រាជរដ្ឋាភិបាលកម្ពុជា បានសម្រេចផ្តល់ការអនុគ្រោះ ដោយព្យួរការអនុវត្តពន្ធបន្ថែម និងការផាកពិន័យចំពោះការយឺតយ៉ាវក្នុងការបង់ពន្ធប្រថាប់ត្រាអចលនទ្រព្យរហូតដល់ដំណាច់ឆ្នាំ២០២៧ ដើម្បីចូលរួមសម្រួលបន្ធូរបន្ថយបន្ទុកហិរញ្ញវត្ថុរបស់ប្រជាពលរដ្ឋ និងពន្លឿនការដោះស្រាយបញ្ហាជាប់គាំងនៃការចេញបណ្ណកម្មសិទ្ធិអចលនទ្រព្យ។ សម្តេចធិបតី ហ៊ុន ម៉ាណែត បានប្រកាសដំណឹងនេះកាលពីព្រឹកថ្ងៃពុធ ទី២៩កក្កដា ក្នុងពេលចុះចែកបណ្ណកម្មសិទ្ធិដីធ្លីបង្ហើយ នៅខេត្តកណ្តាល។ កន្លងមក ឯកសារផ្ទេរកម្មសិទ្ធិអចលនទ្រព្យមួយចំនួន ដែលមានដីការអមហួសរយៈពេល ៣ខែ គិតចាប់ពីកាលបរិច្ឆេទចេញពីមន្ទីររៀបចំដែនដី នគរូបនីយកម្ម សំណង់ និងសុរិយោដី រាជធានី-ខេត្ត តម្រូវឱ្យម្ចាស់កម្មសិទ្ធិត្រូវទទួលរងការផាកពិន័យ និងបង់ពន្ធបន្ថែមចំពោះការយឺតយ៉ាវរហូតដល់ ១០០ភាគរយ នៃប្រាក់ពន្ធត្រូវបង់សរុប។ កត្តានេះបានធ្វើឱ្យម្ចាស់អចលនទ្រព្យមួយចំនួនជួបការលំបាក និងគ្មានលទ្ធភាពបង់ប្រាក់ ខណៈមួយចំនួនទៀតត្រូវស្នើសុំបញ្ជាក់ដីការអមសារជាថ្មី ដែលបង្កឱ្យមានការកកស្ទះ និងយឺតយ៉ាវដល់ដំណើរការការងារចេញប្លង់កម្មសិទ្ធិយ៉ាងខ្លាំង។ ឆ្លើយតបនឹងបញ្ហាចំពោះមុខនេះ សម្តេចធិបតី នាយករដ្ឋមន្ត្រី បានសម្រេចចេញវិធានការអនុគ្រោះ ដោយព្យួរការផាកពិន័យ ១០០ភាគរយនេះ ក្នុងគោលបំណងលើកទឹកចិត្ត និងសម្រួលដល់កម្មសិទ្ធិករដីធ្លីមានលទ្ធភាពចូលមកបំពេញកាតព្វកិច្ចផ្លូវច្បាប់ និងទទួលបានប័ណ្ណកម្មសិទ្ធិស្របច្បាប់ដោយរលូន រហូតដល់ដាច់ឆ្នាំ២០២៧។ ជាមួយគ្នានេះ សម្តេចធិបតី ក៏បានបញ្ជាក់ផងដែរថា អចលនវត្ថុដែលទិញលក់ច្រើនដំណរ ចាប់ពីក្រោយឆ្នាំ២០១៧ ដល់ចុងខែកក្កដា ឆ្នាំ២០២៦ មិនតម្រូវឱ្យបង់ពន្ធប្រថាប់ត្រាច្រើនដងឡើយ។ ការបង់ពន្ធគឺតម្រូវតែលើប្រតិបត្តិការទិញលក់ចុងក្រោយបង្អស់មួយប៉ុណ្ណោះ។ ក្រៅពីនេះ សម្តេចធិបតីនាយករដ្ឋមន្ត្រីបានលើកឡើងថា កម្មសិទ្ធិស្របច្បាប់លើដីធ្លី គឺជាមូលដ្ឋានគ្រឹះនៃជីវិត ដែលមិនមែនត្រឹមតែជាទ្រព្យសម្បត្តិប៉ុណ្ណោះទេ ប៉ុន្តែគឺជាជម្រក ជាអាជីវកម្ម ជាការវិនិយោគ និងជាមរតកដ៏មានតម្លៃសម្រាប់កូនចៅជំនាន់ក្រោយ។ ប្រមុខរដ្ឋាភិបាល បានសង្កត់ធ្ងន់ពីភាពចាំបាច់បំផុតនៃការចុះបញ្ជីដីធ្លីបង្ហើយ…

