ក្រុមអ្នកសង្កេតការណ៍អាស៊ានប្រចាំព្រះរាជាណាចក្រកម្ពុជា (AOT) បានចុះសង្កេតការណ៍ ផ្ទៀងផ្ទាត់ និងរាយការណ៍ពីភូមិដ្ឋានពលរដ្ឋនៅចំណុចភូមិស្រអែមខាងជើង ឃុំស្រអែម ស្រុកជាំក្សាន្ត ខេត្តព្រះវិហារ ដែលទទួលរងការខូតខាតពីការទម្លាក់គ្រាប់របស់យោធាថៃ។ យោងតាមសេចក្ដីប្រកាសព័ត៌មានរបស់ក្រសួងការពារជាតិ​ ក្រុមអ្នកសង្កេតការណ៍ AOT បានចុះទៅតាំងដែលត្រូវបានរងការវាយប្រហារពីសំណាក់កងកម្លាំងយោធាថៃ កាលពីខែធ្នូ ឆ្នាំ២០២៥ ដោយការទម្លាក់គ្រាប់បែកពីយន្តហោះចម្បាំង F-16 និងការបាញ់គ្រាប់ផ្លោងប្រភេទ ១៥៥មីលីម៉ែត្រជាច្រើនគ្រាប់ បណ្តាលឱ្យលំនៅឋាន ទ្រព្យសម្បត្តិរបស់ប្រជាពលរដ្ឋ និងហេដ្ឋារចនាសម្ព័ន្ធស៊ីវិលជាច្រើនរងការបំផ្លិចបំផ្លាញ និងខូចខាតយ៉ាងដំណំ។ កម្ពុជាតែងតែផ្តល់ការគាំទ្រយ៉ាងពេញទំហឹងដល់ក្រុមអ្នកសង្កេតការណ៍អាស៊ាន ព្រមទាំង​សង្កត់ធ្ងន់ទៅលើការពង្រឹងតួនាទី និងអាណត្តិរបស់ AOT ដើម្បីផ្ទៀងផ្ទាត់ និងធានាការអនុវត្តបទឈប់បាញ់ឱ្យបានពេញលេញ និងប្រកបដោយប្រសិទ្ធភាព សំដៅលើកកម្ពស់តម្លាភាព គណនេយ្យភាព និងការជឿទុកចិត្តគ្នាទៅវិញទៅមក៕ សេង បារាំង AMS

កម្លាំងមន្ត្រីនៃដែនជម្រកសត្វព្រៃស្រែពក កាលពីថ្ងៃទី០៥ ខែសីហា ឆ្នាំ២០២៦ បានបង្រ្កាបបទល្មើសបរបាញ់សត្វព្រៃខុសច្បាប់មួយករណីនៅចំណុចផ្លូវ១៤ ក្នុងភូមិកោះម្យើលលើ ឃុំណងឃីលឹក ស្រុកកោះញែក ខេត្តមណ្ឌគិរី។ នេះបើតាមសេចក្តីប្រកាសព័ត៌មានរបស់មន្ទីរបរិស្ថានខេត្តមណ្ឌលគិរី។ ក្នុងប្រតិបត្តិការបង្រ្កាបនោះ ជនសង្ស័យចំនួន២នាក់បានផ្តួលម៉ូតូដែលដឹកសត្វជ្រូកព្រៃចំនួន១ក្បាល និងឈ្លូសចំនួន២ក្បាល រត់គេចចូលក្នុងព្រៃបាត់ស្រមោល ដោយបន្សល់ទុកតែម៉ូតូ និងសាកសពសត្វព្រៃដែលខ្លួនបរបាញ់ក្នុងព្រៃ។ សត្វព្រៃចំនួន០៣ក្បាលនោះត្រូវបានកម្លាំងជំនាញ បានដុតចោលនៅកន្លែងកើតហេតុ រីឯវត្ថុតាងម៉ូតូត្រូវបានយកមករក្សាទុកនៅស្នាក់ដើម្បីចាត់ការតាមនីតិវិធីច្បាប់។ ដែនជម្រកសត្វព្រៃស្រែពកស្ថិតនៅក្នុងភូមិសាស្ត្រខេត្តមណ្ឌលគិរី មានផ្ទៃដីទំហំជាង៣សែនហិកតា ដែលជាជម្រកសម្រាប់ប្រភេទសត្វព្រៃកម្រ និងកំពុងរងគ្រោះជាសកលដូចជា ដំរីអាស៊ី ខ្លារខិន ខ្លាពពក ទន្សោង ត្រយ៉ងយក្ស ត្រយ៉ងចង្កំកស