វ៉ាស៊ីនតោន ៖ រដ្ឋាភិបាលសហរដ្ឋអាមេរិកបានប្រកាសដាក់ទណ្ឌកម្មថ្មីៗ កាលពីថ្ងៃអង្គារប្រឆាំងទៅលើបុគ្គល និងក្រុមហ៊ុនចំនួន ១៣ រួមទាំង ស្ថាប័នមួយចំនួន ដែលមានមូលដ្ឋាន នៅរុស្ស៊ី, ហុងកុង និង ប៉ាគីស្ថាន ដោយចោទប្រកាន់ថា ពួកគេបានជួយអ៊ីរ៉ង់ ក្នុងការទិញអាវុធ និងគ្រឿងបន្លាស់នានា។ បើតាម Reuters, ទណ្ឌកម្មដែលប្រកាសដោយក្រសួងរតនាគារ និងក្រសួងការបរទេសនេះ គឺជាផ្នែកមួយនៃកិច្ចខិតខំប្រឹងប្រែងរបស់រដ្ឋបាលលោក Trump ដើម្បីដាក់អ៊ីរ៉ង់ឱ្យនៅឯកោផ្នែកសេដ្ឋកិច្ច និង បង្ខំឱ្យទីក្រុងតេហេរ៉ង់ចូលរួមក្នុងការចរចា ដើម្បីបញ្ចប់សង្គ្រាម ដែលបានចាប់ផ្តើមឡើង បន្ទាប់ពីការវាយប្រហាររបស់សហរដ្ឋអាមេរិក និងអ៊ីស្រាអែល ទៅលើអ៊ីរ៉ង់ កាលពីថ្ងៃទី ២៨ ខែកុម្ភៈ។ រដ្ឋមន្ត្រីក្រសួងរតនាគារអាមេរិក លោក Scott Bessent បានមានប្រសាសន៍ថា «ក្រសួងរតនាគារនឹងមិនអត់ឱនចំពោះការគាំទ្រណាមួយឡើយ ហើយនឹងបន្តកំណត់មុខសញ្ញា បង្ហាញជាសាធារណៈ និងដាក់ឱ្យនៅឯកោ នូវអ្នកដែលជួយសម្រួលដល់សកម្មភាពរបស់អ៊ីរ៉ង់»។ ក្រសួងរតនាគារបានបញ្ជាក់ថា ទណ្ឌកម្មទាំងនេះមានគោលបំណងកាត់បន្ថយសមត្ថភាពរបស់ទីក្រុងតេហេរ៉ង់ក្នុងការស្តារកម្មវិធីអាវុធរបស់ខ្លួនឡើងវិញ ព្រមទាំង បង្កើនការចំណាយសម្រាប់អ្នកដែលបានគាំទ្រដល់កិច្ចខិតខំប្រឹងប្រែងទិញអាវុធរបស់អ៊ីរ៉ង់។ បុគ្គល និង ស្ថាប័នស្ថិតក្នុងបញ្ជីទណ្ឌកម្ម ដែលត្រូវបានប្រកាស កាលពីថ្ងៃ២៩ ខែកញ្ញា រួមមានទាំងមន្ត្រីតំណាងកងកម្លាំងអ៊ីរ៉ង់នៅចិន,…

រីយ៉ាត ៖ អារ៉ាប៊ី សាអូឌីត បានបន្តការផ្ទុកប្រេងដាក់លើនាវាចេញពីកំពង់ផែ Yanbu ជាប់សមុទ្រក្រហមឡើងវិញ បន្ទាប់ពីបានចាប់ផ្តើមដំណើរការបំពង់បង្ហូរ East-West ជាថ្មី ពោលគឺក្រោយពេលរងការវាយប្រហារ។ នេះបើយោងតាមប្រភពព័ត៌មានពាណិជ្ជកម្ម និងទិន្នន័យដឹកជញ្ជូនតាមផ្លូវសមុទ្រ។ប្រភពបញ្ជាក់ថា បំពង់ប្រេងនៅ Yanbu ត្រូវបានផ្អាកដំណើរការ កាលពីដើមខែកញ្ញានេះ បន្ទាប់ពីរងការវាយប្រហារពីសំណាក់យន្តហោះគ្មានមនុស្សបើក ដោយបានជះឥទ្ធិពលដល់តម្លៃប្រេងពិភពលោក។ បើតាម CNA, សកម្មភាពដំណើរការឡើងវិញ ដែលបានចាប់ផ្តើម