ស្ថានទូតរុស្ស៊ីប្រចាំកម្ពុជា បានព្រមានពលរដ្ឋខ្មែរឱ្យមានការប្រុងប្រយ័ត្នចំពោះការផ្សព្វផ្សាយជ្រើសរើសបុគ្គលិកតាមបណ្តាញសង្គម ដើម្បីទៅធ្វើការក្នុងវិស័យសន្តិសុខនៅប្រទេសរុស្ស៊ី ដោយសន្យាផ្តល់ប្រាក់បៀវត្សរ៍ខ្ពស់។ ស្ថានទូតបានបញ្ជាក់ថា ការផ្សព្វផ្សាយទាំងនេះជាព័ត៌មានដែលមិនអាចទុកចិត្តបាន និងមិនមានការអនុញ្ញាតពីអាជ្ញាធរពាក់ព័ន្ធឡើយ។ ស្ថានទូតចាត់ទុកថា នេះជាល្បិចបោកប្រាស់មួយទៀត ដែលប្រើប្រាស់និមិត្តសញ្ញារបស់សហព័ន្ធរុស្ស៊ី ដើម្បីបម្រើគោលបំណងឧក្រិដ្ឋកម្ម។ ក្នុងន័យនេះ ស្ថានទូតបានអំពាវនាវឱ្យសាធារណជនមានការប្រុងប្រយ័ត្នខ្ពស់ និងកុំប្រញាប់ឆ្លើយតបចំពោះការផ្តល់ជូនការងារដែលមានលក្ខណៈគួរឱ្យសង្ស័យ ឬសន្យាផ្តល់ប្រាក់ខែខ្ពស់។ ជាពិសេស ត្រូវពិនិត្យផ្ទៀងផ្ទាត់ឱ្យបានច្បាស់លាស់អំពីអត្តសញ្ញាណនិយោជក ឬភ្នាក់ងារជ្រើសរើសបុគ្គលិក លក្ខខណ្ឌការងារ និងនីតិវិធីរៀបចំឯកសារផ្សេងៗ។ ជាមួយគ្នានេះ ស្ថានទូតបានណែនាំឱ្យពលរដ្ឋកុំផ្ទេរប្រាក់ កុំផ្តល់ព័ត៌មានលម្អិតអំពីលិខិតឆ្លងដែន ឬចែករំលែកច្បាប់ចម្លងឯកសារផ្ទាល់ខ្លួនទៅឱ្យបុគ្គលដែលមិនស្គាល់អត្តសញ្ញាណឡើយ រហូតទាល់តែបានផ្ទៀងផ្ទាត់ច្បាស់ថា ការផ្តល់ជូនការងារនោះមានភាពស្របច្បាប់ និងពិតប្រាកដ។ ស្ថានទូតក៏បានបញ្ជាក់បន្ថែមថា ការប្រើប្រាស់និមិត្តសញ្ញា ឬរូបភាពពាក់ព័ន្ធនឹងប្រទេសរុស្ស៊ី មិនមែនមានន័យថា ការផ្តល់ជូនការងារនោះមានលក្ខណៈផ្លូវការ ឬមានទំនាក់ទំនងជាមួយអាជ្ញាធររុស្ស៊ីឡើយ ហើយបើពលរដ្ឋមានការសង្ស័យចំពោះការផ្សព្វផ្សាយការងារនៅប្រទេសរុស្ស៊ី គួរស្វែងរកព័ត៌មានបញ្ជាក់ពីប្រភពដែលមានសមត្ថកិច្ច រួមទាំងស្ថានទូតរុស្ស៊ីប្រចាំកម្ពុជាផងដែរ។ ករណីនេះក៏ស្រដៀងគ្នាទៅនឹងការព្រមានកាលពីថ្ងៃទី២៣ ខែតុលា របស់ក្រសួងការងារនិងបណ្តុះបណ្តាលវិជ្ជាជីវៈ ពាក់ព័ន្ធនឹងការផ្សព្វផ្សាយ ឬការដើរអូសទាញពីសំណាក់បុគ្គល ឬក្រុមហ៊ុនណាមួយ អំពីការជ្រើសរើសបុគ្គលិក ឬពលករកម្ពុជាទៅធ្វើការនៅប្រទេសអាមេនី។ ឯកឧត្តម ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានប្រាប់បណ្តាញព័ត៌មាន AMS ថា កម្ពុជាពុំទាន់មានកិច្ចព្រមព្រៀងស្តីពីការផ្លាស់ប្តូរកម្លាំងពលកម្ម និងការបញ្ជូនបុគ្គលិក ឬពលករកម្ពុជាទៅធ្វើការនៅប្រទេសអាមេនី…

ឯកឧត្តម ហង្ស ពុទ្ធា ប្រធានអ្នកនាំពាក្យគណៈកម្មាធិការជាតិរៀបចំការបោះឆ្នោតហៅកាត់ថា គ.ជ.ប ប្រាប់បណ្ដាញព័ត៌មាន AMS នៅថ្ងៃសុក្រទី៣០ ខែតុលា ឆ្នាំ២០២៦នេះថា ចំនួនតួលេខបណ្ដោះអាសន្ននៃបញ្ជីឈ្មោះបោះឆ្នាំ២០២៦បានកើនជាង ១០លាននាក់ បន្ទាប់ពីការពិនិត្យបញ្ជីឈ្មោះ និងចុះឈ្មោះបោះឆ្នោតឆ្នាំ២០២៦ដំណើរការបាន ២៤ថ្ងៃ ។ ប្រធានអ្នកនាំពាក្យ គ.ជ.ប បានគូសបញ្ជាក់ថា កំណើនតួលេខឡើងខាងលើនេះ គឺដោយសារតែមានការចូលរួមផ្សព្វផ្សាយពីគ្រប់ភាគីពាក់ព័ន្ធ ដែលគិតត្រឹមថ្ងៃទី ៣០​តុលានេះ មានអ្នកមកចុះឈ្មោះបោះឆ្នោតថ្មីសរុបជិត ៣០ម៉ឺននាក់។ ជាមួយគ្នានេះក៏មានអ្នកមកធ្វើបច្ចុប្បន្នភាពទិន្នន័យជីវមាត្រ ថតរូប និងផ្ដិតមេដៃឡើងវិញ មានចំនួនជាង ៧៥ម៉ឺននាក់។ ឯកឧត្តម ហង្ស ពុទ្ធា បានឲ្យដឹងផងដែរថា ក្រៅពីពិនិត្យបញ្ជីឈ្មោះ និងចុះឈ្មោះបោះឆ្នោតថ្មី គ.ជ.ប​ គ្រោងនឹងលុបឈ្មោះអ្នកបោះឆ្នោតដែលមានក្នុងបញ្ជីបោះឆ្នោតឆ្នាំ២០២៦​ចំនួន ១៨ម៉ឺននាក់ផងដែរ។ បើតាម គ.ជ.ប ដំណើរការធ្វើបច្ចុប្បន្នភាពបញ្ជីបោះឆ្នោតឆ្នាំ២០២៦របស់បងប្អូនប្រជាពលរដ្ឋ គឺពិតជាមានសារៈសំខាន់ណាស់ សម្រាប់ការត្រៀមខ្លួនប្រើសិទ្ធិចូលរួមក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៦ ឆ្នាំ២០២៧។ ការចូលរួមនេះក៏ជាការរួមចំណែកលើកកម្ពស់លទ្ធិប្រជាធិបតេយ្យសេរីពហុបក្សនៅកម្ពុជាឱ្យកាន់តែចាក់គ្រឹះរឹងមាំនៅថ្នាក់មូលដ្ឋាន។ សូមបញ្ជាក់ថា ដំណើរការពិនិត្យបញ្ជីឈ្មោះ និងចុះឈ្មោះបោះឆ្នោតថ្មីឆ្នាំ២០២៦នឹងបិទបញ្ចប់ត្រឹមថ្ងៃទី៣០ខែវិច្ឆិកាខាងមុខនេះ៕ សេង បារាំង AMS

