ក្រោមកិច្ចខិតខំប្រឹងប្រែងរបស់ក្រសួងកសិកម្ម រុក្ខាប្រមាញ់ និងនេសាទនិងស្ថាប័នពាក់ព័ន្ធ កម្ពុជាបាននាំចេញអង្ករជាង ១២ម៉ឺន ២ពាន់តោន ទៅកាន់ប្រទេសហ្វីលីពីន ក្នុងរយៈពេល ៨ខែ ឆ្នាំ២០២៦នេះ ឬស្មើនឹងជាង ១៥,៤% នៃបរិមាណនាំចេញអង្ករសរុបជាង ៧៩ ម៉ឺនតោន។ តួលេខនេះបង្ហាញថា ការនាំអង្ករទៅហ្វីលីពីនមានការកើនឡើងយ៉ាងខ្លាំងរហូតដល់ទៅជាង ៣ពាន់ភាគរយ បើធៀបនៅរយៈពេលដូចគ្នាកាលពីឆ្នាំ២០២៥។ នេះបើតាមទិន្នន័យរបស់សហព័ន្ធអង្ករកម្ពុជា។ កំណើននៃការនាំចេញនេះកើតមានស្របពេលដែលរាជរដ្ឋាភិបាលខិតខំធ្វើពិពិធកម្មមធ្យោបាយដឹកជញ្ជូន ដើម្បីលើក កម្ពស់ការប្រកួតប្រជែងនៃអង្ករកម្ពុជា។ ជាក់ស្តែង នៅថ្ងៃទី១៦ ខែកញ្ញានេះ កម្ពុជាបានបង្ហាញមធ្យោបាយដឹកជញ្ជូនផ្លូវទឹកថ្មីសម្រាប់នាំចេញអង្ករដោយផ្ទាល់ទៅកាន់ទីផ្សារប្រទេសហ្វីលីពីន។ ពិធីសម្ពោធ “ការដឹកជញ្ជូនអង្ករ ១ម៉ឺនតោនតាមផ្លូវទឹកដោយនាវាដឹកទំនិញរាយ” រវាងក្រុមហ៊ុន City Rice និង Dilai Trading នេះ ធ្វើឡើងនៅកំពង់ផែស្វយ័តក្រុងព្រះសីហនុ ក្រោមអធិបតីភាពឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ។ ការនាំចេញអង្ករកម្ពុជាតាមនាវាទំនិញរាយ គឺសម្រេចបានតាមរយៈការផ្ដល់ការណែនាំដ៏ខ្ពង់ខ្ពស់របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា លើការប្រើប្រាស់កំពង់ផែស្វយ័តព្រះសីហនុ ហើយជោគជ័យនេះ គឺកើតចេញពីការសហការ និងសម្របសម្រួលយ៉ាងជិតស្និទ្ធពីកំពង់ផែស្វយ័តព្រះសីហនុ។ តាមការបញ្ជាក់របស់សហព័ន្ធអង្ករកម្ពុជា អង្ករដែលមានកិច្ចសន្យាទិញរួចហើយសម្រាប់ខែកញ្ញា ដល់ខែធ្នូឆ្នាំនេះ ត្រូវបានគេរំពឹងថានឹងមានចំនួនជាង ៨ម៉ឺន ៧ពាន់តោនបន្ថែមទៀត…

ក្រសួងរៀបចំដែនដី ប្តេជ្ញាបន្តពង្រឹងគុណភាព និងបង្កើនមុខងារសេវាសាធារណៈអនឡាញ ដើម្បីឆ្លើយតបនឹងតម្រូវការអភិវឌ្ឍន៍សង្គម-សេដ្ឋកិច្ចសម័យឌីជីថល និងផ្តល់ភាពងាយស្រួលបំផុតជូនដល់សាធារណជន។ ថ្នាក់ដឹកនាំក្រសួងរៀបចំដែនដី នគរូបនីយកម្ម និងសំណង់ បានលើកទឹកចិត្តឱ្យក្រុមការងាររៀបចំសេវាអនឡាញ បន្តពង្រឹងគុណភាព និងសហការជាមួយដៃគូ ពិនិត្យលទ្ធភាពបង្កើនមុខងារ និងភាពចាំបាច់របស់សេវាសាធារណៈអនឡាញ តាមរយៈការចងក្រងព័ត៌មានលម្អិតចាំបាច់ទាំងអស់នៅលើគេហទំព័រ Portal រួមមួយ ដែលអាចឆ្លើយតបបានគ្រប់លក្ខខណ្ឌតម្រូវរបស់ភាគីពាក់ព័ន្ធ ប្រកបដោយតម្លាភាព ប្រសិទ្ធភាព និងសុវត្ថិភាព ស្របតាមការអភិវឌ្ឍសង្គម-សេដ្ឋកិច្ចសម័យឌីជីថល ។ កិច្ចប្រជុំពិភាក្សាលើការផ្ដល់សេវាសាធារណៈអនឡាញរបស់ក្រសួងរៀបចំដែនដី នគរូបនីយកម្ម និងសំណង់ ត្រូវបានរៀបចំឡើង នារសៀលថ្ងៃទី ១៥ ខែកញ្ញា ឆ្នាំ ២០២៦ នៅទីស្ដីការក្រសួង ក្នុងគោលបំណងពិនិត្យលើវឌ្ឍនភាពនៃការរៀបចំប្រព័ន្ធទិន្នន័យឌីជីថល និងស្ថាបត្យកម្មបច្ចេកវិទ្យា ដើម្បីធានាថា ការផ្ដល់សេវាជូនប្រជាពលរដ្ឋ និងវិស័យឯកជន អាចធ្វើឡើងប្រកបដោយភាពរហ័សរហួន តម្លាភាព និងសុវត្ថិភាពខ្ពស់ ។ ឯកឧត្តមឧបនាយករដ្ឋមន្ត្រី សាយ សំអាល់ បានគូសបញ្ជាក់ថា កន្លងមក គ្រឹះស្ថានធនាគារ និងហិរញ្ញវត្ថុ តែងតែមានការព្រួយបារម្ភ និងប្រុងប្រយ័ត្នខ្ពស់លើការវាយតម្លៃអចលនវត្ថុ ឬសំណង់ដែលជាទ្រព្យបញ្ចាំ ដោយសារកង្វះខាតទិន្នន័យច្បាស់លាស់ក្នុងពេលជាក់ស្ដែង។ ដូច្នេះ តាមរយៈការដាក់ឱ្យដំណើរការប្រព័ន្ធសេវាសាធារណៈអនឡាញនេះ ក្រសួងរំពឹងថា…

សម្តេចមហាបវរធិបតី ហ៊ុន ម៉ាណែត បានប្រកាសថា ខេត្តសៀមរាបមិនត្រូវបាន​​អនុ​ញ្ញា​តឱ្យមានការវិនិយោគលើកាស៊ីណូនោះឡើយ។ រាជរដ្ឋាភិបាលសុខចិត្តឲ្យមានការអភិវឌ្ឍវិស័យអ្វីផ្សេង តែការអភិវឌ្ឍកាស៊ីណូដាច់ខាតមិនត្រូវបានអនុញ្ញា​តឡើយ ទោះជាដួលរលំដោយសារតែគ្មានកាស៊ីណូក៏ដោយ។  ការបញ្ជាក់របស់សម្តេចធ្វើឡើងនៅក្នុងពិធីសម្ពោធបើកឱ្យប្រើប្រាស់ជាផ្លូវការមន្ទីរពេទ្យ ហ្លួង ម៉ែ នាព្រឹកថ្ងៃទី១៦ ខែកញ្ញា ឆ្នាំ២០២៦នេះ។ សម្តេចធិបតី ក៏បានណែនាំឱ្យពិនិត្យឡើងវិញនូវអាជីវកម្មកាស៊ីណូនៅកម្ពុជា ដែលជាផ្នែក​តូចមួយប៉ុណ្ណោះនៃវិស័យសេវាកម្ម​ និងទេសចរណ៍។ ជំហរដ៏ម៉ឺងម៉ាត់នេះត្រូវបានអ្នកឃ្លាំមើលសង្គម និងអ្នកជំនាញខាងវិស័យទេស​ចរណ៍ស្វាគមន៍ និងគាំទ្រផងដែរ ដោយអ្នកខ្លះថែមទាំងស្នើឲ្យលុបចោលល្បែងស៊ីសងនៅទូទាំងប្រទេសតែម្តង។  មិនខុសពីលោកបណ្ឌិត ឈត ប៊ុនថង ប្រធានផ្នែកទំនាក់ទំនងវប្បធម៌ អប់រំ និងទេសចរណ៍នៃវិទ្យាស្ថានទំនាក់ទំនង​​អន្តរជាតិ នៃរាជបណ្ឌិត្យសភាកម្ពុជា