ក្រសួងបរិស្ថានកម្ពុជាបានបញ្ជាក់ថា តំបន់រ៉ាមសារព្រែកទាល់ ក្នុងខេត្តបាត់ដំបង ត្រូវបានដាក់បញ្ចូលជាបេក្ខភាពឧទ្យានបេតិកភណ្ឌអាស៊ាន។ រដ្ឋសមាជិកអាស៊ានបានគាំទ្រ និងឯកភាពការដាក់បញ្ចូលនេះ នៅក្នុងកិច្ចប្រជុំក្រុមប្រឹក្សាភិបាលនៃមជ្ឈមណ្ឌលជីវៈចម្រុះអាស៊ានលើកទី២៨ និងកិច្ចប្រជុំឧត្តមមន្រ្តីបរិស្ថាន​អាស៊ានលើកទី៣៧​ នាថ្ងៃទី​១០ និង១១សីហា​ ឆ្នាំ២០២៦ តាមប្រព័ន្ធវីដេអូ។ ក្រៅពីតំបន់រ៉ាមសារព្រែកទាល់ ​ក្រសួងបរិស្ថាន​ក៏កំពុងសិក្សា​វាយតម្លៃសក្កានុពល​តំបន់​ឧទ្យានជាតិជួរភ្នំ​ក្រវាញដែលជាតំបន់សម្បូរទៅដោយជីវៈចម្រុះ សត្វងាយរងគ្រោះ ជិតផុតពូជ ឬកំពុងទទួលរងការគំរាមគំហេង និងជាជម្រកសត្វពងកូន​ ដែលមានសក្តានុពលក្នុងការដាក់ស្នើសុំទៅជាជាតំបន់ឧទ្យានបេតិ​កភណ្ឌអាស៊ាននាពេលអនាគតផងដែរ។ ឯកឧត្តម ខ្វៃ អាទិត្យា អ្នកនាំពាក្យក្រសួងបរិស្ថាន បានប្រាប់បណ្ដាញព័ត៌មាន AMS ថា នៅមានតំបន់ឧទ្យានរបស់កម្ពុជាជាច្រើនទៀតដែលកម្ពុជាគ្រោងស្នើសុំទៅជាតំបន់ឧទ្យានបេតិ​កភណ្ឌអាស៊ាននាពេលអនាគត។ ក្រសួងបរិស្ថានបញ្ជាក់ថា សារៈសំខាន់នៃការទទួលស្គាល់ចំពោះការអភិរក្សធនធានធម្មជាតិ និងជីវៈចម្រុះរបស់កម្ពុជា ជាពិសេសការដាក់បញ្ចូលតំបន់រ៉ាមសារព្រែកទាល់ជាឧទ្យានបេតិកភណ្ឌអាស៊ាន នឹងផ្តល់ផល​ជាវិជ្ជមានយ៉ាងខ្លាំងចំពោះការអភិរក្សធនធានធម្មជាតិ និងជីវៈចម្រុះរបស់កម្ពុជា ដូចជាការលើកកម្ពស់​កា​រ​​ការពារ និងអភិរក្សធានធានធម្មជាតិ ដោយសារព្រែកទាល់ គឺជាជម្រកបន្តពូជរបស់សត្វស្លាប។ បច្ចុប្បន្ន ​​កម្ពុជាមានឧទ្យានបេតិកភណ្ឌអាស៊ានចំនួន ២ គឺឧទ្យានជាតិវីរៈជ័យ ស្ថិតនៅខេត្តរតនគិរី និងស្ទឹងត្រែង និងឧទ្យានជាតិព្រះមុនីវង្ស «បូកគោ» ស្ថិតនៅខេត្តកំពត ដែលត្រូវដាក់បញ្ចូល និងអនុម័តជាផ្លូវការនៅឆ្នាំ២០០៣។ ដូច្នេះ នៅពេលដ៏ខ្លីខាងមុខ ពេលដែលបេក្ខភាពតំបន់រ៉ាមសារព្រែកទាល់ត្រូវបានអនុម័តជាផ្លូវការដោយរដ្ឋមន្រ្តីបរិស្ថានអាស៊ាននោះ ប្រទេសកម្ពុជានឹងមានតំបន់ឧទ្យានបេតិកភណ្ឌអាស៊ានចំនួនបី ដែលជាលទ្ធផលគួរឱ្យមោទនភាពសម្រាប់កិច្ចខិតខំប្រឹងប្រែងក្នុងកិច្ចការពារ និងអភិរក្សធនធានធម្មជាតិ៕ សេង បារាំង និងម៉ាដេប៉ូ

យុវជនដែលចូលបំពេញកាតព្វកិច្ចយោធា នឹងទទួលបានប្រាក់ឧបត្ថម្ភ ៤០ម៉ឺនរៀលក្នុងមួយខែ ព្រមទាំងគោលរបបផ្សេងៗទៀត ដូចយោធិនអាជីពដែរ ក្នុងនោះរួមមាន ប្រាក់ម្ហូបប្រចាំថ្ងៃ ប្រាក់អាហារបំប៉នបន្ថែមពេលហ្វឹកហាត់ ប្រាក់បំណាច់ឧបត្ថម្ភគ្រួសារនិងកូន របបអង្ករប្រចាំថ្ងៃ របបឯកសណ្ឋានប្រយុទ្ធ និងបរិក្ខារចាំបាច់មួយចំនួនទៀត។ អនុក្រឹត្យស្តីពីការអនុវត្តច្បាប់ស្តីពីកាតព្វកិច្ចយោធា ដែលចុះហត្ថលេខាដោយនាយករដ្ឋមន្ត្រី នៅថ្ងៃទី១២ ខែសីហា ឆ្នាំ២០២៦នេះ ចែងយ៉ាងច្បាស់អំពីបែបបទនៃការធ្វើជំរឿន ការជ្រើសរើស ព្រមទាំងការទទួលយកពលរដ្ឋ ដែលបញ្ចប់កាតព្វកិច្ចយោធាឱ្យចូលបម្រើការងារ ឬបន្តការសិក្សាវិញ។ បណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិកម្ពុជា យល់ឃើញថា ការផ្ដល់ប្រាក់ឧបត្ថម្ភ និងរបបផ្សេងៗ ដែលយុវជនទទួលបានពេលបំពេញកាតព្វកិច្ចយោធា ពិតជាសមស្រប។ ប៉ុន្តែលោកយល់ថា ការទទួលយកពលរដ្ឋ ដែលបញ្ចប់កាតព្វកិច្ចយោធា ឱ្យចូលបម្រើការងារវិញក្រោយអាក់ខានរយៈពេល ២ឆ្នាំ ហាក់ដូចជាបន្ទុកមួយសម្រាប់ក្រុមហ៊ុន សហគ្រាស និងវិស័យឯកជន។ ការជ្រើសរើសប្រជាពលរដ្ឋចូលចំពេញកាតព្វកិច្ចយោធាត្រូវអនុវត្តដោយស្ម័គ្រចិត្ត និងតាមការចាប់ឆ្នោត។ យុវជនដែលមានចាប់ពីអាយុ ១៨ឆ្នាំ ដល់២៥ឆ្នាំ ត្រូវចូលបំពេញកាតព្វកិច្ចយោធា រយៈពេល ២៤ខែ។ បន្ទាប់ពីអនុវត្តកាតព្វកិច្ចយោធាចប់ ពួកគេអាចវិលទៅជីវភាពស៊ីវិលវិញបាន ហើយក៏អាចចូលទៅបំពេញការងារក្នុងក្រខបខ័ណ្ឌដើមរបស់ស្ថាប័ន សហគ្រាសសាធារណៈ ឬឯកជន និងអង្គការសង្គមស៊ីវិល ដោយរក្សាតំណែងដូចមុនពេលបំពេញកាតព្វកិច្ចយោធាផងដែរ។ សូមជម្រាបថា…

ចម្លាក់ព្រះពុទ្ធផ្ទាញ់មារចំនួន១អង្គ ដែលអាជ្ញាធរប្រទេសស្វីសបានរឹបអូសកាលពីឆ្នាំ២០១៤ នឹងត្រូវបញ្ជូនត្រឡប់មកប្រទេសកម្ពុជាវិញនៅចុងខែកញ្ញា ឆ្នាំ២០២៦ខាងមុខនេះ។ នៅថ្ងៃទី១២ ខែសីហា ឆ្នាំ២០២៦ ឯកឧត្តម កែ សុវណ្ណ ឯកអគ្គរាជទូតនៃព្រះរាជាណាចក្រកម្ពុជាប្រចាំសហព័ន្ធស្វីស បានប្រគល់ព្រះពុទ្ធបដិមាបុរាណនេះទៅតំណាងក្រុមហ៊ុនស្វីសមួយ ដើម្បីរៀបចំដឹកជញ្ជូនត្រឡប់ទៅកាន់ប្រទេសកម្ពុជាវិញ។ ព្រះបដិមានេះត្រូវបានផលិតឡើងពីលោហៈ មានបណ្តោយ ៤១,៥ សង់ទីម៉ែត្រ មានជម្រៅ ២២,៥០សង់ទីម៉ែត្រ និងមានកម្ពស់ ៤៩ សង់ទីម៉ែត្រ។ អ្នកជំនាញជនជាតិស្វីសជឿថា រូបចម្លាក់នេះមានអាយុកាលតាំងពីសម័យមុនអង្គរ ឬដើមសម័យអង្គរ ដោយសន្មត់ថាមានអាយុកាលជាង ១០០០ឆ្នាំ។ ប៉ុន្តែបើយោងតាមការវាយតម្លៃជំហានដំបូងរបស់អ្នកជំនាញនៃក្រសួងវប្បធម៌ និងវិចិត្រសិល្បៈ ដោយផ្អែកលើទម្រង់ និងរចនាបថ រូបបដិមាព្រះពុទ្ធផ្ចាញ់មារនេះមានអាយុកាលតាំងនៅសតវត្សទី១៨ ឬទី១៩។ តាមរយៈការប្រៀបធៀបយ៉ាងល្អិតល្អន់នៃបច្ចេកទេសសិល្បៈ និងបច្ចេកទេសនៃការផលិត អ្នកជំនាញខ្មែរបានសន្និដ្ឋានថា រូបចម្លាក់នេះ គឺជាវត្ថុសិល្បៈបុរាណខ្មែរពិតប្រាកដ ប្រកបដោយគុណតម្លៃសិល្បៈនិងសាសនា ដែលត្រូវថែរក្សាជាសម្បត្តិវប្បធម៌ជាតិ៕ សៅ សុខអេង

