នៅថ្ងៃទី២៨ ខែវិច្ឆិកា ឆ្នាំ២០១៨ នៅក្នុងកិច្ចប្រជុំលើកទី១៣ នៃគណៈកម្មការអន្តររដ្ឋាភិបាលសម្រាប់ការការពារបេតិកភណ្ឌវប្បធម៌អរូបីរបស់អង្គការយូណេស្កូ នៅទីក្រុងព័រល្វី សាធារណរដ្ឋម៉ូរីស បានអនុម័តយល់ព្រមចុះល្ខោនខោល ចូលក្នុងបញ្ជីបេតិកភណ្ឌវប្បធម៌អរូបី នៃមនុស្សជាតិ តាមសេចក្តីសម្រេច Decision 13.COM.10.a.3 ។ នេះបើយោងតាមសេចក្ដីជូនដំណឹងរបស់ក្រសួងវប្បធម៌ និងវិចិត្រសិល្បៈ ដែលបានចេញផ្សាយនៅថ្ងៃទី២៨ ខែវិច្ឆិកា ឆ្នាំ២០១៨ ។ ការសម្រេចរបស់គណៈកម្មការអន្តររដ្ឋាភិបាលនៃអង្គការយូណេស្កូនៅពេលនេះ គឺជាមោទកភាពជាតិដ៏ធំថ្មីមួយទៀត ដែលកើតចេញពីការខិតខំប្រឹងប្រែងរបស់រាជរដ្ឋាភិបាលកម្ពុជា និងការខិតខំពុះពារចូលរួមយ៉ាងសកម្មពីថ្នាក់ដឹកនាំមន្រ្តីរាជការ នៃក្រសួងវប្បធម៌ និងវិចិត្រសិល្បៈ ដោយមានកិច្ចសហការគាំទ្រយ៉ាងផុសផុលពីសិល្បករ អង្គការសមាគម សង្គមស៊ីវិល ក្នុងវិស័យសិល្បៈវប្បធម៌ និងការជួយគាំទ្រលើកទឹកចិត្ត ពីមហាជន និងស្រទាប់យុវជនកម្ពុជាទាំងមូល ទើបយើង បានទទួលនូវលទ្ធផលជោគជ័យ នៃការដាក់បញ្ចូលនូវល្ខោនខោលនៅក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិដ៏ត្រចះត្រចង់នេះ។ បេតិកភណ្ឌវប្បធម៌រូបី និងអរូបីរបស់ជាតិយើង បានរួមចំណែកធ្វើឲ្យកេរ្តិ៍ឈ្មោះរបស់ព្រះរាជាណាចក្រកម្ពុជា ល្បីរន្ទឺលើឆាកអន្តរជាតិ ព្រមទាំងជាតួអង្គមួយដ៏លេចធ្លោនៅលើវេទិកាបេតិកភណ្ឌពិភពលោកថែមទៀតផង ៕  

ភ្នំពេញ៖ បុរសម្នាក់ដែលបានបាត់ស្លាកលេខរថយន្ត២ឆ្នាំ ស្រាប់តែប្រទះឃើញជាប់នឹងរថយន្តមួយគ្រឿងផ្សេងទៀតដែលគេចតទុក នៅម្តុំលក់រថយន្តក្បែរវត្តភ្នំ។ ហេតុការណ៍នេះបានធ្វើឲ្យមានការភ្ញាក់ផ្អើលដល់ប្រជាពលរដ្ឋ ក៏ដូចជាសមត្ថកិច្ចនៅវេលាម៉ោង១១និង៣០នាទីព្រឹក ថ្ងៃទី២៨ ខែវិច្ឆិកា ឆ្នាំ២០១៨ នៅចំណុចសួនច្បារវត្តភ្នំ ក្នុងសង្កាត់វត្តភ្នំ ខណ្ឌដូនពេញ។ បើតាមសម្ដីបុរសម្នាក់ដែលបានអះអាងថាខ្លួនជាម្ចាស់ស្លាកលេខរថយន្តនោះ បានប្រាប់ឲ្យដឹងថា គាត់បានធ្វើដំណើរតាមផ្លូវ ហើយក៏បានប្រទះឃើញស្លាកលេខរថយន្តរបស់គាត់ ដែលបានបាត់អស់រយៈពេលជាង២ឆ្នាំមកហើយ ស្រាប់តែពេលនេះឃើញគេយកទៅពាក់លើរថយន្តមួយគ្រឿងដែលគេចតទុកចោលនៅក្បែរវត្តភ្នំទៅវិញ។ គាត់បានប្រាប់ឱ្យដឹងទៀតថា ស្លាកលេខរថយន្តប្រទះឃើញនេះ គឺមានលេខភ្នំពេញ2H-0621 