រយៈពេល៦ខែ ឆ្នាំ២០១៨ កន្លងមកនេះ ខេត្តកណ្តាលមានការងារធំៗជាច្រើន ដែលយើងទាំងអស់គ្នាបានខិតខំដោយស្មារតីទទួលខុសត្រូវ លទ្ធផលល្អប្រសើរគួរជាទីមោទនៈ។ នេះជាការលើកឡើងរបស់ ឯកឧត្តមបណ្ឌិត ម៉ៅ ភិរុណ អភិបាលនៃគណៈអភិបាលខេត្តកណ្តាល នៅក្នុងកិច្ចប្រជុំបូកសរុបការងារ ខែមិថុនា ឆ្នាំ២០០១៨ នារសៀលថ្ងៃទី១១ ខែកក្កដា នៅសាលាខេត្តកណ្តាល។

លោកជំទាវ ហ៊ុន កុសនី អភិបាលរងខេត្តកណ្តាល និងជាអនុប្រធានអចិន្ត្រៃយ៍គណៈកម្មាធិការប្រយុទ្ធប្រឆាំងការជួញដូរមនុស្ស ខេត្តកណ្តាល បានមានប្រសាសន៍ថា ត្រូវបន្តការងារផ្សព្ធផ្សាយ អប់រំតាមគ្រប់រូបភាព និងប្រើប្រាស់លទ្ធភាព និងធនធានដើម្បីលើកកម្ពស់ការយល់ដឹងអំពីការជួញដូរមនុស្ស ការធ្វើអាជីវកម្មផ្លូវភេទ ការកេងប្រវ័ញ្ចពលកម្ម ការងារទេសន្តរប្រវេសន៍ ការជួញដូរមនុស្ស និងបទល្មើសផ្សេងៗទៀតឲ្យបានដល់ប្រជាពលរដ្ឋ គ្រប់ស្រទាប់យុវវ័យ និងជនងាយរងគ្រោះ ឲ្យមានការយល់ដឹង។

អនុវត្តតាមច្បាប់ស្តីពីការបោះឆ្នោត និងគោលការណ៍របស់គណៈកម្មាធិការជាតិរៀបចំការបោះឆ្នោត គ្រប់គណបក្សនយោបាយទាំងអស់ បានធ្វើសកម្មភាពស្វែងរករកសំឡេងឆ្នោត ទៅតាមលទ្ធភាពរៀងៗខ្លួន ពុះពារសម្រេចឲ្យបាននូវការប្ដេជ្ញាចិត្ត យកឈ្នះ ក្នុងការបោះឆ្នោតជ្រើសរើសតំណាងរាស្ត្រ នីតិកាលទី៦ នៅថ្ងៃទី២៩ ខែកក្កដា ឆ្នាំ២០១៨ខាងមុខនេះ។

យោងតាមសេចក្ដីជូនដំណឹងរបស់ គ.ជ.ប. នៅថ្ងៃទី១២ ខែកក្កដានេះ បានឲ្យដឹងថា បន្ទាប់ពីបានបញ្ចប់ការបោះពុម្ពសន្លឹកឆ្នោតរួច គណៈកម្មាធិការជាតិរៀបចំការបោះឆ្នោត នឹងដឹកជញ្ជូនសន្លឹកឆ្នោតពីរោងពុម្ព នៅថ្ងៃទី១៣ ខែកក្កដា ឆ្នាំ២០១៨ ទៅរក្សាទុកនៅឃ្លាំង គ.ជ.ប. ដែលមានទីតាំងស្ថិតនៅសង្កាត់គីឡូម៉ែត្រលេខ៦ ខណ្ឌឬស្សីកែវ រាជធានីភ្នំពេញ។ ការដឹកជញ្ជូនសន្លឹកឆ្នោតនេះ ត្រូវ គ.ជ.ប. ជូនដំណឹងថា នឹងចេញដំណើរពីរោងពុម្ព លី វ៉ាន់ហុង ស្ថិតនៅផ្ទះលេខ៩ ផ្លូវលេខ៣៤៥ សង្កាត់បឹងកក់ទី១ ខណ្ឌទួលគោក រាជធានីភ្នំពេញ នៅម៉ោង ៩ព្រឹក។ ក្នុងឱកាសដឹកជញ្ជូនសន្លឹកឆ្នោតនោះ អ្នកនាំពាក្យ គ.ជ.ប. នឹងមានវត្តមាននៅទីនោះ។ សន្លឹកឆ្នោត សម្ភារ និងឯកសារប្រើប្រាស់សម្រាប់ការបោះឆ្នោត គ.ជ.ប. ត្រូវបញ្ជូនទៅដល់ការិយាល័យបោះឆ្នោតទាំង ២ម៉ឺន២ពាន់៩៦៧ការិយាល័យ នៃមណ្ឌលបោះឆ្នោតទាំង២៥ មិនឲ្យលើសពី៣៦ម៉ោងមុនថ្ងៃបោះឆ្នោតឡើយ។

