ស៊ីរី៖ ប្រជាពលរដ្ឋស៊ីរីបាននាំគ្នាទៅបោះឆ្នោតជ្រើសរើសក្រុមប្រឹក្សាឃុំសង្កាត់ជាលើកដំបូងរបស់ខ្លួន ចាប់តាំងពីសង្គ្រាមស៊ីវិលអូសបន្លាយរយៈពេល៧ឆ្នាំកន្លងមកនេះ។ ការបោះឆ្នោតនេះដែរ កើតឡើងក្រោយពេលអ៊ីស្រាអែលបើកការវាយប្រហារតាមដែនអាកាសទៅលើអាកាសយានដ្ឋាននៅទីក្រុង ដាម៉ាស់។ ការិយាល័យបោះឆ្នោតចំនួន៦,៥៥១កន្លែងបានបើកទ្វារនៅថ្ងៃទី១៦ ខែកញ្ញានេះ ហើយប្រជាពលរដ្ឋស៊ីរីបានបោះឆ្នោតជ្រើសរើសតំណាងរបស់ខ្លួន នៅក្នុងក្រុមប្រឹក្សាឃុំសង្កាត់។ បើតាមសារព័ត៌មានសាណារបស់ស៊ីរី មានបេក្ខភាពឃុំសង្កាត់មានជាង៤ម៉ឺននាក់ប្រកួតប្រជែងដណ្តើមតំណែងកៅអីឃុំសង្កាត់ចំនួន១៨,៤៧៨កៅអី។ ការបោះឆ្នោតបានបិទទ្វារវិញ នៅវេលាម៉ោង៧យប់ថ្ងៃដដែលនេះ (ម៉ោងក្នុងតំបន់) ហើយមន្ត្រីទទួលខុសត្រូវបានបង្កើនការយាមល្បាតរក្សាសុវត្ថិភាព ក៏ដូចជាធុងឆ្នោតផងដែរ។ ការបោះឆ្នោតខាងលើ គឺជាលើកដំបូងហើយ ចាប់តាំងពីឆ្នាំ២០១១រហូតមកទល់ពេលនេះ ហើយការបោះឆ្នោតកើតឡើងក្នុងពេលដែលតំបន់ជាច្រើននៅតែបន្តកើតមានអំពើហិង្សា និងការវាយប្រហារគ្នាជាបន្តបន្ទាប់។ មិនតែប៉ុណ្ណោះ អ៊ីស្រាអែលបានបើកការវាយប្រហារតាមដែនអាកាសទៅលើអាកាសយានដ្ឋាន នៅទីក្រុងដាម៉ាស់ សំដៅទៅលើឃ្លាំងអាវុធនៅក្បែរអាកាសយានដ្ឋាន៕ម.ន

ចិន៖ យោងតាមអាជ្ញាធរក្នុងតំបន់បានរាយការណ៍ថា មនុស្ស៤នាក់ត្រូវបានគេអះអាងថា បានបាត់បង់ជីវិតនៅក្វាងទុង ស្របពេលដែលព្យុះទីហ្វុង មាំងឃុត បានវាយប្រហារទៅលើខេត្តភាគខាងត្បូងប្រទេសចិនមួយនេះ។ ព្យុះទីហ្វុងដ៏មហិមារនេះ បានចុះដល់ដីនៅម៉ោងប្រមាណ៥ល្ងាចថ្ងៃអាទិត្យសប្តាហ៍មុននេះ នៅឯតំបន់ឆ្នេរទីក្រុងជំាងមិន ខេត្តក្វាងទុង ក្នុងល្បឿន១៦២គីឡូម៉ែត្រក្នុងមួយម៉ោង។ នេះបើយោងតាមស្ថានីយឧតុនិយមខេត្ត។ ដោយឡែកអាជ្ញាធរផ្តល់ជំនួយគ្រោះមហន្តរាយខេត្តក្វាងទុង បានបញ្ជាក់ថា គិតត្រឹមម៉ោង១១យប់ថ្ងៃអាទិត្យ ម្សិលមិញនេះ មានមនុស្សប្រមាណជាង៣,១១លាននាក់បានបង្ខំចិត្តភៀសខ្លួនទៅកាន់ទីសុវត្ថិភាព