ភ្នំពេញ៖ កាលពីរសៀលថ្ងៃទី២៥ ខែកញ្ញា ឆ្នាំ២០១៨ម្សិលមិញនេះ លោក ចេង មុនីរ៉ា អភិបាលខណ្ឌច្បារអំពៅ និងលោក-លោកស្រីជាអភិបាលរងខណ្ឌ ព្រមទាំងមន្ត្រីសាលាខណ្ឌជាច្រើននាក់ បានចុះទៅសួរសុខទុក្ខ និងនាំយកអំណោយចែកជូនបងប្អូនប្រជាពលរដ្ឋដែលរងគ្រោះដោយទឹកជំនន់ ស្ថិតនៅភូមិកោះនរា សង្កាត់និរោធ ចំនួន១០៥គ្រួសារ។ អំណោយដែលលោកអភិបាលខណ្ឌយកទៅចែកជូននៅពេលនេះ ក្នុងមួយគ្រួសារៗ ទទួលបានអង្ករ ចំនួន១០គីឡូ ទឹកត្រី២ដប ទឹកស៊ីអ៊ីវ ២ដប និងស្ករស០,៥គីឡូ។ ក្នុងឱកាសនោះដែរ លោក ចេង មុនីរ៉ា ក៏បាននាំនូវប្រសាសន៍ផ្ដាំផ្ញើ និងការសាកសួរសុខទុក្ខពីសំណាក់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនចំពោះប្រជាពលរដ្ឋរងគ្រោះដោយគ្រោះធម្មជាតិ ទឹកជំនន់ទាំងអស់ផងដែរ ហើយលោកក៏បានផ្ដាំផ្ញើដល់ប្រជាពលរដ្ឋទាំងអស់ សូមយកចិត្តទុកដាក់ទៅលើសុខភាព ដោយរក្សាអនាម័យ និងពិសារទឹកឆ្អិនជានិច្ច៕ម.ន

ខេត្តកណ្តាល៖ មុខសញ្ញាជួញដូរគ្រឿងញៀន២ករណី ត្រូវកម្លាំងនគរបាលស្រុកស្អាងធ្វើការស្រាវជ្រាវឃាត់ខ្លួនបាន និងដកហូតថ្នាំញៀនបាន២៧កញ្ចប់ ឃាត់ខ្លួនជនសង្ស័យបាន៣នាក់ នាំយកទៅសាកសួរ និងចាត់ការទៅតាមផ្លូវច្បាប់។ ករណីទី១ ឃាត់ខ្លួនជនសង្ស័យបាន២នាក់ ទី១  ឈ្មោះ លន់ ស៊ីថា ភេទប្រុស អាយុ២២ឆ្នាំ មុខរបរកសិករ និងទី២ ឈ្មោះតុន ចន្រ្ទា ភេទ ប្រុស អាយុ២៣ឆ្នាំ មុខរបរកសិករ។ អ្នកទាំងពីររស់នៅក្នុងភូមិដំរីឆ្លង ឃុំស្អាងភ្នំ ស្រុកស្អាង ខេត្តកណ្តាល។

ខេត្តកំពង់ឆ្នាំង៖ នៅព្រឹកថ្ងៃពុធ ២រោចខែ ភទ្របទ ឆ្នាំច សំរឹទ្ធិស័ក ពស ២៥៦២ ត្រូវនឹងថ្ងៃទី២៦ ខែកញ្ញា ឆ្នាំ២០១៨ ឯកឧត្ដម អ៊ុយ សំអាត អគ្គនាយកគ្រប់គ្រងគ្រោះមហន្តរាយកាកបាទក្រហមកម្ពុជាតំណាងដ៏ខ្ពង់ខ្ពស់សម្តេចជហ្វាវាំង គង់ សំអុល អនុប្រធានអចិន្ត្រៃយ៍កាកបាទក្រហមកម្ពុជា រួមដំណើរដោយឯកឧត្ដម ហ៊ី ណាត ប្រធានសាខាកាកបាទក្រហមខេត្ត ថ្នាក់ដឹកនាំសាខាកាកបាទក្រហមខេត្ត អនុសាខាកាកបាទក្រហមស្រុកកំពង់លែង បានអញ្ជើញចុះសួរសុខទុក្ខ និងនាំយកមកនូវអំណោយសង្រ្គោះរបស់កាកបាទក្រហមកម្ពុជា មកចែកជូនបងប្អូនប្រជាពលរដ្ឋដែលកំពុងរងគ្រោះដោយទឹកជំនន់ចំនួន២២១គ្រួសារ ក្នុងស្រុកកំពង់លែង មកពី៥ឃុំ (ឃុំកំពង់ហៅ ឃុំពោធិ៍ ឃុំផ្លូវទូកឃុំប្រឡាយមាស និងឃុំសំរោងសែន )។ 

