សហរដ្ឋអាម៉េរិក៖ អ្នកនាំពាក្យក្រសួងការបរទេសអាម៉េរិក លោកស្រី ហីដធើ ណឺត បាននិយាយក្នុងថ្ងៃអង្គារ៍សប្តាហ៍នេះថា ការពិភាក្សាគ្នារវាងទីក្រុងវ៉ាស៊ីនតោន និងព្យុងយ៉ាង ជុំវិញការរំសាយអាវុធនុយក្លេអ៊ែរបាននឹងកំពុងដំណើរការទៅតាមទិសដៅត្រឹមត្រូវហើយ។ អ្នកនាំពាក្យក្រសួងការបរទេសរូបនេះ បានគូសបញ្ជាក់ថា ការពិភាក្សានៅខាងក្រោយឈុតឆាកជាមួយទីក្រុងព្យុងយ៉ាង បានធ្វើឱ្យមានកិច្ចចរចាជាច្រើន បន្ទាប់ពីកិច្ចប្រជុំកំពូលរបស់ប្រធានាធិបតីអាម៉េរិក លោក ដូណាល់ ត្រាំ ជាមួយមេដឹកនាំកូរ៉េខាងជើង លោក គីម ជុងអ៊ុន កាលពីខែមិថុនា និងកិច្ចប្រជុំជាបន្តបន្ទាប់រវាងរដ្ឋមន្ត្រីការបរទេសអាម៉េរិក លោក ម៉ៃ ប៉ុមប៉េអូ និងមន្ត្រីកំពូលៗរបស់ទីក្រុងព្យុងយ៉ាង។ ថ្លែងប្រាប់អ្នកយកព័ត៌មាន លោកស្រី ណឺត បាននិយាយថា យើងកំពុងពិចារណាលើជំនួបផ្សេងទៀត ក៏ដូចជាការចរចា និងការសន្ទនាគ្នា ខណៈយើងកំពុងធ្វើវាទៅតាមទិសដៅដ៏ត្រឹមត្រូវ ហើយថា ការសន្ទនាគ្នាជាមួយរដ្ឋាភិបាលកូរ៉េខាងជើងកំពុងក្លាយជាបញ្ហាធម្មតាទៅហើយ។ យ៉ាងណាមិញ លោកស្រីមិនបានផ្តល់ព័ត៌មានលម្អិតអំពីកិច្ចចរចា ឬក៏ទីតាំងដែលពួកគេត្រូវជួបគ្នា ហើយនរណាខ្លះពាក់ព័ន្ធ ក៏ដូចជាបញ្ហាអ្វីដែលបច្ចុប្បន្នស្ថិតក្រោម ការពិភាក្សាគ្នានោះទេ ប៉ុន្តែលោកស្រីគ្រាន់តែបានអះអាងជាថ្មីថា លោក គីម បានប្រាប់លោក ត្រាំ ថា រូបលោកមានឆន្ទៈក្នុងការលុបបំបាត់អាវុធនុយក្លេអ៊ែរ ដែលនេះ គឺជាគោលដៅចម្បងរបស់សហរដ្ឋអាម៉េរិកសម្រាប់កិច្ចពិភាក្សាគ្នា…