ខណៈដែលទូកនេសាទប្រហែល៤៥,០០០នាក់ ត្រូវបានហៅឲ្យវិលត្រឡប់ពីសមុទ្រមកកំពង់ផែនៅក្នុងខេត្តវិញ។ មជ្ឈមណ្ឌលឧតុនិយមជាតិរបស់ចិនបានបញ្ជាក់ថា ព្យុះទីហ្វុង មាំងឃុត បានធ្វើដំណើរឆ្លងកាត់តំបន់ស្វយ័ត ក្វាងស៊ី ឆ័ន ហើយរំកិលខ្លួនឆ្ពោះទៅកាន់ភាគពាយ័ព្យក្នុងល្បឿន២០គីឡូម៉ែត្រក្នុងមួយម៉ោងគិតត្រឹមព្រឹកថ្ងៃច័ន្ទនេះ ហើយបើតាមការិយាល័យកិច្ចការស៊ីវិលក្នុងតំបន់នោះ មានមនុស្សប្រមាណ៦៩,៤០០នាក់បានទទួលរងគ្រោះ និងប្រហែល៤៥,០០០នាក់ផ្សេងទៀតបង្ខំចិត្តភៀសខ្លួនចេញពីផ្ទះសម្បែងរបស់ពួកគេ ដោយសារតែឥទ្ធិពលព្យុះទីហ្វុង មាំងឃុត នេះ៕ម.ន

កូរ៉េខាងត្បូង៖ មេដឹកនាំកំពូលកូរ៉េខាងជើង លោក គីម ជុងអ៊ុន និងប្រធានាធិបតីកូរ៉េខាងត្បូង លោក មូន ជែអ៊ីន គ្រោងនឹងធ្វើកិច្ចពិភាក្សាទៅលើការអនុវត្តតាមកិច្ចព្រមព្រៀងស្តីពីការលុបបំបាត់អាវុធនុយក្លេអ៊ែរ ក្នុងអំឡុងពេលចួលរួមកិច្ចប្រជុំកំពូលអន្តរកូរ៉េជាលើកទី៣ ដែលគ្រោងប្រារព្វឡើងនៅក្នុងទីក្រុងព្យុងយ៉ាង ក្នុងថ្ងៃអង្គារ៍សប្តាហ៍នេះ។ បើតាមប្រធានការិយាល័យប្រធានាធិបតីកូរ៉េខាងត្បូង លោក អ៊ីម ជុងសឹក បានថ្លែងប្រាប់ក្នុងសន្និសិទសារព័ត៌មានមួយថ្ងៃមុនជំនួបកំពូលនេះថា ឥឡូវនេះ ការរំសាយអាវុធនុយក្លេអ៊ែរ គឺជាគន្លឹះដ៏សំខាន់បំផុតនៅក្នុងកិច្ចប្រជុំកំពូលអន្តរកូរ៉េ ហើយថា លោក មូន នឹងមានឱកាសយ៉ាងហោចណាស់ចំនួន២ ដើម្បីពិភាក្សាលើវិធីសាស្រ្តឈានទៅលុបបំបាត់អាវុធនុយក្លេអ៊ែរនៅលើឧបទ្វីបកូរ៉េ ជាមួយនឹងប្រមុខដឹកនំាកូរ៉េខាងជើង។ បើតាមការគ្រោងទុកនោះ មេដឹកនាំកំពូលប្រទេសទាំងពីរនឹងធ្វើកិច្ចពិភាក្សាទ្វេភាគីនៅក្នុងថ្ងៃអង្គារ៍ និងថ្ងៃពុធសប្តាហ៍នេះ ចំណែកលទ្ធផលដែលកើតចេញពីកិច្ចចរចាគ្នានេះ ត្រូវបានគេរំពឹងថា នឹងធ្វើការប្រកាសជាផ្លូវការនៅក្នុងថ្ងៃពុធ។ នេះបើយោងតាមសេចក្តីរាយការណ៍របស់ទីភ្នាក់ងារសារព័ត៌មាន យ៉ុនហាប់ របស់ប្រទេសកូរ៉េខាងត្បូង៕