ភ្នំពេញ៖លើបណ្ដាញសង្គមនារាត្រីថ្ងៃទី២៨ ខែកក្កដា ឆ្នាំ២០២៥​សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តី​កម្ពុជា​បានសរសេរថា “ក្រោយពីត្រឡប់មកដល់ប្រទេសកម្ពុជាវិញបន្ទាប់ពីចរចារការឈប់បាញ់ជាបន្ទាន់ រវាងកងទ័ព​កម្ពុជានិងកងទ័ពថៃដោយជោគជ័យនៅប្រទេសម៉ាឡេស៊ី ខ្ញុំបានទទួលទូរសព្ទពីឯកឧត្តម Donald Trump ប្រធានាធិបតី​សហរដ្ឋអាមេរិក ដោយឯកឧត្តមទាក់ទងមកផ្ទាល់ ដើម្បីអបអរសាទរនូវជោគជ័យនៃកិច្ចចរចារបញ្ចប់ការឈប់បាញ់គ្នា​ភ្លាម​រវាងនាយក​រដ្ឋមន្ត្រីកម្ពុជានិងនាយករដ្ឋមន្ត្រីថៃកាលពីល្ងាចមិញនេះ។ ឯកឧត្តមចាត់ទុកកិច្ចការនេះជាកិច្ចការ​សំខាន់ហើយ​ដែលឯកឧត្តមតាមដានដោយផ្ទាល់។ សម្ដេចធិបតីបានបន្តថា”ខ្ញុំបានសម្ដែងការអរគុណសារជាថ្មីចំពោះឯកឧត្តមប្រធានាធិបតី Donald Trump ដែលបាន​ផ្ដួចផ្ដើម​និងជំរុញឲ្យមានការចរចារការឈប់បាញ់ឱ្យបានឆាប់រហ័ស និងឲ្យគោលការណ៍សហរដ្ឋអាមេរិកធ្វើជាសហ​អ្នករៀបចំកិច្ចប្រជុំពិសេសនៅប្រទេសម៉ាឡេស៊ីថ្ងៃនេះ”។ ឯកឧត្តមប្រធានាធិបតីយល់ថាដើម្បីឱ្យកិច្ចព្រមព្រៀងនេះអាចអនុវត្តទៅដោយពេញលេញនិងមាននិរន្តរភាព ចាំបាច់ត្រូវ​មាន​យន្តការតាមដាននិងត្រួតពិនិត្យការអនុវត្តរបស់ភាគីពាក់ព័ន្ធឱ្យបានច្បាស់លាស់ ដែលនេះក៏ជាចំណុចឯកភាព​គ្នាមួយនៅក្នុងកិច្ចប្រជុំពិសេសផងដែរ។ សម្ដេចធិបតី បន្តថា ក្នុងន័យនេះ ឯកឧត្តមប្រធានាធិបតីបានឯកភាពឱ្យ​សហរដ្ឋ​អាមេរិកចូលរួមក្នុងដំណើរការត្រួតពិនិត្យការអនុវត្តកិច្ចព្រមព្រៀងបញ្ចប់ការឈប់បាញ់គ្នា និងបន្តសហការជា​មួយយន្តការ​ដែលរៀបចំដោយម៉ាឡេស៊ី ដើម្បីត្រួតពិនិត្យឱ្យបានជោគជ័យ។” សម្ដេចធិបតីបានបញ្ជាក់ជាចុងក្រោយថា”ឯកឧត្តមប្រធានា​ធិបតី Donald Trump ចាត់ទុកថាកិច្ចការងារនេះជាកិច្ចការ​ពិសេសសំខាន់ដែលឯកឧត្តមចង់ឃើញនូវសន្តិភាពមួយដែលមានជាអចិន្ត្រៃយ៍រវាងប្រទេសទាំងពីរ។ “៕ដោយ៖វណ្ណលុក

ភ្នំពេញ៖ប្រទេសម៉ាឡេស៊ីក្នុងនាមជាប្រធានប្តូរវេនអាស៊ានបានត្រៀមរួចជាស្រេចក្នុងការសម្របសម្រួលរៀប​ចំឱ្យមាន​ក្រុមអ្នកអង្កេតការណ៍មួយដើម្បីចុះពិនិត្យ និងធានាការអនុវត្តបទឈប់បាញ់ក្នុងជម្លោះព្រំដែនរវាងកម្ពុជា-ថៃ។ ឯកឧត្តម ហ្សង់ ហ្វ្រង់ស័រ តាន់ បានថ្លែងបែបនេះបន្ទាប់ពីបញ្ចប់បេសកកម្មរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជាដែលបានដឹកនាំគណៈប្រតិភូកម្ពុជាទៅចូលរួមកិច្ចប្រជុំពិសេស