កំពង់ធំ៖ឯកឧត្តម ដៀប ពីរី ប្រធានក្រុមប្រឹក្សាខេត្តនិងឯកឧត្តម នួន ផារ័ត្ន អភិបាលខេត្តកំពង់ធំព្រមទាំងសហការី និងពុទ្ធបរិស័ទ បាននាំ​យកទៀនព្រះវស្សា និងទេយ្យទានទៅវេរប្រគេនព្រះសង្ឃដែល​គង់​ចាំព្រះវស្សាដល់វត្តចំនួន១១នៅក្នុងខេត្តកំពង់ធំដោយ​ប្រារព្ធនៅ​វត្តឥន្ទ្រីយ៍សំវរៈ ហៅវត្តកំពង់ធំ កាលពីព្រឹកថ្ងៃទី២៤ ខែកក្កដា ឆ្នាំ២០២៤។ សូមជម្រាបថា ជារៀងរាល់ឆ្នាំរដ្ឋបាលខេត្តកំពងធំ តែងតែប្រគេន​ទៀនព្រះវស្សា និងទេយ្យទានដល់វត្តនានានៅក្នុងខេត្តកំពង់ធំ ។​ វត្តទាំង១១មាន វត្តព្រះមេគណខេត្តទាំងពីរគណៈចំនួនពីរវត្តដោយ​វត្តនីមួយៗទទួលបានទៀនព្រះវស្សាមួយគូ អង្ករមួយតោន មី ២០កេស ទឹកក្រូច ៣០កេស ទឹកសុទ្ធ ៣០កេស ទឹកត្រី ២០យួរ ទឹកស៊ីអ៊ីវ ២០យួរ និងបច្ច័យកសាងមួយចំនួន។ ចំណែកវត្តព្រះអនុគណក្រុង-ស្រុក ទាំង៩ ក្នុងមួយវត្តទទួលបាន ទៀនព្រះវស្សាមួយគូ អង្ករ ៥០០គីឡូក្រាម មី១០កេស ទឹកក្រូច ២០កេស ទឹកសុទ្ធ ២០កេស ទឹកត្រី ១៥យួរ ទឹកស៊ីអ៊ីវ ១៥យួរ និងបច្ច័យកសាងមួយចំនួន៕ដោយ៖ ប៊ុន រដ្ឋា

នៅព្រឹកថ្ងៃទី២៥ ខែកក្កដា ឆ្នាំ២០២៤ ឯកឧត្តមបណ្ឌិត ជុក ជំនោរ អគ្គនាយកអភិវឌ្ឍន៍ទេសចរណ៍ និងសហប្រតិបត្តិការអន្តរជាតិ បានអញ្ជើញថ្លែងសុន្ទរកថាគន្លឹះនាពិធីបើកកិច្ចពិភាក្សាតុមូលស្តីពីភាពជាដៃគូយុទ្ធសាស្ត្រកម្ពុជា-ថៃ៖ ទស្សនវិស័យអំពី «ព្រះរាជាណាចក្រពីរ គោលដៅតែមួយ» ដោយមានការចូលរួមពីតំណាងភាគីពាក់ព័ន្ធក្នុងវិស័យទេសចរណ៍នៃប្រទេសទាំងពីរ។ កិច្ចពិភាក្សានេះ ត្រូវបានសហការរៀបចំដោយស្ថានទូតព្រះរាជាណាចក្រថៃប្រចាំកម្ពុជា និងវិទ្យាស្ថានចក្ខុវិស័យអាស៊ី (AVI) ដើម្បីពិភាក្សាក្នុងន័យផ្សព្វផ្សាយ និងបញ្ជាបការយល់ដឹងអំពីកាលានុវត្តភាពនៃកិច្ចសហប្រតិបត្តិការរវាងកម្ពុជា-ថៃ ក្នុងវិស័យទេសចរណ៍ ពិសេសបន្តផ្សព្វផ្សាយឱ្យកាន់តែទូលំទូលាយនូវចក្ខុវិស័យរួម «ព្រះរាជាណាចក្រពីរ គោលដៅតែមួយ» ៕ចាន់ វិចិត្រ