លោក ធួន ស៊ីណាន ប្រធានសមាគមទេសចរណ៍អាស៊ីបាស៊ីហ្វិក (PATA) ក៏ស្នើឲ្យលុបកាស៊ីណូទាំងអស់ចោលដែរ។  សូមបញ្ជាក់ថា នៅកម្ពុជាមានកាស៊ីណូ​ស្របច្បាប់សរុបចំនួន ​១៩៥ទីតាំង។ ក្នុងរយៈពេល១ឆ្នាំកន្លងទៅ សមត្ថកិច្ចបានចាត់វិធានការច្បាប់លើកាស៊ីណូចំនួន ២៧កន្លែង ដែលពាក់ព័ន្ធនឹងបទល្មើសឆបោកតាមប្រព័ន្ធបច្ចេកវិទ្យា ដោយបានដកហូតអាជ្ញាបណ្ណ ១៨កាស៊ីណូ និងព្យួរអាជ្ញាបណ្ណ ៩កាស៊ីណូ។ អាជ្ញាធរ ក៏កំពុងបន្តត្រួតពិនិត្យ និងចាត់វិធានការតាមច្បាប់ចំពោះទីតាំងពាក់ព័ន្ធនឹងការលេងល្បែងស៊ីសងអនឡាញដោយខុសច្បាប់។ ចាប់ពីខែតុលា ខាងមុខតទៅ ​ការភ្នាល់​អនឡាញនៅគ្រប់កាស៊ីណូទូទាំងប្រទេស នឹងត្រូវហាមឃាត់៕ សេង បារាំង AMS

ក្នុងជំនួបជាមួយលោកឧត្តមសេនីយ៍ទោ ស្តេហ្វាន រីឈូ (Stephane Richou) ប្រធាននាយកដ្ឋានទំនាក់ទំនងសន្តិសុខ និងការពារជាតិនៃក្រសួងអឺរ៉ុប និងការបរទេសបារាំង នៅព្រឹកថ្ងៃទី១៦ ខែកញ្ញា ឆ្នាំ២០២៦ នៅអគ្គបញ្ជាការដ្ឋានឯកឧត្តម ឯកឧត្តម នាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ បានវាយតម្លៃខ្ពស់ចំពោះទំនាក់ទំនង និងកិច្ចសហប្រតិបត្តិការកម្ពុជា-បារាំង ដែលមានការរីកចម្រើនជាបន្តបន្ទាប់ និងកំពុងរៀបចំផែនទីបង្ហាញផ្លូវ ដើម្បីលើកកម្រិតទំនាក់ទំនងរវាងប្រទេសទាំងពីរ ឆ្ពោះទៅជាដៃគូយុទ្ធសាស្ត្រ។ ឯកឧត្តមបានរំលឹកពីតួនាទីរបស់បារាំងក្នុងដំណើរការស្វែងរកសន្តិភាពនៅកម្ពុជា តាមរយៈសន្និសីទទីក្រុងប៉ារីស ដែលឈានទៅដល់ការចុះហត្ថលេខាលើកិច្ចព្រមព្រៀងទីក្រុងប៉ារីស ឆ្នាំ១៩៩១ ព្រមទាំងការគាំទ្រដល់ការអភិវឌ្ឍកម្ពុជាលើវិស័យជាច្រើនផងដែរ។ ឯកឧត្តមអគ្គមេបញ្ជាការក៏បានថ្លែងអំណរគុណដល់កងទ័ពបារាំង ដែលបានចូលរួមបណ្តុះបណ្តាលធនធានមនុស្សរបស់កងយោធពលខេមរភូមិន្ទ តាមរយៈអាហារូបករណ៍ និងវគ្គបណ្តុះបណ្តាលជាច្រើន ជាពិសេសការបណ្តុះបណ្តាលសម្រាប់បេសកកម្មថែរក្សាសន្តិភាពក្រោមឆត្រអង្គការសហប្រជាជាតិ​។ ជាងនេះទៅទៀត ឯកឧត្តម វង្ស ពិសេន បានបង្ហាញពីបំណងបន្តពង្រីកកិច្ចសហប្រតិបត្តិការយោធាលើការបណ្តុះបណ្តាលធនធានមនុស្ស ការផ្លាស់ប្តូរទស្សនកិច្ច និងព័ត៌មាន ការប្រយុទ្ធប្រឆាំងភេរវកម្ម