សហរដ្ឋអាមេរិកបានបង្កើនជំនួយចំនួន ១៣លានដុល្លារឲ្យកម្ពុជាសម្រាប់បោសសម្អាតមីន និងយុទ្ធភណ្ឌមិនទាន់ផ្ទុះនៅឆ្នាំ២០២៦នេះ ដើម្បីឆ្លើយតបទៅនឹងតម្រូវការថ្មីៗ បន្ទាប់ពីជម្លោះតាមព្រំដែននៅក្នុងឆ្នាំ ២០២៥ ជាមួយប្រទេសថៃ។ គិតចាប់តាំងពីឆ្នាំ១៩៩៣មក ជំនួយរបស់អាមេរិកសម្រាប់បោសសម្អាតមីន និងយុទ្ធភណ្ឌមិនទាន់ផ្ទុះនៅកម្ពុជានេះ គឺសរុបចំនួន ២៣៥លានដុល្លារ។ ស្ថានទូតអាមេរិកប្រចាំកម្ពុជាបានបញ្ជាក់នៅលើទំព័រហ្វេសប៊ុកនៅថ្ងៃអង្គារ៍ទី០១ ខែកញ្ញា ឆ្នាំ២០២៦នេះថា អស់រយៈពេលជាង ៣០ឆ្នាំមកហើយ កិច្ចសហប្រតិបត្តិការរវាងសហរដ្ឋអាមេរិក និងកម្ពុជាលើ​វិស័យសកម្មភាពកំចាត់មីន បានជួយធ្វើឱ្យសហគមន៍កាន់តែមានសុវត្ថិភាព និងនាំយកដី ដែលមាន​ការ​បំពុល​ដោយមីន និងសំណល់ជាតិផ្ទុះមកប្រើប្រាស់សម្រាប់ប្រើប្រាស់ឡើងវិញ។ ស្ថានទូតបានគូសបញ្ជាក់ថា តាមរយៈភាពជាដៃគូជាមួយកម្ពុជា ប្រតិបត្តិការសង្គ្រោះជីវិតបានពង្រីកទៅដល់សហគមន៍តាមព្រំដែន ដែលរងផលប៉ះពាល់ដោយជម្លោះនាពេលថ្មីៗនេះ។ អាមេរិកបានវាយតម្លៃខ្ពស់ចំពោះកិច្ចសហប្រ​តិបត្តិការដ៏ជិតស្និទ្ធជាមួយអាជ្ញាធរមីន និងមជ្ឈមណ្ឌលសកម្មភាពកំចាត់មីនកម្ពុជា (CMAC) ព្រមទាំងអ្នកជំនាញជាន់ខ្ពស់កម្ពុជាក្នុងការបោសសម្អាតមីនផងដែរ។ អាមេរិកបានរំលឹកថា ចាប់តាំងពីឆ្នាំ១៩៩៣មក ប្រតិបត្តិការដែលមានការគាំទ្រពីសហរដ្ឋអាមេរិក បានបោសសម្អាត និងប្រ​គល់ដីដែលរងការបំពុលចំនួនជាង ៧១៤លានម៉ែត្រក្រឡា ដោយកម្ទេចមីនប្រឆាំងមនុស្ស និងមីនប្រឆាំងរថក្រោះជាង ១១ម៉ឺនគ្រាប់ ព្រមទាំងសំណល់យុទ្ធភណ្ឌមិនទាន់ផ្ទុះ (UXO) ចំនួន ៥៥ម៉ឺនគ្រាប់ ក្នុងនោះក៏មានគ្រាប់បែកចង្កោមផងដែរ។ សម្រាប់អាមេរិក រាល់ផ្ទៃដីដែលបានបោសសម្អាត គឺជាការបើកឡើងវិញនូវឱកាសសម្រាប់ការធ្វើកសិកម្ម ជំរុញវិស័យទេសចរណ៍ក្នុងតំបន់ និងបើកផ្លូវឱ្យមានការអភិវឌ្ឍសេដ្ឋកិច្ចប្រកបដោយចីរភាព សម្រាប់ប្រ​ជាជនកម្ពុជាជំនាន់ក្រោយៗ។ អ្វីដែលសំខាន់បំផុត គឺបន្ទាប់ពីការខិតខំប្រឹងប្រែងអស់រយៈពេលជាច្រើនឆ្នាំ ការងារនេះកំពុងជួយឱ្យគ្រួសារកម្ពុជាកាន់តែច្រើនអាចរស់នៅ និងប្រកបការងារដោយសុវត្ថិភាព។ យោងតាមអង្គភាព CMAC សង្គ្រាមថៃឈ្លានពានទាំងពីរលើកនៅឆ្នាំ២០២៥ បានគំរាមកំហែងដោយផ្ទាល់ដល់ឃុំ/សង្កាត់ចំនួន ៦០​…

ពិធី​បុណ្យ​កាន់​បិណ្ឌនឹងចូលមកដល់ក្នុងរយៈពេល​២៥ថ្ងៃទៀត។ ក្រសួងធម្មការ និងសាសនា បានណែនាំដល់គ្រប់វត្តអារាមឱ្យរៀបចំ បែងចែក និងបង្វែរទេយ្យទាន ព្រមទាំងចង្ហាន់ ដែលទទួលបានលើសពីតម្រូវការជាក់ស្តែង យកទៅចែកជូនដល់ប្រជាជនភៀសសឹក ចាស់ជរាគ្មានទីពឹង ជនពិការ កុមារកំព្រា និងជនរងគ្រោះផ្សេងៗទៀត។  សេចក្តីណែនាំរបស់ក្រសួងធម្មការ និងសាសនា ចុះនៅថ្ងៃទី២៥ ខែសីហា ឆ្នាំ២០២៦ ក៏បានណែនាំឱ្យគ្រប់វត្តអារាម ត្រូវរៀបចំបង្សុកូលឧទ្ទិសកុសលជូនដល់វិញ្ញាណក្ខន្ធវីរៈកងទ័ព វីរនគរបាល កងកម្លាំង ប្រដាប់អាវុធគ្រប់ប្រភេទ ជនរួមជាតិ និងបុព្វបុរស ដែលបានពលីក្នុងបុព្វហេតុជាតិ មាតុភូមិ ស្របតាមប្រពៃណី ទំនៀមទម្លាប់ ព្រះពុទ្ធសាសនា។  បុណ្យភ្ជុំបិណ្ឌនៅឆ្នាំនេះ នឹងចាប់ផ្តើមកាន់បិណ្ឌចាប់ពីថ្ងៃអាទិត្យ ទី២៧ ខែកញ្ញា ដល់ថ្ងៃទី១១ ខែតុលា ឆ្នាំ២០២៦ដែលជាថ្ងៃបុណ្យភ្ជុំបិណ្ឌធំ។​ ពិធីបុណ្យភ្ជុំបិណ្ឌ មានរយៈពេល១៥ថ្ងៃ គឺជាពិធីបុណ្យដ៏ធំមួយ នៅក្នុងចំណោមពិធីបុណ្យផ្សេងៗនៅកម្ពុជា ដែលប្រជាជនខ្មែរនាំគ្នាប្រារព្ធធ្វើឡើងមិនដែលអាក់ខានឡើយជារៀងរាល់ឆ្នាំ។ ​ នាឱកាសបុណ្យភ្ជុំបិណ្ឌ ជាទូទៅពលរដ្ឋខ្មែរ តែងតែធ្វើចង្ហាន់ ប្រគេនទេយ្យទាន​ ប្រគេនដល់​ព្រះសង្ឃ ដើម្បីឧទ្ទិសកុសល្យជូនទៅដល់ដូនតា និងញាតិសណ្តាន ដែលបានចែងឋានទៅ។  បុណ្យភ្ជុំបិណ្ឌ​ក៏ជាឱកាសសម្រាប់​កូនចៅ​​សម្តែងកត្តញ្ញកតវេទិតាធម៌ ចំពោះបុព្វការីជន មាតា បិតា គ្រូឧបជ្ឈាយាចារ្យជាដើម៕ សៅ សុខអេង​

មន្ត្រីនគរបាលចរាចរណ៍ម្នាក់ រួមទាំងមន្ត្រីជាប់កិច្ចសន្យាម្នាក់​ទៀត ត្រូវបានផ្អាកការងារ និងបញ្ឈប់កិច្ចសន្យា ក្រោយទារប្រាក់ផាកពិន័យពីជនបរទេសចំនួន៥០០ដុល្លារ កាលពីថ្ងៃទី៣០ ខែសីហា ឆ្នាំ២០២៦។ លោក ទូច សុខៈ អ្នកនាំពាក្យរងក្រសួងមហាផ្ទៃ បានបញ្ជាក់ប្រាប់បណ្តាញព័ត៌មាន AMS ថា មន្ត្រីនគរបាលចរាចរណ៍ លោកអនុសេនីយ៍ឯក ហោ ផល្លី ត្រូវបានផ្អាកការងារបណ្តោះអាសន្ន ដើម្បីបន្តអនុវត្តនីតិវិធីតាមផ្លូវច្បាប់។ ដោយឡែក លោក ស៊ឹម រដ្ឋា ដែលជាមន្ត្រីជាប់កិច្ចសន្យា ក៏ត្រូវបានស្នងការដ្ឋាននគរបាលរាជធានីភ្នំពេញ ដាក់ស្នើទៅរដ្ឋបាលរាជធានីភ្នំពេញ ដើម្បីបណ្តេញចេញពីក្របខណ្ឌការងារ។ អ្នកនាំពាក្យដដែលបានគូសបញ្ជាក់ថា មន្ត្រីជាប់កិច្ចសន្យាជួយការងារចរាចរណ៍ឈ្មោះ ស៊ឹម រដ្ឋា នេះ ត្រូវស្នងការដ្ឋាននគរបាលរាជធានីភ្នំពេញ លោកស្នើទៅរដ្ឋបាលរាជធានីភ្នំពេញ ដើម្បីបញ្ចប់កិច្ចសន្យាការងាររបស់គាត់ ចាប់ពីពេលនេះតទៅតែម្តង បាទ។ ដោយឡែកចំពោះមន្ត្រីនគរបាលចរាចរណ៍ឈ្មោះ ហោ ប៉ូលី ត្រូវដកពីគោលដៅមកបង្ហាញមុខនៅផែនធនធានមនុស្ស ឬក៏បុគ្គលិក ដើម្បីស្នើសុំគោលការណ៍ទៅអគ្គស្នងការដ្ឋាននគរបាលជាតិ លោកសម្រេច។ ហើយការចាត់នីតិវិធីស្នើគោលការណ៍ គឺកំពុងតែបន្តមកអគ្គស្នងការដ្ឋាននគរបាល ដើម្បីលោកពិនិត្យសម្រេចចុងក្រោយ។ មន្ត្រីចរាចរណ៍ទាំង ២ រូប ត្រូវបានចាត់វិធានការវិន័យ បន្ទាប់ពីរកឃើញថា ពួកគេបានអនុវត្តខុសពីគោលការណ៍ណែនាំ និងទារប្រាក់ផាកពិន័យលើសពីចំនួនដែលច្បាប់បានកំណត់។ ថ​វិកា ដែលមន្ត្រី​ពីរនាក់នោះបានទារពីជនបទេស…