លោក សាយ ​វណ្ណៈ អភិបាលស្រុកបាទី ខេត្តតាកែវ បានដាក់កំហិតមន្រ្តីរបស់ខ្លួនមិនឲ្យចូលបរិវេណសាលាស្រុកឡើយ ប្រសិនបើជិះម៉ូតូពុំពាក់មួកសុវត្ថិភាព។ វិធានការនេះធ្វើឡើងក្រោយលោកសង្កេតឃើញថា ក្នុងចំណោមអ្នក ជិះម៉ូតូ២៧គ្រឿងមកមកប្រជុំជាមួយលោកកាលពីថ្ងៃទី២៦សីហា ​គឺមានតែ ៣គ្រឿងប៉ុណ្ណោះដែលពាក់មួកសុវត្ថិភាព។ លោកអភិបាលស្រុកបានបញ្ជាក់ចំៗថា អ្នកជិះម៉ូតូមិនពាក់មួកសុវត្ថិភាពមួយចំនួន គឺជាមេភូមិ និងនាយកសាលា​។ បញ្ហានេះ លោក សាយ ​វណ្ណៈ បានលើកឡើងថា យើងជាមន្រ្តីមានតួនាទីដឹកនាំ និងណែនាំពលរដ្ឋ តែមិនអនុវត្តវិធានការសុវត្ថិភាពចរាចរណ៍នេះផង តើយើងយកអ្វីទៅធ្វើជាគំរូ និងអប់រំពលរដ្ឋឲ្យគោរពច្បាប់​។ លោកបានព្រមានថា បើជិះម៉ូតូមកសាលាស្រុកគ្មានមួកសុវត្ថិភាព គឺមិនឲ្យចូលទេ។ លោកអភិបាលស្រុកបាទី បានបញ្ជាក់ប្រាប់បណ្ដាញព័ត៌មាន AMS ថា សម្រាប់ស្រុកបាទីទាំងមូលក៏នឹងធ្វើការផ្សព្វផ្សាយដល់បណ្ដារោងចក្រទាំងអស់ ឲ្យណែនាំកម្មករពេលជិះម៉ូតូមកធ្វើការ ត្រូវតែពាក់មួកសុវត្ថិភាព ។ លោក សាយ ​វណ្ណៈ បានឲ្យដឹងថា នៅស្រុកបាទី មានរោងចក្រសរុបចំនួន ២៦០ ដែលមានកម្មករធ្វើការប្រមាណ ៧ម៉ឺននាក់។ លោករំលឹកថា ការចូលរួមគោរពច្បាប់ចរាណ៍ គឺជារឿងសំខាន់សម្រាប់អាយុជីវិត ដោយសារករណីគ្រោះថ្នាក់ចរាចរណ៍នៅស្រុកបាទី ជាពិសេសនៅផ្លូវជាតិលេខ ២និងលេខ៣ បណ្ដាលឲ្យមានមនុស្សស្លាប់ពី ៣នាក់ទៅ ៥នាក់ក្នុងមួយថ្ងៃ៕ សេង បារាំង AMS

ឯកឧត្តម ចាន់ រតនា អ្នកនាំពាក្យស្តីទីនៃក្រសួងការបរទេស និងកិច្ចសហប្រតិបត្តិការអន្តរជាតិ បានបញ្ជាក់ប្រាប់បណ្តាញព័ត៌មាន AMS ថា ក្នុងហេតុការណ៍គ្រោះទឹកជំនន់ និងការបាក់ដីដ៏គំហុក នៅព្រំដែនចិន-នេប៉ាល់ កាលពីថ្ងៃពុធ ទី២៦ខែសីហា ពុំមានពលរដ្ឋខ្មែរណាម្នាក់រងគ្រោះឡើយ។ ឯកឧត្តម ចាន់ រតនា បានប្រាប់ថា យោងតាម​របាយការណ៍ពីស្ថានទូតកម្ពុជាប្រចាំនៅប្រទេសឥណ្ឌា ជនជាតិណេប៉ាល់ និងជនបរទេសយ៉ាងហោចណាស់ជាង៦០០នាក់ មកពី៣៣ប្រទេស បានបាត់ខ្លួននៅក្នុងហេតុការណ៍គ្រោះធម្មជាតិដ៏សាហាវនេះ ប៉ុន្តែពុំមានពលរដ្ឋខ្មែរណាម្នាក់នៅក្នុងតារាងនៃអ្នកបាត់ខ្លួនឡើយ​។ ទោះបីយ៉ាងណា