ក្រពើភ្នំ និងប្រភេទមច្ឆជាតិរាប់សិបប្រភេទផ្សេងទៀតជាដើម ដែលជាធនធានដ៏កម្រ និងមានតម្លៃសម្រាប់មនុស្សជាតិក្នុងប្រទេសកមម្ពុជា ក្នុងតំបន់ និងក្នុងសកលលោកទាំងមូល។ គូសបញ្ជាក់ថា តំបន់ការពារធម្មជាតិនៅកម្ពុជាមានចំនួន៧៣តំបន់ មានផ្ទៃដីសរុបចំនួនជាង៧លានហិកតា ស្មើនឹង៣៩ភាគរយនៃផ្ទៃប្រទេស។ តំបន់ធម្មជាតិទាំងនោះស្ថិតនៅក្រោមការគ្រប់គ្រង និងការពារដោយក្រសួងបរិស្ថាន៕ សៅ សុខអេង

​សម្ដេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា បានមានប្រសាសន៍ថា ប្រទេសជាតិត្រូវការធនធានមនុស្សដែលមានសមត្ថភាព ចេះធ្វើការ និងអាចយកចំណេះដឹងទៅអនុវត្តជាក់ស្តែង មិនមែនគ្រាន់តែពឹងផ្អែកលើបច្ចេកវិទ្យា ឬមានសមត្ថភាពត្រឹមតែសួររកចម្លើយពី AI នោះឡើយ។ ការលើកឡើងរបស់នាយករដ្ឋមន្រ្តីកម្ពុជា ដូច្នេះ បានធ្វើឡើងនៅក្នុងពិធីប្រគល់សញ្ញាបត្រជូនដល់និស្សិតជ័យលាភីនៃសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច នៅថ្ងៃទី៦ ខែសីហា ឆ្នាំ២០២៦ ដោយសម្ដេចបានណែនាំដល់និស្សិត និងយុវជន ឱ្យខិតខំកសាងជំនាញរបស់ខ្លួនឱ្យបានច្បាស់លាស់ ដោយមិនចាំបាច់រៀនគ្រប់យ៉ាង ប៉ុន្តែត្រូវមានជំនាញស្នូល ដែលអាចយកទៅប្រើប្រាស់បាន និងបន្តអភិវឌ្ឍខ្លួនបន្ថែម។ សម្ដេច​ ហ៊ុន ម៉ាណែត ក៏បានមើល​ឃើញ​ពី​សក្តានុពលរបស់យុវជនកម្ពុជា​នាពេលបច្ចុប្បន្ន ដែល​មានឱកាសច្រើន។ សម្ដេចបន្តថា​ ការរីកចម្រើននៃបច្ចេកវិទ្យាអាចផ្តល់ព័ត៌មាន និងចំណេះដឹងបានយ៉ាងឆាប់រហ័ស ប៉ុន្តែ​និស្សិត​ត្រូវប្រើប្រាស់ឱ្យបានត្រឹមត្រូវ។  បន្ថែមលើនេះ សម្ដេចក៏​បានអំពាវនាវឱ្យយុវជនមានសមត្ថភាពគ្រប់គ្រងបច្ចេកវិទ្យា និង AI ជាឧបករណ៍ជំនួយ ដោយ​មិនមែនពឹងផ្អែកទាំងស្រុងរហូតបាត់បង់សមត្ថភាពគិត និងធ្វើការដោយខ្លួនឯងទេ។ បើតាមសម្ដេច​ ប្រសិនបើមនុស្សគ្រាន់តែចេះប្រើទូរស័ព្ទ ឬសួរ AI ដោយមិនមានចំណេះដឹង និងសមត្ថភាពផ្ទាល់ខ្លួននោះ អាចនាំឱ្យបច្ចេកវិទ្យាដើរតួនាទីជំនួសមនុស្សទៅវិញ។  យ៉ាងណាក៏ដោយ សម្ដេចធិបតីនាយករដ្ឋមន្រ្តីបានជំរុញឱ្យនិស្សិត និងយុវជនបន្តពង្រឹងសមត្ថភាពផ្ទាល់ខ្លួន ដើម្បីអាចប្រើប្រាស់បច្ចេកវិទ្យាថ្មីៗ ជាពិសេស AI ឱ្យក្លាយជាឧបករណ៍ជួយបង្កើនផលិតភាព និងការអភិវឌ្ឍខ្លួន៕ ខន ណារី