ស្ថានទូតកម្ពុជាប្រចាំប្រទេសជប៉ុន បានណែនាំដល់ប្រជាពលរដ្ឋខ្មែរទាំងអស់ ដែលកំពុងរស់នៅ ធ្វើការ និងសិក្សានៅប្រទេសជប៉ុន ឱ្យមានការប្រុងប្រយ័ត្នខ្ពស់ ក្រោយមានគ្រោះរញ្ជួយដីកម្រិតខ្ពស់មួយ និងការព្រមានពីរលកយក្សស៊ូណាមិ។ ការណែនាំនេះ ធ្វើឡើងបន្ទាប់ពីខេត្ត Kumamoto នៅភាគខាងត្បូងនៃប្រទេសជប៉ុន ទទួលរងគ្រោះរញ្ជួយដីដ៏ខ្លាំងកម្រិត ៧,១ រ៉ិចទ័រ ដែលបណ្តាលឲ្យមនុស្សជាច្រើននាក់បាត់បង់ជីវិត កាលពីថ្ងែទី២៨កក្កដា។ ស្ថានទូតកម្ពុជា បានអំពាវនាវដល់បងប្អូនខ្មែរទាំងអស់ឲ្យអនុវត្តតាមការណែនាំរបស់អាជ្ញាធរមូលដ្ឋាន និងយកចិត្តទុកដាក់ខ្ពស់តាមដានព័ត៌មានតាមប្រព័ន្ធផ្សព្វផ្សាយសង្គមផ្សេងៗ និងឲ្យផ្តល់ ព័ត៌មាន ដល់ស្ថានទូត ជាបន្ទាន់ប្រសិនបើមានព័ត៌មានអំពីពលរដ្ឋខ្មែររងផលប៉ះពាល់។ ឯកឧត្តម ចាន់ រតនា អ្នកនាំពាក្យក្រសួងការបរទេស និងសហប្រត្តិបត្តិការអន្តរជាតិ បានប្រាប់បណ្ដាញព័ត៌មាន AMS នៅថ្ងៃពុធនេះថា គ្មានពលរដ្ឋខ្មែរណាម្នាក់នៅក្នុងប្រទេសជប៉ុនរងគ្រោះដោយសារគ្រោះរញ្ជួយដីនេះឡើយ។  ទន្ទឹមនេះ ក្រសួងការងារ និងបណ្ដុះបណ្ដាលវិជ្ជាជីវៈ ក៏កំពុងតាមដានយ៉ាងយកចិត្តទុកដាក់នូវការវិវត្តនៃស្ថានការណ៍នេះផងដែរ ដោយក្រសួងសហការយ៉ាងជិតស្និទ្ធជាមួយស្ថានទូតកម្ពុជាប្រចាំប្រទេសជប៉ុន និងទីភ្នាក់ងារជ្រើសរើសឯកជនទាំងអស់ ដើម្បីធានាថាបងប្អូនកម្មសិក្សាការី និងពលករជំនាញខ្មែរ ដែលកំពុងស្នាក់នៅ និងធ្វើការនៅតំបន់រងផលប៉ះពាល់ ទទួលបានការយកចិត្តទុកដាក់ និងស្ថិតនៅទីកន្លែងមានសុវត្ថិភាព។ ស្ថានទូតកម្ពុជា ប្រចាំប្រទេសជប៉ុន កំពុងបន្តតាមដាន ដោយយកចិត្តទុកដាក់លើការវិវឌ្ឍនៃស្ថានការណ៍។ គិតត្រឹមថ្ងៃទី២៩ ខែកក្កដានេះ មនុស្ស យ៉ាងហោចណាស់ ១៣នាក់ បាន ស្លាប់ ក្នុងគ្រោះរញ្ជួយដីកាលពីម្សិលមិញក្នុងប្រទេសជប៉ុន៕  ខន ណារី…

ខេត្តព្រះសីហនុ និងទីក្រុងអ៊ូស៊ី នៃខេត្តជាំងស៊ូ ប្រទេសចិន បានបន្តពង្រឹងចំណងមិត្តភាព និងកិច្ចសហប្រតិបត្តិការ លើវិស័យទេសចរណ៍ ពាណិជ្ជកម្ម និងការវិនិយោគ។ ការប្តេជ្ញាពង្រឹងកិច្ចសហប្រតិបត្តិការនេះ ត្រូវបានលើកឡើងក្នុងជំនួបពិភាក្សាការងាររវាងឯកឧត្តម ម៉ាង ស៊ីណេត អភិបាលខេត្តព្រះសីហនុ និងលោក Zhou Wendong អភិបាលរងទីក្រុងអ៊ូស៊ី ដែលបានដឹកនាំគណៈប្រតិភូបំពេញទស្សនកិច្ចនៅខេត្តព្រះសីហនុ កាលពីថ្ងៃទី២៨ ខែកក្កដា ឆ្នាំ២០២៦។ ក្នុងជំនួបនេះ ឯកឧត្តម ម៉ាង ស៊ីណេត បានបង្ហាញពីសក្ដានុពលរបស់ខេត្តព្រះសីហនុដែលមានកោះចំនួន៣២ ឆ្នេរសមុទ្រប្រវែង ១៧៥គីឡូម៉ែត្រ និងធនធានធម្មជាតិដ៏សម្បូរបែប ដែលជាមូលដ្ឋានសម្រាប់ការអភិវឌ្ឍវិស័យពាណិជ្ជកម្ម ឧស្សាហកម្ម និងទេសចរណ៍។ លោកអភិបាលខេត្តបានបញ្ជាក់ថា ខេត្តព្រះសីហនុមានហេដ្ឋារចនាសម្ព័ន្ធដឹកជញ្ជូនគ្រប់ប្រភេទ រួមមានផ្លូវទឹក ផ្លូវគោក និងផ្លូវអាកាស។ កំពង់ផែស្វយ័តក្រុងព្រះសីហនុ កំពុងអភិវឌ្ឍជា៣ដំណាក់កាល ដោយគ្រោងបញ្ចប់នៅឆ្នាំ២០៣០ ហើយនឹងអាចទទួលនាវាផ្ទុកទំនិញទម្ងន់រហូតដល់ ១៦ម៉ឺនតោន។ ទន្ទឹមនឹងនេះ កំពង់ផែស្វយ័តក្រុងព្រះសីហនុបានតភ្ជាប់ជាមួយកំពង់ផែទីក្រុងអ៊ូស៊ី ខណៈអាកាសយានដ្ឋានអន្តរជាតិខេត្តមានជើងហោះហើរត្រង់ទៅកាន់ទីក្រុងអ៊ូស៊ី និងមានបណ្តាញផ្លូវជាតិ ផ្លូវល្បឿនលឿន និងផ្លូវដែកគាំទ្រការដឹកជញ្ជូន។ ឯកឧត្តម ម៉ាង ស៊ីណេត បានបន្ថែមថា រាជរដ្ឋាភិបាលកម្ពុជាកំពុងជំរុញខេត្តព្រះសីហនុឱ្យក្លាយជាតំបន់សេដ្ឋកិច្ចពិសេសគំរូពហុបំណង ដោយផ្តោតលើតំបន់ដឹកជញ្ជូន និងឧស្សាហកម្ម ទីក្រុងពាណិជ្ជកម្ម និងសេវាកម្ម ព្រមទាំងតំបន់កោះ…

សម្តេច ហ៊ុន ម៉ាណែត នាយករដ្ឋមន្រ្តីកម្ពុជា បានណែនាំឲ្យមានការរៀបចំការដំឡើងស័ក្តិ និងមេដាយជូនវីរកងទ័ពដែលបំពេញភារកិច្ច និងកំពុងឈរជើងនៅជួរមុខទាំងអស់ រួមទាំងកងទ័ព ដែលទើបចូលបម្រើការងារថ្មីហើយបានចូលរួមប្រយុទ្ធផ្ទាល់ការពារទឹកដីកាលឆ្នាំ២០២៥។ ការណែនាំនេះធ្វើឡើងនៅក្នុងពិធី “ចែកវិញ្ញាបនបត្រសម្គាល់ម្ចាស់អចលនវត្ថុ ជូនប្រជាពលរដ្ឋនៅស្រុកខ្សាច់កណ្តាល ខេត្តកណ្តាល នៅព្រឹកថ្ងៃពុធទី២៩ ខែកក្កដា ឆ្នាំ២០២៦នេះ។ ប្រមុខដឹកនាំរដ្ឋាភិបាលបានប្រាប់នាយឧត្តមសេនីយ៍ ឥត សារ៉ាត់ អគ្គមេបញ្ជាការរង នាយសេនាធិការចម្រុះ នៃកងយោធពលខេមរភូមិន្ទ ឱ្យស្រង់ឈ្មោះយោធិន ជាពិសេសយោធិនទើបចូលបំពេញភារកិច្ចការពារទឹកដី ដែលបានប្រយុទ្ធ ជាមួយយោធាថៃ ចំនួន ២លើកនៅឆ្នាំ២០២៥ ដើម្បីរៀបចំការដំឡើងស័ក្តិជូនពួកគាត់។ បើតាមសម្តេច ហ៊ុន ម៉ាណែត រដ្ឋាភិបាលក៏នឹងរៀបចំមេដាយពិសេស «មេដាយសមរភូមិ» ដាច់ដោយ ឡែកពីមេដាយការពារជាតិ សម្រាប់យោធិនឈរជើងនៅជួរមុខគ្រប់ទិសផងដែរ។ ការរៀបចំបែបនេះ គឺដើម្បីលើកទឹកចិត្តដល់កងទ័ពទាំងអស់ដែលលះបង់កម្លាំងកាយចិត្ត និងបញ្ញា ស្មារតី ដើម្បីបុព្វហេតុជាតិមាតុភូមិ៕ សេង បារាំង AMS

