(ភ្នំពេញ) ៖ មកដល់ពេលនេះកងកម្លាំងរបស់ភាគីថៃកាន់តែគឃ្លើន ប្រកបដោយភាពយង់ឃ្នងបានវាយប្រហារលើជនស៊ីវិលកាន់តែច្រើនឡើង និងនៅថ្ងៃទី២៦ ខែកក្កដានេះ កងទ័ពឈ្លានពានថៃបានពង្រីកការវាយប្រហារបន្ថែមទៀតនៅឃុំថ្មដា ស្រុកវាលវែង ខេត្តពោធិ៍សាត់ ។ បញ្ជាក់ប្រាប់បណ្តាញសារព័ត៌មាននាព្រឹកថ្ងៃទី ២៦ ខែកក្កដា ឆ្នាំ២០២៥នេះ លោកជំទាវ ឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិ បានឱ្យដឹងថា នៅព្រឹកថ្ងៃទី២៦ ខែកក្កដានេះ ភាគីថៃបានពង្រីកការវាយប្រហារតាមទីតាំងខេត្តផ្សេងៗរបស់កម្ពុជាបន្ថែមទៀត ក្នុងនេះដូចជានៅ វេលាម៉ោង ៥,០២នាទីព្រឹក កងទ័ពថៃ បានបើកការវាយប្រហារ ដោយកាំភ្លើងធំចំនួន៥គ្រាប់ មកលើទីតាំងជាច្រើនក្នុងភូមិសាស្រ្ត ឃុំថ្មដា ស្រុកវាលវែង ខេត្តពោធិ៍សាត់។ នៅព្រឹកថ្ងៃដដែលនេះ កងទ័ពឈ្លានពានរបស់ថៃ បានចាប់ផ្តើមធ្វើការ វាយប្រហារផងដែរនៅទីតាំងចំនួន ៣កន្លែងទៀត រួមមាន តាថាវ ជាំក្សាន្ត និង វាលឥន្រ្ទី ។ ក្រសួងការពារជាតិសូមអំពាវនាវ ឱ្យសហគមន៍អន្តរជាតិរួមមានក្រុមប្រឹក្សា សន្តិសុខអង្គការសហប្រជាជាតិ សហគមន៍អាស៊ាន និងដៃគូអន្តរជាតិពាក់ព័ន្ធ ទាំងអស់ថ្កោលទោស យ៉ាងធ្ងន់ធ្ងរបំផុត ចំពោះការឈ្លានពានទាំងកំរោល និងគឃ្លើនរបស់ភាគថៃ មកលើកម្ពុជា។…

ភ្នំពេញ៖នៅថ្ងៃទី២៦ខែកក្កដា ឆ្នាំ២០២៥នេះ ដែលជាថ្ងៃទី៣ នៃការឈ្លាន របស់ថៃ។ក្រុមការងារ Ams បានមកដល់ទី​សុវត្ថិភាពនៅវត្តបាត់ថ្កៅ ក្នុងស្រុកចុងកាល់ ខេត្តឧត្តរមានជ័យ។ នៅទីនេះមានប្រជាពលរដ្ឋភៀស ខ្លួនគេចផុតពីគ្រាប់​ផ្លោងរបស់ថៃចំនួនបីពាន់គ្រួសារស្មើនឹងជាង មួយម៉ឺននាក់។ ក្នុងនោះគឺភាគច្រើនយើងឃើញថា ស្ត្រីនិងកុមារ ដែលបាន​ជម្លៀស​ខ្លួនមករកទីទួលសុវត្តិភាពនៅទីនេះ។ ជនភៀសខ្លួនភាគច្រើន បានលើកឡើងអំពីផលលំបាក ដែលកើត ចេញពីការបាញ់ផ្លោងរបស់កងទ័ព​ថៃធ្លាក់មក​ក្នុង​ភូមិ​ឋានរបស់ពួកគាត់។ពួកគាត់ត្រូវបង្ខំចិត្តចាកចេញពីលំនៅដ្ឋានចោលស្រែចម្ការ ចោលសត្វ​ពាហណៈ មុនពេលដែលជា​ប្រភព​ចំណូលប្រចាំថ្ងៃរបស់​ពួកគាត់ ហើយកូនចៅគឺមិនបានរៀនទៀតទេ ។ដោយឡែកនៅក្នុងខេត្តនេះ គឺសាលារៀនទាំង​អស់បង្ខំបិទទ្វារ។ សូមបញ្ជាក់ថាក្នុងរយៈពេល បីថ្ងៃ ចាប់តាំងពីថ្ងៃទី២៤ខែកក្កដារហូត​មកដល់ថ្ងៃទី២៦ ខែកក្កដា នេះ ប្រជាពលរដ្ឋ​ដែលចាក​ចេញចោលលំនៅ​ឋានគេចពីគ្រាប់កំាភ្លើងរបស់ថៃ បានមកដល់ជំរំទីទួល​សុវត្ថិភាពដែលរៀបចំ​ដោយ​អាជ្ញាធរខេត្តចំនួនបីគឺទីមួយ នៅក្នុងស្រុកចុងកាល់ ,ទីពីរគឺនៅស្រុកបន្ទាយអំពិល និងទីបី​នៅស្រុកអន្លង់វែង​ខេត្តឧត្តរមានជ័យ។ សូមបញ្ជាក់ថា នៅថ្ងៃព្រឹកថ្ងៃទី២៦ ខែកក្កដា នេះសភាពការណ៍ស្ងប់ស្ងាត់នៅតាម​បណ្ដោយព្រំដែននៅក្នុង​ភូមិសាស្ត្រ​ខេត្តឧត្តរមានជ័យ និងខេត្តព្រះវិហារ។ តែប្រជាពលរដ្ឋក៏នៅតែបន្តចាកចេញពីមូលដ្ឋានមក​រស់នៅទីសុវត្ថិ​ភាពនេះបន្ថែមទៀតផងដែរ។ប្រជាពលរដ្ឋបានចេញពីមូលដ្ឋានដោយម៉ូតូ ដោយគោយន្ត និងដោយរ៉ឺម៉ក រថយន្តផងដែរ៕ដោយ៖ក្រុមការងារAMS

ភ្នំពេញ៖ក្នុងសន្និសីទសារព័ត៌មាននៅព្រឹកថ្ងៃសៅរ៍ទី២៦ ខែកក្កដា ឆ្នាំ២០២៥នេះ លោកជំទាវឧត្តមសេនីយ៍ឯក ម៉ាលី សុជាតា អ្នកនាំពាក្យ​ក្រសួងការពារជាតិបានបញ្ជាក់ថាការឈ្លានពានរបស់ថៃបានពង្រីកការឈ្លានពានមកខេត្តមួយ​ចំនួនរបស់កម្ពុជា។ លោកស្រីបានបញ្ជាក់ថា វេលាម៉ោង ៥ និង២នាទី ថ្ងៃទី២៦ ខែកក្កដា ភាគីថៃបានបើកការវាយប្រហារដោយកាំភ្លើង​ធំចំនួន៥គ្រាប់ មក​លើទីតាំងជាច្រើន​នៅក្នុងភូមិសាស្រ្តភូមិថ្មដា ស្រុកវាលវែង ខេត្តពោធិ៍សាត់។ក្នុងទីតាំងនៃ​យុទ្ធភូមិភាគទី៤ ថៃបានធ្វើការវាយប្រហារផងដែរចំនួន៣ទីតាំង មាន តាថាវ ជាំតែ និងវាលឥន្រ្ទី នៅវេលាម៉ោង៥ព្រឹកដូចគ្នា។ ព្រះរាជាណាចក្រ​កម្ពុជាសារជាថ្មី សូមធ្វើការថ្កោលទោសយ៉ាងដាច់អហង្ការ ចំពោះការឈ្លានពានរបស់ភាគីថៃ និងការ​បង្កហេតុ និង​ការត្រៀមទុកជាមុនរបស់ភាគីថៃ, ព្រះរាជាណាចក្រ​កម្ពុជា​សូមបញ្ជាក់ជាថ្មី ចំពោះការ​ប្តេជ្ញាចិត្ត​រក្សាសុខ​សន្តិភាព ទោះជាយ៉ាងណាសូមរក្សា​សិទ្ធិ​នៅក្នុងការ​ការពារអធិបតេយ្យភាព​របស់ខ្លួន ក្នុងនាមជាជនរងគ្រោះពីការ​រំលោភបំពានរបស់ភាគីថៃ។ កម្ពុជាសូមបញ្ជាក់សារជាថ្មី កម្ពុជាឈរលើគោលការណ៍វាយប្រហារតែលើគោលដៅយោធារបស់ភាគីថៃ មិន​មានគោលដៅវាយប្រហារលើជនស៊ីវិលណាមួយឡើយ។ អ្នកនាំពាក្យដដែលបន្តថា មកដល់ម៉ោងនេះ យើងអាចបញ្ជាក់បានថា កងកម្លាំងប្រដាប់អាវុធកម្ពុជាឈរយ៉ាងរឹងមាំ ជឿជាក់ មុះមុត ក្នុងការ​ការពារដែនអធិបតេយ្យភាពរបស់ខ្លួន ដោយ​មិន​រួញរាចំពោះការ​គំរាមកំហែង ការ​បង្ខិតបង្ខំ​របស់ភាគីថៃ ទោះបីជាមានការដាក់សម្ពាធពង្រាយកម្លាំងឈ្លានពាននៅទីតាំងផ្សេងៗ ប៉ុន្តែកងកម្លាំង​ប្រដាប់អាវុធកម្ពុជា ឈរយ៉ាងអង់អាចក្លាហាន ក្នុងការ​ការពារដែនអធិបតេយ្យភាពរបស់ខ្លួន​មិន​ឱ្យ​បាត់សូម្បីមួយមីលីម៉ែត្រ៕ដោយ៖សត្យា

(ភ្នំពេញ)៖ ក្រសួងការពារជាតិ នៃព្រះរាជាណាចក្រកម្ពុជា សូមថ្កោលទោសយ៉ាងដាច់អហង្ការ ចំពោះអំពើឈ្លានពានដោយមិនមានការបង្កហេតុ និងដោយត្រៀមទុកជាមុន ដែលប្រព្រឹត្តឡើងដោយព្រះរាជាណាចក្រថៃ នៅវេលាម៉ោង ០៥:០២នាទី ថ្ងៃទី២៦ ខែកក្កដា ឆ្នាំ២០២៥ ដោយបានបើកការវាយប្រហារដោយកាំភ្លើងធំចំនួន ៥ គ្រាប់ មកលើទីតាំងជាច្រើនកន្លែង នៅក្នុងភូមិឯកភាព ឃុំថ្មដា ស្រុកវាលវែង ខេត្តពោធិ៍សាត់។ ការរំលោភអធិបតេយ្យភាព និងបូរណភាពទឹកដីរបស់កម្ពុជាដ៏កម្រោលនេះ គឺជាការរំលោភបំពានយ៉ាងធ្ងន់ធ្ងរបំផុតលើច្បាប់អន្តរជាតិ រួមទាំងគោលការណ៍ដែលមានចែងក្នុងធម្មនុញ្ញអង្គការសហប្រជាជាតិ ហើយបានបង្កគ្រោះថ្នាក់ដល់អាយុជីវិតជនស៊ីវិលស្លូតត្រង់ និងបំផ្លាញសន្តិភាព និងស្ថិរភាពក្នុងតំបន់។ ព្រះរាជាណាចក្រកម្ពុជា អំពាវនាវឱ្យសហគមន៍អន្តរជាតិចូលរួម ក្នុងការថ្កោលទោសយ៉ាងម៉ឺងម៉ាត់បំផុតចំពោះការឈ្លានពានខុសច្បាប់របស់ថៃ។ កម្ពុជាទាមទារឱ្យថៃបញ្ឈប់រាល់សកម្មភាពអរិភាពជាបន្ទាន់ ហើយប្រកាន់ខ្ជាប់កាតព្វកិច្ចរបស់ខ្លួនក្រោមច្បាប់អន្តរជាតិ។ ខណៈពេលដែលកម្ពុជានៅតែប្តេជ្ញាចិត្ត ក្នុងការដោះស្រាយវិវាទដោយសន្តិវិធី និងអនុលោមតាមច្បាប់អន្តរជាតិ កម្ពុជារក្សាសិទ្ធិក្នុងការការពារខ្លួនដូចមានចែងក្នុងមាត្រា ៥១ នៃធម្មនុញ្ញអង្គការសហប្រជាជាតិ។ កងយោធពលខេមរភូមិន្ទ ប្តេជ្ញាចិត្តឥតងាករេ ក្នុងការការពារអធិបតេយ្យភាព បូរណភាពទឹកដី និងសុវត្ថិភាពរបស់ប្រជាជន ប្រឆាំងនឹងអំពើឈ្លានពានដ៏សាហាវឃោរឃៅរបស់ថៃ។ ដោយ ៖ វណ្ណលុក Statement of the Ministry of National Defense of…