សន្តិសុខសាយប័រ ឧក្រិដ្ឋកម្មឆ្លងដែន ការជួញដូរមនុស្ស គ្រឿងញៀន បទល្មើសឆបោកតាមបច្ចេកវិទ្យា ព្រមទាំងការងារមនុស្សធម៌ សង្គ្រោះគ្រោះមហន្តរាយ បេសកកម្មរក្សាសន្តិភាព ការចូលចតនាវា និងលំហាត់ហ្វឹកហ្វឺនរួមផងដែរ។ ដោយឡែក លោកឧត្តមសេនីយ៍ទោ ស្តេហ្វាន រីឈូ បានកោតសរសើរសមត្ថភាពរបស់កងទ័ពកម្ពុជា ក្នុងការបន្សាបគ្រាប់មីន និងយុទ្ធភណ្ឌមិនទាន់ផ្ទុះ…

សម្តេចបវរធិបតី ហ៊ុន ម៉ាណែត បានប្រកាសថា អាកាសយានដ្ឋានអន្តរជាតិភ្នំពេញនឹងក្លាយជាសួនច្បារពោធិ៍ចិនតុង ដែលគ្រោងនឹងបើកឱ្យសាធារណជន​ចូលទស្សនាកម្សាន្តលេងនៅឆាប់ៗខាងមុខនេះ។​ ការប្រកាសរបស់សម្ដេចនាយករដ្ឋមន្ត្រីធ្វើឡើងនៅក្នុងពិធីសម្ពោធបើកឱ្យប្រើប្រាស់ជាផ្លូវការ មន្ទីរពេទ្យ ហ្លួង ម៉ែ នាព្រឹកថ្ងៃទី១៦ ខែកញ្ញា ឆ្នាំ២០២៦។  សួនច្បារដ៏ធំមួយនេះ កន្លងមកបានបើកដំណើរការសាកល្បងក្នុងឱកាសបុណ្យចូលឆ្នាំប្រពៃណីខ្មែរ និងទទួលបានការចាប់អារម្មណ៍ពីប្រជាពលរដ្ឋជាច្រើន ដោយមានអ្នកចូលមកកម្សាន្តរាប់ពាន់នាក់។​ សម្តេចធិបតី មានប្រសាសន៍ថា សួនច្បារពោធិ៍ចិនតុងនេះ នឹងអនុញ្ញាតឱ្យមានការរៀបចំការប្រគុំតន្ត្រី ការតាំងពិព័រណ៍ និងកម្មវិធីផ្សេងៗ។​ ជាក់ស្តែង នៅថ្ងៃទី០៩ ខែធ្នូ ឆ្នាំ២០២៦ ​នឹងមានការរៀបចំពិធីរត់ម៉ារ៉ាតុង និងពិព័រណ៍រថយន្តនៅក្នុងសួនច្បារដ៏ធំនេះ​។  ដោយឡែក នៅក្នុឱកាសរដូវបុណ្យភ្ជំបិណ្ឌខាងមុខនេះ អតីតព្រលានយន្តហោះពោធិ៍ចិនតុងក៏នឹងបើកជាថ្មីឲ្យប្រជាពលរដ្ឋអាចចូលដើរលេងកម្សាន្តផងដែរ។ សម្តេចធិបតី ហ៊ុន ម៉ាណែត បានលើកឡើងថា ទីតាំងសួនច្បារពោធិ៍ចិនតុង ឬអតីតព្រលានយន្តហោះពោធិ៍ចិនតុង គឺមានភាពអំណោយផល សម្រាប់​ស្រូបយកខ្យល់អាកាស ពីព្រោះទីតាំងនោះមាន​ខ្យល់អាកាសបរិសុទ្ធជាងទីតាំង ផ្សេងៗ​នៅក្នុងរាជធានីភ្នំពេញ​។  សម្តេ​ចធិបតី បានថ្លែងថា កាលពីសប្តាហ៍មុន សម្តេចទើបតែបានទៅត្រួតពិនិត្យមើលពីការរៀបចំហេដ្ឋារចនាសម្ព័ន្ធ នៅក្នុងសួនច្បារពោធិ៍ចិនតុងនេះ។ សម្តេច​ក៏បានណែនាំឱ្យមានការរៀបចំទីតាំងស្ថានីយអ្នកដំណើរ ឬ ​Terminal ដែលទុកចោល ទៅជាកន្លែងប្រជុំនានាសម្រាប់ជួលឱ្យវិស័យឯកជន ជាជាងទុកចោលឧបភោគបរិក្ខារអគ្គិសនីដែលបណ្តាលឱ្យខូច។   អាកាសយានដ្ឋានអន្តរជាតិភ្នំពេញ ឬអាកាសយានដ្ឋានពោធិ៍ចិនតុង ត្រូវបានសាងសង់ឡើងនៅឆ្នាំ ១៩៥៤ ដែលមានទំហំផ្ទៃដី…

