កូរ៉េខាងត្បូង៖ ប្រធានាធិបតីកូរ៉េខាងត្បូង លោក មូន ជែអ៊ីន បាននិយាយក្នុងថ្ងៃ ពុធនេះថា “ភាពស្មោះត្រង់ពិតប្រាកដ” អាចសម្រេចទៅបាន លុះត្រាតែកូរ៉េខាង ជើង និងកូរ៉េខាងត្បូងបង្កើតសហគមន៍សន្តិភាព និងសេដ្ឋកិច្ចដ៏យូរអង្វែង ដោយ ទាមទារឱ្យមានការដឹកជញ្ជូនថាមពល និងកិច្ចសហប្រតិបត្តិការសេដ្ឋកិច្ចជាដើម ។ការលើកឡើងរបស់ប្រធានាធិបតីកូរ៉េខាងត្បូងរូបនេះ ធ្វើឡើងក្នុងអំឡុងពិធីគម្រប់ខួប៧៣ឆ្នាំនៃការរំដោះឧបទ្វីបកូរ៉េ ចេញពីនឹមអាណានិគមរបស់ជប៉ុនកាលពីឆ្នាំ ១៩១០-១៩៤៥ ដោយលោក មូន បានគូសបញ្ជាក់ថា ទីក្រុងសេអ៊ូលនឹងធ្វើឲ្យការ ជឿទុកចិត្តគ្នាកាន់តែស៊ីជម្រៅថែមទៀតជាមួយទីក្រុងព្យុងយ៉ាង នៅក្នុងកិច្ចប្រជុំជា លើកទីបី ជាមួយលោក គីម ជុងអ៊ុន ដែលនឹងប្រព្រឹត្តទៅនាខែក្រោយ ។ លោក មូន ជែអ៊ីន បានបន្ថែមទៀតថា តាមរយៈកិច្ចប្រជុំកំពូលជាមួយមេដឹកនាំកូរ៉េ ខាងជើង រូបលោកនឹងបោះជំហានយ៉ាងអង់អាច ឆ្ពោះទៅរកការលុបបំបាត់អាវុធនុយក្លេអ៊ែរទាំងស្រុងពីឧបទ្វីបកូរ៉េ ព្រមទាំងការប្រកាសបញ្ចប់សង្រ្គាម និងសន្ធិ សញ្ញាសន្តិភាព ។ ជាមួយគ្នានេះ លោក មូន ថែមទំាងបានសង្កត់ធ្ងន់ថា កិច្ចព្រមព្រៀងនានាអាចនឹងត្រូវអនុវត្តន៍ដោយស្មោះត្រង់បាន លុះត្រាតែភាពមិនជឿទុកចិត្ត គ្នាដែលមានឫសគុលយ៉ាងជ្រៅនោះ ត្រូវបានលុបបំបាត់ចោលរវាងទីក្រុងសេអ៊ូល និងទីក្រុងព្យុងយ៉ាង ក៏ដូចជារវាងទីក្រុងព្យុងយ៉ាង និងទីក្រុងវ៉ាស៊ីនតោន…

ទួរគី៖ ប្រធានាធិបតីតួកគី លោក តាយ៉ីប អឺដូហ្កាន់ បាននិយាយថា ប្រទេសលោក នឹងឈប់ប្រើប្រាស់ផលិតផលអេឡិចត្រូនិករបស់សហរដ្ឋអាម៉េរិក ដើម្បីជាការសង សឹកទៅនឹងការដាក់ទណ្ឌកម្មរបស់ទីក្រុងវ៉ាស៊ីនតោន ដែលកំពុងធ្វើឱ្យទីផ្សារហិរញ្ញ វត្ថុទីក្រុងអង់ការ៉ា ប្រឈមនឹងភាពតានតឹងខ្លំាំង ។ភាពរង្គោះរង្គើនៃទំនាក់ទំនងប្រទេសទំាងពីរ បានកើតឡើងក្រោយសហរដ្ឋអាម៉េរិក សម្រេចដាក់ទណ្ឌកម្មលើតួកគី បន្ទាប់ពីទីក្រុងអង់ការ៉ា បានបដិសេធដោះលែង អាចារ្យគ្រិស្ដអាម៉េរិកម្នាក់ ដែលត្រូវបានចោទប្រកាន់ថា មានជាប់ពាក់ព័ន្ធសកម្ម ភាពភេរវកម្ម និងរដ្ឋប្រហារមិនបានសម្រេចនៅតួកគីកាលពីឆ្នាំ២០១៦ ។ ទន្ទឹមគ្នានោះដែរ ប្រធានាធិបតីតួកគីរូបនេះថែមទំាងបានធ្វើការអំពាវនាវផងដែរ ឱ្យប្រជាជនតួកគីទាំងអស់ លក់ប្រាក់ដុល្លារ និងអឺរ៉ូចេញ ដើម្បីឱ្យរូបិយប័ណ្ឌជាតិឡើងថ្លៃ ខណៈកាលពីថ្ងៃ អង្គារ៍ សប្តាហ៍នេះ ក្រុមមន្ត្រីអាម៉េរិកក៏បានព្រមានដែរថា នឹងដាក់ទណ្ឌកម្មបន្ថែមទៀត បើសិនជាទីក្រុងអង់ការ៉ាមិនដោះលែងអាចារ្យគ្រឹស្ដ អាន់ឌ្រូ ប្រាន់សុន ទេនោះ ៕