ស្ថានទូតសាធារណរដ្ឋកូរ៉េខាងត្បូងប្រចាំកម្ពុជា បានកោតសរសើរចំពោះភាពក្លាហានដ៏ឧត្តុង្គឧត្តម និងការប្តេជ្ញាចិត្តយ៉ាងមុតមាំរបស់ស្ថាប័នអនុវត្តច្បាប់កម្ពុជា ក្នុងការការពារសន្តិភាព និងសន្តិសុខរបស់ប្រ​ទេសជាតិ​។ ស្ថានទូតបាន​បង្ហាញការកោតសរសើបែបនេះ នៅក្នុងសាររំលែកទុក្ខចំពោះការពលីជីវិតរបស់មន្ត្រីនគរបាល និងប្រជាការពារចំនួន ៥នាក់ ក្នុងប្រតិបត្តិការបង្រ្កាបគ្រឿងញៀន និងអំពើហិង្សាក្នុងគ្រួសារមួយ នៅឃុំអូរសោម ស្រុកវាលវែង ខេត្តពោធិ៍សាត់ កាលពីល្ងាចថ្ងៃទី០៥ ខែសីហា ឆ្នាំ២០២៦។ ស្ថានទូតសាធារណរដ្ឋកូរ៉េ បានសម្តែងនូវសេចក្តីសោកស្តាយចំពោះការពលីជីវិតរបស់មន្ត្រីអនុវត្តច្បាប់ ក្នុងអំឡុងពេលបំពេញភារកិច្ច​ ដោយបានចូលរួមរំលែកមរណទុក្ខដ៏សែនក្រៀមក្រំបំផុតជាមួយក្រុមគ្រួសារនៃសព និងបានជូនពរឱ្យប្រជាការពារដែលរងរបួសធ្ងន់ឆាប់ជាសះស្បើយឡើងវិញផងដែរ។ ក្រោយមានហេតុណ៍កើតឡើង ឯកឧត្តម ស សុខា រដ្ឋមន្ត្រីក្រសួងមហាផ្ទៃ បានណែនាំអគ្គស្នងការដ្ឋាននគរបាលជាតិ និងអាជ្ញាធរខេត្តពោធិ៍សាត់ ត្រូវយកចិត្តទុកដាក់ខ្ពស់ចំពោះការរៀបចំពិធីបុណ្យសពជូនមន្ត្រីនគរបាលជាតិ និងកម្លាំងប្រជាការពារដែលបានពលីជីវិតផងដែរ។ ជាមួយគ្នានេះ រដ្ឋមន្ត្រីក្រសួងមហាផ្ទៃក៏បានបញ្ជាឱ្យសមត្ថកិច្ចស្រាវជ្រាវរកមុខសញ្ញាចែកចាយគ្រឿងញៀនក្នុងមូលដ្ឋានកើតហេតុនោះ រួមទាំងប្រភពគ្រាប់បែកដែលជនបង្កបានប្រើប្រាស់ ដើម្បីយកទៅផ្តន្ទាទាសតាមច្បាប់៕ សេង បារាំង AMS

ជាង​៧ខែក្រោយបទបាញ់ យោធាថៃបានឈូសឆាយផ្ទះសម្បែងរបស់ប្រជាពលរដ្ឋខ្មែរចំនួន៦២៧ខ្នង និងហេដ្ឋារចនាសម្ព័ន្ធនានា នៅក្នុងភូមិព្រៃចាន់ ភូមិជោគជ័យ និងតំបន់បឹងត្រកួន ក្នុងខេត្តបន្ទាយមានជ័យ​។​នេះបើតាមការរបាយការណ៍របស់អង្គការលីកាដូ ដែលបង្ហាញរូបថតជាច្រើនសន្លឹកពីផ្កាយរណបនៃទីភ្នាក់ងារអវកាសអ៊ឺរ៉ុប(European Space Agency’s Sentinel-2) ដែលថតបានកាលពីខែមីនា ឆ្នាំ២០២៦​។ លំនៅឋានរបស់ពលរដ្ឋខ្មែរ ដែលត្រូវបាន​ឈូសឆាយ​បំផ្លាញនោះ គឺស្ថិតនៅក្រោមការកាន់កាប់ដោយខុសច្បាប់របស់យោធាថៃ។ អង្គការលីកាដូបញ្ជាក់លម្អិតថា ​ នៅភូមិជោគជ័យ ផ្ទះ និងហេដ្ឋារចនាសម្ព័ន្ធស៊ីវិលចំនួន ២៧០ត្រូវបានឈូសបំផ្លាញ ហើយក្នុងភូមិព្រៃចាន់ចំនួន ៥៨ខ្នងត្រូវបានបំផ្លាញ រីឯតំបន់បឹងត្រកួនវិញ ផ្ទះចំនួន២៩៩​ខ្នងត្រូវបានកម្ទេច។ នៅតំបន់ទាំងនោះ ប្រជាពលរដ្ឋស៊ីវិលចំនួន ១ ៨៧០គ្រួសារ ស្មើនឹង ៨ ៧៩០នាក់ ក្នុងនោះមានកុមារជិត ២០០០នាក់មិនទាន់អាចត្រឡប់ទៅលំនៅឋានវិញ។​ តំបន់ទាំង៣នេះត្រូវបានយោធាថៃដាក់ទូកុងតឺន័រ និងរាយបន្លាលួស ព័ទ្ធទន្ទ្រានកាន់កាប់ដោយខុសច្បាប់ លាតសន្លឹងលើទឹកដីកម្ពុជាសរុបចំនួន៧៦៣ហិកតា។ ការបំផ្លិចបំផ្លាញផ្ទះសម្បែង និងហេដ្ឋារចនាសម្ព័ន្ធស៊ីវិល គឺត្រូវបានហាមឃាត់ ដោយយោងតាមបញ្ញត្តិមាត្រា ៥៣ នៃអនុសញ្ញាទីក្រុងហ្សឺណែវ។ ច្បាប់សិទ្ធិមនុស្សអន្តរជាតិ ក៏បានការពារសិទ្ធិមានលំនៅឋានសមរម្យ និងហាមឃាត់រាល់ការបំផ្លិចបំផ្លាញផ្ទះប្រជាជនស៊ីវិលតាមទំនើងចិត្ត និងការបណ្តេញដោយបង្ខំ ទោះបីជាដីនោះជាកម្មសិទិ្ធរបស់ជនណា ឬប្រទេសណាក៏ដោយ ។ អ្នករាយការណ៍ពិសេសនៃអង្គការសហប្រជាជាតិ ស្តីពីស្ថានភាពសិទិ្ធមនុស្សនៅកម្ពុជា លោក Tom Andrews បានលើកឡើងនៅក្នុងសេចក្តីថ្លែងការណ៍កាលពីថ្ងៃទី៣១ ខែកក្កដា…

កសិដ្ឋានចិញ្ចឹមគោយកទឹកដោះ និងរោងចក្រកែច្នៃធំជាងគេនៅកម្ពុជា នឹងត្រូវបង្កើតឡើងនៅក្នុងខេត្តពោធិ៍សាត់ លើផ្ទៃដី ១ពាន់ហិកតា ជាមួយទុនវិនិយោគប្រមាណ ៦៨លានដុល្លារ។ គម្រោងដ៏ធំនេះ នឹងចូលរួមចំណែកយ៉ាងសំខាន់បង្កើតឱកាសការងារជាច្រើនដល់ពលរដ្ឋក្នុងតំបន់ ក៏ដូចជាជំរុញវិស័យកសិ-ឧស្សាហកម្មនៅកម្ពុជា។ ឯកឧត្តម ខូយ រីដា អភិបាលខេត្តពោធិ៍សាត់ បានឱ្យដឹងថា ក្រុមហ៊ុន សូណាវិទ្យ (SONAVITH Co., Ltd.) របស់កម្ពុជា បានសហការជាមួយក្រុមហ៊ុន Farm Fresh Berhad ដែលជាក្រុមហ៊ុនផលិតទឹកដោះគោដ៏ធំរបស់ម៉ាឡេស៊ី និងក្រុមហ៊ុន Alpha Group បានបង្កើតក្រុមហ៊ុនរួមគ្នាឈ្មោះ «FARM FRESH PURSAT» ដើម្បីអនុវត្តគម្រោងវិនិយោគដ៏ធំមួយនេះ នៅក្នុងស្រុកវាលវែង។ អភិបាលខេត្តពោធិ៍សាត់ បានចាត់ទុកគម្រោងវិនិយោគតម្លៃ ៦៨លានដុល្លារ នេះថា ជាគម្រោងប្រវត្តិសាស្រ្តដំបូងគេនៅក្នុងខេត្តពោធិ៍សាត់ ដើម្បីផលិតទឹកដោះគោសម្រាប់ផ្គត់ផ្គង់តម្រូវការទីផ្សារក្នុងស្រុក និងឈានទៅដល់ការនាំចេញទៅក្រៅប្រទេសនាពេលអនាគត។ សូមបញ្ជាក់ថា ឧស្សាហកម្មទឹកដោះគោនៅកម្ពុជា បានចាប់ផ្ដើមពង្រីកផលិតកម្មរបស់ខ្លួនជាបន្តបន្ទាប់ ដើម្បីជំនួសការនាំចូលទឹកដោះគោពីប្រទេសថៃ ក៏ដូចជា ដើម្បីបំពេញតម្រូវការក្នុងស្រុក។ ជាមធម្យម ប្រទេសកម្ពុជា ត្រូវការទឹកដោះគោស្រស់ជាង ៣៦ លានលីត្រ ក្នុងមួយឆ្នាំ ឬស្មើនឹង…

