ឯកឧត្តម ស៊ុំ ម៉ាប់ អ្នកនាំពាក្យក្រសួងវប្បធម៌ និងវិចិត្រសិល្បៈ បានប្រាប់បណ្ដាញព័ត៌មាន AMS នៅថ្ងៃអង្គារ៍ទី២១ កក្កដា ឆ្នាំ២០២៦នេះថា អង្គការយូនីស្កូ (UNISCO) បានកៀរគរមូលនិធិបន្ទាន់បានចំនួនជិត ៥០ម៉ឺនដុល្លារសម្រាប់អភិរក្សតំបន់ប្រាសាទព្រះវិហារ ដែលទទួលរងការខូតខាតយ៉ាងដំណំពីការ​ទម្លាក់គ្រាប់បែកដោយយោធាថៃក្នុងឆ្នាំ២០២៥។  ប្រាសាទព្រះវិហារ ដែលជាសម្បត្តិបេតិកភណ្ឌពិភព​​​លោក បានទទួលរងការខូចខាតយ៉ាងដំណំជាបន្តបន្ទាប់ដោយសារជម្លោះប្រ​ដាប់អាវុធ ដែលបានកើតឡើងនៅឆ្នាំ២០០៨-២០០៩-២០១១ និង២០២៥។ ការប្រយុទ្ធគ្នាដ៏ខ្លាំងក្លាចុងក្រោយនេះបានបន្សល់ទុកនូវវិនាសកម្មយ៉ាងធំធេងបំផុតចំពោះប្រាសាទព្រះវិហារ។ យោងតាមក្រសួងវប្បធម៌ ការវាយប្រហារដោយអាវុធធុនធ្ងន់មិនរើសកន្លែងពីសំណាក់កងទ័ពសៀមមកលើប្រា​សាទព្រះវិហារ បានបង្កការខូចខាតយ៉ាងធ្ងន់ធ្ងរចំនួន ៥៦២កន្លែង ដោយមានការដួលរលំរចនាសម្ព័ន្ធប្រា​សាទ ធ្លុះជញ្ជាំង និងដំបូលប្រាសាទ បាក់បែកថ្មប្រាសាទ សិលាចារឹក និងក្បាច់ចម្លាក់រាប់ម៉ឺនបំណែក ហើយភាគច្រើនមិនអាចជួសជុលវិញបាន។ កិច្ចខិតខំប្រឹងប្រែងថែរក្សា អភិរក្ស និងជួសជុលរបស់អាជ្ញាធរជាតិព្រះវិហារ និងដៃគូរអន្តរជាតិទាំងអស់ក្នុងរយៈពេល១៨ឆ្នាំត្រូវបានបំផ្លាញទាំងស្រុង រួមទាំងហេដ្ឋារចនាសម្ព័ន្ធនានាប្រើឱ្យកិច្ចការអភិរក្ស និងវិស័យទេសចរណ៍។ អ្នកជំនាញបញ្ជាក់ថា ការខូចខាតធ្ងន់ធ្ងរទាំងនេះទាមទារឲ្យមានការសង្គ្រោះបន្ទាន់ឲ្យបានទាន់ពេលវេលា៕ សេង បារាំង AMS

លោក ទូច សុខៈ អ្នកនាំពាក្យរងក្រសួងមហាផ្ទៃ បានគូសបញ្ជាក់ថា រយៈពេល២សប្ដាហ៍ក្នុងខែកក្កដា ឆ្នាំ២០២៦នេះ សមត្ថកិច្ចកម្ពុជាបានឃាត់ខ្លួនអ្នកប្រព្រឹត្តបទល្មើសឆបោកតាមប្រព័ន្ធបច្ចេកវិទ្យាឬអនឡាញស្កេម បានចំនួន ៦៣៦នាក់ មកពី ២១សញ្ជាតិ។ ក្នុងចំណោមនោះ សមត្ថកិច្ចបានកសាងសំ​ណុំរឿងបញ្ចូនទៅតុលាការចំនួន ៩នាក់ ខណៈ ៦២៧នាក់ទៀតកំពុងធ្វើការសាកសួរតាមនីតិវិធីច្បាប់ផងដែរ​។ អ្នកនាំពាក្យរូបនេះបានគូសបញ្ជាក់ថា ក្នុងរយៈពេល២សប្តាហ៍នេះ សមត្ថកិច្ចចំណុះក្រសួងមហាផ្ទៃបានបង្រ្កាបបទល្មើសឆបោកអនឡាញចំនួន ៤០លើក នៅតាមភូមិសាស្រ្តរាជធានីភ្នំពេញ ខេត្តកណ្ដាល ​បន្ទាយមានជ័យ ព្រះសីហនុ កោះកុង កំពង់ស្ពឺ ស្វាយរៀង និងកំពង់ចាម។ សូមបញ្ជាក់ថា ក្នុងឆមាសទី១ឆ្នាំ២០២៦នេះ អាជ្ញាធរកម្ពុជាបានចាត់វិធានការច្បាប់យ៉ាងម៉ឺងម៉ាត់ ដោយបណ្តេញជនបរទេសខុសច្បាប់ចេញពីប្រទេសបានជាង ៤ម៉ឺន៥ពាន់នាក់ ក្រោមយុទ្ធនាការក្តៅនៃការបង្ក្រាបបទល្មើសឆបោកតាមប្រព័ន្ធអនឡាញ៕ សេង បារាំង AMS

អស់រយៈពេល១១ថ្ងៃហើយដែលពលករខ្មែរចំនួន២នាក់នៅបន្តបាត់ខ្លួន នៅក្នុងហេតុការណ៍លិចទូកនេសាទនៅក្នុងសមុទ្រ នៅខេត្តត្រាត ប្រទេសថៃ។​ ពលករខ្មែរ២នាក់នោះ ត្រូវបានសន្និដ្ឋានថាបានបាត់បង់ជីវិត។ ឯកឧត្តម ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បាន​បញ្ជាក់ប្រាប់បណ្តាញព័ត៌មាន​AMS ថា​ មន្ត្រីកម្ពុជាប្រចាំនៅប្រទេសថៃបាន និងកំពុងធ្វើការតាមដានជាបន្ត​បន្ទាប់ជាមួយ​អាជ្ញាធរថៃ​ជុំវិញការ​បាត់ខ្លួន​របស់​ពលករ​ខ្មែរ​ ពេល​ចុះទូក​នេសាទនៅ​សមុទ្រ​ថៃតាំងពីថ្ងៃទី១០ ខែកក្កដា ឆ្នាំ២០២៦។​​ ឯកឧត្តម ស៊ុន មេសា បានឱ្យដឹងថា ពលករខ្មែរបាត់ខ្លួនទាំង២នាក់នេះ គឺស្ថិតនៅក្នុងចំណោមជនរងគ្រោះសរុបចំនួន៥នាក់នៅលើទូកនេសាទ ក្នុងនោះពលករខ្មែរ៤នាក់ និងពលរដ្ឋថៃ១នាក់។ មកដល់ពេលនេះ អាជ្ញាធរថៃរកឃើញសាកសពមនុស្សចំនួន​​៣នាក់ ក្នុងនោះពលករខ្មែរ២នាក់ និងពលករថៃ១នាក់។  បើតាមឯកឧត្តម ស៊ុន មេសា សាកសពពលករខ្មែរម្នាក់ត្រូវបានក្រុមគ្រួសារមកទទួលយកទៅធ្វើបុណ្យតាមប្រពៃណី ហើយសាកសពពលករខ្មែរម្នាក់ទៀតកំពុងស្ថិតនៅក្នុងមន្ទីរពេទ្យប្រទេសថៃដើម្បីពិនិត្យកោសល្យវិច្ឆ័យ។   លោក លឹង សុផុន មន្ត្រីគម្រោងផ្នែកការពារសិទ្ធិពលករប្រចាំប្រទេសថៃ បានបញ្ជាក់ថា ប្រសិនបើការនេសាទរបស់ពួកគាត់ស្ថិតនៅក្រោមការគ្រប់គ្រងរបស់ច្បាប់ថៃ គ្រួសារសពអាចទាមទារដំណើរការឯកសារដើម្បីទទួលបានប្រាក់សំណងពីរដ្ឋ។​     យោងតាមការផ្សាយរបស់សារព័ត៌មានថៃ អាជ្ញាធរថៃកំពុងសម្របសម្រួលសំណងសម្រាប់ក្រុមគ្រួសារអ្នកស្លាប់ ដោយរំពឹងថាគ្រួសារសពនីមួយៗអាចទទួលបានសំណងចំនួនជាង២ម៉ឺនដុល្លារ ស្របទៅតាមនិតីវិធីផ្លូវច្បាប់។  ប្រធានសមាគមនេសាទខេត្តត្រាត បានឱ្យដឹងថា គ្រោះថ្នាក់លិចទូកនេះទំនងកើតឡើងដោយសារកត្តាអាកាសធាតុ៕ សៅ សុខអេង

លោកជំទាវ ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈ បានជួបពិភាក្សាការងារជាមួយឯកឧត្តម Nayef Al-Fayez អគ្គនាយករងអង្គការយូណេស្កូ ទទួលបន្ទុកវប្បធម៌ នៅក្នុងអំឡុងសម័យប្រជុំគណៈកម្មការបេតិកភណ្ឌពិភពលោកលើកទី៤៨ នៅទីក្រុងប៊ូសាន សាធារណរដ្ឋកូរ៉េ នារសៀលថ្ងៃទី២១ ខែកក្កដា ឆ្នាំ២០២៦នេះ។ លោកជំទាវដ្ឋមន្រ្តី បានថ្លែងអំណរគុណដល់ឯកឧត្តម ដែលបានបញ្ជូនរបាយការណ៍នៃបេសកកម្មរបស់អ្នកជំនាញគណៈកម្មការបេតិកភណ្ឌពិភពលោក និងអ្នកជំនាញការ ICOMOS ដែលបានបំពេញបេសកកម្មការងារនៅប្រាសាទព្រះវិហារកាលពីថ្ងៃទី១-៦ ខែមីនា ឆ្នាំ២០២៦កន្លងទៅ តបតាមការអញ្ជើញរបស់កម្ពុជា។ លោកជំទាវ បានសម្តែងនូវការកោតសរសើរចំពោះគុណភាពរបស់របាយការណ៍ដែលមានលក្ខណៈបច្ចេកទេសគ្រប់ជ្រុងជ្រោយ សុក្រឹត្យ និងឆ្លុះបញ្ចាំងអំពីស្ថានភាពជាក់ស្តែង ដែលបាននិងកំពុងកើតឡើងនៅប្រាសាទព្រះវិហារ។ លោកជំទាវ ភឿង សកុណា ក៏បានជម្រាបជូនឯកឧត្តមអគ្គនាយករងអំពីបំណងរបស់កម្ពុជាក្នុងការធ្វើជាម្ចាស់ផ្ទះរៀបចំកិច្ចប្រជុំគណៈកម្មាធិការអន្តររដ្ឋាភិបាលបេតិកភណ្ឌអរូបី នៅឆ្នាំណាមួយក្នុងអំឡុងពេលដែលកម្ពុជា ជាសមាជិកគណៈកម្មាធិការចាប់ពីឆ្នាំ២០២៦ រហូតដល់២០៣០ ខាងមុខនេះ។ ឯកឧត្តមអគ្គនាយករងបានសន្យាថានឹងគាំទ្រសំណើធ្វើជាម្ចាស់ផ្ទះរៀបចំកិច្ចប្រជុំនេះ ព្រមទាំងបន្តតាមដានដោយយកចិត្តទុកដាក់ចំពោះករណីប្រាសាទព្រះវិហារ តាមរយៈការចូលរួមចំណែកយ៉ាងសកម្មក្នុងការសម្របសម្រួលដើម្បីបន្ធូរបន្ថយភាពតានតឹងរវាងប្រទេសទាំងពីរ៕ ដោយ៖ង៉ាន់ ទិត្យ

កំពង់ធំ៖ លោកជំទាវ ខៀវ ស៊ីណា ស្ថាបនិកវិទ្យាល័យ «ជា ចាន់តូ» ព្រមទាំងលោកជំទាវបណ្ឌិត ជា សិរី ទេសាភិបាលធនាគារ ជាតិ នៃកម្ពុជា អាជ្ញាធរដែនដី លោកគ្រូ-អ្នកគ្រូ និងសិស្សានុសិស្ស បានរួមគ្នាដាំកូនឈើនៅក្នុងបរិវេណវិទ្យាល័យ «ជា ចាន់តូ» ស្ថិតក្នុងស្រុកសន្ទុក ខេត្តកំពង់ធំ ដើម្បីរួមចំណែកបង្កើតបរិស្ថានបៃតង និងលើកកម្ពស់គុណភាពនៃការអប់រំ។ ថ្លែងនាឱកាសនោះលោកជំទាវ ខៀវ ស៊ីណា បានរម្លឹកពីប្រវត្តិពិធី «រុក្ខទិវា» ដែលត្រូវបានបង្កើតឡើងតាំងពីឆ្នាំ១៩៥២ ក្រោមព្រះរាជកិច្ចដឹកនាំរបស់ព្រះបរមរតនកោដ្ឋ ដើម្បីដាស់ស្មារតីឱ្យមហាជនស្រឡាញ់ និងចូលរួមអភិរក្សព្រៃឈើ។ លោកជំទាវបានគូសបញ្ជាក់ថា ការដាំដើមឈើនៅពេលនេះ មិនត្រឹមតែជួយបង្កើនគម្របព្រៃឈើ និងកាត់បន្ថយការប្រែប្រួល​អាកាសធាតុប៉ុណ្ណោះទេ ប៉ុន្តែថែមទាំងបង្កើតបានជាម្លប់ និងបរិស្ថានសិក្សាប្រកបដោយសុខុមាលភាព សម្រាប់សិស្សានុសិស្ស​ដែលត្រូវចូលរៀន នាខែកញ្ញាខាងមុខ។ លោកជំទាវ ក៏បានអំពាវនាវឱ្យលោកគ្រូ-អ្នកគ្រូ និងសិស្សានុសិស្ស យកចិត្តទុកដាក់​ថែទាំកូនឈើទាំងនោះឱ្យបានលូតលាស់ល្អផងដែរ។ បន្ទាប់ពីពិធីដាំកូនឈើ គណៈប្រតិភូក៏បានអញ្ជើញពិនិត្យមើលវឌ្ឍនភាពនៃការសាងសង់អគារសិក្សា។ វិទ្យាល័យ «ជា ចាន់តូ» នឹងផ្តល់ជូននូវកម្មវិធីសិក្សាសម្បូរបែប ដើម្បីចូលរួមចំណែកយ៉ាងសំខាន់ក្នុងការបណ្តុះបណ្តាលធនធានមនុស្សសម្រាប់កម្ពុជា។សូមជម្រាបថា ពិធីដាំដើមឈើបានប្រព្រឹត្តទៅកាលពីចុងសប្ដាហ៍កន្លងទៅនេះ៕អត្ថបទ៖ វណ្ណលុករូបភាព៖ វ៉េង លីមហួត

ភ្នំពេញ ៖នៅខេត្តសៀមរាបក្រុមអ្នកជំនាញអាជ្ញាធរជាតិអប្សរា ប្រញាប់ប្រញាល់ជួសជុលសង្គ្រោះបន្ទាន់ នូវប្រាង្គឥដ្ឋដែល​មានអាយុ​កាលជាង ១ពាន់ ឆ្នាំនៃប្រាសាទបាគងដែលកំពុងរងការខូចខាតធ្ងន់ធ្ងរ។ ក្រុមអ្នកជំនាញនៃអាជ្ញាធរជាតិអប្សរា បានកំពុងដំណើរការគម្រោងជួសជុលសង្គ្រោះបន្ទាន់ នូវប្រាង្គឥដ្ឋលេខ១២ លេខ១៣ និងលេខ១៤ នៃប្រាសាទបាគង ដែលស្ថិតនៅខាងក្រៅកំពែងទី២ នាជ្រុងឦសាន ដើម្បីថែរក្សាសម្បត្តិបេតិកភណ្ឌ​ប្រវត្តិសាស្ត្រដែលមានអាយុកាលជាង ១,០០០ ឆ្នាំមួយនេះ ឱ្យបន្តឈរជើងរឹងមាំសម្រាប់កូនខ្មែរជំនាន់ក្រោយ។ យុទ្ធនាការជួសជុលសង្គ្រោះបន្ទាន់នេះ ធ្វើឡើងបន្ទាប់ពីពិនិត្យឃើញថា ប្រាង្គឥដ្ឋទាំងបីនេះបានរងការខូចខាតយ៉ាងធ្ងន់ធ្ងរ អស់ពេលជាច្រើនទសវត្សរ៍មកហើយ ដោយសារតែកត្តាអាយុកាល ធម្មជាតិ និងកង្វះការថែទាំរយៈពេលយូរ។ ក្នុងនោះ ប្រាង្គខាងត្បូង លេខ១២ និងប្រាង្គខាងជើង លេខ១៤ បានរលំបាក់បាត់បង់រូបរាងរហូតដល់ខឿន ខណៈប្រាង្គកណ្តាល លេខ១៣ ថ្វីត្បិតតែនៅរក្សារូបរាងពីខឿនដល់កំពូល ប៉ុន្តែជញ្ជាំងផ្នែកខាងមុខបានរលុះឥដ្ឋមួយផ្នែកធំ ស៊ុមទ្វារដួលរលំ និងមានស្នាមប្រេះហែកជញ្ជាំងទាំងបីជ្រុង ដែលទាមទារការសង្គ្រោះជាបន្ទាន់។ លោក សារាយ គឹមហួល ប្រធានក្រុមអភិរក្សតំបន់រលួស នៃនាយកដ្ឋានអភិរក្សប្រាសាទ និងបុរាណវិទ្យារបស់អាជ្ញាធរជាតិអប្សរា បានឱ្យដឹងថា ក្រុមជំនាញបានចាប់ផ្តើមគម្រោងជួសជុលនេះតាំងពីខែមេសា ឆ្នាំ២០២៦ ហើយរំពឹងថា នឹងបញ្ចប់ជាស្ថាពរ​នៅចុងឆ្នាំ២០២៦ ខាងមុខនេះ។ បើតាមលោក គឹមហួល បច្ចុប្ប​ន្នក្រុមជំនាញកំពុងជួសជុលពង្រឹងខឿន ស៊ុមទ្វារ រចនាសម្ព័ន្ធជណ្តើរ និងផ្នែកដែលចុះខ្សោយ​ឱ្យមានភាពរឹងមាំឡើងវិញ និងធ្វើការបិតកំបោរបាយអដើម្បីការពារការជ្រាបទឹក ការពារសត្វល្អិត…

ភ្នំពេញ៖ ប្រធានព្រឹទ្ធសភាកម្ពុជាសម្តេចអគ្គមហាសេនាបតីតេជោ ហ៊ុន សែន បានបង្ហាញនូវក្តីសង្ឃឹមយ៉ាងមុតមាំថា អ្នកវិនិយោគទុន​របស់អាម៉េរិកនឹងចូលមកបណ្តាក់ទុនរកស៊ីនៅកម្ពុជាកាន់តែច្រើនបន្ថែមទៀត ខណៈដែលទំហំពាណិជ្ជកម្មរវាងប្រទេសទាំងពីរ កំពុងមានកំណើនយ៉ាងល្អប្រសើរ។ ការលើកឡើងនេះ ត្រូវបានធ្វើឡើងនៅក្នុងឱកាសដែល សម្តេចតេជោ ហ៊ុន សែន អនុញ្ញាតឱ្យ លោក Brian D. McFeeters ប្រធាននាយកប្រតិបត្តិក្រុមប្រឹក្សាធុរកិច្ចអាមេរិក-អាស៊ាន (US-ABC) ដឹកនាំគណៈប្រតិភូតំណាងក្រុមហ៊ុនធំៗរបស់អាមេរិក ចូលជួបសម្តែងការគួរសម នៅវិមានសាមគ្គីភាព កាលពីព្រឹកថ្ងៃទី២១ ខែកក្កដា ឆ្នាំ២០២៦។ ឯកឧត្តម ជា ធីរិទ្ធ អ្នកនាំពាក្យព្រឹទ្ធសភា បានប្រាប់អ្នកសារព័ត៌មានក្រោយជំនួបថា សម្ដេចតេជោ ហ៊ុន សែន បាន​ស្វាគមន៍យ៉ាងកក់ក្តៅចំពោះគណៈប្រតិភូធុរជនអាម៉េរិក និងបានគូសបញ្ជាក់ថា «ពាណិជ្ជកម្ម និងការវិនិយោគ គឺជាចំណុចស្នូល​នៃទំនាក់ទំនងរវាងកម្ពុជា និងអាមេរិក»។ សម្ដេចតេជោបានកត់សម្គាល់ថា បច្ចុប្បន្ន ក្រុមហ៊ុនអាម៉េរិកបានវិនិយោគលើវិស័យ​សំខាន់ៗនៅកម្ពុជា ដូចជា រថយន្ត សុខមាលភាព ការអប់រំ និងបច្ចេកវិទ្យា-នវានុវត្តន៍ ហើយថ្វីបើកម្ពុជាមានប្រជាជនតិច ប៉ុន្តែមាន​កម្លាំងទិញធំក្នុងតំបន់។សម្ដេចសង្ឃឹមថា វិនិយោគិនអាម៉ររិក នឹងមករកស៊ីនៅក្នុងប្រទេសកម្ពុជាកាន់តែច្រើន។ នៅក្នុងជំនួបនោះ លោក Brian…