ដើម្បីសម្រេចឱ្យមានបទឈប់​បាញ់គ្នាបន្ទាន់ រវាង​កម្ពុជា-ថៃ នៅទីក្រុងគូឡាឡាំពួរ ដែលមានម៉ាឡេស៊ី ធ្វើជាម្ចាស់ផ្ទះ សហរដ្ឋអាមេរិក ជាសហការរៀប​ចំ និងមាន​ការចូលរួមពីតំណាងចិន ។ឯកឧត្តមបន្តថា ប្រទេសម៉ាឡេស៊ី នឹងពិគ្រោះជាមួយសមាជិកអាស៊ានផ្សេង​ទៀត​ដើម្បីចូលរួមក្នុងកិច្ចអង្កេតការណ៍តាមឃ្លាំមើលដែលឆ្លុះបញ្ចាំងពីការប្តេជ្ញាចិត្តក្នុងតំបន់ដើម្បីគាំទ្រ សន្តិភាពពិតប្រាកដ។ក្រៅពីនេះទាំងរដ្ឋមន្រ្តីការបរទេស និងរដ្ឋមន្រ្តីការពារជាតិម៉ាឡេស៊ី កម្ពុជានិងថៃ នឹងបង្កើតយន្តការសម្រាប់អនុវត្ត​ផ្ទៀងផ្ទាត់ និងរាយការណ៍អំពីពីបទឈប់បាញ់។យន្តការនេះគឺជាមូលដ្ឋានគ្រឹះ សន្តិភាព និរន្តរភាព និងការទទួលខុស​ត្រូវ។ ឯកឧត្តម ហ្សង់ ហ្វ្រង់ស័រ តាន់ បានបន្តថាសង្រ្គាមនឹងចប់ហើយ បើផ្អែកទៅលទ្ធផលកិច្ចចរចាជាប្រវត្តិសាស្រ្ត សម្ដេច​មហាបវរ​ធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និង ឯកឧត្ដម Phumtham Wechayachai នាយករដ្ឋមន្ត្រីស្តីទីនៃព្រះរាជាណាចក្រថៃ នៅថ្ងៃនេះ(ថ្ងៃទី ២៨ ខែ កក្កដា ឆ្នាំ ២០២៥)។ឯកឧត្តមបញ្ជាក់បន្ថែមថា”ស្នូរកាំភ្លើងនឹងលែងលាន់លឺទៀតហើយចាប់ពីយប់នេះនៅម៉ោង១២អធ្រាត្រទៅ។ នេះបើយោងតាមស្មារតីនៃទំនួលខុសត្រូវ រួមរវាងមេដឹកនាំកំពូលទាំងពីរគឺកម្ពុជាថៃ នៅចំពោះមុខប្រជាជាតិរៀងៗខ្លួន នៅចំពោះមុខតំបន់ និងនៅចំពោះមុខពិភពលោក”៕

ភ្នំពេញ៖ឯកឧត្តម ហ្សង់ ហ្វ្រង់ស័រតាន់ រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកកិច្ចការការបរទេស និងសហប្រតិ បត្តិការ អន្តរជាតិបានថ្លែងថាសង្រ្គាមនឹងចប់ហើយបើផ្អែកទៅលទ្ធផលកិច្ចចរចាជាប្រវត្តិសាស្រ្ត សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងឯកឧត្ដម Phumtham Wechayachai នាយករដ្ឋមន្ត្រីស្តីទី នៃព្រះរាជាណាចក្រថៃ នៅថ្ងៃនេះ។ ឯកឧត្តម ហ្សង់ ហ្វ្រង់ស័រ តាន់ បានថ្លែងបែបនេះបន្ទាប់ពីបញ្ចប់បេសកកម្មរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជាដែលបានដឹកនាំគណៈប្រតិភូកម្ពុជាទៅចូលរួមកិច្ចប្រជុំពិសេស ដើម្បីសម្រេចឱ្យមានបទឈប់​បាញ់គ្នាបន្ទាន់ រវាង​កម្ពុជា-ថៃ នៅទីក្រុងគូឡាឡាំពួរ ដែលមានម៉ាឡេស៊ី ធ្វើជាម្ចាស់ផ្ទះ សហរដ្ឋអាមេរិក ជាសហការរៀប​ចំ និងមាន​ការចូលរួមពីតំណាងចិន ។ឯកឧត្តមបន្តថា ក្រោយបញ្ចប់ចរចាជម្លោះព្រំដែនជាមួយភាគី ថៃ នាយប់ថ្ងៃទី ២៨ ខែកក្កដា ឆ្នាំ២០២៥នេះថា”ស្នូរកាំភ្លើងនឹងលែងលាន់លឺទៀតហើយចាប់ពីយប់នេះនៅម៉ោង១២អធ្រាត្រទៅ ។នេះបើយោងតាមស្មារតីនៃទំនួល​ខុសត្រូវ រួមរវាងមេដឹកនាំកំពូលទាំងពីរគឺកម្ពុជាថៃ នៅចំពោះមុខប្រជាជាតិរៀងៗខ្លួន នៅចំពោះមុខតំបន់ និងនៅចំពោះមុខ​ពិភពលោក។ ជាមួយការថ្លែងបែបនេះឯកឧត្តម ហ្សង់ ហ្វ្រង់ស័រ តាន់​បានគូសបញ្ជាក់ដែរថាប្រទេសម៉ាឡេស៊ីក្នុងនាមជាប្រធានប្តូរវេន​អាស៊ានបានត្រៀមរួចជាស្រេចក្នុងការសម្របសម្រួលរៀបចំឱ្យមានក្រុមអ្នកអង្កេតការណ៍មួយដើម្បីចុះពិនិត្យ និងធានា​ការអនុវត្តបទឈប់បាញ់។ម៉ាឡេស៊ីក៏នឹងពិគ្រោះជាមួយសមាជិកអាស៊ានផ្សេងទៀតដើម្បីចូលរួមក្នុងកិច្ចអង្កេតការណ៍​តាមឃ្លាំមើលដែលឆ្លុះបញ្ចាំងពីការប្តេជ្ញាចិត្តក្នុងតំបន់ដើម្បីគាំទ្រ សន្តិភាពពិតប្រាកដ។ក្រៅពីនេះទាំងរដ្ឋមន្រ្តីការបរទេស និងរដ្ឋមន្រ្តីការពារជាតិម៉ាឡេស៊ី កម្ពុជានិងថៃ នឹងបង្កើតយន្តការសម្រាប់អនុវត្តផ្ទៀងផ្ទាត់…

ភ្នំពេញ៖សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានដឹកនាំគណៈប្រតិភូកម្ពុជា​ធ្វើមាតុភូមិនិវត្តន៍ពីប្រទេសម៉ាឡេស៊ី​ជាមួយនឹងលទ្ធផលដ៏ត្រចះត្រចង់ ដោយមានការឯកភាពបទឈប់បាញ់ នៅម៉ោង​១២អធ្រាត្រ ថ្ងៃទី២៨ ខែកក្កដា ឆ្នាំ២០២៥នេះ ដែលនេះជាគោលដៅធំសម្រាប់ជាតិ និងប្រជាជនកម្ពុជា។ ការឯកភាពបទឈប់បាញ់ នៅម៉ោង១២អធ្រាត្រ ថ្ងៃទី២៨ ខែកក្កដានេះ កើតមានឡើងក្នុងឱកាសដែលសម្តេចធិបតី ហ៊ុន ម៉ាណែត ដឹកនាំគណៈប្រតិភូកម្ពុជា ចូលរួមកិច្ចប្រជុំពិសេសមួយ ដើម្បីសម្រេចឱ្យមានបទឈប់បាញ់គ្នាបន្ទាន់ រវាង​កម្ពុជា-ថៃ នៅទីក្រុងគូឡាឡាំពួរ ដែលមានម៉ាឡេស៊ី ធ្វើជាម្ចាស់ផ្ទះ សហរដ្ឋអាមេរិក ជាសហការរៀបចំ និងមាន​ការចូលរួមពីតំណាងចិន ។ សូមជម្រាបថា សម្ដចធិបតី ហ៊ុន ម៉ាណែត បានបញ្ជាក់លើបណ្ដាញសង្គមនៅល្ងាចថ្ងៃទី២៨ ខែកក្កដា ឆ្នាំ២០២៥​ពេលត្រឡប់មកដល់កម្ពុជា ថា ជាលទ្ធផលដ៏ត្រចះត្រចង់ពីជំនួបរវាងសម្ដេច និងឯកឧត្ដម Phumtham Wechayachai នាយករដ្ឋមន្ត្រីស្តីទី នៃព្រះរាជាណាចក្រថៃ ដោយភាគីទាំងពីរ កម្ពុជា-ថៃបានឯកភាពគ្នាដូចខាងក្រោម៖ ១. បទឈប់បាញ់បន្ទាន់ ឥតលក្ខខណ្ឌ ដែលនឹងចូលជាធរមាននៅវេលាម៉ោង ២៤:០០ ថ្ងៃទី២៨ ខែកក្កដា ឆ្នាំ២០២៥ ។…