អាហ្វហ្កានីស្ថាន៖ ប្រព័ន្ធផ្សព្វផ្សាយក្នុងតំបន់បានរាយការណ៍នៅថ្ងៃពុធនេះថា សមាជិកកងកម្លាំងសន្តិសុខអាហ្វហ្កានីស្ថាន ៤៥នាក់ ត្រូវបានសម្លាប់ បន្ទាប់ពីពួកឧទ្ទាមតាលីបង់បានបើកការវាយប្រហារដ៏កក្រើកមួយនៅឯជំរំយោធាមួយកន្លែងក្នុងខេត្ត ប៊េគលែន ភាគខាងជើងកាលពីយប់ថ្ងៃ អង្គារ៍ ម្សិលមិញ នេះ (ម៉ោងក្នុងតំបន់)។

សហរដ្ឋអាម៉េរិក៖ អ្នកនាំពាក្យក្រសួងការបរទេសអាម៉េរិក លោកស្រី ហីដធើ ណឺត បាននិយាយក្នុងថ្ងៃអង្គារ៍សប្តាហ៍នេះថា ការពិភាក្សាគ្នារវាងទីក្រុងវ៉ាស៊ីនតោន និងព្យុងយ៉ាង ជុំវិញការរំសាយអាវុធនុយក្លេអ៊ែរបាននឹងកំពុងដំណើរការទៅតាមទិសដៅត្រឹមត្រូវហើយ។ អ្នកនាំពាក្យក្រសួងការបរទេសរូបនេះ បានគូសបញ្ជាក់ថា ការពិភាក្សានៅខាងក្រោយឈុតឆាកជាមួយទីក្រុងព្យុងយ៉ាង បានធ្វើឱ្យមានកិច្ចចរចាជាច្រើន បន្ទាប់ពីកិច្ចប្រជុំកំពូលរបស់ប្រធានាធិបតីអាម៉េរិក លោក ដូណាល់ ត្រាំ ជាមួយមេដឹកនាំកូរ៉េខាងជើង លោក គីម ជុងអ៊ុន កាលពីខែមិថុនា និងកិច្ចប្រជុំជាបន្តបន្ទាប់រវាងរដ្ឋមន្ត្រីការបរទេសអាម៉េរិក លោក ម៉ៃ ប៉ុមប៉េអូ និងមន្ត្រីកំពូលៗរបស់ទីក្រុងព្យុងយ៉ាង។ ថ្លែងប្រាប់អ្នកយកព័ត៌មាន លោកស្រី ណឺត បាននិយាយថា យើងកំពុងពិចារណាលើជំនួបផ្សេងទៀត ក៏ដូចជាការចរចា និងការសន្ទនាគ្នា ខណៈយើងកំពុងធ្វើវាទៅតាមទិសដៅដ៏ត្រឹមត្រូវ ហើយថា ការសន្ទនាគ្នាជាមួយរដ្ឋាភិបាលកូរ៉េខាងជើងកំពុងក្លាយជាបញ្ហាធម្មតាទៅហើយ។ យ៉ាងណាមិញ លោកស្រីមិនបានផ្តល់ព័ត៌មានលម្អិតអំពីកិច្ចចរចា ឬក៏ទីតាំងដែលពួកគេត្រូវជួបគ្នា ហើយនរណាខ្លះពាក់ព័ន្ធ ក៏ដូចជាបញ្ហាអ្វីដែលបច្ចុប្បន្នស្ថិតក្រោម ការពិភាក្សាគ្នានោះទេ ប៉ុន្តែលោកស្រីគ្រាន់តែបានអះអាងជាថ្មីថា លោក គីម បានប្រាប់លោក ត្រាំ ថា រូបលោកមានឆន្ទៈក្នុងការលុបបំបាត់អាវុធនុយក្លេអ៊ែរ ដែលនេះ គឺជាគោលដៅចម្បងរបស់សហរដ្ឋអាម៉េរិកសម្រាប់កិច្ចពិភាក្សាគ្នា…

ហ្វីលីពីន៖ ប្រធានាធិបតីហ្វីលីពីន លោក រ៉ូឌ្រីហ្គោ ឌូតឺតេ បានកត់សម្គាល់ថា ចិន គួរតែផ្លាស់ប្ដូរអាក្បកិរិយាបច្ចុប្បន្ន និងបញ្ឈប់ការដាក់កំហិតលើការធ្វើនាវាចរណ៍ នៅក្នុងតំបន់ជម្លោះ ព្រោះថា ការធ្វើបែបនេះ នឹងបង្កទៅជាការប្រឈមមុខដាក់គ្នា ក៏ដូចជាជម្រុញឱ្យបណ្ដាប្រទេសដទៃចុះសិន្ធិសញ្ញាសម្ព័ន្ធភាពជាមួយសហរដ្ឋអាមេរិកតែប៉ុណ្ណោះ ។ លោក ឌូតឺតេ បានលើកឡើងយ៉ាងដូច្នេះ នៅក្នុងសុន្ទរកថាមួយកាលពីថ្ងៃអង្គារ៍ សប្តាហ៍នេះ និងនៅក្នុងបរិបទដែលគេមើញឃើញថា ប្រធានាធិបតីហ្វីលីពីនរូបនេះ មានទំនោរងាកទៅរកចិន តែប្រឆាំងនឹងគោលនយោបាយរបស់សហរដ្ឋអាមេរិក ។ តែយ៉ាងណាមិញ រដ្ឋាភិបាលទីក្រុងប៉េកាំងនៅមិនទាន់មានប្រតិកម្មនឹងការអះអាង នេះនៅឡើយទេ ។បើតាមសម្រង់សម្តីផ្ទាល់របស់លោក រ៉ូឌ្រីហ្គោ ឌូតឺតេ ចិនកំពុងយល់ខុស ដែលថា តំបន់សមុទ្រចិនខាងត្បូងគឺជាកម្មសិទ្ធិរបស់ខ្លួន ហើយថា ចិនមិនអាចបង្កើតកោះ មួយបាននោះទេ ចិននិយាយថា ដែនអាកាសនៅពីលើតំបន់កោះសម្បនិម្មិត គឺជា របស់ចិន ប៉ុន្តែចិនយល់ខុសហើយ ដ្បិតដែនទឹកមួយនេះ គឺជាដែនសមុទ្រអន្តរជាតិ ហើយចិនក៏គ្មានសិទ្ធិហាមមិនឱ្យនរណាម្នាក់ធ្វើដំណើរឆ្លងកាត់នោះដែរ ៕