ភ្នំពេញ៖ នាព្រឹកថ្ងៃទី១ ខែតុលា ឆ្នាំ២០១៨ ក្នុងពិធីបើកដាក់ឲ្យប្រើប្រាស់សាកល្បងរថយន្តក្រុង ដែលជាជំនួយឥតសំណងរបស់រដ្ឋាភិបាលជប៉ុនលើតម្រាយផ្លូវរត់ថ្មីរបស់រដ្ឋាករស្វយ័តដឹកជញ្ជូនសាធារណៈរថយន្តក្រុង ឯកឧត្តម ឃួង ស្រេង អភិបាលរាជធានីភ្នំពេញ បានជំរុញឱ្យមន្ត្រីរដ្ឋាករស្វយ័តដឹកជញ្ជូនសាធារណៈរថយន្តក្រុង ត្រូវចុះត្រួតពិនិត្យចំណតរង់ចាំ ដើម្បីបំពេញតម្រូវការប្រជាពលរដ្ឋធ្វើដំណើរប្រចាំថ្ងៃ។ 

ពោធិ៍សាត់៖ នៅព្រឹកថ្ងៃចន្ទ ៧រោច ខែភទ្របទ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី០១ ខែតុលា ឆ្នាំ២០១៨ ឯកឧត្តម ម៉ៅ ធនិន អភិបាលនៃគណៈអភិបាលខេត្តពោធិ៍សាត់ និងលោកជំទាវ ហ៊ុន ចាន់ធី ដោយបានការចូលរួមពីលោកជំទាវ ឯម ប៉ុណ្ណា តំណាងរាស្ត្រមណ្ឌលពោធិ៍សាត់ និងប្រតិភូអមដំណើរ បានអញ្ជើញកាន់បិណ្ឌទី៧ នៅវត្តទួលលាប ស្ថិតក្នុងភូមិមេទឹក ឃុំមេទឹក ស្រុកបាកាន រួមជាមួយនឹងពុទ្ធបរិស័ទចំណុះជើងវត្ត។

ឥណ្ឌូណេស៊ី៖ រដ្ឋាភិបាលឥណ្ឌូណេស៊ីនៅថ្ងៃចន្ទនេះ បានអំពាវនាវសុំជំនួយពីអន្តរជាតិ បន្ទាប់ពីប្រទេសអាស៊ានមួយនេះ បានទទួលរងការវាយប្រហារយ៉ាងដំណំដោយគ្រោះរញ្ជួយដី និងរលកយក្សស៊ូណាមិ នៅកោះស៊ូឡាវ៉េស៊ី ដែលរហូតមកទល់ពេលនេះ ចំនួនមនុស្សស្លាប់បានបន្តកើនឡើងដល់១,២០៣នាក់ហើយ។ បច្ចុប្បន្នអាជ្ញាធរឥណ្ឌូណេស៊ីកំពុងខ្នះខ្នែងនាំយកស្បៀងអាហារ និងបរិក្ខារចាំបាច់ផ្សេងៗទៅកាន់កោះ ស៊ូឡាវ៉េស៊ី ខណៈតួលេខជនរងគ្រោះបាត់បង់ជីវិត ត្រូវគេជឿជាក់ថា នឹងបន្តកើនឡើងថែមទៀត នារយៈពេល០៣ថ្ងៃក្រោយការវាយប្រហារពីរញ្ជួយដីកម្រិត៧.៧រ៉ិចទ័រ (ក្រោយមកត្រូវបានទម្លាក់មក៧.៥រ៉ិចទ័រ) និងរលកយក្សស៊ូណាមិ ដែលបង្កឡើងដោយគ្រោះរញ្ជួយដីនេះ។ ប្រធានផ្នែកវិនិយោគរដ្ឋាភិបាលឥណ្ឌូណេស៊ី លោក ថម ឡេមបុង បានឲ្យដឹងថា ប្រធានាធិបតីឥណ្ឌូណេស៊ី ដែលបានចុះទៅកាន់តំបន់រងគ្រោះដោយផ្ទាល់កាលពីថ្ងៃអាទិត្យម្សិលមិញនេះ បានអនុញ្ញាតឲ្យបើកទ្វារទទួលជំនួយពីអន្តរជាតិ សម្រាប់ការឆ្លើយតបជាចាំបាច់ចំពោះគ្រោះមហន្តរាយ។ ទន្ទឹមគ្នានេះដែរ ទីភ្នាក់ងារ និងអង្គការក្រៅរដ្ឋាភិបាលនានា ព្រមទាំងរដ្ឋាភិបាលបរទេសរួមមាន អូស្រ្តាលី ថៃ នូវែលសេឡង់ និងតួកគីផងនោះ បានត្រៀមខ្លួនរួចរាល់ហើយ ដើម្បីផ្តល់ជំនួយ ស្របពេលដែលរដ្ឋាភិបាលឥណ្ឌូណេស៊ីកំពុងជួបការលំបាកក្នុងការកំណត់ទំហំទាំងស្រុងនៃការបំផ្លិចបំផ្លាញ ដោយសារគ្រោះធម្មជាតិដ៏អាក្រក់នេះនៅឡើយ៕ម.ន