បាត់តាំង២ឆ្នាំមុននៅម្តុំស្ទឹងមានជ័យ។ លុះដល់ព្រឹកនេះ ក៏ស្រាប់តែបានប្រទះឃើញស្លាកលេខរថយន្តរបស់គាត់ដែលបាត់នោះ ត្រូវបានគេយកទៅដាក់ជាប់នឹងរថយន្តម៉ាក CORONA ព៌ណទឹកប្រាក់មួយគ្រឿងទៀតដែលចតទុកចោលនៅលើផ្លូវក្បែរសួនច្បារវត្តភ្នំ ហើយគាត់ក៏បានរាយការណ៍ទៅប្តឹងកម្លាំងមានសម្ថកិច្ចទាំងខណ្ឌដូនពេញ និងសមត្ថកិច្ចប៉ុស្តិ៍នគរបាលស្ទឹងមាន១ ឲ្យជួយឃាត់ទុកតែម្តង។ ក្រោយពេលកើតហេតុ កម្លាំងមានសម្ថកិច្ចមូលដ្ឋានក៏បានចុះទៅធ្វើអន្តរាគមន៍ឃាត់រថយន្តនៅនឹងកន្លែងកើតហេតុរង់ចាំសហការជាមួយសមត្ថកិច្ចប៉ុស្តិ៍ស្ទឹងមានជ័យ ហើយបានបញ្ជូនរថយន្តទាំង២គ្រឿងទៅកាន់នគរបាលប៉ុស្តិ៍ស្ទឹងមានជ័យ១ ដើម្បីធ្វើការដោះស្រោយគ្នាបន្តទៅទៀត៕  

ភ្នំពេញ៖ ប្រជាពលរដ្ឋដែលរស់នៅក្នុងសង្កាត់ចោមចៅ១ ខណ្ឌពោធិ៍សែនជ័យ ជាពិសេសអ្នកធ្វើដំណើរតាមដងផ្លូវវេងស្រេង មានការត្អូញត្អែរជុំវិញឡានសំរាមរបស់ក្រុមហ៊ុនស៊ិនទ្រីយឺតយ៉ាវក្នុងការប្រមូលសំរាម រហូតដល់ស្បោងច្រកសំរាមរបស់ពលរដ្ឋ យកចេញពីក្នុងផ្ទះមកគរជាគំនរលើចិញ្ចើមផ្លូវវេងស្រេងបាត់ទៅហើយ។ ប្រជាពលរដ្ឋបានលើកឡើងថា កន្លងមកលោក កង វង ចៅសង្កាត់ចោមចៅ១ ខ្នះខ្នែងយកចិត្តទុកដាក់នៅចំណុចត្រង់ណាដែលពលរដ្ឋរអ៊ូរិះគន់ជុំវិញគំនរសំរាម គឺលោកចៅសង្កាត់ចាត់វិធានការ មានទាំងឡាយ វីដេអូ រូបភាព សកម្មភាព ក្រុមការងារ ចាត់វិធានការប្រមូល កើបសំរាមយកចេញ បានស្អាតនៅថ្ងៃនេះ ហើយស្អែកឡើងសំរាមពេញដដែល បានត្រឹមឡាយបង្ហោះឲ្យថ្នាក់លើមើលឃើញ។ សំរាមធ្លាប់កើតមាននៅកន្លែងណា នៅដដែល រហូតមកដល់ព្រឹកថ្ងៃទី២៨ ខែវិច្ឆិកា គ្រាន់តែកំណាត់ផ្លូវវេងស្រេង ចាប់ពីមុខរោងចក្រ៦ជាន់ រហូតដល់ផ្សារត្រពាំងថ្លឹង ចម្ងាយជាង៥០ម៉ែត្រសោះ សំរាមហូរហៀរមកលើផ្លូវវេងស្រេងបាត់ទៅហើយ ក្បែរសាលាសង្កាត់ផ្ទាល់តែម្តង។ ពលរដ្ឋបន្តទៀតថា ឲ្យតែឡានរបស់ក្រុមហ៊ុនស៊ិនទ្រីយឺតយ៉ាវក្នុងការប្រមូលសំរាម ប្រាកដហើយ សំរាមគរស្អុយរលួយ កន្លែងណាក៏ដូចកន្លែងណា ទោះជាអាជ្ញាធរ ខិតខំ សម្អាត អស់ពីកន្លែងមួយ នៅកន្លែងមួយទៀត ដូចកំណាត់ផ្លូវវេងស្រេង ក្នុងភូមិសាស្ត្រសង្កាត់ចោមចៅទី១នេះអ៊ីចឹង៕