លោក Christopher Anderson អតីតទាហាននៃកងទ័ពជើងគោកអាមេរិក នឹងមកធ្វើជាឯកអគ្គរដ្ឋទូតសហរដ្ឋអាមេរិកប្រចាំកម្ពុជា ដើម្បីជំរុញទំនាក់ទំនងទ្វេភាគីកម្ពុជា-អាមេរិក បន្ទាប់ពីកៅអីនេះនៅទំនេរអស់រយៈពេលរហូតជាង២ឆ្នាំ។ យោងតាមសេចក្ដីប្រកាសរបស់ស្ថានទូតអាមេរិកប្រចាំកម្ពុជា នៅថ្ងៃទី១៦ ខែកញ្ញា ឆ្នាំ២០២៦នេះ លោករដ្ឋមន្ត្រីការបរទេសអាមេរិក Marco Rubio បានរៀបចំពិធីស្បថចូលកាន់តំណែងជូនលោកឯកអគ្គរដ្ឋទូត Christopher Anderson មុនពេលលោកចូលខ្លួនមកដឹកនាំស្ថានទូតសហរដ្ឋអាមេរិកប្រចាំកម្ពុជា។ បេសកម្មរបស់លោក គឺជំរុញទំនាក់ទំនងរវាងសហរដ្ឋអាមេរិក និងកម្ពុជា ឱ្យឈានទៅកាន់ជំពូកថ្មីមួយ ដោយលើកកម្ពស់ផលប្រយោជន៍របស់សហរដ្ឋអាមេរិក ព្រមទាំងគាំទ្រកម្ពុជាឱ្យកាន់តែរឹងមាំ និងមានវិបុលភាព។ ក្នុងទំនាក់ទំនងសេដ្ឋកិច្ច-ពាណិជ្ជកម្ម អាមេរិកគឺជាទីផ្សារនាំចេញធំបំផុតមួយ និងជាដៃគូពាណិជ្ជកម្មដ៏សំខាន់របស់កម្ពុជា ដោយទំហំពាណិជ្ជកម្មទ្វេភាគីបានកើនឡើងជាលំដាប់គួរឲ្យកត់សម្គាល់។ យោងតាមទិន្នន័យផ្លូវការរបស់អគ្គនាយកដ្ឋានគយ និងរដ្ឋាករកម្ពុជា ទំហំពាណិជ្ជកម្មកម្ពុជា ជាមួយដៃគូអន្តរជាតិ​សរុប សម្រេចបានជាង ៥០ពាន់លានដុល្លារ ក្នុងរយៈពេល ៨ខែ ឆ្នាំនេះ ​ក្នុងនោះ ទំហំពាណិជ្ជកម្មទ្វេភាគីកម្ពុជា-អាមេរិក សម្រេចបានជាង ១១ពាន់លានដុល្លារ គឺកើនឡើងជិត ៣០ភាគរយ បើធៀបនឹងរយៈពេលដូចគ្នាកាលពីឆ្នាំមុន។ ជាអតីតទាហាននៃកងទ័ពជើងគោកសហរដ្ឋអាមេរិក លោកឯកអគ្គរដ្ឋទូត Anderson នឹងមកដល់រាជធានីភ្នំពេញ ដោយបំពេញការងារផ្តោតលើការពង្រីកពាណិជ្ជកម្ម និងការវិនិយោគ ការពង្រឹងកិច្ចសហប្រតិបត្តិការផ្នែកសន្តិសុខ និងការធ្វើការរួមគ្នាជាមួយដៃគូកម្ពុជា ដើម្បីកម្ចាត់បណ្តាញឆបោក ដែលបានលួចយកប្រាក់រាប់ពាន់លានដុល្លារពីប្រជាជនអាមេរិក និងប្រជាជននៅជុំវិញពិភពលោក។ នេះបើតាមការបញ្ជាក់របស់ស្ថានទូតអាមេរិក។ សហរដ្ឋអាមេរិក ក៏បានអះអាងពីការប្តេជ្ញាចិត្ត ក្នុងការប្រយុទ្ធប្រឆាំងនឹងបទល្មើសឆ្លងដែន…