រាជរដ្ឋាភិបាលកម្ពុជា នាថ្ងៃទី០១ ខែតុលា ឆ្នាំ២០១៨ បានប្រារព្ធទិវាទេសចរណ៍ពិភពលោកឆ្នាំ២០១៨ ក្រោមប្រធានបទ «វិស័យទេសចរណ៍ និងនិន្នាការផ្លាស់ប្តូរទៅរកប្រព័ន្ធឌីជីថល Tourism and the Digital Transformation» នៅខេត្តព្រះសីហនុ ក្រោមអធិបតីភាព ឯកឧត្តម ថោង ខុន រដ្ឋមន្ត្រីក្រសួងទេសចរណ៍ និងឯកឧត្តម យន្ត មីន អភិបាលខេត្តព្រះសីហនុ។

រដ្ឋបាលក្រុងតាខ្មៅ រួមជាមួយនឹងមន្ត្រីរាជការមកពីមន្ទីរ អង្គភាពពាក់ព័ន្ធនានាជុំវិញខេត្ត និងកម្មករកម្មការនី ក្រុមហ៊ុន ស៊ុនទ្រី ប្រមាណជាង១៣០នាក់ កាលពីព្រឹកថ្ងៃ ទី១ខែ តុលា ឆ្នាំ២០១៨នេះបានចូលរួមក្នុងយុទ្ធនាការធ្វើអនាម័យលាងសំអាតផ្លូវ និងរើសសំរាមតាមបណ្តារផ្លូវនានាក្នុងក្រុងតាខ្មៅ។ យុទ្ធនាការនេះ បានបែងចែកជា៤ក្រុមដើម្បីបោសសំអាតសួនច្បារ រើសសំរាមពីតាមបណ្តាផ្លូវធំៗក្នុងក្រុងតាខ្មៅ សំដៅធ្វើយ៉ាងណាឲ្យមានសោភណ្ឌភាព និងបរិស្ថានល្អ។

ភ្នំពេញ៖ លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងថ្នាក់ដឹកនាំ មន្ត្រីរាជការក្រសួង នៅព្រឹកថ្ងៃទី០១ ខែតុលា ឆ្នាំ២០១៨នេះ បានអញ្ជើញចូលរួមគោរពវិញ្ញាណក្ខន្ធសពឯកឧត្តម នៃ ប៉េណា អនុប្រធានទី១ ព្រឹទ្ធសភា។ លោកជំទាវសូមសម្ដែងនូវការសោកស្ដាយ និងក្ដុកក្ដួលរំជួលចិត្តឥតឧបមារកអ្វីប្រៀបផ្ទឹមពុំបានចំពោះមរណភាពរបស់ឯកឧត្តម នៃ ប៉េណា ដែលបានទទួលមរណភាពនៅថ្ងៃទី២៩ ខែកញ្ញា ឆ្នាំ២០១៨ វេលាម៉ោង១៣៖០០នាទី ក្នុងជន្មាយុ៧៤ឆ្នាំ ដោយរោគាពាធ។