ក្រសួងអប់រំ យុវជន និងកីឡា បានរំលឹកឲ្យបេក្ខជន និងគណៈមេប្រយោគរក្សាសុខភាពនិងត្រៀមសម្ភារៈ​ការពារភ្លៀងនៅក្នុងដំណើរការប្រឡងសញ្ញាបត្រមធ្យមសិក្សាទុតិយភូមិឬបាឌុបដែលប្រព្រឹត្តទៅចាប់ពីថ្ងៃទី១០ ខែសីហា ឆ្នាំ២០២៦។ ការរំលឹករបស់ក្រសួងអប់រំនេះ ធ្វើឡើងក្រោយពីក្រសួងធនធានទឹក និងឧតុនិយម បានព្យាករថា ចាប់ពីថ្ងៃទី៦ ដល់​ថ្ងៃទី១៥សីហា ឆ្នាំ២០២៦ នៅតំបន់វាលទំនាប ដូចជាខេត្តបន្ទាយមានជ័យ បាត់ដំបង ពោធិ៍​សាត់ កំពង់ឆ្នាំង សៀមរាប កំពង់ធំ កំពង់ចាម ត្បូងឃ្មុំ ព្រៃវែង កណ្តាល តាកែវ ស្វាយរៀង និងរាជធានីភ្នំពេញ អាចមានភ្លៀងធ្លាក់ជាមួយខ្យល់កន្ត្រាក់ និងផ្គររន្ទះគ្របដណ្តប់លើផ្ទៃដី ៤០%។ ចំណែកនៅតំបន់ខ្ពង់រាបវិញ មានខេត្តកំពង់ស្ពឺ ប៉ៃលិន ឧត្តរមានជ័យ ព្រះវិហារ ក្រចេះ ស្ទឹងត្រែង រតនគិរី មណ្ឌលគិរី ជួរភ្នំដងរែក និងតំបន់ជួរភ្នំក្រវាញ អាចមានភ្លៀងធ្លាក់ជាមួយខ្យល់កន្ត្រាក់ និងផ្គររន្ទះគ្របដណ្តប់លើផ្ទៃដី ៦០%។ សម្រាប់តំបន់មាត់សមុទ្រ ក្នុងនោះមានខេត្តកោះកុង ព្រះសីហនុ កំពត កែប និងជួរភ្នំបូកគោ អាចមានភ្លៀងធ្លាក់ជាមួយខ្យល់កន្ត្រាក់ និងផ្គររន្ទះគ្របដណ្តប់លើផ្ទៃដី ៧០%។ រលកសមុទ្របោកបក់ខ្លាំងដែលមានកម្ពស់មធ្យមអប្បបរមា ០,៥០ម៉ែត្រ និងកម្ពស់មធ្យមអតិបរមា ១,៧៥ម៉ែត្រ។ សូមបញ្ជាក់ថា…

សូមជម្រាបជូនសាធារណៈថា លោក កុក ឆាយ បានបាត់លិខិតសម្គាល់សិទ្ធិកាន់កាប់អចលនវត្ថុ ផ្ទះលេខ ២៩០E0z ផ្លូវលេខ ១២៨ សង្កាត់ មិត្តភាព ខណ្ឌ ៧មករា ចុះថ្ងៃទី១៧ ខែកញ្ញា ឆ្នាំ១៩៩២ ដែលបានទិញពីឈ្មោះ លីម យាង។ សូមជម្រាបថា ចាប់ពីថ្ងៃចេញសេចក្តីជូនដំណឹងនេះតទៅ រាល់ការយកឯកសារខាងលើទៅប្រើប្រាស់ រួមមាន ការដាក់បញ្ចាំ ការធ្វើហ៊ីប៉ូតែក ការផ្ទេរសិទ្ធិ ការលក់ ការធ្វើអំណោយ ឬសកម្មភាពផ្លូវច្បាប់ផ្សេងៗជាមួយបុគ្គល ឬភាគីណាមួយ ត្រូវចាត់ទុកថាជាការប្រើប្រាស់ខុសច្បាប់។