កាលពីថ្ងៃទី២៨ ខែកញ្ញា គឺជាសញ្ញានៃការកើនឡើងនូវលំហូរប្រេងចេញពីតំបន់មជ្ឈិមបូព៌ា ដែលពីមុន ត្រូវបានរាំងស្ទះដោយសារជម្លោះរវាងសហរដ្ឋអាមេរិក និងអ៊ីរ៉ង់។ ប្រភពពីក្រុមហ៊ុនចម្រាញ់ប្រេងមួយនៅអាស៊ីបានឱ្យដឹងថា ក្រុមហ៊ុនប្រេងយក្សរបស់រដ្ឋ Saudi Aramco បានជូនដំណឹងដល់អតិថិជន កាលពីល្ងាចថ្ងៃចន្ទ អំពីកាលវិភាគផ្ទុកប្រេងសម្រាប់ខែតុលាពីកំពង់ផែ Yanbu។ ក្រុមហ៊ុនចម្រាញ់ប្រេងនេះបានផ្ទុកប្រេងមួយជើងរួចហើយពី Yanbu កាលពីចុងសប្តាហ៍មុន។ ការវាយប្រហារដោយដ្រូន ដែល អារ៉ាប៊ី សាអូឌីត ចោទប្រកាន់ថា បង្កឡើងដោយក្រុមប្រដាប់អាវុធអ៊ីរ៉ាក់ បានបង្ខំឱ្យប្រទេសមួយនេះបិទបំពង់បង្ហូរប្រេង នៅថ្ងៃទី១១ ខែកញ្ញា ដែលធ្វើឱ្យការនាំចេញប្រេងឆៅពី Yanbu ត្រូវផ្អាក៕ ប្រភព ៖ CNA,…

ព្យុងយ៉ាង ៖ កូរ៉េខាងជើងបានព្រមានធ្ងន់ៗថា ការបើកដៃរបស់សហរដ្ឋអាមេរិកឱ្យកូរ៉េខាងត្បូងអាចសាងសង់នាវាមុជទឹកដើរដោយថាមពលនុយក្លេអ៊ែរ នឹងក្លាយជាការវិវត្តន៍ដ៏គ្រោះថ្នាក់ ហើយអាចបង្កើនអស្ថិរភាពផ្នែកនយោបាយ និងយោធានៅតំបន់អាស៊ី-ប៉ាស៊ីហ្វិក។ បើតាមផែនការ, កូរ៉េខាងត្បូងមានបំណងដាក់ដំណើរការនាវាមុជទឹកដើរដោយថាមពលនុយក្លេអ៊ែរដំបូងរបស់ខ្លួន នៅពាក់កណ្តាលឆ្នាំ ២០៣០ខាងមុខ។ គម្រោងនេះមានគោលបំណងពង្រឹងសមត្ថភាពរបស់កូរ៉េខាងត្បូង ក្នុងការតាមដាន និងទប់ស្កាត់ការគំរាមកំហែងពីនាវាមុជទឹក និងមីស៊ីលដែលបាញ់ចេញពីនាវាមុជទឹករបស់កូរ៉េខាងជើង។ តាមរយៈសេចក្តីថ្លែងការណ៍របស់ក្រសួងការបរទេសខ្លួន កូរ៉េខាងជើងបានរិះគន់ធ្ងន់ៗថា ការផ្ទេរបច្ចេកវិទ្យាផលិតនាវាមុជទឹកដើរដោយថាមពលនុយក្លេអ៊ែរទៅកាន់សម្ព័ន្ធមិត្តរបស់សហរដ្ឋអាមេរិក តាមរយៈកិច្ចព្រមព្រៀង AUKUS និងគម្រោងស្រដៀងគ្នា អាចប៉ះពាល់ដល់របបដឹកនាំអន្តរជាតិ ស្តីពីការមិនរីកសាយភាយអាវុធនុយក្លេអ៊ែរ។ ក្រៅពីរិះគន់ កូរ៉េខាងជើងថែមទាំងចោទប្រកាន់ថា សកម្មភាពរបស់សហរដ្ឋអាមេរិកកំពុងជំរុញឱ្យមានការប្រកួតប្រជែងផ្នែកយោធាកាន់តែខ្លាំងនៅក្នុងតំបន់។ ជាការឆ្លើយតប កូរ៉េខាងជើងបាននឹងកំពុងបន្តអភិវឌ្ឍគម្រោងផលិតនាវាមុជទឹកដែលខ្លួនអះអាងថា មានសមត្ថភាពដើរដោយថាមពលនុយក្លេអ៊ែរ និងអាចមានសមត្ថភាពបំពាក់អាវុធនុយក្លេអ៊ែរ៕ ប្រភព ៖ The Straits Times ប្រែសម្រួល ៖ ឈឹម ទីណា

