អ្នកឃ្លាំមើលសង្គមអំពាវនាវឲ្យមានការដាក់ទោសធ្ងន់ធ្ងរលើបុគ្គលទាំងឡាយណា ដែលអាងអំណាចបុណ្យសក្តិ ឬទ្រព្យសម្បត្តិ ហើយដើរបង្កបញ្ហានៅក្នុងសង្គម ដូចជាករណីប្រើអំពើហិង្សា ឬបង្កគ្រោះថ្នាក់ចរាចរណ៍បុកគេស្លាប់ហើយរត់គេចខ្លួនជាដើម។ លោកបណ្ឌិត ឈត ប៊ុនថង អ្នកជំនាញទស្សនវិជ្ជានៃរាជបណ្ឌិត្យសភាកម្ពុជា យល់ឃើញថា មនុស្សមួយចំនួននៅបំពានច្បាប់ ដោយសារតែការអនុវត្តច្បាប់នៅធូរលុងនៅឡើយ។ លោកបានពន្យល់ថា ៖ មនុស្សក្អេងក្អាងបាននឹង ក្អេងក្អាងបែបធម្មជាតិក្អេងក្អាងដោយសារមានលុយមានអំណាចនឹងគឺដោយសារតែការអនុវត្តច្បាប់យើងនឹងមិនទាន់បានតឹងរឹង ក្រៅពីមិនទាន់តឹងរឹងនឹង មានការលើកឡើងថាអាចនឹងមានភាពមិនប្រក្រតី មានន័យថាការអនុវត្តច្បាប់នឹងលម្អៀងទៅអ្នកមានប្រាក់មានអំណាចចឹងទៀតទៅ ចឹងហើយធ្វើឲ្យភាពក្អេក្អាង បុគ្គលក្អេងក្អាងចេះតែមានសកម្មភាពធ្វើទុក្ខបុកម្និញទៅដល់ជនរងគ្រោះទាំងឡាយដែលពាក់ព័ន្ធឬក៏ទាក់ទងជាមួយគាត់នឹង។ ដោយឡែក លោក សេក សុជាតិ អ្នកប្រឹក្សាយោបល់ផ្នែកផ្នត់គំនិតក្នុងសង្គមខ្មែរវិញ យល់ឃើញថា សកម្មភាពក្អេងក្អាងបង្កហិង្សា ឬសកម្មភាពល្មើសផ្សេងៗដោយអាងអំណាចមាសប្រាក់នេះ មិនគួរទុកឲ្យបន្តស្រាបព្រួសនៅក្នុងសង្គមខ្មែរទៀតនោះទេ។ ​ បើតាមលោក សុជាតិ រដ្ឋាភិបាលឬក៏ថ្នាក់ដឹកនាំជាន់ខ្ពស់គួរចាត់វិធានការតាមវិន័យរដ្ឋបាលរបស់រដ្ឋដើម្បីធ្វើយ៉ាងម៉េចកុំឲ្យបញ្ហាទាំងអស់វាកើតមានជាបន្តបន្ទាប់ទៅលើអ្នកដទៃផ្សេងទៀត ហើយក៏ជាគំរូមួយដែលបង្ហាញអំពីបេះដូងនិងឆន្ទៈពិតប្រាកដរបស់ថ្នាក់ដឹកនាំនៅក្នុងការបោសសម្អាតអំពើទាំងឡាយណាដែលបំផ្លាញផលប្រយោជន៍រួមរបស់រដ្ឋហើយនឹងរាស្រ្តរបស់យើង។ សូមបញ្ជាក់ថា អ្នកតាមដានសង្គមបានកត់សម្គាល់បែបនេះ ក្រោយពេល​ថ្មីៗនេះ ជនសង្ស័យម្នាក់ រួមទាំងបក្សពួក បានយកដបស្រាវាយក្បាលគូជម្លោះម្នាក់ឲ្យរងរបួសធ្ងន់ ដោយសារអាងខ្សែអ្នកធំ។ កន្លងមក ក៏មានករណីកូនអ្នកមានទ្រព្យស្តុកស្តម្ភបើករថយន្តទំនើបបុកគេស្លាប់ហើយរត់ផងដែរ។ តែទោះជាយ៉ាងណា ជនល្មើសត្រូវបាននាំយកមក​ទទួលទោសចំពោះមុខច្បាប់៕ សេង បារាំង AMS