ស្ថានទូតសហរដ្ឋអាមេរិកប្រចាំកម្ពុជា បានបញ្ជាក់ថា អាមេរិកគាំទ្រកិច្ចខិតខំប្រឹងប្រែងរបស់កម្ពុជាក្នុងការប្រ​យុទ្ធប្រឆាំងនឹងឧក្រិដ្ឋកម្មឆ្លងដែន និងការបោកប្រាស់តាមប្រព័ន្ធអនឡាញ។ ការប្រ​កាសនេះធ្វើឡើង​បន្ទាប់ពីលោកស្រី Aleks Zittle ភារធារីនៃស្ថានទូត បានជួបពិភាក្សាជាមួយឯកឧត្តម កើត រិទ្ធ រដ្ឋមន្ត្រីក្រសួងយុត្តិធម៌ នៅទីស្តីការក្រសួង កាលពីរសៀលថ្ងៃទី១២ ខែសីហាឆ្នាំ២០២៦។ ស្ថានទូតអាមរិកបានគូសបញ្ជាក់ថា ក្នុងជំនួបនេះ ភាគីទាំងពីរបានពិភាក្សាគ្នាអំពីការអនុវត្តច្បាប់ស្តីពីការប្រ​យុទ្ធប្រឆាំងនឹងការបោកប្រាស់តាមប្រព័ន្ធបច្ចេកវិទ្យារបស់កម្ពុជា។ លោកស្រី Aleks Zittle បានសង្កត់ធ្ងន់លើសារៈសំខាន់នៃការស៊ើបអង្កេត និងការកាត់ទោសមេក្លោងដែលនៅពីក្រោយអំពើឆបោកទាំងនេះ ក៏ដូចជាអ្នកដែលជួយសម្របសម្រួលឱ្យសកម្មភាពទាំងនេះអាចបន្តរីករាលដាលផងដែរ។ នៅក្នុងជំនួបនោះ ភាគីទាំងពីរក៏បានពិភាក្សាអំពីជំនួយបច្ចេកទេសយ៉ាងទូលំទូលាយដែលសហរដ្ឋអាមេរិកកំពុងផ្តល់​ជូន ដើម្បីជួយកម្ពុជាទប់ទល់នឹងការគំរាមកំហែងពីសំណាក់ក្រុមឧក្រិដ្ឋជនឆ្លងដែន ដែលដំណើរការមជ្ឈមណ្ឌលឆបោកតាមប្រព័ន្ធអនឡាញនៅកម្ពុជា។ ស្ថានទូតបញ្ជាក់ថា ​អាមេរិកនឹងបន្តសហការជា​មួយកម្ពុជា ដើម្បីពង្រឹងកិច្ចសហប្រតិបត្តិការក្នុងការអនុវត្តច្បាប់ ដើម្បីការពារពលរដ្ឋអាមេរិក និងបុគ្គលដទៃទៀតពីបណ្តាញឧក្រិដ្ឋកម្មទាំងនេះ។ ចំណែកឯកឧត្តម កើត រិទ្ធ រដ្ឋមន្ត្រីក្រសួងយុត្តិធម៌ បានបញ្ជាក់ជូនលោកស្រី Aleks Zittle អំពីកិច្ចខិតខំប្រឹងប្រែង និងការប្តេជ្ញាចិត្តឥតដកថយរបស់រាជរដ្ឋាភិបាលកម្ពុជាក្នុងការបោសសម្អាតឧក្រិដ្ឋកម្មឆបោកតាមប្រព័ន្ធបច្ចេកវិទ្យា។ នេះបើតាមការបញ្ជាក់របស់ក្រសួងយុត្តិធម៌កម្ពុជា។ យោងតាមក្រសួង ឯកឧត្តមឧបនាយករដ្ឋមន្ត្រី និងលោកស្រី Aleks Zittle បានបញ្ជាក់អំពីការបេ្ដជ្ញាចិត្តក្នុងការបន្ដពង្រឹងកិច្ចសហប្រតិបត្តការល្អរវាងមន្ត្រីអនុវត្តច្បាប់នៃប្រទេសទាំងពីរ ក៏ដូចជាការបន្តនូវកិច្ចសន្ទ​នា និងការចែករំលែកព័ត៌មានគ្នាទៅវិញទៅមក សំដៅលើកកម្ពស់ប្រសិទ្ធភាពនៃការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា, ការប្រឆាំងការសម្អាតប្រាក់ ក៏ដូចជាការប្រឆាំងហិរញ្ញប្បទានដល់ការរីកសាយភាយអាវុធមហាប្រល័យ៕ សេង បារាំង AMS