បន្ទាយមានជ័យ៖ឯកឧត្ដមបណ្ឌិត អ៊ាង សុផល្លែត រដ្ឋមន្ត្រីក្រសួង​បរិស្ថាន​បានបញ្ជាក់ថា បរិស្ថានគឺសំដៅឱ្យប្រជាពលរដ្ឋគ្រប់រូប រស់នៅប្រកបដោយផាសុកភាពល្អ ,មានជីវភាពសមរម្យ ,មាន​សុខុមាលភាពរឹងមាំ ពង្រឹងសង្គម វប្បធម៌បរិស្ថានបានល្អ ។ មានប្រសាសន៍សំណេះសំណាលជាមួយថ្នាក់ដឹកនាំមន្ត្រីរាជការនៃមន្ទីរបរិស្ថានខេត្តបន្ទាយមានជ័យកាលព្រឹកថ្ងៃទី២៥ ខែកក្កដា ឆ្នាំ ២០២៤ ឯកឧត្ដមបណ្ឌិត អ៊ាង សុផល្លែត បន្តថា គោលការណ៍របស់​ក្រសួងបរិស្ថានមានបីចំណុចសំខាន់ គឺសមត្ថភាពបុគ្គល, ការ​បេ្តជ្ញាចិត្តខ្ពស់ និងបំពេញភារកិច្ចបានល្អមានតម្លាភាព ប្រសិទ្ធភាព។ ឯកឧត្ដមបណ្ឌិតរដ្ឋមន្ត្រីបានគូសរំលេចថា ដោយឈរលើមូលដ្ឋាន​គ្រឹះនៃ​យុទ្ធសាស្ត្រចក្រាវិស័យបរិស្ថាន(២០២៣-២០២៨ ) គឺសំដៅជំរុញការអភិវឌ្ឍប្រកបដោយភាពស្អាត ភាពបៃតង ។ក្នុងវិស័យបរិស្ថានរួមគ្នាគិត រួចធ្វើរួមគ្នាដោះស្រាយ ក្នុងការឆ្លើយតប ទៅយុទ្ធសាស្ត្រចតុកោណរបស់រាជរដ្ឋាភិបាលកម្ពុជាសំដៅលើភាពស្អាត ភាពបៃតង និងចីរភាពសម្រាប់រូបយើង កូនចៅយើង គ្រប់ជំនាន់។ ឯកឧត្ដម អ៊ាង សុផល្លែត រដ្ឋមន្ត្រីក្រសួងបរិស្ថានបានកោតសរសើរ​ចំពោះមន្ត្រីរាជការនៃមន្ទីរបរិស្ថានខេត្ត និងមន្ត្រីឧទ្យានុរក្ស ដែល​បានខិតខំបំពេញភារកិច្ចរបស់ខ្លួនទទួលបានលទ្ធផលល្អប្រសើរ ពីមួយថ្ងៃទៅមួយថ្ងៃ ជាពិសេសក្រុមមន្ត្រីឧទ្យាននុរក្ស បានចុះល្បាត ក្នុងតំបន់ការពារធម្មជាតិ ធ្វើឱ្យបទល្មើសមានការថយចុះ។ ក្នុងឱកាសនេះលោក យឹម លី ប្រធានមន្ទីរបរិស្ថានខេត្ត ក៏បានធ្វើ​សេចក្ដី​រាយការណ៍សង្ខេបជុំវិញ ការងាររួមរបស់មន្ទីរបរិស្ថាន​ខេត្តជូន​ឯកឧត្តមរដ្ឋមន្រ្តីផងដែរ៕ដោយ៖ឃិន គន្ធា

កំពង់ស្ពឺ៖ ក្រុមមន្ត្រីជំនាញនាយកដ្ឋាននគរបាលប្រឆាំងបទល្មើស​សេដ្ឋកិច្ច ក្រសួងមហាផ្ទៃ សហការជាមួយស្នងការដ្ឋាននគរបាល ខេត្តកំពង់ស្ពឺ ក្រោមការដឹកនាំ និងសម្របសម្រួលនីតិវិធីផ្ទាល់ពីលោក​ព្រះរាជអាជ្ញារងអមសាលាដំបូងខេត្តកំពង់ស្ពឺ រ៉ែន នរិន្ធ កាលពីថ្ងៃទី២៤ ខែកក្កដា បាន​ចុះបង្ក្រាបទីតាំងមួយកន្លែងយីហោ ហេង សុខជា ស្ថិតនៅភូមិក្រាំងពលទេព សង្កាត់រការធំ ក្រុងច្បារមន ខេត្តកំពង់ស្ពឺ ពាក់ព័ន្ធ​ករណីសង្ស័យប្រេងរំអិលក្លែងក្លាយ ។ករណីនេះ​បានធ្វើដោយ​ផ្អែកតាមពាក្យបណ្តឹងរបស់ក្រុមហ៊ុន P.K.I និងក្រុមហ៊ុន Siam Kubota Corporation ។ ប្រភពពីមន្ត្រីជំនាញនាយកដ្ឋាននគរបាលប្រឆាំងបទល្មើសសេដ្ឋកិច្ច ក្រសួងមហាផ្ទៃ ឱ្យដឹងថា ក្រោយការស៊ើបអង្កេត​ស្រាវជ្រាវ របស់​សមត្ថកិច្ចទើបឈានដល់ការចុះបង្ក្រាបទីតាំងមួយកន្លែងយីហោ ហេង សុខជា ស្ថិតនៅភូមិក្រាំងពលទេព សង្កាត់រការធំ ក្រុងច្បារមន ខេត្តកំពង់ស្ពឺ ពាក់ព័ន្ធករណីសង្ស័យលួចស្កុតប្រេងរំអិលក្លែងក្លាយ ក្រោយពីការឆែកឆេរ និងត្រួតពិនិត្យជាក់ស្តែង សមត្ថកិច្ចនាយក​ដ្ឋាននគរបាលប្រឆាំងបទល្មើសសេដ្ឋកិច្ច បានឆែករកឃើញ និង​ដកហូតវត្ថុតាង រួមមាន ប្រេងរអិលម៉ាកNOVA 2Tក្លែងក្លាយចំនួន ១.២៦២កំប៉ុង ស្មើនឹង ៨៧៦លីត្រ និងប្រេងម៉ាស៊ីនម៉ាក Tra CHANG ក្លែងក្លាយចំនួន ៣.០៨៦ប៊ីដុង ស្មើនឹង…

សៀមរាប៖មន្ទីរទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច ខេត្តសៀមរាប ស្នងការដ្ឋាននគរបាលខេត្ត​និងរដ្ឋបាល​ស្រុក​ស្វាយលើ កាលពីព្រឹកថ្ងៃទី២៥ ខែកក្កដា បានប្រជុំផ្សព្វផ្សាយច្បាប់ស្តីការត្រួត ពិនិត្យគ្រឿងញៀននៅសាលប្រជុំ​សាលាស្រុក​ដោយ​មានការចូលរួម ពីលោក លឹម ភក្តី ប្រធានមន្ទីរទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ចខេត្តសៀមរាប លោក អៀង ពិសិដ្ឋ អភិបាលស្រុកស្វាយ លើ លោក ណាម ណម នាយការិយាល័យប្រឆាំងគ្រឿងញៀន ស្តីទី នៃស្នងការដ្ឋាននគរបាល​ខេត្ត​សៀមរាប កងកម្លាំងប្រដាប់អាវុធ អាជ្ញាធរ មូលដ្ឋាន លោកគ្រូអ្នកគ្រូ សិស្សានុសិស្ស និងប្រជាពលរដ្ឋ យ៉ាងច្រើនកុះករ។ ការប្រជុំផ្សព្វផ្សាយច្បាប់ស្តីការត្រួតពិនិត្យគ្រឿងញៀនធ្វើឡើងក្នុងគោលបំណងបង្ការ ទប់ស្កាត់ ប្រយុទ្ឋប្រឆាំងបទល្មើស​គ្រឿង​ញៀនដើម្បី រួមចំណែកការពារសន្តិសុខសណ្តាប់ធ្នាប់សាធារណៈសុវត្ថិភាពសង្គម និងលើកកម្ពស់សុខុមាលភាពប្រជាពលរដ្ឋ ដើម្បីឱ្យជីវភាពរស់ នៅរបស់ប្រជាពលរដ្ឋក្នុងសហគមន៍បានល្អប្រសើរ៕ ដោយ៖ប៊ុន រដ្ឋា

