ម៉ាស្កាត ៖ ប្រទេសអូម៉ង់ កាលពីថ្ងៃព្រហស្បតិ៍ បានប្រកាសបដិសេធកិច្ចព្រមព្រៀងជាមួយអ៊ីរ៉ង់លើការប្រមូលថ្លៃសេវារួមគ្នាសម្រាប់ការធ្វើដំណើរឆ្លងកាត់ច្រកសមុទ្រហ័រមូស។ នេះបើតាមកាសែត The New York Post។ សារព័ត៌អាមេរិកមួយនេះបានរាយការណ៍ដោយដកស្រង់សម្តីមន្ត្រីជាន់ខ្ពស់ក្នុងតំបន់មួយរូប ដោយគេបញ្ជាក់ថា ប្រទេសអូម៉ង់បានបដិសេធសំណើរបស់អ៊ីរ៉ង់ ក្នុងការប្រមូលថ្លៃសេវារួមគ្នាពីនាវាដែលធ្វើដំណើរឆ្លងកាត់ច្រកសមុទ្រហ័រមូស។ យោងតាមមន្ត្រីរូបនោះ ដើម្បីជៀសវាងជម្លោះដែលអាចកើតមានជាមួយប្រធានាធិបតីអាមេរិក លោក ដូណាល់ ត្រាំ, ប្រទេសអូម៉ង់បានបដិសេធសូម្បីតែគំនិតនៃការបង់ថ្លៃដោយស្ម័គ្រចិត្ត ដែលគ្រោងនឹងប្រើប្រាស់សម្រាប់ធានាសុវត្ថិភាព និងការការពារបរិស្ថាននៅក្នុងច្រកសមុទ្រហ័រមូស។ បើតាម Tass, ការប្រកាសទាត់ចោលនេះ ធ្វើឡើង បន្ទាប់ពី លោក ត្រាំ បានសម្តែងការមិនពេញចិត្តចំពោះសកម្មភាពរបស់ប្រទេសអូម៉ង់ និងបានគំរាមថា នឹង “ទម្លាក់គ្រាប់បែកវាយប្រហារយ៉ាងធ្ងន់ធ្ងរ” មកលើប្រទេសនេះ ប្រសិនបើអូម៉ង់រារាំងដល់ការដោះស្រាយជម្លោះរវាងអ៊ីរ៉ង់ និងសហរដ្ឋអាមេរិក។ រដ្ឋបាលអាមេរិកយល់ឃើញថា អាជ្ញាធរអូម៉ង់បានយល់ព្រមផ្តល់ការសម្បទានច្រើនពេកនៅក្នុងការចរចាជាមួយអ៊ីរ៉ង់ជុំវិញការគ្រប់គ្រងច្រកសមុទ្រហ័រមូស។ ជាពិសេស ទីក្រុងវ៉ាស៊ីនតោនមិនពេញចិត្តនឹងកិច្ចព្រមព្រៀងស្តីពីការគ្រប់គ្រងរួមគ្នារវាងប្រទេសទាំងពីរលើការចេញ-ចូលច្រកសមុទ្រហ័រមូស ក៏ដូចជា ការប្រមូលថ្លៃសេវាឆ្លងកាត់ពីម្ចាស់នាវាផងដែរ៕ ប្រភព ៖ Tass ប្រែសម្រួល ៖ សារ៉ាត

វ៉ាស៊ីនតោន ៖ អនុប្រធានាធិបតីអាមេរិក លោក JD Vance បានថ្លែងកាលពីថ្ងៃព្រហស្បតិ៍ថា លោកមិនចាត់ទុកជម្លោះជាមួយប្រទេសអ៊ីរ៉ង់ថាជា «សង្គ្រាម» នោះទេ បើទោះបីជាការប៉ះទង្គិចគ្នារវាងភាគីទាំងពីរនៅតែបន្តកើតមាន បន្ទាប់ពីជម្លោះនេះបានអូសបន្លាយអស់រយៈពេល ៦ ខែមកហើយក៏ដោយ។ ការលើកឡើងរបស់លោក Vance បានធ្វើឡើងចំពេលដែលមានសញ្ញាកាន់តែច្បាស់ថា ប្រធានាធិបតី ដូណាល់ ត្រាំ កំពុងព្យាយាមបញ្ចប់ជម្លោះ ដែលជាបន្ទុកដល់រដ្ឋបាលរបស់លោក។ លោក Vance បានថ្លែងក្នុងសន្និសីទសារព័ត៌មាននៅសេតវិមាន នៅពេលត្រូវបានសួរថា តើសង្គ្រាមនេះនឹងត្រូវបញ្ចប់មុនការបោះឆ្នោតពាក់កណ្តាលអាណត្តិ នៅអាមេរិកនាខែវិច្ឆិកាដែរឬទេថា «ខ្ញុំមិនហៅវាថាសង្គ្រាមនោះទេ។ នៅពេលនេះ មិនមានការបាញ់ប្រហារសកម្មឡើយ»។ លោក Vance បានបន្ថែមថា លោកទទួលស្គាល់ថា មានតំបន់មួយចំនួនដែលជម្លោះនេះបានផ្ទុះឡើង ប៉ុន្តែប្រតិបត្តិការប្រយុទ្ធធំៗមានរយៈពេលត្រឹមតែ ៦ សប្តាហ៍ប៉ុណ្ណោះ បន្ទាប់ពីសង្គ្រាមរវាងអាមេរិក-អ៊ីស្រាអែល និងអ៊ីរ៉ង់បានចាប់ផ្តើម នៅថ្ងៃទី ២៨ ខែកុម្ភៈ។ លោកបានបញ្ជាក់ទៀតថា «ប៉ុន្តែនៅពេលអ្នកសួរថា តើរឿងនេះនឹងបញ្ចប់នៅពេលណា អ្នកត្រូវសួរសំណួរមកខ្ញុំ ដូចជា តើនៅពេលណាដែលអ៊ីរ៉ង់នឹងឈប់បាញ់ប្រហារលើនាវា? ខ្ញុំគិតថា ការពិតគឺខ្ញុំមិនដឹងចម្លើយចំពោះសំណួរនោះទេ។ អ្នកត្រូវតែទៅសួរអ៊ីរ៉ង់»។ បន្ទាប់ពីភាពស្ងប់ស្ងាត់អស់រយៈពេលប៉ុន្មានសប្តាហ៍ ការប៉ះទង្គិចគ្នាសារជាថ្មីបានចាប់ផ្តើមជាមួយនឹងការវាយប្រហាររបស់អាមេរិកកាលពីថ្ងៃអាទិត្យ…