អគ្គនាយកដ្ឋានអន្តោប្រវេសន៍ បានជួយសម្រួល​បែបបទជូនពលរដ្ឋចេញទៅធ្វើការស្របច្បាប់ជាង ៥ពាន់នាក់ និងរឹតបន្តឹងបង្ក្រាប​បទល្មើស​ឆ្លងដែន​ជិត៣ពាន់លើក ក្នុងរយៈពេល ៩ខែ ឆ្នាំ២០២៦។ ក្នុងរយៈពេល៩ខែ អគ្គនាយកដ្ឋានអន្តោ​ប្រវេសន៍​នៃក្រសួងមហាផ្ទៃ បានសម្រួលបែបបទជូន​ប្រជាពលរដ្ឋ​ខ្មែរជាង ៥ ៤០០នាក់ ចេញទៅធ្វើការ​នៅក្រៅប្រទេសដោយស្របច្បាប់ ព្រមទាំងបាន​បង្កើនការរឹតបន្តឹងសន្តិសុខនៅតាមច្រកទ្វារព្រំដែន ដោយបង្ក្រាបបទល្មើស​ចេញ-ចូលប្រទេសបានជិត ៣ ពាន់លើក ទប់ស្កាត់ការជួញដូរមនុស្ស និងបញ្ជូនជន​សង្ស័យទៅតុលាការជាបន្តបន្ទាប់។ ជាមួយគ្នានោះសមត្ថកិច្ចក៏បានទទួលពលរដ្ឋខ្មែរដែលអាជ្ញាធរបរទេសបញ្ជូនត្រឡប់មកវិញសរុប ៥.៥៦៨នាក់ ក្នុងនោះមកពីប្រទេស​ថៃ​ច្រើនជាងគេរហូតដល់ ៤.៤៧៧នាក់ ។ក្រៅពីនេះមានម៉ាឡេស៊ី ចិន កូរ៉េខាង​ត្បូង សហរដ្ឋអាម៉េរិក វៀតណាម សិង្ហបុរី ជប៉ុន ហ្វីលីពីន ឡាវ និងកាណាដា។ទន្ទឹមនេះមន្ត្រីអន្តោប្រវេសន៍បានទប់ស្កាត់ពលរដ្ឋ ២១៨នាក់ មិនឱ្យចាកចេញពីប្រទេសដោយសង្ស័យ​ពាក់ព័ន្ធ​នឹង​អំពើជួញដូរមនុស្ស។ ស្របពេលជាមួយគ្នានេះ ក្នុងការងារត្រួតពិនិត្យបទ​ល្មើស​ចេញ-ចូលប្រទេស សមត្ថកិច្ចបានរកឃើញ​បទល្មើសសរុបជិត ៣ពាន់លើក មានមនុស្ស ៥.២៦២នាក់ ស្មើនឹង ៩៣សញ្ជាតិ។ ចំពោះបទល្មើសចូលប្រទេស មាន ២.២៨៧លើក ស្មើនឹងចំនួនមនុស្ស ៤.២៧១នាក់ ដោយសមត្ថកិច្ចបាន​ឃាត់ខ្លួនបញ្ជូនទៅតុលាការ ១០៣នាក់ និងបដិសេធ​មិនឱ្យចូលដោយបញ្ជូនត្រឡប់ទៅវិញ ៤.១៦៨នាក់ ដោយសារ​មានឈ្មោះក្នុងបញ្ជីមុខសញ្ញា ប្រើប្រាស់​លិខិតឆ្លងដែន ឬស្ទីកគ័រក្លែងក្លាយ…

