នៅថ្ងៃទី២៩ ខែកក្កដា ឆ្នាំ២០១៨ ម្សិលមិញនេះ យើងសង្កេតឃើញថាប្រជាពលរដ្ឋខ្មែរយ៉ាងច្រើនលើសលប់រហូតដល់ទៅ៨២.១៧% បានទៅចូលរួមបោះឆ្នោតជ្រើសតាំងតំណាងរាស្រ្តនីតិកាលទី៦ ដែលនេះបង្ហាញឲ្យឃើញពីមោទកភាពនៃអធិបតេយ្យភាព និងឯករាជភាពជាតិរបស់កម្ពុជា។ ចំនួនបោះឆ្នោតនេះ បានកើនឡើងខ្ពស់ជាងឆ្នាំ២០១៣ ដែលមានត្រឹមតែ ៦៩.៦១% ប៉ុណ្ណោះ។ ក្រោយការបោះឆ្នោតប្រជាពលរដ្ឋខ្មែររាប់លាននាក់នៅក្នុងប្រទេសបានសាទរ និងទទួលយកនូវលទ្ធផលនៃការបោះឆ្នោតនេះ រួមទាំងភ្នាក់ងារគណបក្សនយោបាយ អ្នកសង្កេតការណ៍បោះឆ្នោតជាតិ និងអន្តរជាតិមកពីបណ្តាអង្គការមិនមែនរាជរដ្ឋាភិបាល អង្គការសង្គមស៊ីវិល អង្គការអន្តរជាតិ និងបណ្តាញគណបក្សនយោបាយអន្តរជាតិមកពីប្រទេសចំនួន៥២ ជុំវិញពិភពលោក ក៏បានមកធ្វើជាសាក្សីនៃប្រជាធិបតេយ្យពិតប្រាកដនៅកម្ពុជា ហើយពួកគេបានបង្ហាញចំណាប់អារម្មណ៍ដែរថា ការបោះឆ្នោតនៅកម្ពុជាម្សិលមិញនេះ គឺមានភាពសេរី ត្រឹមត្រូវ និងយុត្តិធម៌។ ផ្ទុយទៅវិញ បែរជាលោកស្រីដែលជាអ្នកនាំពាក្យសេតវិមានសហរដ្ឋអាម៉េរិកចាត់ទុកថា ការបោះឆ្នោតជ្រើសតាំងតំណាងរាស្រ្តនីតិកាលទី៦នេះ មិនសេរី និងយុត្តិធម៌ហើយមិនអាចតំណាងឲ្យឆន្ទៈប្រជាពលរដ្ឋខ្មែរទៅវិញ។ លោកស្រីមានជ្រាបទេថា ការបោះឆ្នោតសកល២០១៨នេះ មានចំនួនប្រជាពលរដ្ឋចូលរួមបោះឆ្នោតកើនឡើងខ្ពស់ជាងឆ្នាំ២០១៣ ហើយប្រជាពលរដ្ឋទាំងអស់ទៅចូលរួមបោះឆ្នោត ដោយមិនមានការបង្ខិតបង្ខំនោះទេ ពោលគឺពួកគេបានប្រើប្រាស់សិទ្ធិរបស់ខ្លួនស្របតាមរដ្ឋធម្មនុញ្ញនៃព្រះរាជាណាចក្រកម្ពុជា។ ជាងនេះទៅទៀតចំនួនគណបក្សនយោបាយចូលរួមប្រកួតប្រជែងក៏មានការកើតឡើងខ្ពស់ជាងអាណត្តិមុនរហូតដល់២០គណបក្ស ហើយក៏មានគណបក្សដែលមានសក្តានុពល ដែលអាចនឹងក្លាយជាគណបក្សប្រឆាំងថ្មីនៅកម្ពុជា ដែលមានគំនិតវិជ្ជមានល្អ ចូលរួមប្រឆាំង កែលម្អចំណុចខ្វះខាត ស្របតាមច្បាប់ ក្នុងន័យអភិវឌ្ឍន៍ជាតិរួមគ្នាជាមួយនឹងគណបក្សឈ្នះឆ្នោត ដើម្បីសុខសន្តិភាព និងការអភិវឌ្ឍជាតិ ជាជាងគណបក្សប្រឆាំងដែលមានតែគំនិតបំផ្លាញជាតិ ស្តាប់បរទេស បង្កភាពចលាចលក្នុងបំណងផ្តួលរំលំរាជរដ្ឋាភិបាលស្របច្បាប់…