នាយកដ្ឋានបុរាណវត្ថុ សហការជាមួយមន្ទីរវប្បធម៌ និងវិចិត្រសិល្បៈខេត្តពោធិ៍សាត់ កំពុងរៀបចំការតាំងពិព័រណ៍រូបថតស្តីពី «វត្ថុសិល្បៈខ្មែរ» ដែលត្រូវបាននាំចេញដោយខុសច្បាប់ និងកំពុងទាមទារត្រឡប់មកកម្ពុជាវិញ នៅក្នុងបរិវេណសារមន្ទីរខេត្តពោធិ៍សាត់។ ការតាំងពិព័រណ៍នេះ នឹងបើកទទួលសាធារណជនចូលទស្សនាដោយឥតគិតថ្លៃ រយៈពេល២០​ថ្ងៃ ចាប់ពីថ្ងៃទី២៤ ខែសីហា  ដល់ថ្ងៃទី១២ ខែកញ្ញា  ឆ្នាំ២០២៦។ លោក ហួត សំណាង ប្រធាននាយកដ្ឋានបុរាណវត្ថុ នៃក្រសួងវប្បធម៌ និងវិចិត្រសិល្បៈ បានប្រាប់បណ្តាញព័ត៌មាន AMS ថា​ រូបថតវត្ថុសិល្បៈខ្មែរ ដែលកំពុងដាក់តាំងបង្ហាញជាសាធារណៈនេះ បង្ហាញពីវត្ថុបុរាណខ្មែរដែលត្រូវបានគេលួចចរាចរដោយខុសច្បាប់ចេញពីកម្ពុជា កំឡុងពេលកម្ពុជា​ជួ​ប​​សង្គ្រាមស៊ីវិល ច​ន្លោះឆ្នាំ ១៩៧០ និងឆ្នាំ១៩៩០។ លោកបន្តថា វត្ថុបុរាណទាំងនោះ ជារូបបដិមាសាសនា ទាំងព្រះពុទ្ធសាសនា និងព្រហ្មញ្ញសាសនា ដែលមានប្រភពមកពីបុរាណដ្ឋាននានា ពិសេសវត្ថុនៅក្នុងតំបន់ប្រាសាទកោះកេរ ក្នុងនោះក៏មានវត្ថុខ្លះជាសមុច្ច័យ ដែលបាត់ពីសារមន្ទីរខេត្តបាត់ដំបង និងខ្លះទៀតពីអភិរក្សដ្ឋានអង្គរ ខេត្តសៀមរាបផងដែរ។ លោកនិយាយថា វត្ថុបុរាណទាំងនេះ ពុំមែនគ្រាន់តែជារូបចម្លាក់ដែលឆ្លាក់ពីថ្ម ឈើ ឬលោហធាតុប៉ុណ្ណោះទេ ប៉ុន្តែជាមរតកវប្បធម៌ដ៏មានតម្លៃ ដែលផ្ទុកនូវប្រវត្តិសាស្ត្រ សិល្បៈ ជំនឿ ទំនៀមទម្លាប់ និងអត្តសញ្ញាណជាតិខ្មែរ និងជាសក្ខីភាពដ៏រស់រវើកនៃអារ្យធម៌ខ្មែរ ដែលឆ្លុះបញ្ចាំងពីការវិវឌ្ឍន៍នៃសង្គម នយោបាយ សាសនា សិល្បៈ…

