វ៉ាស៊ីនតោន ៖ ប្រធានាធិបតីអាមេរិក លោក ដូណាល់ ត្រាំ បានអះអាងថា លោកមានគំនិតអំពីលទ្ធភាពនៃការបង្កើតសន្តិភាព រវាងរុស្ស៊ី និងអ៊ុយក្រែនហើយ។ នេះបើតាមការចេញផ្សាយរបស់សារព័ត៌មាន Tass នៅថ្ងៃសៅរ៍នេះ។ បើតាមសារព័ត៌មានរុស្ស៊ីមួយនេះ, ប្រធានាធិបតី Donald Trump បានថ្លែងថា សហរដ្ឋអាមេរិកមានគំនិតអំពីទម្រង់នៃកិច្ចព្រមព្រៀងសន្តិភាព ដែលអាចកើតមានរវាងរុស្ស៊ី និងអ៊ុយក្រែន ក្នុងអំឡុងពេលសន្ទនាជាមួយអ្នកសារព័ត៌មាន នៅឯសេតវិមាន។ លោក Trump ត្រូវបានគេសួរថា តើតាមទស្សនៈរបស់ទីក្រុងវ៉ាស៊ីនតោន កិច្ចព្រមព្រៀងដែលអាចទៅរួចសម្រាប់ការដោះស្រាយវិបត្តិនៅអ៊ុយក្រែន គួរតែរួមបញ្ចូលអ្វីខ្លះ។ មេដឹកនាំអាមេរិករូបនេះបានឆ្លើយតបថា «យើងមានគំនិតសម្រាប់សន្តិភាព» ដោយមិនបានផ្តល់ព័ត៌មានលម្អិតអ្វីឡើយ។ មេដឹកនាំអាមេរិករូបនេះបានថ្លែងម្តងទៀតថា លោកធ្លាប់បានដោះស្រាយជម្លោះសង្គ្រាមចំនួន ៨ រួចមកហើយ ខណៈដែលលោកទទួលស្គាល់ថា លោកចាត់ទុកការដោះស្រាយវិបត្តិនៅអ៊ុយក្រែនថាជាកិច្ចការដ៏សាមញ្ញបំផុត។ លោកប្រធានាធិបតី Donald Trump បានលើកឡើងថា ដំណោះស្រាយនេះត្រូវបានរារាំងដោយ «បញ្ហានៃបុគ្គលិកលក្ខណៈ» រវាងថ្នាក់ដឹកនាំនៃប្រទេសរុស្ស៊ី និងអ៊ុយក្រែន។ លោក Trump បាននិយាយថា «ពួកគេមានការស្អប់ខ្ពើមគ្នាខ្លាំង ហើយវាជាឧបសគ្គរារាំងពួកគេ»។ នេះបើតាម Tass ដដែល។ ការលើកឡើងនេះ…

ហ្សាកាតា ៖ អាជ្ញាធរប្រទេសឥណ្ឌូណេស៊ីបានឱ្យដឹង កាលពីថ្ងៃសុក្រថា ផ្សែងដែលបណ្តាលមកពីភ្លើងឆេះព្រៃបានធ្វើឱ្យគុណភាពខ្យល់ធ្លាក់ចុះដល់កម្រិតគ្រោះថ្នាក់ នៅក្នុងតំបន់មួយចំនួននៃកោះ Borneo (បូណេអូ) រាលដាលដល់ ៣ប្រទេស ខណៈដែលកម្លាំងមនុស្សរាប់ពាន់នាក់ត្រូវបានដាក់ពង្រាយ ដើម្បីទប់ទល់នឹងអគ្គិភ័យទាំងនេះ។ បើតាម Arab News, ប្រទេសនៅអាស៊ីអាគ្នេយ៍ ដែលមានកោះជាច្រើនមួយនេះ បាននិងកំពុងតស៊ូ អស់រយៈពេលជាច្រើនសប្តាហ៍ ដើម្បីទប់ស្កាត់ភ្លើងឆេះព្រៃ និងផ្សែងដ៏ក្រាស់ដែលបានហោះហើរទៅកាន់ប្រទេសម៉ាឡេស៊ី សិង្ហបុរី និង ហ្វីលីពីន ផងដែរ។ អ្នកនាំពាក្យទីភ្នាក់ងារជាតិគ្រប់គ្រងគ្រោះមហន្តរាយបាននិយាយថា នៅក្នុងខេត្ត កាលីម៉ាន់តាន់ខាងលិច ដែលជាតំបន់មួយរងផលប៉ះពាល់ធ្ងន់ធ្ងរជាងគេ, ផ្សែងមានប្រភពពីអគ្គិភ័យបានធ្វើឱ្យគុណភាពខ្យល់ធ្លាក់ចុះដល់កម្រិតគ្រោះថ្នាក់ ដោយមានចម្ងាយមើលឃើញ តិចជាងមួយគីឡូម៉ែត្រ។ យ៉ាងណា អ្នកពន្លត់អគ្គិភ័យជាង ១ម៉ឺន៤ពាន់នាក់ត្រូវបានដាក់ពង្រាយ នៅក្នុងខេត្តមួយនេះ ហើយបានគ្រប់គ្រងពន្លត់ភ្លើងដោយជោគជ័យ លើផ្ទៃដីទំហំជិត ៤៣០ហិកតា កាលពីថ្ងៃព្រហស្បតិ៍។ ប្រទេស ឥណ្ឌូណេស៊ី មានផ្ទៃដីវាលភក់ ស្រទាប់សរីរាង្គដ៏ធំទូលាយ ដែលជាប្រព័ន្ធអេកូឡូស៊ីមួយមានស្រទាប់នៃសារធាតុសរីរាង្គដែលរលួយមិនទាន់អស់។ ដីប្រភេទនេះគឺជាកន្លែងស្តុកកាបូនដ៏សំខាន់ នៅពេលវាមានសំណើម ប៉ុន្តែ ងាយឆេះខ្លាំងនៅពេលដែលវាស្ងួត ហើយភ្លើងអាចឆេះយឺតៗ នៅក្រោមដី និង អាចឆេះឡើងវិញ យ៉ាងឆាប់រហ័ស៕ ប្រភព…

សាណា ៖ មនុស្សជាង ១២០នាក់នៅប្រទេសយេម៉ែនបានស្លាប់ អំឡុងការប៉ះទង្គិចគ្នាដ៏ធ្ងន់ធ្ងរបំផុតមិនធ្លាប់កើតមាន ក្នុងរយៈពេលប៉ុន្មានឆ្នាំចុងក្រោយនេះ ចំពេលដែលមានការវាយលុកតាមផ្លូវ ពីសំណាក់ក្រុមឧទ្ទាមហ៊ូទី។ យោងតាមប្រភពព័ត៌មាន ដែលបានប្រាប់ដល់ទីភ្នាក់ងារព័ត៌មាន AFP កាលពីថ្ងៃសុក្រ, ការវាយលុកដ៏ធំមួយដោយក្រុមឧទ្ទាម Houthi ដើម្បីដណ្តើមការគ្រប់គ្រងលើច្រកផ្លូវចូលទៅកាន់សមុទ្រក្រហម បានបណ្តាលឱ្យមនុស្សជាង ១២០នាក់ស្លាប់។ នេះគឺជាការប៉ះទង្គិចគ្នាដែលមានអ្នកស្លាប់ច្រើនបំផុត នៅក្នុងប្រទេសនេះ អំឡុងរយៈពេលប៉ុន្មានឆ្នាំមកនេះ។ ការប្រយុទ្ធគ្នាបានផ្ទុះឡើង កាលពីថ្ងៃព្រហស្បតិ៍ បន្ទាប់ពីក្រុម Houthi ដែលមានអ៊ីរ៉ង់គាំទ្រ បានបើកការវាយលុកតាមផ្លូវគោក រួមជាមួយនឹងការវាយប្រហារដោយគ្រាប់រ៉ុក្កែត និងយន្តហោះគ្មានមនុស្សបើក នៅជិតតំបន់ឆ្នេរសមុទ្រ ដើម្បីដណ្តើមការគ្រប់គ្រងលើច្រកសមុទ្រ Bab al-Mandab ដែលតូចចង្អៀត និងស្ថិតនៅច្រកចូលភាគខាងត្បូងនៃសមុទ្រក្រហម។ ប្រទេសយេម៉ែន ដែលបានជាប់ផុងនៅក្នុងជម្លោះស៊ីវិល អស់រយៈពេលជាងមួយទសវត្សរ៍មកហើយនោះ បានក្លាយជាប្រទេសចុងក្រោយគេ ដែលត្រូវបានទាញចូលទៅក្នុងសង្គ្រាមនៅមជ្ឈិមបូព៌ា កាលពីខែកក្កដា ចំពេលដែលក្រុម Houthi បានបំពានលើកិច្ចព្រមព្រៀងឈប់បាញ់ឆ្នាំ ២០២២ ជាមួយរដ្ឋាភិបាល ដែលគាំទ្រដោយ អារ៉ាប៊ី សាអូឌីត។ ចាប់តាំងពីពេលនោះមក, ក្រុម Houthi បានដាក់ចេញនូវការបិទផ្លូវសមុទ្រ ប្រឆាំងនឹងអារ៉ាប៊ីសាអូឌីត និងបានវាយប្រហារ ម្តងហើយម្តងទៀត…

វ៉ាស៊ីនតោន ៖ សហរដ្ឋអាមេរិក កាលពីថ្ងៃសុក្រ បានប្រកាសពីការអនុម័ត លើការលក់គ្រាប់បែក, ឧបករណ៍កំណត់គោលដៅ, និងសម្ភារៈផ្សេងទៀតក្នុងតម្លៃ ៥ ពាន់លានដុល្លារ ទៅឱ្យអារ៉ាប៊ី សាអូឌីត ដែលជាប្រទេសរងការវាយប្រហារជាបន្តបន្ទាប់ ក្នុងអំឡុងពេលនៃសង្គ្រាមរវាងសហរដ្ឋអាមេរិក-អ៊ីស្រាអែល ប្រឆាំងនឹងអ៊ីរ៉ង់។ ក្រសួងការបរទេសអាមេរិកបានថ្លែងនៅក្នុងសេចក្តីថ្លែងការណ៍មួយថា «ការលក់ដែលបានស្នើឡើងនេះ នឹងលើកកម្ពស់សមត្ថភាពការពារដែនអាកាសរបស់អារ៉ាប៊ីសាអូឌីត ដើម្បីទប់ទល់នឹងការគំរាមកំហែងក្នុងតំបន់ទាំងបច្ចុប្បន្ន និងអនាគត ពង្រឹងការការពារទឹកដីរបស់ខ្លួន និងបង្កើនសមត្ថភាពប្រតិបត្តិការរួមគ្នាជាមួយប្រព័ន្ធនានាដែលប្រើប្រាស់ដោយកងកម្លាំងអាមេរិក និងដៃគូផ្សេងទៀតនៅក្នុងតំបន់ឈូងសមុទ្រ»។ ក្រសួងនេះបានបញ្ជាក់ថា ការលក់នេះក៏នឹង «គាំទ្រដល់គោលដៅគោលនយោបាយការបរទេស និងគោលបំណងសន្តិសុខជាតិរបស់សហរដ្ឋអាមេរិក តាមរយៈការលើកកម្ពស់សន្តិសុខរបស់សម្ព័ន្ធមិត្តដ៏សំខាន់មួយដែលមិនមែនជាសមាជិកអង្គការណាតូ (NATO)។ អារ៉ាប៊ី សាអូឌីត បានក្លាយជាគោលដៅនៃការវាយប្រហារដោយយន្តហោះគ្មានមនុស្សបើក និងមីស៊ីល ពីសំណាក់កងកម្លាំងអ៊ីរ៉ង់ និងក្រុមឧទ្ទាមហ៊ូទី នៅយេម៉ែន