(ភ្នំពេញ)៖ កាមេរ៉ាសុវត្តភាពជាច្រើនគ្រឿង ត្រូវបានគេតម្លើងជាបន្តបន្ទាប់ដើម្បីថតចាប់យករូបភាព និងស្វែងយល់ឱ្យកាន់តែច្បាស់ពីភាពសម្បូរបែប និងវត្តមាននៃប្រភេទថនិកសត្វសំខាន់ៗនៅតំបន់មួយនេះ ។ គម្រោងរេដបូកនៅដែនជម្រកសត្វព្រៃលំផាត់ មានផ្ទៃដីសរុបចំនួន ២៥ម៉ឺនហិកតាក្នុងខេត្តរតនគិរី និងមណ្ឌលគិរី។ អង្គការជីវិតធម្មជាតិនៅកម្ពុជា (NatureLife Cambodia)ដែលបានសហការជាមួយដែនជម្រកសត្វព្រៃលំផាត់នៃក្រសួងបរិស្ថានបានឱ្យដឹងថាកាលពីអំឡុងខែមេសា ឆ្នាំ ២០២៥ ក្រុមការងារជំនាញ បានតម្លើងកាមេរ៉ាចំនួន ១១គ្រឿង ដោយយោងទៅលើពិធីសារអង្កេតតាមដាន។ គួរបញ្ជាក់ថាតាម ទិន្នន័យដែលទទួលបានក្នុងត្រីមាសទីមួយនៃឆ្នាំ២០២៥ បានកត់ត្រាសត្វព្រៃចំនួន ១៥ ប្រភេទ ក្នុងនោះរួមមាន: ថនិកសត្វ៖ សត្វខ្ទីង ស្វាកន្ទុយស ស្វាត្រោស ស្វាក្ដាម ឈ្លូស ជ្រូកព្រៃ សំពោចកលឿង សំពោចវល្លិ៍ឬសំពោចតូច ប្រម៉ា ទន្សាយគល់ និងកំប្រុកពោះប្រផេះ។ ចំពោះសត្វសត្វស្លាបមានដូចជា ត្រដក់តូច មាន់ព្រៃ ទទា និងសត្វល្វាចេក។ អង្គការមួយនេះបានលើកឡើងដែរថាដើម្បីបង្កើនវិសាលភាពនៃការអង្កេតតាមដាន កាមេរ៉ាស្វ័យប្រវត្តនឹងត្រូវតម្លើងទីតាំងចំនួន ៣៤ បន្ថែមទៀត ចាប់ពីពេលនេះរហូតដល់ដំណាច់ឆ្នាំ។សម្រាប់កិច្ចខិតខំប្រឹងប្រែងនេះបានរួមចំណែកដល់ការអភិរក្សជីវៈចម្រុះនៅក្នុងតំបន់នៃគម្រោងរេដបូកលំផាត់៕ ដោយ ៖ ម៉ាដេប៉ូ

ភ្នំពេញ៖ក្នុងរាត្រីថ្ងៃទី១២ ខែមិថុនា ឆ្នាំ២០២៥ សម្ដេចបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជាបានសរសេរលើបណ្ដាញ​ទំនាក់​ទំនង​សង្គមហ្វេសប៊ុកថា ថ្មីៗនេះមានការចែកចាយ​ព័ត៌មានតាមបណ្ដាញ​សង្គមជាច្រើននៅប្រទេសថៃ ពាក់ព័ន្ធទៅនឹងការគំរាមពីសំណាក់​ក្រុមជ្រុលនិយមមួយចំនួននៅប្រទេសថៃឲ្យកាត់ផ្តាច់ការផ្គត់ផ្គង់អគ្គិសនី​និង​អ៊ីនធឺណិត​មកកម្ពុជា។ ដើម្បីកុំឱ្យ​វែងឆ្ងាយ ឬបង្កការលំបាក​សម្រាប់ភាគីថៃក្នុងការសម្រេចកាត់ឬមិនកាត់ ឬកាត់ពេលណានោះ កម្ពុជាបានសម្រេច​ចិត្តធានាការផ្គត់ផ្គង់អគ្គិសនីនិងអ៊ីនធឺណិត​ដោយខ្លួនឯង។ ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍ ទើបរាយការណ៍មកខ្ញុំថា ចាប់ពីម៉ោង ១២ យប់នេះ​ក្រុមហ៊ុនបណ្ដាញ​ខ្សែកាបអុបទិក ឬប្រតិបត្តិករអ៊ីនធឺណិតទាំងអស់នៅកម្ពុជា និងបញ្ចប់​ការទិញអ៊ីនធឺណិត (Internet Bandwidth) ពីប្រទេសថៃ ដោយសារ​យើងមានលទ្ធភាពផ្គត់ផ្គង់សេវាអ៊ីនធឺណិតគ្រប់គ្រាន់ដោយ​ខ្លួនឯង។ ដោយឡែកឯកឧត្តម កែវ រតនៈ រដ្ឋមន្ត្រីក្រសួងរ៉ែនិងថាមពល ក៏បាន​បញ្ជាក់រួចហើយអំពីសមត្ថភាពរបស់កម្ពុជា​ក្នុងការផ្គត់ផ្គង់អគ្គិសនីនៅកម្ពុជា​ដោយខ្លួនឯង។បន្ថែមលើក្រសួងពីរខាងលើ ខ្ញុំបានបញ្ជាឱ្យក្រសួងស្ថាប័នរបស់កម្ពុជា ពិនិត្យនិងត្រៀមលក្ខណៈជាយថាហេតុ ដើម្បីដាក់ចេញនូវវិធានការ​ផ្សេងៗ​បន្ថែមទៀត ប្រសិនបើអ្នកមានការគំរាមកំហែងកាត់ផ្ដាច់​អ្វីផ្សេងទៀត​មក​កម្ពុជាផងដែរ៕ដោយ៖វណ្ណលុក

ភ្នំពេញ៖បញ្ហាសន្តិសុខ សុវត្ថិភាព ត្រូវតែធានាក្នុងកម្មវិធីសម្ពោធ​បើក​ជាផ្លូវការនូវផ្លូវថ្មើរជើងចតុមុខ (Walk Street) ក្រោមអធិបតីភាព​ដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនិង​លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ។នេះជាការបញ្ជាក់​របស់ឯកឧត្ដម ឃួង ស្រេង អភិបាលរាជធានីភ្នំពេញក្នុងកិច្ចប្រជុំ​ត្រួត​ពិនិត្យ​វឌ្ឍនភាពនៃការត្រៀមរៀបចំសម្ពោធដាក់ឱ្យ​ប្រើប្រាស់ជា​ផ្លូវការ​ផ្លូវថ្មើរជើងចតុមុខកាលពីព្រឹកថ្ងៃទី១២ ខែមិថុនា នៅសាលារាជធានី​ភ្នំពេញ។ ថ្លែងក្នុងកិច្ចប្រជុំដ៏មានអត្ថន័យនេះ ឯកឧត្ដម ឃួង ស្រេង មាន​ប្រសាសន៍ថា ផ្លូវថ្មើរជើងចតុមុខ បន្ទាប់ពីបាន​បើក​ឱ្យដំណើរការជា​បណ្តោះអាសន្នប៉ុន្មានខែមកនេះ បានទទួលការគាំទ្រនិងពេញ​និយម​ខ្លាំង​ពីប្រជាពលរដ្ឋ និងភ្ញៀវ​ជាតិ-អន្តរជាតិ។ដោយឈរលើផ្លែផ្កាដែល​កើតចេញពីម្លប់សន្តិភាព​នេះ រដ្ឋបាលរាជធានីភ្នំពេញបានស្នើសុំ​ទៅ​សម្តេច​បវរធិបតី ហ៊ុន ម៉ាណែត នាយករដ្ឋមន្រ្តីអញ្ជើញសម្ពោធ​បើក​ជាផ្លូវការ ហើយត្រូវបានសម្តេចបវរធិបតី ឯកភាពនិង​អញ្ជើញចូល​រួមសម្ពោធជាផ្លូវការនៅថ្ងៃទី២១ ខែមិថុនាខាងមុខ។ ឯកឧត្ដម ឃួង ស្រេង បានផ្តល់សារៈសំខាន់លើបញ្ហាសន្តិសុខ សុវត្ថិភាព ត្រូវតែធានាឱ្យបាន​សម្រាប់ទាំងថ្នាក់ដឹកនាំ​កំពូលៗ​និងអ្នកចូលរួមទាំងអស់ ជាមួយការបង្កើតឱ្យមានទីបញ្ជាការ​ស្រាលជាច្រើនកន្លែង។ បន្ថែមពីលើការងារ​សន្តិសុខនេះ ការជួស​ជុលផ្លូវ ការអ៊ុតគំនូសចរាចរ ការតុបតែងនិងបំពាក់ភ្លើងបំភ្លឺ ត្រូវតែធ្វើឱ្យបានរួចរាល់​នៅមុន​នៃការប្រារព្វពិធីនេះ។ យោងតាមកម្មវិធីដែលបានគ្រោងសម្រាប់ថ្ងៃសម្ពោធ ដើម្បីញ៉ាំងឱ្យ​ព្រឹត្តិការណ៍នេះកាន់តែសប្បាយរីករាយ​សម្រាប់​ប្រជាពលរដ្ឋ ភ្ញៀវ​ទេសចរជាតិ អន្តរជាតិ​ រដ្ឋបាលរាជធានីភ្នំពេញបានរៀបចំ​ឱ្យមាន​ការប្រគំតន្ត្រីខ្នាតធំ ដោយ​ក្រុមហ៊ុន​កាឡាក់ស៊ី«GALAXY »,ការ​សម្តែង​សិល្បៈប្រពៃណី របាំចម្រុះរបស់មន្ទីរវប្បធម៌រាជធានីភ្នំពេញ ,ស្តង់​លក់ដូរ​នានា។​លើសពីនេះក៏មាន​ការរៀបចំស្តង់ម្ហូបអាហាររបស់​ស្ថានទូត​ឥណ្ឌានិងស្ថានទូតនៃប្រទេសម៉ាឡេស៊ី​ប្រចាំកម្ពុជា​ផងដែរ។…

រតនគិរី៖ ឯកឧត្តមនាយឧត្តមសេនីយ៍កិត្តិសង្គហបណ្ឌិត គន់ គីម ទេសរដ្ឋមន្ត្រី អនុប្រធានទី១ និងជាអគ្គលេខាធិការ​សមាគម​អតីត​យុទ្ធជនកម្ពុជានិងលោកងិន ណែល អភិបាលខេត្តរតនគិរី​ស្តីទីកាលពីព្រឹកថ្ងៃទី១១ ខែមិថុនា ឆ្នាំ២០២៥ បានអញ្ជើញចូល​រួម​បញ្ចុះបឋមសិលាសាងសង់ ទីស្នាក់ការសមាគមអតីត​យុទ្ធជន​កម្ពុជា(ស.អ.ក)។អគារស្នាក់ការនេះ​ជាអំណោយដ៏ថ្លៃថ្លារបស់​សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជា​ណាចក្រកម្ពុជាតាមរយៈ អ្នកឧកញ៉ា ម៉ម វណ្ណឌី ។ សំណង់ដែលត្រូវសាងសង់មានទំហំ ២០,៨ ម៉ែត្រ គុណនឹង ១១ម៉ែត្រ មានទីតាំងនៅ ភូមិ៧មករា សង្កាត់ឡាបានសៀក ក្រុងបានលុង ខេត្តរតនគិរី (អតីតព្រលានយន្តហោះចាស់)។ ក្នុងឱកាសនេះនាយឧត្តមសេនីយ៍ គន់ គីម បានថ្លែងកោត​សរសើរ និងវាយតម្លៃខ្ពស់ ចំពោះការចូលរួមចំណែក​ពីគ្រប់​ភាគីពាក់ព័ន្ធ ក្នុងការជួយសម្រួលដល់ជីវភាពរស់នៅរបស់​បងប្អូនអតីតយុទ្ធជន ដែលធ្លាប់បានបូជាសាច់ស្រស់ ឈាម​ស្រស់ និងលះបង់អាយុជីវិត ដើម្បីបុព្វហេតុជាតិ មាតុភូមិ នាំមកនូវសុខសន្តិភាព ជូនប្រទេសជាតិ និងប្រជាជន​កម្ពុជា​កាលពីអតីតកាល។ ក្នុងនោះសមាគមអតីតយុទ្ធជនខេត្តរតនគិរី ក៏បានបំពេញតួនាទីភារកិច្ច របស់ខ្លួនយ៉ាង​ល្អប្រសើរ ហើយ​ទីស្នាក់ការសមាគមអតីតយុទ្ធជនកម្ពុជាខេត្ត ដែលនឹងត្រូវ​ធ្វើការសាងសង់នាពេលនេះ នឹងក្លាយជាទីតាំងដ៏​មាន​សារៈសំខាន់បំផុត សម្រាប់ការបំពេញការងារប្រចាំថ្ងៃរបស់​សមាគម។ នៅក្នុងឱកាសនេះ នាយឧត្តមសេនីយ៍កិត្តិសង្គហបណ្ឌិត…

បាត់ដំបង៖ឯកឧត្តម អ៊ិន ចន្ថា រដ្ឋលេខាធិការក្រសួងអភិវឌ្ឍន៍​ជនបទនិងជាសមាជិកគណៈកម្មាធិការលទ្ធកម្ម និង​តំណាង​ក្រសួងសេដ្ឋកិច្ចនិងហិរញវត្ថុ ក្រុមការងារអន្តរក្រសួង មន្ត្រីពាក់​ព័ន្ធ​កាលពីថ្ងៃទី១០ ខែមិថុនា ឆ្នាំ២០២៥ បាន​អញ្ជើញ​ត្រួត​ពិនិត្យ​វាយតម្លៃលើការងារថែទាំប្រចាំនូវផ្លូវកៅស៊ូ,ផ្លូវល្បាយក្រួស និងផ្លូវល្បាយថ្មចំនួន ៥ខ្សែ និងប្រវែង​សរុបជាង ៧៨ គីឡូម៉ែត្រ​ក្នុង​ភូមិសាស្ត្រ ស្រុក ក្រុង មួយចំនួននៃខេត្តបាត់ដំបង។ ផ្លូវទាំង៥ខ្សែនេះអនុវត្តដោយមន្ទីរអភិវឌ្ឍន៍ជនបទខេត្តបាត់ដំបងក្នុងនោះមាន៖ ផ្លូវក្រាលកៅស៊ូនៅឃុំស្ដៅ ស្រុករតន​មណ្ឌល​ប្រវែង ២៩.២០០ម៉ែត្រ,ផ្លូវនៅសង្កាត់វត្តគរ ក្រុងបាត់ដំបង និងឃុំឈើទាល ស្រុកបាណន់ ប្រវែង ៦.៤០០​ម៉ែត្រ។ដោយ​ឡែកផ្លូវល្បាយក្រួសនិងផ្លូវល្បាយកម្ទេចថ្មចំនួន៣ខ្សែ ប្រវែង ៤៣ ១០០ម៉ែត្រ ស្ថិតនៅ​ឃុំកំរៀង​ស្រុកកំរៀង ឃុំស្ដៅ ស្រុករតនមណ្ឌល និងឃុំសំពៅលូន ស្រុកសំពៅលូន ។ ក្នុងឱកាសត្រួតពិនិត្យ ឯកឧត្តម អ៊ុន ចន្ថា រដ្ឋលេខាធិការជា​តំណាង​ឯកឧត្តមរដ្ឋមន្ត្រីក្រសួងអភិវឌ្ឍន៍ជនបទ បាន​វាយ​តម្លៃ​ខ្ពស់និងកោតសរសើរដល់មន្ទីរអភិវឌ្ឍន៍ជនបទខេត្តបាត់ដំបង ដែលបានបំពេញកាតព្វកិច្ចក្នុងការងារអនុវត្ត​គម្រោង​ខាងលើ​ដោយ​ការទទួលខុសត្រូវខ្ពស់ និងធ្វើឱ្យសម្រេចបាននូវលទ្ធផល​ល្អប្រសើរទទួលយកបាន។ ឯកឧត្តម​រដ្ឋលេខា​ធិការ ក៏បានណែ​នាំមន្ត្រីអនុវត្តគម្រោងផ្ទាល់ និងថ្នាក់ដឹកនាំមន្ទីរបន្តយកចិត្ត​ទុក​ដាក់បន្ថែមក្នុងការចុះត្រួតពិនិត្យមើលផ្លូវ និងថែទាំឱ្យបានជាប់​ជាប្រចាំ ពិសេសផ្លូវនៅតាមជនបទក្នុងរដូវវស្សា ធ្វើយ៉ាងណា​ជួយ​សម្រួល​ដល់ការធ្វើដំណើរ​របស់ប្រជាពលរដ្ឋ​រួមជាមួយ​ការអប់រំផ្សព្វផ្សាយឱ្យចូលរួមថែរក្សាផ្លូវផងដែរ៕អត្ថបទ-រូបភាព៖ អ៊ុក សំអាន ប.ប