ប្រតិភូបញ្ជាការដ្ឋានយោធានៃរដ្ឋធានីហាណួយ សាធារណរដ្ឋសង្គមនិយមវៀតណាម ដឹកនាំដោយលោកឧត្តសេនីយ៍ទោ ង្វៀង ថេកេត ប្រធាននយោបាយនៃបញ្ជាការដ្ឋានយោធាទីក្រុងហាណូយ និងគណៈប្រតិភូ បានចូលជួបសម្តែងការគួរសមជាមួយឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ ក្នុងឱកាសដែលរាជធានីភ្នំពេញធ្វើជាម្ចាស់ផ្ទះនៃកិច្ចប្រជុំប្រចាំឆ្នាំលើកទី៦រវាងបញ្ជាការដ្ឋានយោធាប្រទេសទាំង៣ ភ្នំពេញ-ហាណូយ-វៀងច័ន្ទ ដោយផ្តោតទៅលើការពង្រឹងចំណងសាមគ្គីភាព មិត្តភាពជាប្រពៃណីនៃប្រទេសទាំង៣ ប្រជាជនទាំង៣ និងកងទព័ទាំង៣ឲ្យកាន់តែរឹងមាំ ស្ថេរភាព និងយូអង្វែង។ ឯកឧត្តម ឃួង ស្រេង បានថ្លែងថា ចំណងមិត្តភាព និងកិច្ចសហប្រតិបត្តិការរវាងប្រទេសជិតខាងយើងទាំង២ គឺមានតម្លៃ និងមានផលប្រយោជន៍សម្រាប់ប្រជាជន និងប្រទេសយើងទាំង២ក្នុងការជួយគ្នាទៅវិញទៅមក ព្រោះនៅពេលយើងមានបញ្ហាគឺមានតែប្រទេសជិតខាងនឹងហើយ ដែលជួយយើងមុនគេ។ ពិសេសមិត្តវៀតណាម បានជួយកម្ពុជាក្នុងការរំដោះប្រជាជនកម្ពុជាចេញផុតពីរបបប្រល័យពូជសាសន៍ ប៉ុល ពត។ នេះជាការពិតដែលកម្ពុជាតែងបានប្រាប់ទៅយុវវ័យជំនាន់ក្រោយមិនត្រូវភ្លេចពីគុណបំណាច់នេះ។ ជាមួយគ្នានេះ ឯកឧត្តម ង្វៀង ថេកេត បានលើកឡើងថា ភាពសប្បាយរីករាយ និងការអភិវឌ្ឍរបស់ប្រជាជនកម្ពុជា គឺជាភាពសប្បាយរីករាយរបស់រដ្ឋ ប្រជាជន និងកងទ័ពវៀតណាមដែរ។ ឯកឧត្តមបន្តថា កម្ពុជា-វៀតណាម-ឡាវ មានភូមិផងរបងជាមួយគ្នានៅពេលមានបញ្ហា យើងត្រូវរួមគ្នាដោះស្រាយដោយសន្តិវិធី។  …

ភ្នំពេញ៖ នៅថ្ងៃទី២៧ ខែវិច្ឆិកា ឆ្នាំ២០១៨ គណ:បញ្ជាការឯកភាពរដ្ឋបាលខណ្ឌដង្កោ បានបន្តដាក់គោលដៅត្រួតពិនិត្យរថយន្តតទ្រុងខុសបច្ចេកទេស និងម៉ោងពេលវេលាចូលរាជធានីភ្នំពេញ នេះបើយោងតាមផេករបស់លោក នុត ពុធដារ៉ា អភិបាលខណ្ឌដង្កោ។ គួររំលឹកផងដែរថា កន្លងមកគេសង្កេតឃើញមានរថយន្តប្រភេទធុនធំ បើកចូលក្រុងពេលរាត្រីជាប្រចាំថ្ងៃ ជាពិសេសខណ្ឌដង្កោ គឺមានការលួចឆ្មក់បើកចូល១-២ ខុសនឹងម៉ោងកំណត់របស់សាលារាជធានីភ្នំពេញ ពិសេសនៅចំណុចស្ពានដែកចម្ការដូង ផ្លូវ៣៧១ព្រំប្រទល់ខណ្ឌមានជ័យ និងខណ្ឌដង្កោ ចំណុចផ្លូវ២១៧ស្តុបចម្ការដូង ចំណុចស្តុបបឹងតាម៉ាត ចំណុចពីទួលពង្រ បុកមកមុខវត្តសំបួរមាស ជាដើម។ ដូច្នេះសូមឲ្យអាជ្ញាធរជួយធ្វើការរឹតបន្តឹងទៅលើរថយន្តប្រភេទធុនធំទាំងនេះផង ព្រោះអាចបង្កជាការកកស្ទះ ខូចផ្លូវ និងអាចបង្កគ្រោះថ្នាក់ជាយថាហេតុ ដល់បងប្អូនប្រជាពលរដ្ឋដែលកំពុងធ្វើដំណើរតាមដងផ្លូវផងដែរ៕