ភ្នំពេញ៖ធនាគារជាតិនៃកម្ពុជាបានរៀបចំ «វេទិកាទីផ្សារហិរញ្ញវត្ថុសកល» ក្រោមប្រធានបទ «ដំណើរឆ្លងកាត់ភាពចលាចល នៃទីផ្សារ៖ ការវាយតម្លៃហានិភ័យឡើងវិញ និងកាលានុវត្តភាពវិនិយោគ» ដើម្បីផ្តល់ជូនអ្នកដឹកនាំវិស័យហិរញ្ញវត្ថុនៅកម្ពុជា នូវទស្សនៈ និងការវិភាគស៊ីជម្រៅអំពីការវិវត្តនៃទីផ្សារអន្តរជាតិ។ វេទិកានេះ បានប្រព្រឹត្តទៅក្រោមអធិបតីភាពលោកជំទាវបណ្ឌិត ជា សិរី ទេសាភិបាលធនាគារជាតិនៃកម្ពុជា កាលពី​ថ្ងៃទី២០ ខែកក្កដា ឆ្នាំ២០២៦នៅរាជធានីភ្នំពេញ។កម្មវិធីនេះរៀបចំឡើងក្នុងគោលបំណងចែករំលែកព័ត៌មាន​ពីស្ថានភាព​សេដ្ឋកិច្ចសកល បញ្ហាប្រឈម និងយុទ្ធសាស្ត្រវិនិយោគ ពីសំណាក់អ្នកជំនាញហិរញ្ញវត្ថុឈានមុខ សម្រាប់ជាទុនដល់​អ្នកដឹក​នាំហិរញ្ញវត្ថុនៅកម្ពុជា ក្នុងការធ្វើសេចក្តីសម្រេចចិត្តឱ្យកាន់តែមានប្រសិទ្ធភាព។ ក្នុងនោះក៏មានការចូលរួមធ្វើបទឧទ្ទេសនាម និងពិភាក្សាពីវាគ្មិននៃធនាគារជាតិនៃកម្ពុជាព្រមទាំងក្រុមហ៊ុនគ្រប់គ្រង​ទ្រព្យសកម្ម​ពិភពលោកធំៗ ជាច្រើនរួមមាន BNP Paribas Asset Management, J.P. Morgan Asset Management និង BNY Investments ។ អង្គវេទិកាបានផ្តោតសំខាន់លើការវាយតម្លៃហានិភ័យនៃភាពតានតឹងភូមិសាស្ត្រនយោបាយ អតិផរណា និងការប្រែ​ប្រួលគោល​នយោបាយពាណិជ្ជកម្មអន្តរជាតិ។ ទន្ទឹមគ្នានេះ ក៏បានពិភាក្សាលើឱកាសវិនិយោគក្នុងទីផ្សារមូលបត្រ និន្នាការវិនិយោគចីរភាព និងការប្រើប្រាស់បច្ចេកវិទ្យាហិរញ្ញវត្ថុផងដែរ។ ខណៈដែលស្ថានភាព និងការវិវត្តនៅលើសកលលោក មានឥទ្ធិពលលើស្ថានភាពហិរញ្ញវត្ថុរបស់កម្ពុជាផងដែរ ការតាមដាន និងយល់ដឹងអំពីការវិវត្តទាំងនេះ នឹងជួយឱ្យអ្នកចូលរួម ទទួលបានការវិភាគស៊ីជម្រៅ ដើម្បីធ្វើការសម្រេចចិត្តផ្នែក​ហិរញ្ញវត្ថុ​របស់ស្ថាប័ន ឱ្យកាន់តែមានប្រសិទ្ធភាព ៕អត្ថបទ៖…