សិង្ហបុរី ៖ ក្រសួងសង្គ្រាមអាមេរិកបញ្ជាក់ថា សិង្ហបុរីបានចំណាយប្រមាណ ៤.០៦ ពាន់លានដុល្លារ ដើម្បីបញ្ជាទិញយន្តហោះចម្បាំងបំបាំងកាយ F-35 ចំនួន ២០គ្រឿង និងឧបករណ៍យោធាពាក់ព័ន្ធ ។ នេះជាលើកដំបូងដែលតម្លៃសរុបនៃកិច្ចព្រមព្រៀងយន្តហោះចម្បាំងបំបាំងកាយ F-35 ត្រូវបានបង្ហាញជាផ្លូវការ ។ បើតាម Straits Times, ក្នុងចំណោមយន្តហោះទាំង ២០គ្រឿង ក្នុងនោះយន្តហោះចម្បាំង F-35B ចំនួន ១២គ្រឿង នឹងឈរជើងជាអចិន្ត្រៃយ៍នៅមូលដ្ឋានទ័ពអាកាស Ebbing Air National Base នៃរដ្ឋ Arkansas សហរដ្ឋអាមេរិក ។ រីឯយន្តហោះចម្បាំង F-35A ចំនួន ៨គ្រឿងទៀត នឹងត្រូវដាក់ឱ្យឈរជើងនៅមូលដ្ឋានទ័ពអាកាស Tengah Air Base ប្រទេសសងិ្ហបុរី ។ ប្រភពឱ្យដឹងថា យន្តហោះចម្បាំង F-35 ដំបូងរបស់សិង្ហបុរី ត្រូវបានរំពឹងថា នឹងប្រគល់ទៅឱ្យមូលដ្ឋានអាកាសរបស់សហរដ្ឋអាមេរិកនៅចុងឆ្នាំ ២០២៦ ខណៈការដាក់ពង្រាយយន្តហោះ F-35 ផ្សេងទៀតនៅសិង្ហបុរី នឹងចាប់ផ្តើមនៅឆ្នាំ…

មូស្គូ ៖ អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova នៅថ្ងៃ ព្រហស្បតិ៍ បានចោទប្រកាន់ន័រវេសពេញៗមាត់ថា បានធ្វើសកម្មភាពដូចចោរសមុទ្រ ក្រោយអាជ្ញាធរន័រវេសបានរឹបអូសនាវាមួយគ្រឿងរបស់រុស្ស៊ី ។ បើតាម Anadolu, ការចោទប្រកាន់នេះ កើតឡើងបន្ទាប់ពីអាជ្ញាធរន័រវែសបានរឹបអូសនាវាស្រាវជ្រាវ Professor Molchanov របស់រុស្ស៊ីនៅតំបន់អាក់ទិក ដើម្បីអនុវត្តតាមសេចក្តីសម្រេចផ្តល់សំណងចំនួន ៤.២២ ពាន់លានដុល្លារ ដល់ក្រុមហ៊ុនថាមពលជាតិអ៊ុយក្រែន Naftogaz ។ ការផ្តល់សំណងនេះ ធ្វើឡើងដើម្បីឆ្លើយតបការដែលរុស្ស៉ីបានរឹបអូសទ្រព្យសម្បត្តិរបស់ក្រុមហ៊ុនអ៊ុយក្រែន Naftogaz នៅពេលទីក្រុងមូស្គូកាត់បញ្ចូលតំបន់គ្រីមៀ ចូលជាទឹកដីរបស់ខ្លួនកាលពីឆ្នាំ ២០១៤ ។ យ៉ាងណា លោកស្រី Zakharova អះអាងថា នេះជាផ្នែកមួយនៃការផ្លាស់ប្តូរគោលនយោបាយរបស់ប្រទេសលោកខាងលិច ចំពោះកិច្ចការសមុទ្រ ។ លោកស្រីថា ជាច្រើនទសវត្សរ៍មកហើយ ច្បាប់សមុទ្រ គឺជាគោលការណ៍ណែនាំនៅក្នុងកិច្ចការសមុទ្រ ។ ប៉ុន្តែពេលនេះ អ្វីៗគ្រប់យ៉ាងត្រូវបានច្របូកច្របូល និងបោះបង់ចោល ហើយពួកគេបានឈានទៅរកសកម្មភាពចោរសមុទ្រយ៉ាងពិតប្រាកដ ។ បន្ថែមលើនេះ លោកស្រី Zakharova បានពណ៌នាអំពីការវិវត្តនេះថា ជារឿងគួរឱ្យតក់ស្លុត និងជាការធ្លាក់ចុះសីលធម៌…