នេះគឺគ្រាន់តែជាតួលេខបឋមបណ្តោះអាសន្នប៉ុណ្ណោះ។ បើតាមឯកឧត្តម ចាន់ រតនា គ្មានពលរដ្ឋខ្មែរ ឬភ្ញៀវទេសចរខ្មែរ រស់នៅ និងទៅកម្សាន្តនៅប្រទេស​នេប៉ាល់ឡើយ​គិតមកដល់ពេលនេះ​។ តួលេខថ្មីបណ្តោះអាសន្នបង្ហាញថា ទឹកជំនន់ និងការបាក់ដី នៅព្រំដែនចិន-នេប៉ាល់ បានបណ្តាលឱ្យមនុស្សចំនួន១៦៥នាក់បានស្លាប់ និងមនុស្សជាង១ ៥០០នាក់ ​បាត់ខ្លួន ដោយអាជ្ញាធរនេប៉ាល់ និងចិនកំពុងយកចិត្តទុកដាក់ស្វែងរកអ្នកនៅរស់រានមានជីវិត ស្រមពេលដែលមានហានិភ័យនៃទឹកជំនន់លើកទីពីរ។   អ្នកបាត់ខ្លួនជាច្រើន គឺជាអ្នកទេសចរបរទេសមកពីជាង៣០ប្រទេស រួមមានឥណ្ឌា អូស្ត្រាលី អង់គ្លេស ម៉ាឡេស៊ី កូរ៉េខាងត្បូង និងសហរដ្ឋអាមេរិក។ ក្នុងចំណោមអ្នកបាត់ខ្លួនជាជនជាតិបរទេស គឺជនជាតិឥណ្ឌាមានច្រើនជាងគេ គឺ ចំនួន១៧៨នាក់។  ការស្ទង់មតិភូគព្ភសាស្ត្រសហរដ្ឋអាមេរិកបាន​ឱ្យដឹងថា គ្រោះធម្មជាតិនេះ គឺបណ្តាលមកពីការបាក់ផ្ទាំងទឹកកក…

អាជ្ញាធរខេត្តមួយចំនួនបានត្រៀមគ្រាប់ពូជទុកសម្រាប់ចែកជូនប្រជាពលរដ្ឋរបស់ខ្លួនឲ្យបង្កបង្កើនផលឡើង​វិញ ក្រោយពីដំណាំកសិកម្មរបស់ប្រជាកសិករ ជាពិសេសដំណាំស្រូវបានទទួលរងការខូចខាតដោយ​សារទឹកជំនន់។ លោក ម៉ែន គុង អភិបាលរងខេត្តស្ទឹងត្រែង បានប្រាប់បណ្ដាញព័ត៌មាន AMS ថាគណៈកម្មាធិការគ្រប់​គ្រង​គ្រោះមហន្តរាយខេត្តប្រចាំខេត្តស្ទឹងត្រែង បានត្រៀមពូជស្រូវ និងពូជដំណាំ ព្រមទាំងដំណាំរួមផ្សំមួយចំនួនប្រមាណ ៥តោន ដើម្បីចែកជូនប្រជាពលរដ្ឋដែលរងផលប៉ះពាល់ទឹកជំនន់ឲ្យបង្កបង្កើនផលឡើងវិញ។ ចំណែកអាជ្ញាធរខេត្តក្រចេះ និងខេត្តត្បូងឃ្មុំ បានបញ្ជាក់ថា កំពុងរង់​ចាំការវាយតម្លៃផលប៉ះពាល់ជាមុនសិន ទើបត្រៀមគ្រាប់ពូជចែកជូនដល់ប្រជាពលរដ្ឋដែលរងគ្រោះដោយសារទឹកជំនន់។ លោក សេង ជ័យវុធ នាយករដ្ឋបាលខេត្តត្បូងឃ្មុំ បានឲ្យដឹងផងដែរថា គ្រួសាររងផល​ប៉ះពាល់ដោយសារទឹកជំនន់នៅខេត្តត្បូងឃ្មុំមានសរុបចំនួន ១ ៤០០គ្រួសារ ប៉ះពាល់ដំណាំស្រូវ និងដំណាំផ្សេងៗចំនួន ១ ៩២៣ហិកតា ក្នុងនោះខូចខាតចំនួន ១ ១០០ហិកតា។ យោងតាមរបាយការណ៍អំពីស្ថានភាពទឹកជំនន់​ ​ខេត្តចំនួន ៤ របស់កម្ពុជាទទួលរងទឹកជំនន់ គឺខេត្តក្រចេះ ស្ទឹងត្រែង ត្បូងឃ្មុំ និងកំពង់ចាម ដោយប៉ះពាល់ពលរដ្ឋជាង ២ម៉ឺនគ្រួ​សា​រ ក្នុងនោះជម្លៀសទៅទួលសុវត្ថិភាពប្រមាណ ២ ពាន់គ្រួសារ។ ផ្ទះជាង ១ម៉ឺន៤ពាន់ខ្នង និងស្រូវជាង ៥ពាន់ហិកតា បានលិចលង់។ ខេត្តដែលរងផលប៉ះពាល់ខ្លាំងជាងគេ គឺខេត្តក្រចេះ និងត្បូងឃ្មុំ៕ សេង បារាំង AMS

សម្តេចធិបតី ហ៊ុន ម៉ាណែត​​ នាយករដ្ឋមន្ត្រីកម្ពុជា បានលាតត្រដាងពីទង្វើឈ្លានពានរបស់ថៃ មកលើទឹកដីកម្ពុជានាពេលកន្លងមកនៅចំពោះមុខមេដឹកនាំសភាប្រទេសនានា ក្នុងសន្និសីទប្រធានសភានៃអន្តរសភា លើកទី២ នៅកម្ពុជានា ព្រឹកថ្ងៃព្រហស្បតិ៍ ទី២៧ ខែសីហា ឆ្នាំ២០២៦។ សន្និសីទប្រធានសភានៃអន្តរសភាដែលកម្ពុជាធ្វើជាម្ចាស់ផ្ទះនៅពេលនេះ មានការចូលរួមពីថ្នាក់ដឹកនាំសភាមកពីចំនួន៤០ប្រទេស។ សម្តេចធិបតី បានសង្កត់ធ្ងន់​លើ​សន្តិភាព ដែលជាដើមទុនដ៏មានតម្លៃបំផុតរបស់ប្រទេសជាតិ ហើយជាមូលដ្ឋានគ្រិះ មិនអាចខ្វះបានសម្រាប់ស្ថាប័ន និងការរីកចម្រើនប្រកបដោយចីរភាព។ សម្រាប់កម្ពុជា សន្តិភាពដែលរកបានតាមរយៈនយោបាយឈ្នះ-ឈ្នះ ឆ្នាំ១៩៩៨ របស់សម្តេចតេជោ ហ៊ុន សែន បានបញ្ចប់សង្គ្រាមស៊ីវិលជាប្រវត្តិសាស្ត្រ និងបាននាំមកនូវផ្លែផ្កាយ៉ាងច្រើន ដូចជាការស្តារសេដ្ឋកិច្ច-សង្គម ការកាត់បន្ថយភាពក្រីក្រ ការវិនិយោគលើការអប់រំ និងសុខាភិបាល និងការធ្វើសមាហរណកម្មកាន់តែស៊ីជម្រៅទៅក្នុងទីផ្សារតំបន់ និងសកលលោក។ ទោះជាកម្ពុជាទទួលបានសន្តិភាពពេញលេញចំនួន២៦ ឆ្នាំ ប៉ុន្តែនៅឆ្នាំ ២០២៥ សង្គ្រាមព្រំដែនជាមួយថៃបានផ្ទុះឡើងវិញ ដោយប៉ះពាល់យ៉ាងធ្ងន់ធ្ងរដល់អធិបតេយ្យភាពជាតិ និងធ្វើឱ្យប្រជាពលរដ្ឋភៀសសឹកជាង ២ ម៉ឺននាក់មិនទាន់អាចត្រឡប់ទៅលំនៅឋានរបស់ពួកគេវិញបាន។ សម្តេចធិបតីបន្តថា  ទោះជាមានកិច្ចព្រមព្រៀង និងបទឈប់បាញ់នៅចុងឆ្នាំ២០២៥ ក៏ដោយ ក៏ស្ថានភាពនៅលើដីនៅតែមានភាពផុយស្រួយ ដោយសារកងទ័ពនៅតែប្រឈមមុខដាក់គ្នា ហើយគណៈកម្មការព្រំដែន (JBC) មិនអាចចាប់ផ្តើមការងារខណ្ឌសីមា និងការបោះបង្គោលព្រំដែនឡើងវិញនៅឡើយ។ លើសពីនេះ ភាគីថៃនៅតែបន្តកាន់កាប់ដី សាងសង់ហេដ្ឋារចនាសម្ព័ន្ធផ្សេងៗក្នុងទឹកដីកម្ពុជា ព្រមទាំងចេញប័ណ្ណកម្មសិទ្ធិដីធ្លីជូនប្រជាពលរដ្ឋរបស់ខ្លួន​។  សម្តេចធិបតី មានប្រសាសន៍ថា…