ដែលគាំទ្រដោយទីក្រុងតេហេរ៉ង់ ចាប់តាំងពីសហរដ្ឋអាមេរិក និងអ៊ីស្រាអែលបានបើកប្រតិបត្តិការសង្គ្រាមប្រឆាំងនឹងអ៊ីរ៉ង់កាលពីដើមឆ្នាំនេះ។ ក្រសួងការបរទេសបានជូនដំណឹងទៅកាន់សភា អំពីសំណើលក់គ្រាប់បែកទៅឱ្យទីក្រុងរីយ៉ាដ ដែលនៅត្រូវការការអនុម័តពីសមាជិកសភាអាមេរិកជាមុនសិន៕ ប្រភព ៖ AFP ប្រែសម្រួល ៖ សារ៉ាត

តូក្យូ ៖ ទីភ្នាក់ងារឧតុនិយមជប៉ុន ហៅកាត់ JMA បានចេញការព្រមានកម្រិតខ្ពស់បំផុត អំពីការបាក់ដីសម្រាប់ទីប្រជុំជន Yakushima ស្ថិតក្នុងខេត្ត Kagoshima នាថ្ងៃសៅរ៍នេះ ពោលគឺបន្ទាប់ពីមានភ្លៀងធ្លាក់ខ្លាំងកម្រិតកំណត់ត្រាថ្មី។ បើតាម anadolu, អាជ្ញាធរជាតិទទួលបន្ទុកផ្នែកឧតុនិយម និងការតាមដានភូគព្ភសាស្ត្របានបញ្ជាក់នៅក្នុងសេចក្តីថ្លែងការណ៍មួយថា «មានលទ្ធភាពខ្ពស់ណាស់ដែលគ្រោះមហន្តរាយបានកើតឡើងរួចហើយ នៅក្នុងតំបន់ដែលត្រូវបានកំណត់ថា ជាតំបន់ប្រឈមនឹងហានិភ័យនៃការបាក់ដី» ដោយកត់សម្គាល់ថា បរិមាណទឹកភ្លៀងនេះគឺ «មិនធ្លាប់មានពីមុនមក»។ ទីភ្នាក់ងារនេះបានសង្កត់ធ្ងន់ថា អាយុជីវិតរបស់ប្រជាពលរដ្ឋកំពុងស្ថិតក្នុង «គ្រោះថ្នាក់ជាបន្ទាន់» ហើយពួកគេត្រូវតែចាត់វិធានការភ្លាមៗដើម្បីធានាសុវត្ថិភាព ខណៈដែលព្យុះនៅតែបន្តកើតមាន។ អាជ្ញាធរបានណែនាំប្រជាពលរដ្ឋថា ប្រសិនបើការធ្វើដំណើរទៅកាន់មជ្ឈមណ្ឌលជម្លៀសខ្លួនដែលបានកំណត់មានហានិភ័យខ្លាំងពេក, ពួកគេគួរតែផ្លាស់ទៅកាន់អគារដែលស្ថិតនៅឆ្ងាយពីជម្រាលភ្នំ និងស្ទឹង។ ទីភ្នាក់ងារឧតុនិយម JMA បានព្រមានថា ការរង់ចាំរហូតដល់មានការចេញសេចក្តីព្រមានពិសេស ទាល់តែពេលនោះទើបធ្វើសកម្មភាព គឺជារឿយៗ មានន័យថា វាហួសពេលទៅហើយក្នុងការគេចចេញដោយសុវត្ថិភាព។ ទីភ្នាក់ងារនេះបានបន្ថែមថា «ដើម្បីការពារអាយុជីវិតរបស់អ្នក និងមនុស្សជាទីស្រឡាញ់របស់អ្នក សូមកុំរង់ចាំ ព្រមទាំង បានអំពាវនាវឱ្យសាធារណជនអនុវត្តតាមការណែនាំរបស់អាជ្ញាធរ»៕ ប្រភព ៖ anadolu ប្រែសម្រួល ៖ សារ៉ាត