រតនគិរី៖នៅសាលប្រជុំសាលាខេត្តរតនគិរី កាលពីព្រឹកថ្ងៃទី២៥ ខែ​កក្កដា ឆ្នាំ២០២៤ មានប្រារព្ធសិក្ខាសាលា​ស្តីពីការងារ​រៀបចំ​ផែនការ​ប្រើប្រាស់ដីថ្នាក់ឃុំ សង្កាត់ ក្រោមអធិបតីភាពលោក ខ័ណ្ឌ ចំណាន អភិបាលរងខេត្តតំណាងឯកឧត្តម ញ៉ែម សំអឿន អភិបាលខេត្ត​រតនគិរី។ គោលបំណងនៃអង្គសិក្ខាសាលាដើម្បីពង្រឹងសមត្ថភាពបន្ថែមដល់មន្ត្រីពាក់ព័ន្ធឱ្យបានយល់ដឹងកាន់តែស៊ីជម្រៅអំពីបទដ្ឋានគតិយុត្ត និងបទដ្ឋាន​បច្ចេកទេសពាក់ព័ន្ធនឹងការងាររៀបចំដែនដី និងនគរូប​នីយកម្ម ។លើកម្ពស់ការយល់ដឹងអំពីសារៈ​សំខាន់ព្រម​ទាំងចែក​រំលែកនូវទស្សនទាន និងបទពិសោធន៍នៃការងាររៀបចំដែនដី និងនគរូបនីយកម្ម និងជំរុញការងាររៀបចំ និងការអនុវត្តការងារ​រៀបចំដែនដី និងនគរូបនីយកម្មឱ្យកាន់តែល្អប្រសើរ និងកាន់តែមានប្រសិទ្ធភាព។ លោកអភិបាលរងខេត្តបានថ្លែងអំណរគុណចំពោះថ្នាក់ដឹកនាំគ្រប់ជាន់ថ្នាក់ដឹកនាំក្រសួងរៀបចំដែនដី នគរូបនីយកម្ម និងសំណង់ ដែលបាន​ជ្រើសរើសយកខេត្តរតនគិរី ធ្វើជាទីតាំងរៀបចំសិក្ខាសាលាចែករំលែក​បទពិសោធន៍ ស្តីពីការងាររៀបចំផែនការ​ប្រើប្រាស់​ដីថ្នាក់ឃុំ សង្កាត់ នាពេលនេះ ៕ ដោយ៖ គតិ យុត្ត

រតនគិរី៖ បុរសជាប្តីបានគ្រោះថ្នាក់ដល់ជីវិតខណៈបញ្ជូនមកដល់មន្ទីរ​ពេទ្យបង្អែកខេត្តរតនៈគិរីនិងស្រ្តីជាប្រពន្ធទទួលការសង្រ្គោះពី​ក្រុម​​គ្រូពេទ្យ ។ករណីនេះកើតឡើងបន្ទាប់ពីពួកគេបរិភោគ​សម្ល​ផ្សិតដែល​ដកពីព្រៃលាយជាមួយសាច់សត្វគីង្គក់។គ្រូពេទ្យដាក់ការសង្ស័យថាជាករណីពុលម្ហូប។ របាយការណ៍បឋមរបស់ក្រុមការងារនៃមន្ទីរសុខាភិបាលខេត្តរតនគិរីកាលពីថ្ងៃទី២៤ ខែកក្កដា ឆ្នាំ២០២៤បានរៀបរាប់ថា នៅម៉ោង​ប្រមាណ​២៣:៣០យប់ថ្ងៃទី២៣ ខែកក្កដានៅភូមិរ៉ក ឃុំកុកឡាក់ ស្រុកវ៉ើនសៃ មានករណីសង្ស័យពុលផ្សិតបណ្ដាលឱ្យបុរសជាប្តី​ស្លាប់។ចំណែក​ប្រពន្ធត្រូវបានគ្រូពេទ្យជួយសង្រ្គោះ បន្ទាប់ពីបរិភោគ​ស្ងោរផ្សិតជា​មួយសត្វគីង្គក់នានវេលាម៉ោងប្រហែល៦ល្ងាច។បន្ទាប់មកប្រហែលម៉ោង៨យប់ ក៏មានអាការៈ ឈឺពោះ វិលលមុខ ឈឺក្បាល ក្អួត ចុកពោះ រហូតដល់ម៉ោងប្រហែល២៣:៣០យប់​បានមកសម្រាកព្យាបាលនៅមណ្ឌលសុខភាពវីរៈជ័យ ស្រុកវ៉ើនសៃ ។ ដោយស្ថាន​ភាព​ធ្ងន់ធ្ងរក៏បញ្ជូនមកមន្ទីរពេទ្យបង្អែកខេត្ត។ប្តីក៏​បានបាត់បង់ជីវិតនៅវេលាម៉ោង០៣:៣៤ទៀបភ្លឺឈានចូលថ្ងៃទី២៤ ខែកក្កដា។ ជនរងគ្រោះជាប្តីឈ្មោះ ប្រង កេះ អាយុ៣០ឆ្នាំ ។ក្រោយមរណភាពមន្ទីរសុខាភិបាល ដឹកនាំដោយលោក ជា និត ប្រធានមន្ទីរសុខាភិបាល​ខេត្តរតនគិរីរួមជាមួយមន្រ្តីនៃ​ការិយាល័យ​សុខាភិបាលស្រុកប្រតិបត្តិបរកែវ មណ្ឌលសុខភាពវ៉ើនសៃ បានចុះ​អង្កេតសា្រវជ្រាវករណីនេះដល់ភូមិកើតហេតុ ដើម្បីសាកសួរ​ព័ត៌មានបន្ថែម និងធ្វើការអប់សុខភាពបឋមដល់ប្រជាជននៅទីនោះ។ គួររំលឹកថា កាលពីថ្ងៃទី២១ ខែកក្កដា កន្លងមកប្រជាពលរដ្ឋ នៅភូមិ​ប៉ក់ប៉ូ ឃុំប៉ក់ញ៉ៃ ស្រុកអូរយ៉ាដាវ​ចំនួន១៧នាក់បានពុលផ្សិត​ម្យ៉ាង​បន្ទាប់ពីពួកគេយកមកធ្វើម្ហូប តែមិនបណ្តាលឱ្យមានគ្រោះថ្នាក់​ដល់ជីវិតទេ​បន្ទាប់ពីដឹកមកសង្រ្គោះនៅ​មន្ទីរពេទ្យបង្អែក​ស្រុក​បរកែវ និងមន្ទីរពេទ្យបង្អែកខេត្តទាន់ពេលវេលា។បន្ទាប់មកនៅថ្ងៃទី២៣ ខែកក្កដា ក្រសួងសុខាភិបាលចេញសេចក្តីប្រកាស​ព័ត៌មានស្តីពី​បង្ការបញ្ហាសុខភាពបណ្តាលមកពីបរិភោគផ្សិតពុល ៕ដោយ៖ គតិ យុត្ត

បាត់ដំបងៈគណៈប្រតិភូ នៃ ទីភ្នាក់ងារបារាំងសម្រាប់​ការអភិវឌ្ឍ​​(AFD) និងប្រតិភូសហភាពអឺរ៉ុប(EU)តាមរយៈ ការពិនិត្យជាក់ស្តែងនិងជួប​ប្រាស្រ័យផ្ទាល់ជាមួយប្រជាកសិករ​នៅតា​មសហ​គមន៍​នានា គណៈប្រតិភូជា​ម្ចាស់ហិរញ្ញប្បទាន​បានចាត់ទុកការ​ដ្ឋាននេះថា បាន​ឆ្លើយ​តប និងស្របតាម​ទស្សន​វិស័យ​”បង្កើត​ដោយសហគមន៍ ធ្វើការជាមួយ​សហគមន៍ និងដើម្បីសហ​គមន៍​”។ ដោយចំណាយពេលពីរថ្ងៃចាប់ពីថ្ងៃទី២៤និង២៥ ខែកក្កដា​ឆ្នាំ២០២៤នេះឯកឧត្តមថោ ជេដ្ឋា រដ្ឋមន្ត្រីក្រសួងធនធានទឹក និង​ឧតុនិយម ឯកឧត្តម សុខ លូ អភិបាលខេត្តបាត់ដំបង មន្ត្រីបច្ចេកទេសក្រសួង មន្ត្រីជំនាញ ក្នុងខេត្ត បានអម​គណៈប្រតិភូទី​ភ្នាក់ងារ​បារាំងសម្រាប់ការអភិវឌ្ឍ និង​សហភាពអឺរ៉ុបអញ្ជើញពិនិត្យមើលពីវឌ្ឍនភាពនៃគម្រោងស្តារឡើងវិញនូវប្រព័ន្ធធារា​សាស្ត្រនិងគម្រោងជួសជុល​ខូចខាត​ដោយទឹកជំនន់ ឆ្នាំ២០២០ ក្រោមហិរញ្ញប្បទានពីទីភ្នាក់ងារ​បារាំងសម្រាប់ការអភិវឌ្ឍនិងសហភាពអឺរ៉ុប។ ប្រតិភូរួមមាន ឯកឧត្តម ហ្សាក់កេ ប៉ែលឡេត(Jacques Pellet) ឯកអគ្គរដ្ឋទូតនៃសាធារណរដ្ឋបារាំង,លោក ហ្សង់ព្យែរ ម៉ាសែល​លី​(Jean-Pierre MARCELLI) នាយកទីភ្នាក់​ងារបារាំងសម្រាប់ការអភិវឌ្ឍប្រចាំតំបន់អាស៊ាន,លោកស្រី ដានឌ្រីន ប៊ូសេ (Dandrine BOUCHER)នាយក AFD ប្រចាំកម្ពុជា,លោកស្រី សាននី សារ៉េ(Janny Scharrer )នាយកស្ថានតំណាងKFW​ប្រចាំនៅកម្ពុជា,លោក ប្រ៊ីយ៉ាន ហ្វតណេរី(Bryan FOR)NARI ប្រធានកិច្ចសហប្រតិបត្តិ​ការនៃប្រតិភូសហភាពអឺរ៉ុប​(EU)ប្រចាំនៅកម្ពុជា ឯកឧត្តម​អគ្គនាយកនៃអគ្គនាយកដ្ឋានសហប្រតិបត្តិការអន្តរជាតិនិងគ្រប់គ្រងបំណុលនៃ​ក្រសួងសេដ្ឋកិច្ចនិងហិរញ្ញវត្ថុ ឯកឧត្តម​តំណាងក្រសួងអភិវឌ្ឍន៍ជនបទ ក្រសួងកសិកម្មរុក្ខា​ប្រមាញ់និងនេសាទ ។ នៅថ្ងៃទីមួយ…

ភ្នំពេញ-ឯកឧត្តមបណ្ឌិត ជុក ជំនោរ អគ្គនាយកអភិវឌ្ឍន៍ទេសចរណ៍ និងសហប្រតិបត្តិការអន្តរជាតិ និងជាប្រធានលេខាធិការដ្ឋានគណៈកម្មាធិការជាតិគ្រប់គ្រង និងអភិវឌ្ឍសហគមន៍ទេសចរណ៍ និងអេកូទេសចរណ៍ (គ.ជ.អ.អ.) បានអញ្ជើញចូលរួមកិច្ចប្រជុំក្រោមអធិបតីភាពដ៏ខ្ពង់ខ្ពស់ ឯកឧត្តម សុខ សូកេន រដ្ឋមន្ត្រីក្រសួងទេសចរណ៍ និងជាប្រធាន គ.ជ.អ.អ. ដើម្បីពិភាក្សាអំពីវឌ្ឍនភាពការងារក្នុងក្របខណ្ឌ គ.ជ.អ.អ. និងពិនិត្យលទ្ធភាពក្នុងការរៀបចំ “វេទិកាជាតិអេកូទេសចរណ៍ លើកទី៤”ថ្ងៃទី២៤ ខែកក្កដា ឆ្នាំ២០២៤ ។ នាឱកាសនោះ ឯកឧត្តមអគ្គនាយក និងជាប្រធានលេខាធិការដ្ឋាន បានធ្វើបទបង្ហាញលម្អិតអំពីវឌ្ឍនភាពនៃការអភិវឌ្ឍអេកូទេសចរណ៍ និងសហគមន៍ និងទិសដៅអនុវត្តបន្តក្នុងក្របខណ្ឌគណៈកម្មាធិការជាតិ សម្រាប់អាណត្តិទី៧នេះ សំដៅជំរុញការអនុវត្តការងាររបស់ គ.ជ.អ.អ. ប្រកបដោយប្រសិទ្ធភាព ស្របតាមគោលនយោបាយជាតិអេកូទេសចរណ៍ ២០១៩-២០៣០ និងគំនិតផ្តួចផ្តើមយុទ្ធសាស្ត្រ “បង្កើន៥ អភិវឌ្ឍន៍៣ (BUILD + 3Ds)” ដើម្បីរួមចំណែកក្នុងការលើកកម្ពស់ “វិស័យទេសចរណ៍ជាមាសបៃតង” យ៉ាងពិតប្រាកដ៕ ចាន់ វិចិត្រ