សមត្ថកិច្ចនគរបាលសហការជាមួយមន្ត្រីរដ្ឋបាលព្រៃឈើ និងព្រះរាជអាជ្ញារងអមសាលាដំបូងខេត្តស្ទឹងត្រែង បានចុះបង្រ្កាប និងឃាត់រថយន្តយីឌុបចំនួនបីគ្រឿងដឹកឈើម៉ៃសាក់មិនទាន់គ្រប់អាយុចេញពីក្រុមហ៊ុន កែវ វុទ្ធី។ ការចុះបង្រ្កាបនេះ ធ្វើឡើងនៅសង្កាត់សាមគ្គី ក្រុងស្ទឹងត្រែង កាលពីថ្ងៃទី២៥ ខែកញ្ញា ឆ្នាំ២០១៨។ លោក គឹម ហុងសាន ព្រះរាជអាជ្ញារងអមសាលាដំបូងខេត្តស្ទឹងត្រែងបានបញ្ជាក់ថា ក្រោយពីទទួលបានសេចក្តីរាយការណ៍ពីការដឹកឈើនេះ កម្លាំងសមត្ថកិច្ចបានចុះពិនិត្យមើលជាក់ស្តែង ដើម្បីរកឯកសារពាក់ព័ន្ធ។ ជាក់ស្តែងរថយន្តទាំងអស់នោះ ពុំមានច្បាប់អនុញ្ញាតពីការដឹកជញ្ជូនឈើនៅឡើយទេ ។ យោងតាមប្រភពមួយបានបង្ហើបឲ្យដឹងថា រថយន្តទាំងបីគ្រឿងដឹកឈើប្រភេទម៉ៃសាក់ យកទៅប្រើប្រាស់ក្នុងស្រុកមួយគ្រឿង និងពីរគ្រឿងទៀតគោលដៅចូលប្រទេសវៀតណាម។ ដោយសារពុំមានច្បាប់។ បច្ចុប្បន្ននេះ រថយន្តទាំងបីគ្រឿងត្រូវបានបញ្ជូនមករក្សាទុកនៅក្នុងស្នងការរដ្ឋាននគរបាលខេត្តស្ទឹងត្រែង។ រីឯចំណាត់ការរបស់សមត្ថកិច្ចនៅមិនទាន់មានវិធានការនៅឡើយទេ៕ម.ន

បន្ទាយមានជ័យ៖ កិច្ចប្រជុំផ្សព្វផ្សាយផែនការយុទ្ធសាស្ត្រជាតិសកម្មភាពមីន ២០១៨-២០២៥ នៅថ្នាក់ក្រោមជាតិ ដែលប្រព្រឹត្តទៅក្រោមអធិបតីភាព ឯកឧត្ដម ចៅ ឡាយ អគ្គលេខាធិការរងអាជ្ញាធរមីន ឯកឧត្ដម លី សារី អភិបាលរងខេត្ត តំណាងឯកឧត្តម សួន បវរ គណៈអភិបាលខេត្ត និងការចូលរួមអ្នកពាក់ព័ន្ធជុំវិញខេត្ត ត្រូវបានបើកនៅថ្ងៃទី២៥ ខែកញ្ញា នាសាលប្រជុំក្រុមប្រឹក្សាខេត្តបន្ទាយមានជ័យ។ ឯកឧត្ដម លី សារី  បានមានប្រសាសន៍ថា រយៈពេល០៨ខែកន្លងមកនេះ ក្នុងខេត្តបន្ទាយមានជ័យ បានបោសសម្អាតមីនបានចំនួនជាង៩០០ហិកតា ដែលបានរកឃើញ និងកម្ទេចចោលមីនប្រឆាំងមនុស្សចំនួន១៦៥១គ្រាប់ មីនប្រឆាំងរថក្រោះចំនួន២៨គ្រាប់ និងសំណល់ជាតិផ្ទុះសល់ពីសង្គ្រាមចំនួន១៨៦៥គ្រាប់។ ឯកឧត្ដមបានបញ្ជាក់ថា តាមទិន្នន័យអង្គភាព CMVIS  ប្រចាំខេត្តបន្ទាយមានជ័យ បានឲ្យដឹងថា ក្នុងឆ្នាំ២០១៨ នេះគិតពីដើមឆ្នាំ រហូតមកដល់ថ្ងៃនេះ ខេត្ត មានការគ្រោះថ្នាក់កើតឡើងចំនួន០៤ករណីក្នុងនោះមាន០២ករណី ដែលបានបង្កឲ្យជនរងគ្រោះស្លាប់០១នាក់ និងរបួសធ្ងន់ស្រាល០២នាក់ និង០២ករណីទៀត បណ្ដាលឲ្យស្លាប់សត្វគោ០២ក្បាល និងខូចខាតដាច់ច្រាវ៉ាកគ្រឿងចក្រកម្ទេចមីន១គ្រឿង។

នៅព្រឹកថ្ងៃពុធ ២រោច ខែភទ្របទ ឆ្នាំច សំរឹទ្ធិស័កព.ស ២៥៦២ ត្រូវនឹងនៅថ្ងៃទី២៦ ខែកញ្ញា ឆ្នាំ ២០១៨នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានដឹកនាំគណៈប្រតិភូជាន់ខ្ពស់អញ្ជើញទៅសាធារណរដ្ឋសង្គមនិយមវៀតណាមដើម្បីចូលរួមគោរពវិញ្ញាណក្ខន្ធសពឯកឧត្តម ត្រាន់ ដាយក្វាង ( Tran Dao Quang) អតីតប្រធានាធិបតីនៃសាធារណរដ្ឋសង្គមនិយមវៀតណាម ដែលបានទទួលមរណភាព កាលពីថ្ងៃទី២១ ខែកញ្ញា ឆ្នាំ២០១៨។