ក្រុមការងារជំនាញនៃក្រសួង​​​វប្បធម៌ និងវិចិត្រសិល្បៈ បានរកឃើញរចនាសម្ព័ន្ធសំណង់ឥដ្ឋបុរាណ ជើងទម្រថ្មភក់ ព្រមទាំងបំណែក​កុលាលភាជន៍ជាច្រើន នៅទីតាំង «ទួលយាយពុត» ស្ថិតក្នុងស្រុកអង្គរបុរី ខេត្តតាកែវ ដែលការសន្និដ្ឋានបឋមបញ្ជាក់ថាជាទីតាំងគោរពបូជា​សាសនានាសម័យបុរាណ ស្ថិតក្នុងចន្លោះសតវត្សរ៍ទី ៦ ដល់ទី ៧ នៃគ្រិស្តសករាជ។ ក្រុមការងារជំនាញនៃនាយកដ្ឋានបុរាណវិទ្យា ក្រសួងវប្បធម៌និងវិចិត្រសិល្បៈ បានធ្វើកំណាយស្រាវជ្រាវរយៈពេលដប់ថ្ងៃ នៅ​ប្រាសាទ​ភ្នំដា និងទួលយាយពុត ក្នុងស្រុកអង្គរបុរី ខេត្តតាកែវ ដោយបានរកឃើញគ្រឹះឥដ្ឋប្រាសាទមុនសម័យអង្គរ។ តាមរយៈបំណែកកុលាលភាជន៍ ទីតាំងទួលយាយពុតត្រូវបានអ្នកជំនាញប៉ាន់ស្មានថា ស្ថិតក្នុងចន្លោះសតវត្សរ៍ទី៦ ដល់ទី៧ ប៉ុន្តែសំណង់​ឥដ្ឋ​នៅ​មិនទាន់អាចកំណត់អាយុកាលច្បាស់លាស់បានទេ ដោយសារមានការបាក់បែក និងមានការរៀបចំខឿនឡើងវិញនៅសម័យ​ក្រោយៗ។​ ក្រុមជំនាញបានសិក្សាប្រៀបធៀបបច្ចេកទេសនិងខ្នាតឥដ្ឋ និងយកសំណាកធ្យូង ឬសារធាតុសរីរាង្គពីស្រទាប់ដីទៅពិសោធ​តាម​វិធីសាស្ត្រ​វិទ្យាសាស្ត្របន្តទៀត។ លោក ឡេង វិទូ ប្រធាននាយកដ្ឋានបុរាណវិទ្យា និងបុរេប្រវត្តិវិទ្យា បានសន្និដ្ឋានជាបឋមថា «ទួលយាយពុត» គឺជាទីតាំងគោរពបូជា​សាសនា​សម័យបុរាណ ដោយផ្អែកលើសំណង់ឥដ្ឋបុរាណ និងបំណែកជើងទម្រថ្មភក់។ ក្នុងការធ្វើកំណាយនេះ ក្រុមជំនាញបានរកឃើញ​ភស្តុតាងសំខាន់ៗរួមមាន គ្រឹះនិងខឿនសំណង់ឥដ្ឋបច្ចេកទេសបុរាណ បំណែកកុលាលភាជន៍ជាច្រើនដូចជាឆ្នាំង ផើង និងកុណ្ឌី ដែល​សម្គាល់​ពីសម័យនគរភ្នំដល់សម័យចេនឡា ព្រមទាំងសំណល់ឆ្អឹងសត្វសម័យបុរាណ។ ក្រសួងវប្បធម៌ និងវិចិត្រសិល្បៈ បានដាក់ចេញវិធានការអភិរក្សទីតាំងកំណាយ តាមរយៈការលុបរណ្តៅការពាររចនាសម្ព័ន្ធឥដ្ឋ​តាម​បច្ចេកទេស…