សៀមរាប៖នាខេត្តសៀមរាប ធនាគារជាតិនៃកម្ពុជានៅថ្ងៃ​ទី២៤ ខែកក្កដា ឆ្នាំ២០២៤​ដោយមានវត្តមានចូលរួមពី​ឯកឧត្តម អ៊ូ ចាន់តារា អគ្គបេឡាធនាគារជាតិនៃកម្ពុជា លោក ឈឹម ច័ន្ទកុសល អគ្គបេឡារងបានបើកកិច្ចប្រជុំពិភាក្សា​ជាមួយបណ្តាគ្រឹះស្ថាន​ធនាគារនិងហិរញ្ញវត្ថុ ស្ថាប័ន អង្គភាពពាក់ព័ន្ធ អាជីវករ តំណាងសេវាកម្ម​ទេសចរណ៍​ក្នុងខេត្តប្រមាណ១០០នាក់។ កិច្ចប្រជុំនេះដើម្បីសម្រួលចរាចរណ៍ក្រដាសប្រាក់ដុល្លារអាមេរិកចាស់ និងដាក់ចេញនូវវិធានការជា​យន្តការបន្ទាន់សម្រាប់​អនុវត្ត​​នៅក្នុង​ខេត្តសៀមរាប។ឯកឧត្តម អ៊ូ ចាន់តារា អគ្គបេឡាធនាគារជាតិនៃកម្ពុជា បានប្រាប់កិច្ចប្រជុំថា​ថ្មីៗនេះធនាគារជាតិនៃកម្ពុជា​បានដាក់​ចេញនូវយន្តការចំនួន​បួនចំណុចដើម្បីសម្រួលដល់ការចាយវាយក្រដាសប្រាក់ដុល្លារដែលមានសភាពចាស់ ទក់ ឬរហែក​នៅក្នុង​ខេត្តសៀមរាប។ ធនាគារជាតិបានតម្រូវឱ្យធនាគារពាណិជ្ជនៅទូទាំងខេត្តសៀមរាបមិនត្រូវគិតថ្លៃកម្រៃសេវាបន្ថែមលើក្រដាសប្រាក់ដុល្លារដែលរហែក ទក់ ឬចាស់នោះទេ។ ឯកឧត្តមអគ្គបេឡាបន្ថែមថាការសម្រេចរបស់ធនាគារជាតិនេះ ធ្វើឡើង បន្ទាប់ពីសម្តេចធិបតី ហ៊ុន ម៉ាណែត​នាយករដ្ឋមន្ត្រី​កម្ពុជា សង្កេតឃើញពីការលំបាកក្នុងការលក់ដូររបស់​ប្រជា​ពលរដ្ឋនៅក្នុងខេត្ត ពិសេសបានធ្វើឱ្យប៉ះពាល់ដល់​ភ្ញៀវ​ទេសចរបរទេស។ លោក ឈឹម ច័ន្ទកុសល អគ្គបេឡារងបានលើកឡើងថា ចាប់​ពីពេលនេះទៅ ធនាគារជាតិនៃកម្ពុជា ស្នើឱ្យសាខាគ្រឹះស្ថាន​ធនាគារ​និង​ហិរញ្ញវ​ត្ថុក្នុងខេត្តសៀមរាបទាំងអស់ទទួល​យក​ប្រាក់ដុល្លារអាមេរិកចាស់ ខូចគុណភាព ដោយមិនគិត​កម្រៃសេវាពីអតិថិជន។ ចំពោះក្រដាសប្រាក់ដុល្លារអាមេរិកដែលមានសភាពពុកផុយ កណ្តៀរកាត់ ភ្លើងឆេះ ប្រឡាក់ទឹកថ្នាំ ធនាគារជាតិនៃកម្ពុជា​កំពុង​ពិភាក្សាជាមួយដៃគូក្រៅប្រទេសក្នុងការនាំយក​ក្រដាស​ប្រាក់ដុល្លារអាមេរិកទាំងនេះទៅការធ្វើកោសល្យវិច័យ ដើម្បីបន្ថយថ្លៃបង់​សេវាឱ្យមានកម្រិតទាបជាងមុន។ លោកបានសំណូមពដល់ បងប្អូនអាជីវករ និងអ្នកបម្រើ​សេវាកម្ម​ទេសចរណ៍ទាំងអស់ក្នុងខេត្ត​សៀមរាប​ប្រើប្រាស់ កម្មវិធីបាគង អេប (Bakong App)…