ហ្វីលីពីន៖ ប្រធានាធិបតីហ្វីលីពីន លោក រ៉ូឌ្រីហ្គោ ឌូតឺតេ បានកត់សម្គាល់ថា ចិន គួរតែផ្លាស់ប្ដូរអាក្បកិរិយាបច្ចុប្បន្ន និងបញ្ឈប់ការដាក់កំហិតលើការធ្វើនាវាចរណ៍ នៅក្នុងតំបន់ជម្លោះ ព្រោះថា ការធ្វើបែបនេះ នឹងបង្កទៅជាការប្រឈមមុខដាក់គ្នា ក៏ដូចជាជម្រុញឱ្យបណ្ដាប្រទេសដទៃចុះសិន្ធិសញ្ញាសម្ព័ន្ធភាពជាមួយសហរដ្ឋអាមេរិកតែប៉ុណ្ណោះ ។ លោក ឌូតឺតេ បានលើកឡើងយ៉ាងដូច្នេះ នៅក្នុងសុន្ទរកថាមួយកាលពីថ្ងៃអង្គារ៍ សប្តាហ៍នេះ និងនៅក្នុងបរិបទដែលគេមើញឃើញថា ប្រធានាធិបតីហ្វីលីពីនរូបនេះ មានទំនោរងាកទៅរកចិន តែប្រឆាំងនឹងគោលនយោបាយរបស់សហរដ្ឋអាមេរិក ។ តែយ៉ាងណាមិញ រដ្ឋាភិបាលទីក្រុងប៉េកាំងនៅមិនទាន់មានប្រតិកម្មនឹងការអះអាង នេះនៅឡើយទេ ។បើតាមសម្រង់សម្តីផ្ទាល់របស់លោក រ៉ូឌ្រីហ្គោ ឌូតឺតេ ចិនកំពុងយល់ខុស ដែលថា តំបន់សមុទ្រចិនខាងត្បូងគឺជាកម្មសិទ្ធិរបស់ខ្លួន ហើយថា ចិនមិនអាចបង្កើតកោះ មួយបាននោះទេ ចិននិយាយថា ដែនអាកាសនៅពីលើតំបន់កោះសម្បនិម្មិត គឺជា របស់ចិន ប៉ុន្តែចិនយល់ខុសហើយ ដ្បិតដែនទឹកមួយនេះ គឺជាដែនសមុទ្រអន្តរជាតិ ហើយចិនក៏គ្មានសិទ្ធិហាមមិនឱ្យនរណាម្នាក់ធ្វើដំណើរឆ្លងកាត់នោះដែរ ៕

កូរ៉េខាងត្បូង៖ ប្រធានាធិបតីកូរ៉េខាងត្បូង លោក មូន ជែអ៊ីន បាននិយាយក្នុងថ្ងៃ ពុធនេះថា “ភាពស្មោះត្រង់ពិតប្រាកដ” អាចសម្រេចទៅបាន លុះត្រាតែកូរ៉េខាង ជើង និងកូរ៉េខាងត្បូងបង្កើតសហគមន៍សន្តិភាព និងសេដ្ឋកិច្ចដ៏យូរអង្វែង ដោយ ទាមទារឱ្យមានការដឹកជញ្ជូនថាមពល និងកិច្ចសហប្រតិបត្តិការសេដ្ឋកិច្ចជាដើម ។ការលើកឡើងរបស់ប្រធានាធិបតីកូរ៉េខាងត្បូងរូបនេះ ធ្វើឡើងក្នុងអំឡុងពិធីគម្រប់ខួប៧៣ឆ្នាំនៃការរំដោះឧបទ្វីបកូរ៉េ ចេញពីនឹមអាណានិគមរបស់ជប៉ុនកាលពីឆ្នាំ ១៩១០-១៩៤៥ ដោយលោក មូន បានគូសបញ្ជាក់ថា ទីក្រុងសេអ៊ូលនឹងធ្វើឲ្យការ ជឿទុកចិត្តគ្នាកាន់តែស៊ីជម្រៅថែមទៀតជាមួយទីក្រុងព្យុងយ៉ាង នៅក្នុងកិច្ចប្រជុំជា លើកទីបី ជាមួយលោក គីម ជុងអ៊ុន ដែលនឹងប្រព្រឹត្តទៅនាខែក្រោយ ។ លោក មូន ជែអ៊ីន បានបន្ថែមទៀតថា តាមរយៈកិច្ចប្រជុំកំពូលជាមួយមេដឹកនាំកូរ៉េ ខាងជើង រូបលោកនឹងបោះជំហានយ៉ាងអង់អាច ឆ្ពោះទៅរកការលុបបំបាត់អាវុធនុយក្លេអ៊ែរទាំងស្រុងពីឧបទ្វីបកូរ៉េ ព្រមទាំងការប្រកាសបញ្ចប់សង្រ្គាម និងសន្ធិ សញ្ញាសន្តិភាព ។ ជាមួយគ្នានេះ លោក មូន ថែមទំាងបានសង្កត់ធ្ងន់ថា កិច្ចព្រមព្រៀងនានាអាចនឹងត្រូវអនុវត្តន៍ដោយស្មោះត្រង់បាន លុះត្រាតែភាពមិនជឿទុកចិត្ត គ្នាដែលមានឫសគុលយ៉ាងជ្រៅនោះ ត្រូវបានលុបបំបាត់ចោលរវាងទីក្រុងសេអ៊ូល និងទីក្រុងព្យុងយ៉ាង ក៏ដូចជារវាងទីក្រុងព្យុងយ៉ាង និងទីក្រុងវ៉ាស៊ីនតោន…