បាត់ដំបង៖សហគ្រិនខ្មែរសហការជាមួយសាកលវិទ្យាល័យជាតិ​បាត់​ដំបងបានរៀបចំសម្ពោធកម្មវិធីសហគ្រិន​មហា​វិទ្យាល័យ សាកល​​វិទ្យាល័យជាតិបាត់ដំបងរដូវកាលទី ៣ (NUBB UniPreneur’s Business Model Competition Season ៣)ដោយមានការចូលរួមពីសហគ្រិននិស្សិត​ប្រមាណ​១០០នាក់ និងម្ចាស់អាជីវកម្មចំនួន១០ដែលមកពី​​ក្រុងបាត់ដំបង ។ កម្មវិធីដែលបានប្រារព្ធក្នុងសប្ដាហ៍នេះក៏មានការចូលរួមពីតំណាងសហគ្រិនខ្មែរ លោក ពក បញ្ញាពេជ្រ អ្នកឯកទេស​ជាន់ខ្ពស់​អភិវឌ្ឍ​សហគ្រិនភាព និងនវានុវត្តន៍ លោក ទេព នាវា សាកល​វិទ្យា​ធិការរងនៃសាកលវិទ្យាល័យជាតិបាត់ដំបង ព្រមទាំងគណៈ​គ្រប់គ្រង សាស្ត្រាចារ្យ និស្សិត និងភ្ញៀវកិត្តិយសជាច្រើននាក់។ លោក ទេព នាវា សាកលវិទ្យាធិការរង នៃសាកលវិទ្យាល័យជាតិ​បាត់ដំបងបានបញ្ជាក់ថា កម្មវិធីនេះ គឺជាផ្នែកមួយរបស់​កម្មវិធី​សហគ្រិនមហាវិទ្យាល័យ(UniPreneur)ដែលបង្កើតឡើងក្នុងគោលបំណង​លើក​កម្ពស់នវានុវត្តភាព និងសហគ្រិន​ភាពទៅ​កាន់និស្សិត ដោយប្រែក្លាយគំនិតច្នៃ​ប្រឌិតរបស់និស្សិតឱ្យក្លាយ​ទៅ​ជា​ផលិតផល ឬ សេវាកម្ម ដែលអាចដោះ​ស្រាយបញ្ហា​ប្រឈម​ប្រចាំថ្ងៃរបស់ប្រជាជន វិស័យសាធារណៈ និង វិស័យ​ឯកជន។ លោកបានបន្ថែមថា ” សាកលវិទ្យា​ល័យជាតិបាត់ដំបង មិនត្រឹមតែផ្តោតទៅលើការបង្រៀន និងការស្រាវជ្រាវប៉ុណ្ណោះទេ សាកលវិទ្យាល័យ ក៏មានបេសកកម្ម​តម្រង់​ទិសអភិវឌ្ឍន៍ សមត្ថភាពស្រាវជ្រាវ ដោយផ្សារភ្ជាប់ជាមួយឧស្សាហកម្ម ដើម្បីចូលរួមចំណែកក្នុងការ​អភិវឌ្ឍ​សេដ្ឋកិច្ចនៅក្នងភូមិភាគ​ពាយ័ព្យនៃប្រទេសកម្ពុជា។ អញ្ជើញចូលរួមក្នុងកម្មវិធីនេះដែរឯកឧត្តមបណ្ឌិត ឈៀង វណ្ណមុនិណ្ឌ ប្រតិភូរាជរដ្ឋាភិបាលទទួលបន្ទុកនាយកប្រតិបត្ដិ…