មូស្គូ ៖ ប្រទេសរុស្ស៊ីបានចេញមុខជំទាស់ បន្ទាប់ពីភាគីអ៊ីរ៉ង់ប្រកាសចង់ដកខ្លួនចេញពីសន្ធិសញ្ញាមិនរីកសាយភាយអាវុធនុយក្លេអ៊ែរ ហៅកាត់ NPT ដោយវិមានក្រឹមឡាំងបានទទូចឱ្យទីក្រុងតេហេរ៉ង់បន្តជាសមាជិកនៃសន្ធិសញ្ញានេះ។ អ្នកនាំពាក្យវិមានក្រឹមឡាំង លោក Dmitry Peskov និយាយថា រុស្ស៊ីចាត់ទុកសន្ធិសញ្ញា NPT ជា «មូលដ្ឋានគ្រឹះ» នៃសហគមន៍អន្តរជាតិ ដែលមានគោលបំណងទប់ស្កាត់ការរីកសាយភាយអាវុធនុយក្លេអ៊ែរ ដូច្នេះទីក្រុងមូស្គូសង្ឃឹមថា ភាគីអ៊ីរ៉ង់នឹងបន្តគោរពកាតព្វកិច្ចរបស់ខ្លួន ក្នុងនាមជាភាគីនៃសន្ធិសញ្ញានេះ។ ការអំពាវនាវរបស់រុស្ស៊ីឱ្យអ៊ីរ៉ង់បន្តជាសមាជិកនៃសន្ធិសញ្ញានេះ ធ្វើឡើងបន្ទាប់ពីអនុប្រធានសភាអ៊ីរ៉ង់ លោក Ali Nikzad បានប្រកាសប្រាប់អន្តរជាតិថា ទីក្រុងតេហេរ៉ង់កំពុងពិចារណាដកខ្លួនពីសន្ធិសញ្ញាមិនរីកសាយភាយអាវុធនុយក្លេអ៊ែរ។ លោក Nikzad បានប្រាប់មូលហេតុថា គឺដោយសារតែអ៊ីរ៉ង់លែងមានទំនុកចិត្តលើទីភ្នាក់ងារថាមពលអាតូមិកអន្តរជាតិ ហៅកាត់ IAEA និងលោកអគ្គនាយក Rafael Grossi ទៀតហើយ ដោយលោកបានចោទថា ការត្រួតពិនិត្យរបស់ IAEA មានកម្រិត និងរបាយការណ៍របស់ពួកគេមានលក្ខណៈអវិជ្ជមានចំពោះអ៊ីរ៉ង់។ យ៉ាងណា ភាគីរុស្ស៊ីបានចេញមុខអះអាងច្បាស់ៗថា ទោះបីប្រកាសចង់ដកខ្លួនចេញពីសន្ធិសញ្ញា NPT ក៏ដោយ អ៊ីរ៉ង់នៅតែប្តេជ្ញាចំពោះកាតព្វកិច្ចក្រោមរបបមិនរីកសាយភាយនុយក្លេអ៊ែរ ហើយបន្តអភិវឌ្ឍវិស័យថាមពលនុយក្លេអ៊ែរសម្រាប់តែគោលបំណងសន្តិភាពប៉ុណ្ណោះ៕ ប្រភព ៖ Jerusalem Post ប្រែសម្រួល…

ឡុងដ៍ ៖ ចក្រភពអង់គ្លេសបន្តផ្អាកផ្តល់អាជ្ញាប័ណ្ណនាំចេញអាវុធទៅកាន់អ៊ីស្រាអែល សរុបកើនឡើងជាង ៨០ អាជ្ញាប័ណ្ណ ដោយតួលេខនេះ ហក់ឡើងជិត ៣ ដង បើធៀបនឹងចំនួនអាជ្ញាប័ណ្ណពីមុនត្រឹមតែ ៣០ អាជ្ញាប័ណ្ណ ដែលប្រកាសផ្អាកដំបូងកាលពីខែកញ្ញា ឆ្នាំ២០២៤។ ចាប់តាំងពីការរឹតបន្តឹងនាំចេញអាវុធលើកដំបូងកាលពីជាង២ឆ្នាំមុន ចក្រភពអង់គ្លេសក៏បានបដិសេធពាក្យស្នើសុំអាជ្ញាប័ណ្ណថ្មីៗពីសំណាក់អ៊ីស្រាអែលច្រើនជាង ៥០ បន្ថែមទៀតផងដែរ។ អាជ្ញាប័ណ្ណទាំងនេះគ្របដណ្តប់លើឧបករណ៍យោធា សមាសភាគយន្តហោះចម្បាំង ដ្រូន និងប្រព័ន្ធកំណត់គោលដៅ ដែលគេវាយតម្លៃថា អាចនឹងត្រូវកងកម្លាំងការពារអ៊ីស្រាអែលយកទៅប្រើប្រាស់ក្នុងសង្គ្រាមប្រឆាំងក្រុមហាម៉ាស នៅតំបន់ហ្គាហ្សា។ បើតាមរដ្ឋមន្ត្រីទទួលបន្ទុកកិច្ចការមជ្ឈិមបូព៌ារបស់អង់គ្លេស លោក Stephen Doughty, វិធានការថ្មីដែលត្រូវបានដាក់ចេញ បានបង្កើតឱ្យមានប្រព័ន្ធត្រួតពិនិត្យកាន់តែតឹងរ៉ឹងខ្លាំងឡើង។ លោកថា រាល់ការស្នើសុំនាំចេញត្រូវតែពិចារណា ទាំងលើលក្ខខណ្ឌច្បាប់មនុស្សធម៌អន្តរជាតិ ព្រមទាំងជំហរផ្លូវច្បាប់របស់ចក្រភពអង់គ្លេសចំ ពោះវត្តមានរបស់អ៊ីស្រាអែលនៅក្នុងទឹកដីប៉ាឡេស្ទីន។ ទោះបីមានការបិទខ្ទប់អាជ្ញាប័ណ្ណកាន់តែច្រើនក៏ដោយ ក៏គ្រឿងបន្លាស់ និងសមាសភាគសម្រាប់ខ្សែសង្វាក់ផ្គត់ផ្គង់សកលនៃយន្តហោះចម្បាំងបំបាំងកាយ F-35 នៅតែត្រូវបានលើកលែងភាគច្រើន ដោយសារហេតុផលសន្តិសុខជាតិ និងកិច្ចព្រមព្រៀងជាមួយសម្ព័ន្ធមិត្តអន្តរជាតិ ដូចជា សហរដ្ឋអាមេរិក និងអង្គការណាតូ៕ ប្រភព ៖ Ynet News ប្រែសម្រួល ៖ ឈឹម ទីណា

វ៉ាស៊ីនតោន ៖ ប្រធានាធិបតីអាមេរិក លោក Donald Trump បានហៅលោក Kim Jong Un មេដឹកនាំកូរ៉េខាងជើងថាជាមិត្តភក្តិដែលគោរពរាប់អានគ្នា នៅពេលដែលត្រូវបានសួរដោយអ្នកកាសែតថា ហេតុអ្វីបានជាទីក្រុងព្យុងយ៉ាង អាចមានអាវុធនុយក្លេអ៊ែរក្នុងដៃបាន តែ អ៊ីរ៉ង់ បែរជាមិនអាចមានអាវុធប្រភេទនេះ។ កាសែត Tass បានចេញផ្សាយ ការលើកឡើងយ៉ាងដូច្នេះ នៅថ្ងៃទី៣០ ខែកញ្ញា។ បើតាមប្រភព, លោក Donald Trump បានប្រាប់ក្រុមអ្នកសារព័ត៌មានថា «គាត់គឺជាមិត្តរបស់ខ្ញុំ គឺ លោក Kim Jong Un… គាត់ចូលចិត្តខ្ញុំ ហើយខ្ញុំក៏ចូលចិត្តមេដឹកនាំកូរ៉េខាងជើងរូបនេះដែរ»។ លោករៀបរាប់ទៀតថា «ដរាបណាខ្ញុំនៅទីនេះ គាត់នឹងមានសុវត្ថិភាពល្អ។ ហេតុផលនោះគឺ ព្រោះតែគាត់គោរពខ្ញុំ»។ បើតាម Tass, ទីក្រុងព្យុងយ៉ាងបានលើកឡើងម្តងហើយម្តងទៀតថា ស្ថានភាពនុយក្លេអ៊ែររបស់កូរ៉េខាងជើងគឺមិនអាចត្រឡប់ក្រោយវិញបានទេ។ អំឡុងពេលធ្វើអត្ថាធិប្បាយលើកិច្ចប្រជុំរវាងប្រមុខការទូតនៃសហរដ្ឋអាមេរិក ជប៉ុន និងកូរ៉េខាងត្បូង នាពេលថ្មីៗនេះ រដ្ឋមន្ត្រីការបរទេសកូរ៉េខាងជើង លោកស្រី Choe Son-hui បាននិយាយថា កូរ៉េខាងជើងមិនមានបំណងបោះបង់ចោលអាវុធនុយក្លេអ៊ែររបស់ខ្លួនឡើយ…