សម្ដេចតេជោ ហ៊ុន សែន ប្រធានព្រឹទ្ធសភាកម្ពុជា និងជាប្រធានសន្និសីទប្រធានសភានៃអន្តរសភាលើកទី២ បានស្នើឱ្យបង្កើតក្រុមអ្នកសង្កេតការណ៍សភាសម្រាប់បទឈប់បាញ់ ផ្គុំគ្នាជាមួយយន្តការដែលមានស្រាប់ ដើម្បីធានាថា ការត្រួតពិនិត្យជាអន្តរជាតិ មានភាពរឹងមាំគ្រប់គ្រាន់ក្នុងការទប់ស្កាត់ការប៉ះទង្គិចគ្នាតាមព្រំដែនខ្នាតតូចមិនឱ្យរីករាលដាលទៅជាសង្គ្រាមរ៉ាំរ៉ៃ។ ក្នុងពិធីបើកសន្និសីទប្រធានសភានៃអន្តរសភាលើកទី២ នៅថ្ងៃទី២៧ ខែសីហា នេះ សម្ដេចតេជោ ហ៊ុន សែន បានថ្លែងថា យើងត្រូវតែការពារយ៉ាងម៉ឺងម៉ាត់ នូវគោលការណ៍ដ៏ពិសិដ្ឋនៃអធិបតេយ្យរបស់រដ្ឋ បូរណភាពទឹកដី និងការដោះស្រាយជម្លោះដោយសន្តិវិធី ដែលមានចែងក្នុងធម្មនុញ្ញអង្គការសហប្រជាជាតិ ធម្មនុញ្ញអាស៊ាន ក៏ដូចជាស្មារតីអមតៈនៃលិខិតូបករណ៍សភា ដូចជា ធម្មនុញ្ញសន្តិភាពសកល ដែលត្រូវបានអនុម័តនៅរាជធានីភ្នំពេញនេះផ្ទាល់តែម្តង។  ជាងនេះទៅទៀត ដើម្បីឈានផុតពីការទូតបែបអកម្ម សម្តេចតេជោបានអំពាវនាវឲ្យមានការបង្កើតបណ្តាញអន្តរជាតិនៃអ្នកសម្រុះសម្រួលឆ្នើមសភា ដោយប្រមូលផ្តុំនូវសមាជិកសភាលេចធ្លោនានា ដែលអាចជំរុញការសម្រុះ​សម្រួល​ឱ្យមានសន្តិភាពដោយសកម្ម។ សម្ដេចតេជោមានប្រសាសន៍ថា ប្រធានអង្គនីតិប្បញ្ញត្តិទាំងអស់សុទ្ធសឹងជាឥស្សរជននយោបាយដែលមានបទពិសោធខ្ពស់ មានបណ្តាញទំនាក់ទំនងអន្តរជាតិយ៉ាងទូលំទូលាយ និងមានកិត្យានុភាព។ ដូច្នេះ បណ្តាញសម្រុះសម្រួលឯកទេសនេះត្រូវតែឈានជើងឱ្យផុតពីភាពរឹងត្អឹងនៃមនោគមវិជ្ជា ហើយអាចធ្វើសកម្មភាពដោយភាពរហ័សរហួន ដើម្បីសម្រុះសម្រួលផ្ទាល់ជាមួយភាគីជម្លោះ មុនពេលដែលការប៉ះទង្គិចគ្នាបន្តិចបន្តួចអាចផ្ទុះឡើង បង្កជាសង្គ្រាមទ្រង់ទ្រាយធំ។  សម្ដេចបានសង្កត់ធ្ងន់ថា ភ្លើងសង្គ្រាមក្នុងប្រទេសមួយលែងជារឿងដាច់ដោយឡែកទៀតហើយ ព្រោះវាអាចបក់ផ្សែងមកដល់ជើងមេឃ ដែលអាចខ្ទប់ដង្ហើមយ៉ាងងាយស្រួល។ ដូច្នេះ ដើម្បីជំនួសជាអចិន្ត្រៃយ៍នូវច្បាប់ព្រៃ «អ្នកខ្លាំងឈ្នះ» ​ស្ថាប័ននីតិប្បញ្ញត្តិត្រូវបន្តចេញសេចក្ដីថ្លែងការណ៍រួមដ៏មានឥទ្ធិពល និងបង្ហាញសាមគ្គីភាពឥតងាករេ។ សម្តេចប្រធានព្រឹទ្ធសភាសង្កត់ធ្ងន់ថា