ព្រះវិហារ៖ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួង​មុខងារសាធារណៈ និង​ជា​ប្រធាន​សហភាព​សហព័ន្ធ​​យុវជនកម្ពុជា​(ស.ស.យ.ក.)បានអំពាវនាវដល់ប្រជាពលរដ្ឋឱ្យលើកទឹកចិត្តដល់កងទ័ព និង​ជឿជា​ក់មកលើ​រាជរដ្ឋាភិបាល ក្នុងការដោះស្រាយវិវាទ​ព្រំដែនកម្ពុជា-ថៃ ។ ការអំពាវនាវនេះធ្វើឡើងក្នុងពិធីជួបសំណេះសំណាលសួរសុខទុក្ខ និងប្រគល់អំណោយរបស់ស.ស.យ.ក.​ជូនដល់​កងទ័ពនៅទីបញ្ជាការ​ដ្ឋានអង្គរក្សស្ថិតក្នុងភូមិធម្មជាតិ ឃុំស្រអែម ស្រុកជាំក្សាន្ត ខេត្ត​ព្រះវិហារកាលពីព្រឹកថ្ងៃទី១១ ខែមិថុនា ឆ្នាំ២០២៥។ ឯកឧត្តម ហ៊ុន ម៉ានី បន្តថា ក្នុង​នាម​ប្រជា​ពលរដ្ឋ​ខ្មែរ​ស្រលាញ់​ទឹក​ដីរបស់​ប្រទេសយើង គឺត្រូវតាមដានស្ថានការណ៍​ព្រំដែនកម្ពុជា-ថៃ គ្រប់កាលៈទេសៈ និង​គាំទ្រ​លើ​ចំណាត់​ការណ៍​ទាំង​បី​របស់​រាជ​រដ្ឋាភិបាល​ក្នុង​ការ​ដោះ​ស្រាយ​បញ្ហា​ព្រំដែន​ជា​មួយ​ភាគី​ថៃ ដែលក្នុងនោះរួមមាន ការទូត ច្បាប់ និងយោធា។ ជា​ការ​កត់​សម្គាល់ ស.ស.យ.ក.បានចលនារៃអង្គាសថវិកា និង​សម្ភារៈ​ជូន​ដល់​វីរ​កង​ទ័ព​​ដែល​កំពុង​ឈរ​ជើង​ការពារ​ជាតិ​នៅខ្សែ​បន្ទាត់​ព្រំដែន។គំនិតផ្តួច​ផ្តើមនេះ បាន​អនុញ្ញាតឱ្យប្រជាពលរដ្ឋទូទៅ​ស្ម័គ្រចិត្តបរិច្ចាគធនធានផ្ទាល់ខ្លួនចូលរួមជួយឧបត្ថម្ភដល់​សមរភូមិ​មុខ។ សូមជម្រាបថា អំណោយជា ស្បៀង សម្ភារៈ និងថវិកា ដែល​ស.យ.យ.ក.ទទួលបានពីសមាជិក សមាជិកា ស.ស.យ. ក. វិស័យឯកជន សាធារណជន និងអង្គភាពពាក់ព័ន្ធនានា ជូនកងទ័ព និងគ្រួសារកងទ័ពមានថវិកាចំនួន ១៨ម៉ឺន​ដុល្លារអាមេរិក និងគ្រឿងឧបភោគបរិភោគ សម្ភារៈប្រើប្រាស់ជាច្រើនទៀត៕ដោយ៖សួន លីណា

កំពង់ឆ្នាំង៖នៅវិទ្យាស្ថានបច្ចេកទេសសកម្មភាពកំចាត់មីនកម្ពុជា ខេត្តកំពង់ឆ្នាំង​កាលពីព្រឹក​ថ្ងៃទី១១ ខែមិថុនា ឆ្នាំ២០២៥ ស៊ីម៉ាក់​បានប្រគល់សុនខដែលជំនាញខាងហិតគ្រឿងញៀន​ចំនួន ១០ក្បាល ជូនអគ្គស្នងការ​នគរបាល​ជាតិ ក្រោមវត្តមានឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកនៃមជ្ឈមណ្ឌលសកម្មភាព​កំចាត់មីនកម្ពុជា(ស៊ីម៉ាក់,CMAC),ឧត្តមសេនីយ៍ឯក លន់ សុផាត អគ្គស្នងការរងនគរបាលជាតិតំណាងឯកឧត្តមនាយឧត្តម​​សេនីយ៍ ស