ទួរគី៖ ប្រធានាធិបតីតួកគី លោក តាយ៉ីប អឺដូហ្កាន់ បាននិយាយថា ប្រទេសលោក នឹងឈប់ប្រើប្រាស់ផលិតផលអេឡិចត្រូនិករបស់សហរដ្ឋអាម៉េរិក ដើម្បីជាការសង សឹកទៅនឹងការដាក់ទណ្ឌកម្មរបស់ទីក្រុងវ៉ាស៊ីនតោន ដែលកំពុងធ្វើឱ្យទីផ្សារហិរញ្ញ វត្ថុទីក្រុងអង់ការ៉ា ប្រឈមនឹងភាពតានតឹងខ្លំាំង ។ភាពរង្គោះរង្គើនៃទំនាក់ទំនងប្រទេសទំាងពីរ បានកើតឡើងក្រោយសហរដ្ឋអាម៉េរិក សម្រេចដាក់ទណ្ឌកម្មលើតួកគី បន្ទាប់ពីទីក្រុងអង់ការ៉ា បានបដិសេធដោះលែង អាចារ្យគ្រិស្ដអាម៉េរិកម្នាក់ ដែលត្រូវបានចោទប្រកាន់ថា មានជាប់ពាក់ព័ន្ធសកម្ម ភាពភេរវកម្ម និងរដ្ឋប្រហារមិនបានសម្រេចនៅតួកគីកាលពីឆ្នាំ២០១៦ ។ ទន្ទឹមគ្នានោះដែរ ប្រធានាធិបតីតួកគីរូបនេះថែមទំាងបានធ្វើការអំពាវនាវផងដែរ ឱ្យប្រជាជនតួកគីទាំងអស់ លក់ប្រាក់ដុល្លារ និងអឺរ៉ូចេញ ដើម្បីឱ្យរូបិយប័ណ្ឌជាតិឡើងថ្លៃ ខណៈកាលពីថ្ងៃ អង្គារ៍ សប្តាហ៍នេះ ក្រុមមន្ត្រីអាម៉េរិកក៏បានព្រមានដែរថា នឹងដាក់ទណ្ឌកម្មបន្ថែមទៀត បើសិនជាទីក្រុងអង់ការ៉ាមិនដោះលែងអាចារ្យគ្រឹស្ដ អាន់ឌ្រូ ប្រាន់សុន ទេនោះ ៕

វេណេស៊ុយអេឡា៖ អគ្គរដ្ឋអាជ្ញាវេណស៊យអេឡាលោក តារ៉េក វីលៀម សាអាប់ បានឱ្យដឹងថា ឧត្ដមសេនីយ៍វេណេស៊ុយអេឡាម្នាក់ត្រូវបានចាប់ខ្លួនពីបទចោទប្រកាន់ថា មានជាប់ពាក់ព័ន្ធនឹងការប៉ុនប៉ងធ្វើឃាតប្រធានាធិបតីវេណេស៊ុយអេឡា លោក នីកូឡាស់ ម៉ាឌូរ៉ូ។ 

សហរដ្ឋអាម៉េរិក៖ ក្រសួងការពារជាតិអាម៉េរិក ត្រូវបានគេរំពឹងថា នឹងចំណាយប្រាក់យ៉ាងច្រើនសន្ធឹកសន្ធាប់ ក្នុងការអភិវឌ្ឍប្រព័ន្ធមីស៊ីលការពារដែនអាកាស ក្រោមក្របខណ្ឌនៃកញ្ចប់ថវិកាយោធាឆ្នាំ២០១៩ ស្ថិតក្នុងគោលបំណងទប់ស្កាត់ការវាយប្រហារដោយគ្រាប់មីស៊ីលជាយថាហេតុណាមួយពីសំណាក់អ៊ីរ៉ង់ ឬក៏កូរ៉េខាងជើង។