វេណេស៊ុយអេឡា៖ អគ្គរដ្ឋអាជ្ញាវេណស៊យអេឡាលោក តារ៉េក វីលៀម សាអាប់ បានឱ្យដឹងថា ឧត្ដមសេនីយ៍វេណេស៊ុយអេឡាម្នាក់ត្រូវបានចាប់ខ្លួនពីបទចោទប្រកាន់ថា មានជាប់ពាក់ព័ន្ធនឹងការប៉ុនប៉ងធ្វើឃាតប្រធានាធិបតីវេណេស៊ុយអេឡា លោក នីកូឡាស់ ម៉ាឌូរ៉ូ។ 

សហរដ្ឋអាម៉េរិក៖ ក្រសួងការពារជាតិអាម៉េរិក ត្រូវបានគេរំពឹងថា នឹងចំណាយប្រាក់យ៉ាងច្រើនសន្ធឹកសន្ធាប់ ក្នុងការអភិវឌ្ឍប្រព័ន្ធមីស៊ីលការពារដែនអាកាស ក្រោមក្របខណ្ឌនៃកញ្ចប់ថវិកាយោធាឆ្នាំ២០១៩ ស្ថិតក្នុងគោលបំណងទប់ស្កាត់ការវាយប្រហារដោយគ្រាប់មីស៊ីលជាយថាហេតុណាមួយពីសំណាក់អ៊ីរ៉ង់ ឬក៏កូរ៉េខាងជើង។ 

អ៊ីតាលី៖ ប្រព័ន្ធផ្សព្វផ្សាយក្នុងតំបន់បានរាយការណ៍ថា តួលេខជនរងគ្រោះបាត់បង់ជីវិតបន្តកើនឡើងដល់៣៥នាក់ហើយ និងជាច្រើនផ្សេងទៀតទទួលរងរបួសធ្ងន់-ស្រាល បន្ទាប់ពីហេតុការណ៍បាក់ស្ពានមួយកន្លែង ស្ថិតនៅភាគខាងជើងទីក្រុង ជេនណោ ប្រទេសអ៊ីតាលី។ 

អ៊ីរ៉ង់៖ ប្រព័ន្ធផ្សព្វផ្សាយរដ្ឋរបស់អ៊ីរ៉ង់បានរាយការណ៍ថា អ៊ីរ៉ង់នឹងលក់ប្រេង និងឧស្ម័នបញ្ចុះតម្លៃដល់អតិថិជនអាស៊ី ស្របពេលដែលប្រទេសក្នុងតំបន់មជ្ឈិមបូព៌ាមួយនេះ កំពុងទទួលរងការដាក់ទណ្ឌកម្មឯកតោភាគីរបស់សហរដ្ឋអាម៉េរិក។ បើតាមទីភ្នាក់ងារព័ត៌មាន Bloomberg ថា ក្រុមហ៊ុន National Iranian Oil Company របស់រដ្ឋកំពុងកាត់បន្ថយតម្លៃផ្លូវការ សម្រាប់ការលក់នៅខែកញ្ញាខាងមុខនេះ ដល់អាស៊ី មកនៅត្រឹមកម្រិតទាបបំផុតក្នុងរយៈពេល១៤ឆ្នាំ បើធៀបនឹងប្រេងឆៅរបស់ប្រទេសអារ៉ាប៊ីសាអ៊ូឌីត។ យ៉ាងណាមិញ សហរដ្ឋអាម៉េរិកនឹងរារាំងការលក់ប្រេងអន្តរជាតិរបស់ប្រទេសអ៊ីរ៉ង់ចាប់ពីថ្ងៃទី៥ ខែវិច្ឆិកាខាងមុខនេះ នៅពេលដំណាក់កាលទី២នៃការដាក់ទណ្ឌកម្មត្រូវបានដាក់ជាថ្មី ដែលជាផ្នែកមួយនៃការដកខ្លួនចេញរបស់រដ្ឋាភិបាលទីក្រុងវ៉ាស៊ីនតោន ពីកិច្ចព្រមព្រៀងនុយក្លេអ៊ែរឆ្នាំ២០១៥។ ប្រភពព័ត៌មាននៅក្នុងក្រសួងប្រេងរបស់ប្រទេសអ៊ីរ៉ង់ មិនបានផ្ដល់ព័ត៌មានលម្អិតនៃការបញ្ចុះតម្លៃនេះទេ ប៉ុន្តែបានព្យាយាមនិយាយសម្រាលវិធានការនេះថា ជាការអនុវត្តរបស់ឧស្សាហកម្មជាទូទៅ ហើយការបញ្ចុះតម្លៃ គឺជាផ្នែកមួយនៃលក្ខណៈទូទៅរបស់ទីផ្សារពិភពលោក ដែលត្រូវបានផ្ដល់ដោយក្រុមហ៊ុននាំចេញប្រេងទាំងអស់។ ជាមួយគ្នានេះ ក្រុមអ្នកវិភាគបានធ្វើការព្យាករណ៍ថា ការលក់របស់អ៊ីរ៉ង់អាចនឹងធ្លាក់ចុះប្រហែល៧០ម៉ឺនបារ៉ែលក្នុងមួយថ្ងៃពីកម្រិតបច្ចុប្បន្នប្រហែល២,៣លានបារ៉ែល។ ដោយឡែកក្រុមហ៊ុនថាមពលបារាំង Total ឲ្យដឹងថា ខ្លួនកំពុងដកគម្រោងវិនិយោគរាប់ពាន់លានដុល្លារអាម៉េរិកនៅអណ្ដូងប្រេង South Pars នៅភាគខាងត្បូងប្រទេសអ៊ីរ៉ង់ ដោយសារការដាក់ទណ្ឌកម្មជាថ្មីនេះ ៕