នៅចំពោះភាពបរាជ័យដ៏អាម៉ាស់របស់ខ្លួន មេឧទ្ទាមក្រុមឧទ្ទាមក្រៅច្បាប់ បាននិងកំពុងឃោសនាមួលបង្កាច់ដំណើរការបោះឆ្នោតនៅកម្ពុជាថា ជាការបោះឆ្នោតក្លែងក្លាយ៖        – ក្លែងក្លាយយ៉ាងម៉េច បើប្រជាជនច្រើនលើសលប់ហួសពីការស្មាន ។       – ក្លែងក្លាយម៉េចកើត បើមានតួលេខសន្លឹកឆ្នោតបូកសរុបយ៉ាងត្រឹមត្រូវ។       – មានអ្នកសង្កេតការណ៏ជាតិ និងអន្តរជាតិរាប់ម៉ុននាក់ចូលរួមសង្កេតការណ៍យ៉ាងយកចិត្តទុកដាក់ ហើយថាមានលក្ខណៈល្អប្រសើរ មានសន្តិសុខ សុវត្ថិភាព គ្មានអំពើហិង្សា គ្មានបាតុភាពអសកម្មធំដុំអ្វីគួរកត់សម្គាល់។ ដូច្នេះការនិយាយថាការបោះឆ្នោតក្លែងក្លាយ វាគ្រាន់តែបិទបាំងការបរាជ័យយ៉ាងអាម៉ាស់របស់ខ្លួនតែប៉ុណ្ណោះ។ការដែលគណបក្សប្រជាជនកម្ពុជាឈ្នះឆ្នោតភ្លូកទឹកភ្លូកដី មិនមែនឈ្នះដោយគ្មានគូប្រកួតនោះទេ។ គូធ្លាប់ប្រកួតត្រូវទទួលវិន័យដោយអាជ្ញាកណ្តាលដោយសារអំពើប្រព្រឹត្តខុសច្បាប់។ ឯគណបក្សដទៃ ដែលចូលប្រកួតប្រជែងក៏ជាគូប្រកួតស្របច្បាប់ដែលអាជ្ញាកណ្តាលអនុញ្ញាត។ ដូច្នេះ ជ័យជម្នះរបស់គណបក្សប្រជាជនកម្ពុជា នៅតែជាជ័យជម្នះដ៏មានអត្ថន័យដដែល និងស្របច្បាប់។ ការឃោសនាបំភាន់មតិសាធារណរបស់អតីតបក្សប្រឆាំង គ្រាន់តែការខិតខំកែប្រែមុខមាត់នៃបរាជ័យដ៏អាម៉ាស់របស់ខ្លួនតែប៉ុណ្ណោះ៕ដោយៈ សុខ ឥសាន

គណបក្សយុវជនកម្ពុជា នៅទី៣០ ខែកក្កដា ឆ្នាំ២០១៨ នេះ បានចេញសេចក្តីថ្លែងការណ៍មួយដោយវាយតម្លៃថា ការបោះឆ្នោតជាតិជ្រើសតាំងតំណាងរាស្រ្តអាណត្តិទី០៦ កាលពីថ្ងៃអាទិត្យកន្លងទៅនេះ បានដំណើរការយ៉ាងល្អប្រសើរ និងគ្មានការគំរាមកំហែងកើតឡើងទេ ជាពិសេសគឺមានប្រជាពលរដ្ឋទៅបោះឆ្នោតយ៉ាងច្រើនកុះក។ ទន្ទឹមនឹងនេះ គណបក្សយុវជនកម្ពុជា ក៏បានប្រកាសទទួលយកនូវលទ្ធផលបឋម ដែលប្រកាសដោយគណៈកម្មាធិការជាតិរៀបចំការបោះឆ្នោត (គ.ជ.ប) ផងដែរ៕

សហភាពសហព័ន្ធយុវជនកម្ពុជារាជធានីភ្នំពេញ បានធ្វើការវាយតម្លៃថាដំណើរការបោះឆ្នោតជ្រើសតាំងតំណាងរាស្រ្ត នីតិកាលទី៦ ឆ្នាំ២០១៨ សម្រាប់មណ្ឌលរាជធានីភ្នំពេញ បានប្រព្រឹត្តទៅដោយរលូន និងប្រក្រតី ស្ថិតនៅក្នុងបរិយាកាសល្អប្រសើរ សុវត្ថិភាព សន្តិសុខ គ្មានអំពើហិង្សា គ្មានការបង្ខិតបង្ខំ ឬការបំភិតបំភ័យអ្វីឡើយ ជាពិសេសប្រជាពលរដ្ឋយ៉ាងច្រើនកុះករ បានអញ្ជើញទៅបោះឆ្នោតតាមការិយាល័យរបស់ខ្លួននីមួយៗដោយមានទឹកមុខសប្បាយរីករាយ ស្នាមញញឹមពេញចិត្តក្នុងជាមួយនឹងការចូលរួមបោះឆ្នោតដោយជឿជាក់លើជោគវាសនាប្រទេស ដែលបង្ហាញអំពីភាពរីកចម្រើន លទ្ធិប្រជាធិបតេយ្យនៅកម្ពុជា និងឆន្ទៈរបស់ប្រជារាស្រ្តខ្មែរ៕ម.ន