ការពឹងផ្អែករបស់កម្ពុជាលើការនាំចូលប្រេងឥន្ធនៈ និងជី បានធ្វើឱ្យសេដ្ឋកិច្ចប្រទេសប្រឈមនឹងការរំខានការផ្គត់ផ្គង់ថាមពលសកល និងរំលេចពីតម្រូវការ ក្នុងការការពារគ្រួសារងាយរងគ្រោះ ព្រមទាំងការកសាងភាពធន់រយៈពេលវែង។ នេះបើយោងតាមរបាយការណ៍ថ្មីមួយ ដែលចេញផ្សាយដោយវិទ្យាស្ថានបណ្តុះបណ្តាល និងស្រាវជ្រាវដើម្បីអភិវឌ្ឍន៍កម្ពុជា (CDRI)។ របាយការណ៍ស្តីពីផលប៉ះពាល់សេដ្ឋកិច្ចដោយការរំខាននៃទីផ្សារថាមពលអន្តរជាតិ​មកលើប្រទេសកម្ពុជា ត្រូវបានចងក្រងដោយអ្នកស្រាវជ្រាវកម្ពុជា និងអន្តរជាតិ មកពីមជ្ឈមណ្ឌលសិក្សាគោលនយោបាយនៅសាកលវិទ្យាល័យ Victoria, ធនាគារអភិវឌ្ឍន៍អាស៊ី និងវិទ្យាស្ថានបណ្តុះបណ្តាល និងស្រាវជ្រាវដើម្បីអភិវឌ្ឍន៍កម្ពុជា។ លោកស្រី Yasmin Siddiqi នាយិកាប្រចាំប្រទេសកម្ពុជារបស់ធនាគារអភិវឌ្ឍន៍អាស៊ី (ADB) បានថ្លែងថា ការរងផលប៉ះពាល់របស់កម្ពុជា ដោយការរំខាននៃទីផ្សារថាមពល មិនត្រឹមតែជាការគំរាមកំហែងរយៈពេលខ្លី ដល់ការកាត់បន្ថយភាពក្រីក្ររបស់ប្រទេសកម្ពុជាប៉ុណ្ណោះទេ ប៉ុន្តែក៏ជាបញ្ហាប្រឈមជាមូលដ្ឋានសម្រាប់ការអភិវឌ្ឍផងដែរ។ បើតាមលោកស្រី Yasmin Siddiqi របាយការណ៍នេះផ្តល់ការវិភាគទាន់ពេលវេលា ដើម្បីគាំទ្រដល់ការឆ្លើយតបជាបន្តបន្ទាប់របស់រាជរដ្ឋាភិបាលទៅនឹងវិបត្តិប្រេងឥន្ធនៈសកល និងជំនួយ តាមរយៈអន្តរាគមន៍រហ័សរបស់ ADB នាពេលថ្មីៗនេះ ដើម្បីស្ថិរភាពសេដ្ឋកិច្ចរបស់ប្រទេសកម្ពុជា។ របាយការណ៍នេះអាចជួយអ្នកបង្កើតគោលនយោបាយ ដោះស្រាយបញ្ហាសេដ្ឋកិច្ច ដែលបង្កដោយវិបត្តិពីខាងក្រៅ។ លោក Milan Thomas សេដ្ឋវិទូប្រចាំប្រទេសកម្ពុជា របស់ ADB បានបង្ហាញពីលទ្ធផលនៃគំរូស្រាវជ្រាវនេះ។ លោកគូសបញ្ជាក់ថា ប្រសិនបើតម្លៃប្រេងឥន្ធនៈកើនឡើងបន្ថែមទៀតដល់ ៥០ភាគរយ ខ្ពស់ជាងមុនពេលមានវិបត្តិ សកម្មភាពសេដ្ឋកិច្ចនឹងធ្លាក់ចុះ ១ភាគរយ។ ផលប៉ះពាល់អាចមានកាន់តែច្រើនលើគ្រួសារនៅតាមជនបទ ដោយសារផលិតកម្មវិស័យកសិកម្មរបស់ពួកគាត់ រងផលប៉ះពាល់ដោយតម្លៃធាតុចូលខ្ពស់ជាងមុន។ យ៉ាងណាក៏ដោយ ដើម្បីរួមចំណែកដោះស្រាយបញ្ហាខាងលើនេះ…

