស្រង់ទិន្នន័យ ក៍ដូចជាប្រព័ន្ឋផ្លូវដើរចូលមិនទាន់មានរបៀបរៀបរយ ហេតុនេះហើយបានជាអាជ្ញាធរខេត្តដឹកនាំសហការជាមួយរដ្ឋបាលស្រុកនិងកម្លាំងសមត្ថកិច្ចប្រចាំការនៅគោលដៅនេះរៀបចំកែសម្រួលប្រព័ន្ឋកត់ត្រាគ្រប់គ្រងទិន្នន័យ និងកន្លងផ្លូវដើរចូល ព្រមទាំងកំណត់គម្លាតសុវត្ថិភាពចៀសវាងការចូលប្រជ្រៀតគ្នាក្នុងពេលផ្តល់ព័តមាននិងកត់ត្រាទិន្នន័យរបស់អ្នកដំណើរ។ លោក នាក់ ណេរ៉ុន អភិបាលរងខេត្ត បានបង្ហាញឱ្យដឹងទៀតថា តាមរយៈសំរង់ទិន្នន័យអ្នកដំណើរឆ្លងកាត់ពីច្រកព្រំប្រទល់នេះហើយដែលបានផ្តល់លទ្ឋភាពឱ្យអាជ្ញាធរខេត្តគ្រប់គ្រងបានការឆ្លងជំងឺកូវីដ-១៩ឱ្យមកនៅត្រឹមកម្រិតនាំចូលពីក្រៅមានន័យថា ទាំងអ្នកមានផ្ទូកមេរោគកូវីដ-១៩ ទាំងអ្នកជិតស្និទ្ឋនិងអ្នកប៉ះពាល់ដោយប្រយោល ត្រូវបានរកឃើញទាន់ពេលវេលា ទោះបីជាមានចូលទៅក្នុងសហគមន៍ខ្លះក្តី តែក៍ស្ថិតនៅក្នុងការគ្រប់គ្រងបានដែរ។ តាមការពិនិត្យជាក់ស្តែង លោក នាក់ ណេរ៉ុន កត់សម្គាល់ឃើញថា បងប្អូនអ្នកដំណើរមកដល់ដើម្បីពិនិតសុខភាពបឋម និងផ្តល់ព័ត៌មានអំពីទិន្នន័យផ្ទាល់ខ្លួននិងអ្នករួមដំណើរ នៅតែមានភាពប្រញ៉ាប់ប្រញ៉ាល់ និងមិនគិតពីគម្លាតសុវត្ថិ នៅឡើយ ទោះបីជាមានសេចក្តីប្រកាសក៍ដូចជាវិធានការនានារបស់រាជរដ្ឋាភិបាល ក្រសួងសុខាភិបាល និងអាជ្ញាធរខេត្តជារឿយៗក្តី។ លោក បានបញ្ជាក់ថា តាំងពីបង្កើតប៉ុស្តិត្រួតពិនិត្យសុខភាពបឋម កត់ព័ត៌មាននិង ស្រង់ទិន្នន័យនៃអ្នកធ្វើដំណើរចូលខេត្តសៀមរាបនៅព្រំប្រទល់ខេត្តកំពង់ធំនិងខេត្តបន្ទាយមានជ័យ កន្លងមក ក្រុមការងារនេះ បានជួបប្រទះបញ្ហាប្រឈមជាច្រើនដូចជារងការរិះគន់ពីមហាជនថា ការងារមានភាពយឹតយ៉ាវ និងសំណូមពរនានាទៀតផង ប៉ុន្តែដោយឆន្ទៈនិងស្មារតីមោះមុត របស់ថ្នាក់ដឹកនាំខេត្ត រដ្ឋបាលស្រុក កម្លាំងសមត្ថកិច្ច ជាដើមសុទ្ឋតែបានប្រឹងប្រែងយកអស់ពីកម្លាំងកាយចិត្តមិនថាយប់ព្រលប់ ហាលថ្ងៃ ហាលភ្លៀងក្តីនោះទេ គឺបានបំពេញការងារ២៤ម៉ោងលើ២៤ម៉ោង ដើម្បីឱ្យសកម្មភាពការងារដំណើរការទៅបានរលូនល្អប្រសើរថែមទៀត៕ ដោយ ស៊ាន សុផាត