ខណៈទំនាក់ទំនងកម្ពុជា-ចិន ឈានដល់កិច្ចសហប្រតិបត្តិការភាពជាដៃគូគ្រប់ជ្រុងជ្រោយហើយនោះ មានក្រុមហ៊ុនឯកជនរបស់ចិន បានបង្ហាញគោលជំហរបង្កើតសាលារៀនតាមប្រព័ន្ធអនឡាញនៅកម្ពុជា ដើម្បីឱ្យសិស្ស-និស្សិតនៅកម្ពុជាកាន់តែមានភាពងាយស្រួលក្នុងការសិក្សា ក្នុងយុគសម័យបច្ចេកវិទ្យាទំនើបនេះ ដោយខាងក្រុមហ៊ុនចិនបានបញ្ជាក់ថា ខ្លួនទទួលបានជោគជ័យខ្ពស់ក្នុងការបង្កើតសាលាអនឡាញនេះនៅប្រទេសចិន។

ពោធិ៍សាត់៖ កាលពីយប់រំលងអាធ្រាត ឈានចូលថ្ងៃទី២៥ ខែកញ្ញា ឆ្នាំ២០១៨ នៅក្នុងផ្ទះជនរងគ្រោះ ស្ថិតក្នុងភូមិតាស្តី ឃុំវាល ស្រុកកណ្តៀង ខេត្តពោធិ៍សាត់ រថយន្តប្រភេទ  Camry ស៊េរីឆ្នាំ២០០២ ពណ៌ទឹកប្រាក់ ពាក់ស្លាកលេខ ពោធិ៍សាត់ 2A-1807 មួយគ្រឿង ជាកម្មសិទ្ធិរបស់ឈ្មោះ ញឹម រដ្ឋា ភេទប្រុស អាយុ៤៩ឆ្នាំ ប្រធានមន្ទីរមុខងារសាធារណៈ ខេត្តពោធិ៍សាត់ ត្រូវបានចោរលួចយកចេញពីក្នុងរបងមុខផ្ទះដោយសុវត្ថិភាព ពេលដែលម្ចាស់រថយន្តកំពុងលង់លក់ក្នុងដំណេក។ ប្រភពពីម្ចាស់រថយន្តបានឲ្យដឹងថា មុនកើតហេតុរូបគាត់ បានចតទុករថយន្តនៅមុខផ្ទះ ហើយចាក់ទ្វារបងខាងមុខត្រឹមត្រូវ រួចក៏ចូលសម្រាកនៅក្នុងផ្ទះ។ លុះព្រឹកឡើង គាត់ក៏បានភ្ញាក់ពីដំណេក ទើបដឹងថាបាត់រថយន្ត ក៏ផ្អើលឆោឡោរាយការណ៍ទៅសមត្ថកិច្ចតែម្តង។ បច្ចុប្បន្នសមត្ថកិច្ចកំពុងធ្វើការស្រាវជ្រាវរកមុខសញ្ញាមកចាត់ការតាមច្បាប់៕

កំពង់ឆ្នាំង៖ ថ្ងៃទី២៦ ខែកញ្ញា ឆ្នាំ២០១៨ ឯកឧត្ដម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានដឹកនាំមន្ត្រីរាជការក្រសួងសាធារណការ និងដឹកជញ្ជូន និងប្រជាពលរដ្ឋស្រុកកោះធំប្រមាណ៥៦៧នាក់ ធ្វើដំណើរកំសាន្តតាមរថភ្លើងពីភ្នំពេញទៅស្ថានីយ៍រមាស ខេត្តកំពង់ឆ្នាំង។ ដំណើរកំសាន្តតាមរថភ្លើងនេះ ធ្វើឡើងដើម្បីអបអរសាទរសមិទ្ធផលថ្មីរបស់រាជរដ្ឋាភិបាល ក៏ដូចជាប្រទេសជាតិទាំងមូល និងដើម្បីឱ្យប្រជាពលរដ្ឋបានស្វែងយល់ពីការរីកចម្រើនវិស័យហេដ្ឋារចនាសម្ព័ន្ធផ្លូវដែក ភាពសំបូរសប្បាយរបស់បងប្អូនប្រជាពលរដ្ឋនៅតំបន់ផ្សេងៗ និងបានកំសាន្តសប្បាយនឹងសម្រស់ធម្មជាតិ ដ៏ត្រកាលនៅតាមដងផ្លូវនារដូវភ្ជុំបិណ្ឌ ក៏ដូចជាការបណ្ដុះស្មារតីភាពជាម្ចាស់នៃទ្រព្យសម្បត្តិដ៏មហាសាលនេះ ឱ្យចូលរួមថែរក្សាការពារឱ្យបានគង់វង្សដើម្បីជាមរតកសម្រាប់អ្នកជំនាន់ក្រោយបន្តបន្ទាប់ទៀតផងដែរ។