ភ្នំពេញ ៖ សង្ស័យអ្នកបើកបរងោកមួយភាំង រថយន្តហ៊ីណូ ប្រភេទកុងទីន័រសណ្តោងរឺម៉កមួយគ្រឿង ដឹកស៊ីម៉ង់ត៍ពេញទ្រុង២៨តោន ធ្លាក់ផ្លូវក្រឡាប់ផ្ងារជើងក្នុងប្រឡាយ ចាក់ស៊ីម៉ង់ត៍ចូលក្នុងទឹក បែរជាម្ចាស់កុហកថាមានរថយន្តផ្សេងបើកមកកៀរ។ ហេតុការណ៍ខាងលើកើតឡើង កាលពីវេលាម៉ោង៤និង៣០នាទីព្រឹក ថ្ងៃទី១២ ខែកក្កដា ឆ្នាំ២០១៨ ស្ថិតនៅតាមផ្លូវ ទំនប់កប់ស្រូវ ភូមិស្រែតេជៈ សង្កាត់សំរោងក្រោម ខណ្ឌពោធិសែនជ័យ ។​ រថយន្តជួបហេតុការណ៍ខាងលើ ម៉ាកហ៊ីណូ ប្រភេទកុងទីន័រសណ្តោងរឺម៉ក ពណ៌ស ខៀវ ពាក់ស្លាកលេខ ចង្កូតស្តាំ PSHN-0151 រឺម៉កក្រោយពាក់ស្លាកលេខ ភ្នំពេញ 4A-1952 ដឹកស៊ីម៉ង់ត៍ចំនួន១៤យ៉ោង ស្មើនឹង២៨តោន បើកបរដោយយុវជនម្នាក់មិនស្គាល់ឈ្មោះ ។

ប្រធានកាកបាទក្រហមកម្ពុជា សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន នៅថ្ងៃទី១១ ខែកក្កដា ឆ្នាំ២០១៨ ម្សិលមិញនេះ បានផ្ញើសារចូលរួមរំលែកទុក្ខជាមួយ លោក តាដាតេរូ កូណូអេ (Mr. Tadateru KONOE) ប្រធានសមាគមជាតិកាកបាទក្រហមជប៉ុន និងប្រជាជនជប៉ុន ជាពិសេស គ្រួសារនៃសព។ លិខិតបានសរសេរថា  ខ្ញុំមានសេចក្ដីតក់ស្លុត និងក្រៀមក្រំជាពន់ពេក នៅពេលបានទទួលព័ត៌មានអំពីការបាត់ខ្លួន និងការបាត់បង់ជីវិតមនុស្សជាច្រើនក្នុងគ្រោះទឹកជំនន់ និងបាក់ដី ដោយសារភ្លៀងធ្លាក់ខ្លាំង តាំងពីចុងសប្ដាហ៍មុន។ លិខិតបានបន្តថា «ក្នុងនាមគណៈកម្មាធិការ កណ្ដាល សមាជិក សមាជិកា បុគ្គលិក អ្នកស្ម័គ្រចិត្ត និងយុវជនកាកបាទក្រហមកម្ពុជា និងក្នុងនាមសម្ដេចផ្ទាល់ សម្ដេចសូមចូលរួមមរណទុក្ខដ៏ក្រៀមក្រមបំផុត ចំពោះលោក លោក តាដាតេរូ កូណូអេ ប្រធានសមាគមជាតិកាកបាទក្រហមជប៉ុន និងប្រជាជនជប៉ុន ជាពិសេស គ្រួសារនៃសព៕

ត្បូងឃ្មុំ ៖ ឯកឧត្តម សាយ សំអាល់ ប្រធានក្រុមការងារថ្នាក់កណ្តាលចុះជួយស្រុកអូររាំងឪ ខេត្តត្បូងឃ្មុំ បានបន្តជួបសំណេះសំណាលជាមួយសមាជិកសមាជិកាគណបក្សប្រជាជនកម្ពុជា នៅក្នុងឃុំអំពិលតាពក ស្រុកអូររាំងឱ ខេត្តត្បូងឃ្មុំ នៅព្រឹកថ្ងៃទី១២ ខែកក្កដា ឆ្នាំ២០១៨ ។ ឯកឧត្តម សាយ សំអាល់ បានជម្រាបជូនសមាជិក សមាជិកា អំពីគោលនយោបាយ របស់គណបក្សប្រជាជនកម្ពុជា ដោយផ្តោតសំខាន់ទៅលើការកសាង និងការអភិវឌ្ឍប្រទេសជាតិ ប្រកបដោយស្ថេរភាព សន្តិភាព សុខដុមរមនា ជំរុញកំណើនសេដ្ឋកិច្ច និងធ្វើឱ្យជីវភាពប្រជាពលរដ្ឋល្អប្រសើរ ។ ឯកឧត្តមប្រធានក្រុមការងារ ក៏បានលើកឡើងពីឧបាយកលអាក្រក់របស់គណបក្សប្រឆាំង ដែលមានបំណងចង់ផ្តួលរំលំរាជរដ្ឋាភិបាលស្របច្បាប់ គាំទ្រដោយប្រជាពលរដ្ឋ ប៉ុន្តែត្រូវបរាជ័យដោយអំពើល្ងង់ខ្លៅរបស់ខ្លួន។ មានតែគណបក្សប្រជាជនកម្ពុជាប៉ុណ្ណោះ ដែលបានរួមសុខទុក្ខជាមួយប្រជាពលរដ្ឋ និងបានដឹកនាំប្រទេសឲ្យមានការអភិវឌ្ឍរីកចម្រើន ក្នុងនោះមានហេដ្ឋារចនាសម្ព័ន្ឋ ផ្លូវថ្នល់ ស្ពាន សាលារៀន មន្ទីរពេទ្យ វត្តអារាម និងសមិទ្ឋនានាបានរីកដុះដាលនៅទូទាំងប្រទេស។ ជាមួយគ្នានេះ ឯកឧត្តម បានរំលឹកដល់ប្រជាពលរដ្ឋ សូមអញ្ជើញទៅបោះឆ្នោតនៅថ្ងៃទី២៩ ខែកក្កដា ឆ្នាំ២០១៨ ឲ្យបានគ្រប់គ្នា ព្រោះថា  ការបោះឆ្នោតនេះសំខាន់ណាស់…