សហគមន៍ដែលគោរពច្បាប់ដូចបណ្តាញបណ្តាញសន្និសីទអន្តរសភានេះ គប្បីខិតខំស្វែងរកផ្លូវច្បាប់ដើម្បីទប់ស្កាត់ល្បិចកលប្រផេះ ដែលចង់ពង្រីកមហិច្ឆតាទឹកដី និងការត្រួតត្រាលើអធិបតេយ្យប្រទេសដទៃដោយបង្ខំ ដែលផ្ទុយនឹងច្បាប់អន្តរជាតិ។ ត្រង់ចំណុចនេះ សម្តេចតេជោបានរិះគន់ការប្រើប្រាស់ការអនុវត្តច្បាប់ក្រៅដែនអធិបតេយ្យ ចំពោះបទល្មើសឆ្លងដែន ដូចជាការឆបោកតាមអនឡាញ…

រដ្ឋបាលខេត្តស្ទឹងត្រែង គ្រោងនឹងបង្កើតផ្លូវថ្មើរជើងពេលរាត្រី​ ពង្រីកកន្លែងកម្សាន្ត កន្លែងហាត់ប្រាណ កែលម្អហេដ្ឋារចនាសម្ព័ន្ធ និងការរៀបចំឱ្យមានសណ្តាប់ធ្នាប់សាធារណៈឱ្យបានសា្អតបាតនៅក្នុងខេត្ត​ ដើម្បីបម្រើ​ដល់​ពលរដ្ឋ បង្កើនភាពអ៊ូអរ ក៏ដូចជា​ទាក់ទាញភ្ញៀវទេសចរ។   ​ឯកឧត្តម សរ សុពុត្រា អភិបាលខេត្តស្ទឹងត្រែង បានបញ្ជាក់​ពីគម្រោងនេះ ក្នុងពិធីបង្ហាញវឌ្ឍនភាពការងារសម្រេចបានប្រចាំឆមាសទី១របស់រដ្ឋបាលខេត្តស្ទឹងត្រែង កាល​ពីថ្ងៃទី២៦ ខែសីហា​ ឆ្នាំ២០២៦។  ឯកឧត្តម សរ សុពុត្រា ​គ្រោង​ដាក់ឈ្មោះ​ផ្លូវថ្មើរជើងកម្សាន្តពេលរាត្រី ក្នុងក្រុងស្ទឹងត្រែងនោះថា «ឦសានធានី»ដែលបើកបម្រើភ្ញៀវទេសចរនៅ​ចុងសប្តាហ៍។ លោក អ៊ន់ ប៉ោសឿន ប្រធានមន្ទីរទេសចរណ៍ខេត្តស្ទឹងត្រែង  បានបញ្ជាក់ប្រាប់បណ្តាញព័ត៌មាន AMS បន្ថែមថា រដ្ឋបាលខេត្តនឹងបង្កើតផ្សារសហគមន៍ទេសចរណ៍ និងរៀបចំហេដ្ឋារចនាសម្ព័ន្ធនៅរមណីយដ្ឋាន​ទេសចរណ៍​អន្លង់ផ្សោតត្បូងខ្លា ស្ថិតនៅក្នុងស្រុកសូមបូក ឱ្យកាន់តែទាក់ទាញបន្ថែមទៀតផងដែរ។ បើតាមលោក អ៊ន់ ប៉ោសឿន  គម្រោងពង្រីកហេដ្ឋារចនាសម្ព័ន្ធទេសចរណ៍ទាំងនេះ គ្រោងនឹងរៀបចំនៅ​ ខាងមុខនេះ ខណៈរដ្ឋបាលខេត្តកំពុងស្វែងរកដៃគូ​សហការរៀបចំ។ ក្នុងឆមាសទី១ ឆ្នាំ២០២៦នេះ ខេត្តស្ទឹងត្រែងទទួលបានភ្ញៀវទេសចរសរុបចំនួន​ជិត៦០ម៉ឺននាក់  គឺកើនឡើង៦៧ភាគរយ បើធៀបនឹងរយៈពេលដូចគ្នាក្នុងឆ្នាំ២០២៥។ នៅក្នុងខេត្តស្ទឹងត្រែង​ មានបឹងកាឡូ និង Resort ចំនួន២៥កន្លែង រមណីយដ្ឋានប្រវត្តិសាស្ត្រចំនួន៣កន្លែង រមណីយដ្ឋានធម្មជាតិកែច្នៃ ២កន្លែង រមណីយដ្ឋានទេសចរណ៍ធម្មជាតិ១កន្លែង រមណីយដ្ឋានកសិទេសចរណ៍ចំនួន១កន្លែង និងសហគមន៍អេកូទេសចរណ៍ចំនួន៧កន្លែង៕ សៅ សុខអេង