ពលរដ្ឋជាច្រើននាក់ ក្នុងខេត្តកោះកុង បានមកប្រមូលផ្ដុំគ្នាសម្រាកនៅលើដងផ្លូវ នៅក្នុងភូមិសាស្រ្តស្រុកមណ្ឌលសីមា នាម៉ោង១១យប់ ថ្ងៃទី២៥ កក្កដានេះ ក្រោយពីមានការផ្សព្វផ្សាយព័ត៌មានមិនពិតពីអ្នកប្រេីបណ្តាញសង្គម ថា មានការវាយប្រហារពីសំណាក់ភាគីថៃ មកលើតំបន់ខេត្តកោះកុង។ ការផ្សព្វផ្សាយព័ត៌មានមិនពិតនេះ ធ្វេីឱ្យប្រជាពលរដ្ឋភិតភ័យ ទើបមកប្រមូលផ្ដុំក្នុងភូមិសាស្ត្រស្រុកមណ្ឌលសីមានេះ។ ក្រោយទទួលបានដំណឹងនេះ លោកស្រី មិថុនា ភូថង អភិបាលខេត្តកោះកុង ថ្នាក់ដឹកនាំ និងកម្លាំងសមត្ថកិច្ច បានចុះជួបផ្ទាល់ជាមួយប្រជាពលរដ្ឋ ដោយប្រាប់ពីស្ថានភាពពិតប្រាកដដល់ពួកគេ ហើយឱ្យពួកគេវិលត្រឡប់ទៅគេហដ្ឋានវិញ។ សូមបញ្ជាក់ថា គិតមកដល់ម៉ោង១១ យប់ ថ្ងៃទី២៥ ខែកក្កដា ឆ្នាំ២០២៥ នេះ តាមបន្ទាត់ព្រំដែនភូមិសាស្ត្រខេត្តកោះកុង ពុំមានការផ្ទុះអាវុធដូចការផ្សព្វផ្សាយគ្មានប្រភពផ្លូវការនោះទេ។ ប្រភពវីដេអូពីលោកស្រី មិថុនា ភូថង អភិបាលខេត្តកោះកុង

ភ្នំពេញ៖ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្ត្រីក្រសួងមហាផ្ទៃ បានបញ្ជាក់លើបណ្ដាញសង្គម​ផ្លូវការរបស់​លោកថា “ចាប់ពីយប់ថ្ងៃទី២៥ ខែកក្កដា ឆ្នាំ២០២៥នេះតទៅតែម្ដង ខ្ញុំសម្រេចបញ្ជាឱ្យអគ្គស្នងការនគរបាល​ជាតិ ដែលមានស្នងការ​នគរបាលរាជធានី-ខេត្តជាសេនាធិការ ផ្អាកជាបណ្ដោះអាសន្ន ការអនុវត្តច្បាប់ស្ដីពីចរាចរណ៍ផ្លូវ​គោក រហូតដល់មាន​ការបញ្ជាក់ជាថ្មី​នាពេលក្រោយ”។ ឯកឧត្តមបន្តថា ក្នុងចន្លោះពេលនេះ មន្ត្រីនគរបាលចរាចរណ៍ទូ​ទាំង​ប្រទេស និងបន្តអនុវត្តតួនាទីភារកិច្ច សម្រប​សម្រួល​ការ​ធ្វើចរាចរណ៍​តាមដងផ្លូវសាធារណៈ ជាពិសេសតាមដងផ្លូវជាតិសំខាន់ៗ ដែលមាន​ការធ្វើចរាចរណ៍របស់កងកម្លាំង អាជ្ញាធរមានសមត្ថកិច្ច និងប្រជាពលរដ្ឋ ក្នុងបេសកកម្មការពារបូរណភាពទឹកដីនិងអធិបតេយ្យភាពជាតិ។ក្នុងពេល​ជាមួយគ្នានេះ ខ្ញុំសូមអំពាវនាវដោយទទូច សូមបងប្អូនជន​រួមជាតិ ដែលធ្វើដំណើរតាមដងផ្លូវមេត្តាគោរពច្បាប់ បើកបរប្រកបដោយ​ការទទួលខុសត្រូវ ដើម្បីធានាសុវត្ថិភាព និងអាយុជីវិតរបស់បងប្អូនផ្ទាល់ រួមទាំងអ្នកដំណើរ​ផ្សេងទៀតលើដងផ្លូវ!៕ដោយ៖មុនី