វ៉ាស៊ីនតោន ៖ ខណៈដែលការបោះឆ្នោតពាក់កណ្តាលអាណត្តិ កាន់តែខិតជិតមកដល់, លោក Donald Trump បានមានប្រសាសន៍ កាលពីថ្ងៃអង្គារថា លោកមិនដឹងថា តើអ៊ីរ៉ង់នឹងព្រមចុះចាញ់ឬនៅនោះទេ​ ទោះបីរងសំពាធទណ្ឌកម្មយ៉ាងចាស់ដៃពីទីក្រុងវ៉ាស៊ីនតោន ក៏ដោយ។ ប្រធានាធិបតីវ័យ៨០ឆ្នាំរូបនេះបានប្រាប់អ្នកសារព័ត៌មានថា «ខ្ញុំមិនដឹងថា ពួកគេនឹងព្រមចុះចាញ់ឬនៅនោះទេ ប៉ុន្តែ ពួកគេនឹងចុះចាញ់ជាក់ជាមិនខាន»។ លោកបានបន្ថែមថា «ពួកគេកំពុងស្ថិតក្នុងស្ថានភាពយ៉ាប់យ៉ឺនខ្លាំង»។ បើតាម straitstimes, ការបិទខ្ទប់របស់សហរដ្ឋអាមេរិកបានកាត់ផ្តាច់ប្រភពចំណូលដ៏សំខាន់របស់អ៊ីរ៉ង់ គឺការនាំចេញប្រេង ហើយផលប៉ះពាល់ផ្នែកសេដ្ឋកិច្ចនៃសង្គ្រាមបានធ្វើឱ្យជីវភាពរស់នៅរបស់ប្រជាជនអ៊ីរ៉ង់កាន់តែលំបាក។ ប៉ុន្តែ ប្រធានាធិបតីអ៊ីរ៉ង់បានថ្លែងទៅកាន់មហាសន្និបាតអង្គការសហប្រជាជាតិកាលពីសប្តាហ៍មុនថា ទីក្រុងតេហេរ៉ង់នឹងមិនឱនក្បាលចុះចាញ់ចំពោះសម្ពាធរបស់សហរដ្ឋអាមេរិកឡើយ។ ការកើនឡើងនៃតម្លៃប្រេងដោយសារសង្គ្រាម ក៏បានក្លាយជាបញ្ហាចម្បងសម្រាប់គណបក្សសាធារណរដ្ឋ របស់លោក Trump ផងដែរ នៅមុនការបោះឆ្នោតពាក់កណ្តាលអាណត្តិរបស់សហរដ្ឋអាមេរិក នៅខែវិច្ឆិកាខាងមុខ។ សង្គ្រាមនេះបាននាំឱ្យមានការបិទខ្ទប់ច្រកសមុទ្រ Hormuz ដែលធ្លាប់ជាផ្លូវដឹកជញ្ជូនប្រេងឆៅ និងឧស្ម័នធម្មជាតិរាវ LNG មួយភាគប្រាំនៃការផ្គត់ផ្គង់សកលលោក មុនពេលមានជម្លោះ។ លោក Trump បានផ្លាស់ប្តូរគោលដៅ និងពេលវេលាសម្រាប់សង្គ្រាមជាមួយអ៊ីរ៉ង់ ដែលបានចាប់ផ្តើមនៅថ្ងៃទី២៨ ខែកុម្ភៈ ជាពេលដែលសហរដ្ឋអាមេរិក និងអ៊ីស្រាអែលបានវាយប្រហារលើអ៊ីរ៉ង់ ហើយទីក្រុងតេហេរ៉ង់បានឆ្លើយតបវិញ ដោយការវាយប្រហារលើអ៊ីស្រាអែល និងបណ្តាប្រទេសនៅតំបន់ឈូងសមុទ្រដែលជាទីតាំងមូលដ្ឋានយោធារបស់សហរដ្ឋអាមេរិក។ ការវាយប្រហាររបស់សហរដ្ឋអាមេរិក និងអ៊ីស្រាអែលទៅលើអ៊ីរ៉ង់…