ថេត  អគ្គស្នងការនគរបាលជាតិ។ ឯកឧត្តម ហេង រតនា មានប្រសាសន៍ក្នុងពិធីប្រគល់ថា នេះជា​លើកទីមួយហើយដែលវិទ្យាស្ថានបច្ចេក​ទេស​សកម្មភាពកំចាត់​មីនកម្ពុជា បានប្រគល់សុនខ ឯកទេសហិតគ្រឿងញៀនជូន​អគ្គ​ស្នងការនគរបាលជាតិ។ ថ្វីត្បិត​មិនច្រើន តែគឺជាការចាប់ផ្តើម។ ជាមួយនឹងការប្រគល់ទទួលនូវសុនខ ឯកឧត្តមក៏បានផ្ដាំផ្ញើដល់​សិក្ខាកាមដែលបានចូលមក​ហ្វឹកហាត់​ជំនាញបញ្ជា​សុនខ ហិតគ្រឿង​ញៀន សូមយកចិត្តទុកដាក់ថែរក្សា សុនខ ដែលខ្លួនមាន​តួនាទីគ្រប់​គ្រងនិង​ត្រូវបង្វឹក​បន្ថែមទៀត ដើម្បីក្រើនរំលឹកមេរៀនដល់សត្វសុនខ ឱ្យកាន់តែស្ទាត់ជំនាញ ពីព្រោះបើមិនបង្ហាត់វាទៀងទាត់ទេ វាងាយនឹង​ភ្លេច​ទៅវិញដែរ ។ ឯកឧត្តម ហេង រតនា ក៏បានរំលឹកពីអតីតកាលស៊ីម៉ាក់បានទិញ​សត្វសុនខពីបរទេស គឺជួបការលំបាកច្រើ​ននិងមាន​តម្លៃខ្ពស់។ ប៉ុន្តែបច្ចុប្បន្នស៊ីម៉ាក់មានសុនខ ដែលបានបង្កាត់ដោយខ្លួនឯង ព្រមទាំងមានជំនាញហិតមីន ហិតគ្រឿង​ញៀន ដើម្បីចូលរូមក្នុង​ការបង្ក្រាបបទល្មើសនានា។ យោងតាមរបាយការណ៍របស់ឧត្តមសេនីយ៍ទោ ឈិន ប៊ុនរ៉ាន នាយកវិទ្យាស្ថានបច្ចេកទេសសកម្មភាពកំចាត់មីន ស៊ីម៉ាក់ ខេត្តកំពង់ឆ្នាំង បានឱ្យដឹងថា វគ្គហ្វឹកហ្វឺនមូលដ្ឋានគ្រឹះនិង​អ្នកឯកទេស​បញ្ជាសុនខ​ប្រតិបត្តិការ​ហិតគ្រឿង​ញៀន…

បន្ទាយមានជ័យ៖សម្ភារៈ បរិក្ខារ គ្រឿងចក្រចំនួនបីគ្រឿង សម្រាប់​ដំណើរការនៅទីលានទុកដាក់សំរាម ក្នុងក្រុងសិរី​សោភ័ណ ខេត្តបន្ទាយមានជ័យ ត្រូវបានគណៈប្រតិភូក្រសួង​សាធារណការ និងដឹកជញ្ជូនយកមកប្រគល់ជូន​អាជ្ញាធរ​ខេត្តបន្ទាយមានជ័យ កាលពីព្រឹកថ្ងៃទី១០ ខែមិថុនា នៅទី​លានទុកដាក់សំរាម ក្នុងសង្កាត់កំពង់ស្វាយ ក្រុងសិរីសោភ័ណផ្ទាល់តែម្តង។ ពិធីប្រគល់-ទទួល ប្រព្រឹត្តទៅក្រោមវត្តមានលោក ពូ ម៉ានិត អនុប្រធាននាយកដ្ឋានប្រព័ន្ធលូទឹកកខ្វក់ តំណាងឱ្យ​ឯកឧត្តម វង្ស ពិសិដ្ឋ អនុរដ្ឋលេខាធិការក្រសួងសាធារណការ និង​ដឹកជញ្ជូន លោក ឃ្លោក នួយ អភិបាលរងខេត្ត​បន្ទាយ​មានជ័យ និងជាប្រធានក្រុមការងារគ្រប់គ្រងទីលានទុកដាក់សំរាម ក្រុងសិរីសោភ័ណ តំណាងឯកឧត្តម អ៊ុំ រាត្រី អភិបាល​ខេត្តបន្ទាយមានជ័យ ។ ក្នុងឱកាសនេះលោក ឃ្លោក នួយ បានថ្លែងអំណរអរគុណដល់​ក្រសួងសាធារណការ និងដឹកជញ្ជូន តំណាង​ប្រតិភូត​ធនាគារ​អភិវឌ្ឍន៍អាស៊ី(ADB) និងតំណាងក្រុមហ៊ុន AMR CAMBODIA PLC ដែលបានប្រគល់សម្ភារ បរិក្ខារ គ្រឿងចក្រ​ចំនួនបីគ្រឿងសម្រាប់បម្រើដំណើរការទីលានទុកដាក់សំរាម ក្នុងក្រុងសិរីសោភ័ណឱ្យកាន់តែរលូន និងមានប្រសិទ្ធភាព៕ដោយ៖ឃិន គន្ធា

ភ្នំពេញ៖គម្រោងលើកកម្ពស់កម្រិតផ្លូវជាតិលេខ៧ ជា៤គន្លង (ស្គន់-កំពង់ចាម) បច្ចុប្បន្នសម្រេចបាន ៥៦ភាគរយ ។នេះបើ​តាមការបញ្ជាក់របស់ឯកឧត្តម អ៊ុន ចាន់ដា អភិបាលខេត្តកំពង់​ចាម​នៅក្នុងកិច្ចប្រជុំសាមញ្ញលើកទី១៣ អាណត្តិទី៤ របស់ក្រុម​ប្រឹក្សា​ខេត្ត ក្រោមអធិបតីភាព ឯកឧត្តម ខ្លូត ប្រធានក្រុមប្រឹក្សាន​ខេត្ត​កាលពីព្រឹក​ព្រឹកថ្ងៃទី១០ ខែមិថុនា ឆ្នាំ២០២៥ នៅសាល​ប្រជុំ​សាលាខេត្តកំពង់ចាម ។ សូមជម្រាបថា គម្រោងពង្រីក និងលើកកម្រិតផ្លូវជាតិលេខ​៧ជាបួនគន្លង(ស្គន់-កំពង់ចាម)ប្រវែងសរុប ៤៥,៥០ គីឡូម៉ែត្រ(PK000+000 – PK45+502.84)ចាប់ផ្តើមពី​ស្រុកជើងព្រៃ ខេត្តកំពង់ចាម រហូតដល់ក្រុងកំពង់ចាម ខេត្ត​កំពង់ចាម ។ គម្រោងត្រូវធ្វើឡើងជាប្រភេទAC(Asphalt concrete) កម្រាស់៩សង់ទីម៉ែត្រ ទទឹងផ្លូវ ២៤,៥​ម៉ែត្រ​(៤គន្លង) ដោយត្រូវសាងសង់ស្ពានថ្មីតូច-ធំ ចំនួន៨(ស្មើ​ប្រវែងសរុប ១៥៦ម៉ែត្រ) ជួសជុលស្ពានតូច-ធំ(ចាស់)​ចំនួន៧ស្ពាន(ស្មើប្រវែងសរុប ១១៦ម៉ែត្រ) លូរំដោះទឹកភ្លៀង លូរំដោះទឹកកខ្វក់ និងជាបរិក្ខារចរាចរណ៍នានា។ ផ្លូវជាតិលេខ៧ គឺជាខ្សែផ្លូវយ៉ាងសំខាន់ក្នុងការដឹកជញ្ជូនផលិត​ផលកសិកម្ម កសិឧស្សាហកម្ម ព្រមទាំងលើកកម្ពស់​ការ​អភិវឌ្ឍ និងសកម្មភាពសេដ្ឋកិច្ច-សង្គមជាតិ។ផ្លូវនេះតភ្ជាប់ជាមួយ​ផ្លូវជាតិ​លេខ៦ ពីរង្វង់មូលស្គន់ ឆ្ពោះទៅទិសដៅ​រាជធានីភ្នំពេញ និងជាទិសដៅទៅខេត្តកំពង់ធំ សៀមរាប និងតភ្ជាប់ទៅតាម​បណ្ដាញផ្លូវសំខាន់ៗផ្សេងៗទៀត។កំណាត់ផ្លូវជាតិនេះ ក៏តភ្ជាប់ជាមួយផ្លូវជាតិលេខ៨ និងផ្លូវជាតិ​លេខ១១…