យុទ្ធនាការមិនបន្ធូរដៃរបស់សមត្ថកិច្ចនៅក្នុងខែសីហាបានបោសសម្អាត និងឃាត់ខ្លួនក្រុមក្មេងទំនើងរួមទាំងអ្នកញៀន​ល្បែង​ស៊ីសង​ខុសច្បាប់បានរហូតដល់ទៅជាង ៤០០នាក់។ កម្លាំងនគរបាលនៅតាមមូលដ្ឋាន ទូទាំងប្រទេស បានល្បាតជាប់ជាប្រចាំដោយ​រកឃើញ​និង ឃាត់ខ្លួន ក្រុមក្មេងទំនើង រួមទាំងអ្នកញៀនល្បែងស៊ីសងខុសច្បាប់សរុបចំនួន ៤១៣នាក់។ តួលេខនេះមានការកើនឡើង ១៣​នាក់ បើធៀបនឹងខែ កក្កដាកន្លងទៅ ។ក្នុងខែសីហាដដែល សមត្ថកិច្ចបានកសាងសំណុំ រឿងជនសង្ស័យចំនួន ៣៩៩ នាក់បញ្ជូនទៅ​កាន់តុលាការដើម្បីផ្តន្ទា ទោសតាមច្បាប់។ យោងតាមទិន្នន័យពីក្រសួងមហាផ្ទៃនៅថ្ងៃសុក្រទី៤ ខែកញ្ញាបាន ឱ្យដឹងថា ក្នុងចំណោមប្រតិបត្តិការសរុបបទល្មើសក្មេងទំនើង​មាន​ចំនួន ៨១ករណីបង្រ្កាបដោយសមត្ថកិច្ច និងឃាត់ខ្លួនបាន ៣៦៤នាក់ បញ្ជូនទៅតុលាការទាំងអស់។ដោយឡែកបទល្មើស​ល្បែងស៊ីសងខុស ច្បាប់មានចំនួន ២២ករណី ឃាត់ខ្លួនមនុស្ស ៤៩នាក់ ក្នុងនោះ ៣៥ នាក់ ត្រូវបញ្ជូនទៅតុលាការ និង ១៤នាក់​ទៀតត្រូវបានអប់រំណែនាំ ឱ្យធ្វើកិច្ចសន្យាបញ្ឈប់សកម្មភាព។ ប្រតិបត្តិការក្នុងខែសីហា បានគ្របដណ្តប់លើរាជធានី-ខេត្តចំនួន ១៤ រួមមាន រាជធានីភ្នំពេញ ខេត្តកណ្តាល កំពង់ស្ពឺ តាកែវ ព្រះសីហនុ ក្រចេះ រតនគិរី ឧត្តរមានជ័យ សៀមរាប ពោធិ៍សាត់ ត្បូងឃ្មុំ កំពត…

អាជ្ញាធរជាតិអប្សរាបានដំឡើងកៅអីនៅតាមប្រាសាទមួយចំនួនក្នុងរមណីយដ្ឋានអង្គរ ដើម្បីសម្រួលដល់ការអង្គុយសម្រាកបំបាត់ភាពនឿយហត់ ព្រមទាំងអាចអង្គុយទស្សនាប្រាសាទពីចម្ងាយបានដោយក្តីរីករាយ។ ក្នុងឆ្នាំ២០២៦នេះ នាយកដ្ឋានអភិវឌ្ឍន៍ទេសចរណ៍ និងវប្បធម៌នៃអាជ្ញាធរជាតិអប្សរា បានរៀបចំដំឡើងកៅអីនៅតាមប្រាសាទបុរាណសំខាន់ៗ និងទីតាំងចាំបាច់នានាមួយចំនួនក្នុងរមណីយដ្ឋានអង្គរ ដើម្បីឱ្យភ្ញៀវទេសចរបានអង្គុយសម្រាកយកកម្លាំង បំបាត់ភាពនឿយហត់នៅពេលដើរទស្សនាពីប្រាសាទមួយទៅប្រាសាទមួយ។ ពិសេសគឺទេសចរវ័យចំណាស់ ក្មេងតូចៗ និងជនពិការ អាចអង្គុយរង់ចាំ ឬអង្គុយទស្សនាប្រាសាទពីចម្ងាយបានដោយក្តីរីករាយ។ លោក ទេស សុធីរ អនុប្រធាននាយកដ្ឋានអភិវឌ្ឍន៍ទេសចរណ៍ និងវប្បធម៌ ឱ្យដឹងថា ការដំឡើងកៅអីអង្គុយនៅតាមប្រាសាទ ធ្វើឡើងដោយបានសិក្សាយ៉ាងលម្អិតទៅលើទីតាំង ចំនួនភ្ញៀវទេសចរ និងតម្រូវការរបស់ភ្ញៀវទេសចរ ដើម្បីសម្រួលដល់ការអង្គុយសម្រាកបំបាត់ភាពនឿយហត់នៅពេលដែលដើរទស្សនាប្រាសាទ។ ម្យ៉ាងទៀត ការដំឡើងកៅអីសម្រាប់ទេសចរអង្គុយសម្រាកនៅតាមប្រាសាទ ជួយកាត់បន្ថយភ្ញៀវទេសចរអង្គុយលើថ្មប្រាសាទ កាត់បន្ថយបញ្ហាកកស្ទះនៅក្នុងប្រាសាទ រួមចំណែកក្នុងកិច្ចការអភិរក្សប្រាសាទបុរាណដែលមានអាយុរាប់រយឆ្នាំមកហើយ។ លោក ទេស សុធីរ បន្តថា កៅអីដែលរៀបចំដំឡើងនៅតាមទីតាំងប្រាសាទនីមួយៗ គឺក្រោមម្លប់ឈើអាចឱ្យទេសចរអង្គុយសម្រាកលំហែគយគន់ទេសភាព និងប្រាសាទបានយ៉ាងល្អ អមជាមួយបរិយាកាសស្ងប់ស្ងាត់ បង្កើតបានអារម្មណ៍ស្រស់ស្រាយ ទទួលបានបទពិសោធន៍ល្អៗក្នុងការទស្សនានៅក្នុងរមណីយដ្ឋានអង្គរ។ អនុប្រធានរូបនេះ បញ្ជាក់ថា នៅក្នុងឆ្នាំ២០២៦នេះ អាជ្ញាធរជាតិអប្សរា មានគម្រោងដំឡើងកៅអីនៅតាមប្រាសាទបុរាណ និងទីតាំងចាំបាច់នានាក្នុងរមណីយដ្ឋានអង្គរ សរុបជាកៅអីចំនួន២២៥កៅអី។ ក្រុមការងារក៏បានសិក្សាអំពីបរិស្ថាន និងទីតាំងទេសភាពវប្បធម៌នីមួយៗយ៉ាងច្បាស់លាស់មុននឹងដំឡើងគ្រឿងបរិក្ខារ ដោយសិក្សាទៅលើទំហំរបស់ប្រាសាទ និងចំនួនភ្ញៀវចូលទស្សនា។ ក្រុមការងារជ្រើសរើសយកទីតាំងយ៉ាងសមស្របមិនប៉ះពាល់ដល់ទេសភាពវប្បធម៌ ហើយថែមទាំងអាចទាក់ទាញឱ្យភ្ញៀវទេសចរអាចគយគន់ និងថតយករូបភាពបានស្អាតទៀតផង។…

ក្រសួងទេសចរណ៍គ្រោងរៀបចំព្រឹត្តិការណ៍រត់ឆ្លងកាត់ឧបសគ្គលើភ្នំបូកគោ ក្រោមប្រធានបទ «រត់ដើម្បីទេសចរណ៍បៃតងលើភ្នំបូកគោ»។ ក្រសួងទេសចរណ៍ និងរដ្ឋបាលខេត្តកំពត បានសម្រេចយកថ្ងៃទី៤ ខែតុលា ឆ្នាំ២០២៦ ខាងមុខ ដើម្បីរៀបចំព្រឹត្តិការណ៍រត់ឆ្លងកាត់ឧបសគ្គ ផ្សារភ្ជាប់ទេសចរណ៍នារដូវកាលបៃតង ក្រោមប្រធានបទ «រត់ដើម្បីទេសចរណ៍បៃតងលើភ្នំបូកគោ» នៃឧទ្យានជាតិព្រះមុនីវង្ស។ នេះបើតាមការបញ្ជាក់របស់ឯកឧត្តម វ៉ា ហេង ដាវុធ រដ្ឋលេខាធិការក្រសួងទេសចរណ៍ ប្រាប់បណ្តាញព័ត៌មាន AMS។ ឯកឧត្តមបានពន្យល់ថា ការរត់ឆ្លងកាត់ឧបសគ្គនេះ គឺជាសកម្មភាពអមមួយក្នុងព្រឹត្តិការណ៍ទេសចរណ៍តំបន់ឆ្នេរនារដូវកាលបៃតងឆ្នាំ២០២៦ ដែលក្រសួងទេសចរណ៍បានជ្រើសរើសខេត្តកំពតជាតំបន់ឆ្នេរ សម្រាប់រៀបចំ​រយៈពេល៣ថ្ងៃ ចាប់ពីថ្ងៃទី២ ដល់ថ្ងៃទី៤ ខែតុលា ឆ្នាំ២០២៦ ដោយផ្តោតលើសក្តានុពលទេសចរណ៍ម្ហូបអាហារ និងភាពស្រស់ស្អាតនៃតំបន់ឆ្នេរនារដូវកាលបៃតង។ ឯកឧត្តមរដ្ឋលេខាធិការបានរំលេចថា ដើម្បីអបអរព្រឹត្តិការណ៍ថ្នាក់ជាតិដ៏ធំនេះ ក្រសួងទេសចរណ៍បានគាំទ្រ និងជំរុញឱ្យមានការរៀបចំកម្មវិធីរត់ឆ្លងកាត់ឧបសគ្គនៅឧទ្យានជាតិព្រះមុនីវង្សបូកគោ ដើម្បីផ្សារភ្ជាប់សក្តានុពលទេសចរណ៍ និងជំរុញចលនាទេសចរណ៍ទៅកាន់ខេត្តកំពត និងឧទ្យានជាតិ បូកគោ។ ក្នុងនាមក្រសួងទេសចរណ៍ ឯកឧត្តមបានអំពាវនាវដល់ភាគីពាក់ព័ន្ធ និងអាជ្ញាធរគ្រប់លំដាប់ថ្នាក់ ត្រូវរួមគ្នារៀបចំព្រឹត្តិការណ៍រត់ឆ្លងកាត់ឧបសគ្គនេះឱ្យបានរលូន ចាប់តាំងពីដំណើរការចុះឈ្មោះអត្តពលិកចូលរួម រហូតដល់ថ្ងៃប្រារព្ធព្រឹត្តិការណ៍ជាផ្លូវការ។ ក្រសួងទេសចរណ៍មានបំណងប្រែក្លាយកម្មវិធីរត់នេះទៅជាព្រឹត្តិការណ៍អន្តរជាតិ ដើម្បីទាក់ទាញអត្តពលិក និងអ្នកចូលចិត្តការរត់ពីបណ្តាប្រទេសនានា បន្ថែមពីលើប្រជាពលរដ្ឋក្នុងស្រុក និងឈានទៅទាក់ទាញភ្ញៀវទេសចរអន្តរជាតិឱ្យមកចូលរួមកាន់តែច្រើន ស្របតាមយុទ្ធសាស្ត្ររបស់ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ ក្នុងការជំរុញការផ្សព្វផ្សាយវិស័យទេសចរណ៍កម្ពុជាឱ្យកាន់តែទូលំទូលាយ។ សូមបញ្ជាក់ថា ក្នុងព្រឹត្តិការណ៍ទេសចរណ៍តំបន់ឆ្នេរនារដូវកាលបៃតងឆ្នាំ២០២៦ នៅកំពតពីថ្ងៃទី២ ដល់ថ្ងៃទី៤…