ស្ថានទូតអាមេរិកប្រចាំកម្ពុជាបានរំលឹកថា កាលពីឆ្នាំមុនការប្រយុទ្ធគ្នាតាមបណ្តោយព្រំដែ​ន​​កម្ពុជា-ថៃ បានបណ្តាលឱ្យមានការបាត់បង់ជីវិត ការផ្លាស់ទីលំនៅរបស់គ្រួសារជាច្រើន និងភាពមិនច្បាស់​លាស់សម្រាប់សហគមន៍ទាំងសងខាងនៃព្រំដែន។ ស្ថានទូតបានលើកឡើងថា បីខែក្រោយមក គឺនៅថ្ងៃទី២៨តុលា ឆ្នាំ២០២៥ លោកប្រធានាធិបតី ត្រាំ បានសម្របសម្រួលឱ្យមានកិច្ចព្រមព្រៀងសន្តិភាពទីក្រុងកូឡាឡាំពួរជាប្រវត្តិសាស្ត្រ ដែលបានបង្កើតជាគន្លងការទូតមួយសម្រាប់បញ្ច​ប់​ការប្រយុទ្ធគ្នា និងដោះស្រាយបញ្ហាព្រំដែន ដែលកើតមានជាយូរមកហើយ។ សម្រាប់សហរដ្ឋអាមេរិក កិច្ចព្រមព្រៀងសន្តិភាពទីក្រុងគូឡាឡាំពួរនេះ នៅតែបន្តផ្តល់ឱ្យប្រ​ទេសកម្ពុជា និងប្រទេសថៃ នូវវិធីសាស្ត្រជាក់ស្តែងដើម្បីកាត់បន្ថយភាពតានតឹង និងទប់ស្កាត់ការវិលត្រឡប់ទៅរកជម្លោះវិញ ហើយសហរដ្ឋអាមេរិកនៅតែបន្តប្តេជ្ញាចិត្តក្នុងការពង្រឹងសន្តិភាពដ៏យូរអង្វែងនេះ។ លោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា យល់ឃើញថា វត្ត​មានសហរដ្ឋអាមរិកក្នុងការសម្របសម្រួលឲ្យមានកិច្ចព្រមព្រៀងសន្តិភាពទីក្រុងកូឡាឡាំពួរ រវាងកម្ពុជា និងថៃនេះ ជាផ្នែកដ៏សំខាន់ ដែលធ្វើឲ្យកម្ពុជា និងថៃឈានទៅរកកិច្ចព្រមព្រៀងបទឈប់បាញ់នៅពេលនោះ។ លោកបណ្ឌិតសង្ឃឹមថា សហរដ្ឋអាមរិក​នឹងជួយជំរុញឲ្យភាគីថៃគោរពនូវកិច្ចព្រៀងទាំងឡាយ ហើយងាកមកដោះស្រាយព្រំដែនជាមួយកម្ពុជាដោយសន្តិវិធីផ្អែកតាមច្បាប់អន្តរជាតិ។  ដោយឡែក លោក ឆាំង យុ នាយកមជ្ឈមណ្ឌលឯកសារ​កម្ពុជា សង្កេតឃើញថា សហរដ្ឋអាមេរិកបានប្តេជ្ញាចិត្តយ៉ាងមុតមាំក្នុងការនាំមកនូវសន្តិភាពក្នុងតំបន់ ហើយគ្មានរដ្ឋបាលអាមេរិកណាមួយមានការប្តេជ្ញាចិត្តខ្លាំងដូចរដ្ឋបាលលោក ត្រាំ ក្នុងការគាំទ្រផលប្រយោជន៍នៃប្រទេសនីមួយៗ​លើបញ្ហាព្រំដែន​នោះទេ។ បើតាមលោក ឆាំង យុ កម្ពុជាគួរតែបន្តផ្តោតទៅលើអាទិភាពទាំងពីរគឺ សន្តិភាព និងសន្តិសុខព្រំដែន ហើយកម្ពុជាអាច និងគួរតែបន្តដាក់សម្ពាធលើប្រទេសថៃ ឱ្យគោរពកាតព្វកិច្ចរបស់ខ្លួនក្រោមកិច្ចព្រមព្រៀងបទឈប់បាញ់សម្របសម្រួលដោយសហរដ្ឋអាមេរិក ព្រោះកងទ័ពថៃបានរំលោភបំពានកិច្ចព្រមព្រៀងនេះ តាមរយៈការបន្តកាន់កាប់ ទឹកដីកម្ពុជាដោយខុសច្បាប់៕ សេង បារាំង AMS