ទឹកទន្លេមេគង្គកំពុងតែហក់ឡើងបង្កឱ្យមានករណីបាក់ច្រាំងទន្លេខេត្តកំពង់ចាមប្រវែង៤ ៧៥៦ម៉ែត្រ  ដែលបណ្តាលឱ្យប៉ះពាល់ផ្ទះពលរដ្ឋចំនួន ២៤ខ្នងរបស់ពលរដ្ឋចំនួន២៤គ្រួសារ ក្នុងនោះពលរដ្ឋចំនួន ១៧គ្រួសារត្រូវបានជម្លៀសទៅកាន់ទីទួលសុវត្ថិភាព។​ ករណីបាក់ច្រាំងទន្លេនេះ​ បានកើតឡើងនៅស្រុកស្ទឹងត្រង់ កំពង់សៀម និងកោះសូទិន​ ក្នុងនោះ ស្រុកកំពង់សៀមរងគ្រោះធ្ងន់ជាងគេ ដោយប៉ះពាល់ផ្ទះ១៧ខ្នង និងបានជម្លៀសពលរដ្ឋ ១៧គ្រួសារ ។  ឯកឧត្តម អ៊ុន ចាន់ដា អភិបាលខេត្តកំពង់ចាម បានបញ្ជាក់ប្រាប់បណ្តាញព័ត៌មាន AMS ថា ផ្លូវបេតុងចំនួន១ខ្សែប្រវែង១០០ម៉ែត្រ និងផ្លូវគ្រួស​ក្រហមប្រវែង៤០០ម៉ែត្រ ក៏ត្រូវបានបាក់ស្រុតផងដែរ។ ឯកឧត្តម អ៊ុន ចាន់ដា បានបញ្ជាក់ថា ការបាក់ច្រាំងទន្លេនេះ គឺបណ្តាលមកពីបម្រែបម្រួលអាកាសធាតុ​នាំឱ្យចរន្តទឹកហូរមកម្ខាងច្រាំង​ និងមានដីដុះនៅច្រាំងម្ខាងទៀត។  លោក អ៊ុម វិបុល ប្រធានមន្ទីរធនធានទឹក និងឧតុនិយមខេត្តកំពង់ចាម បានឲ្យដឹងថា កម្ពស់ទឹកទន្លេមេគង្គហក់ឡើងក៏ជាមូលហេតុបង្កឱ្យមានការបាក់ស្រុតច្រាំង​ផងដែរ។                                                                                                                                         លោកបញ្ជាក់ថា  កម្ពស់ទឹកទន្លេមេគង្គក្នុងខេត្តកំពង់ចាម គិតត្រឹមព្រឹកថ្ងៃចន្ទ ទី២៤ ខែសីហា ឆ្នាំ២០២៦នេះ​ បានហក់ឡើងដល់ជាង ១៤ម៉ែត្រ ខណៈកម្ពស់ទឹកត្រូវប្រុងប្រយ័ត្នគឺ ១៥ ម៉ែត្រ ២តឹក។ បើតាមលោកប្រធានមន្ទីរធនធានទឹក និងឧតុនិយមខេត្តកំពង់ចាម  ចំពោះមុខស្ថានភាពទឹកទន្លេកំពុងហក់ឡើងនេះ​ រដ្ឋបាលខេត្តបានត្រៀមទីទួលសុវត្ថិភាពចំនួន​ ១៧៨ទីតាំង​ សម្រាប់ពលរដ្ឋដែលរងផលប៉ះពាល់​ និងយកសត្វពាហនៈមករក្សាទុក។ ខេត្តកំពង់ចាម ទទួលរងឥទ្ធិពលព្យុះណារ៉ា ដែលបង្កឱ្យមានភ្លៀងផ្គររន្ទះពីតិចទៅច្រើន អាចធ្វើឱ្យកម្ពស់ទឹកទន្លេកើនឡើងក្នុងកម្រិតគួរឱ្យកត់សម្គាល់ បង្កឱ្យមានជំនន់នៅតាមដងទន្លេ…