កំពង់ធំ៖ ផ្ទះថ្មីមួយខ្នង ត្រូវបានលោកឧត្តមសេនីយ៍ទោ សោម ស៊ុន បញ្ជាការងយោធភូមិភាគទី៤ និងជាមេបញ្ជាការតំបន់ប្រតិបត្តិការសឹករងកំពង់ធំ អមដំណើរដោយលោក ប៉ែន វណ្ណរិទ្ធ ប្រធានចលនាយុវជនកម្ពុជា១៥៧សាខាខេត្តកំពង់ធំ និងអាជ្ញាធរមូលដ្ឋាន បានចុះប្រគល់ផ្ទះជូនដល់ក្រុមគ្រួសារលោកស្រី អ៊ុន សុត ជាស្ត្រីម៉េម៉ាយមានកូន៥នាក់ មានជីវភាពទីទ័លក្រ នៅរសៀលថ្ងៃទី ២៦ ខែកញ្ញា ឆ្នាំ ២០១៨។

សៀមរាប៖ ថ្នាក់ដឹកនាំខេត្តសៀមរាប បានជួបសំណេះសំណាលជាមួយពុទ្ធបរិស័ទក្នុងពិធីកាន់បិណ្ឌវេនទី២ នៅវត្តកេសរារាម និងវត្តពោធិវង្ស ក្រុងសៀមរាប។ ឯកឧត្តមបណ្ឌិត ឃឹម ប៊ុនសុង អភិបាលខេត្តសៀមរាប បានមានប្រសាសន៍ថា ស្ថានភាពនៃការរីកចម្រើនរបស់ព្រះរាជាណាចក្រកម្ពុជា ការរក្សាបាននូវអត្រាកំណើនសេដ្ឋកិច្ចជាតិក្នុងរយៈពេលប៉ុន្មានឆ្នាំចុងក្រោយនេះ នឹងការសម្លឹងឃើញសម្រាប់អនាគតនៃប្រទេសជាតិ លើបេសកកម្មនៃការថែរក្សាសន្តិភាព និងបន្តឲ្យមាននិរន្តរភាពនៃវឌ្ឍនភាពកម្ពុជា គឺបានមកពីការចូលរួមនិងគាំទ្រយ៉ាងពេញទំហឹងពីសំណាក់ប្រជារាស្រ្តកម្ពុជា តាមរយៈនៃការផ្តល់ជំនឿទុកចិត្តបោះឆ្នោតជូនគណបក្សប្រជាជនកម្ពុជា គាំទ្រសម្តេចតេជោ ហ៊ុន សែន កាន់តំណែងជានាយករដ្ឋមន្រ្តីនៃរាជរដ្ឋាភិបាលកម្ពុជា អាណត្តិទី៦បន្តទៀត។

ភ្នំពេញ៖ ហេតុការណ៍អគ្គិភ័យមួយបានកើតឡើងនៅវេលាម៉ោង១១និង៣០នាទីយប់ ថ្ងៃទី២៦ ខែកញ្ញ  ឆ្នាំ២០១៨ ក្នុងក្រុមហ៊ុន internet opennet ជាប់ផ្លូវលេខ306 ស្ថិតក្នុងសង្កាត់បឹងកេងកង១ ខណ្ឌចំការមន បណ្ដាលឲ្យក្រុមហ៊ុននោះរងការខូចខាតសម្ភារមួយចំនួន។