កីឡាករ Mutaz Essa Barshim របស់កាតា និង Gianmarco Tamberi របស់អ៊ីតាលី បានឈ្នះមេដាយមាសស្ទួន ពីការប្រកួតវគ្គផ្តាច់ព្រ័ត្រកីឡាលោតកម្ពស់បុរស នៅអូឡាំពិកក្រុងតូក្យូ គួរអោយភ្ញាក់ផ្អើល នឹងជាប្រវត្តិសាស្ត្រអូឡាំពិក មិនធ្លាប់មានក្នុងពេលជាង១០០ឆ្នាំ ។ បន្ទាប់ពីការប្រកួតវគ្គផ្តាច់ព្រ័ត្រអស់រយៈពេល២ម៉ោង Barshim និង Gianmarco មិនអាចរកឃើញអ្នកចាញ់ឡើយ ដ្បិតអ្នកទាំង២លោតបាន ក្នុងកម្ពស់ខ្ពស់បំផុត ២,៣៩ ម៉ែត្រដូចគ្នា ។ Maksim Nedasekau អត្តពលិកបេឡារុស ដណ្តើមបានមេដាយសំរឹទ្ធិ ដោយលោតបានកម្ពស់ ២,៣៧ ម៉ែត្រ ។ តាមពិតទៅ អត្តពលិកកាតា និងអ៊ីតាលីត្រូវលោតបន្តបន្ទាប់ទៀតដើម្បីរកឈ្នះចាញ់ និងកាត់សេចក្តីថាអ្នកណាបានមេដាយមាស និងមេដាយប្រាក់ ។ ប៉ុន្តែភាពភ្ញាក់ផ្អើលបានកើតឡើង ក្រោយកីឡាករទាំង២បានបញ្ចប់ការប្រជែងគ្នា និងយល់ព្រមចែករំលែកមេដាយមាសឱ្យគ្នាទៅវិញទៅមក ។ អ្នករៀបចំការប្រកួតលោតកម្ពស់ក្នុងព្រឹត្តិការណ៍អូឡាំពិករដូវក្តៅ ឆ្នាំ២០២០ ក៏បានយល់ព្រមផ្តល់មេដាយមាសឱ្យទាំង Barshim វ័យ៣០ឆ្នាំ និង Gianmarco វ័យ២៩ឆ្នាំផងដែរ ៕

តូក្យូ ៖ វិញ្ញាសាបាល់ទាត់ផ្នែកបុរស ក្រុមជម្រើសជាតិយុវជនអាយុក្រោម២៣ឆ្នាំ អេស្ប៉ាញ ត្រូវប៉ះ ក្រុមការពារតំណែងជើងឯកប្រេស៊ីល ដើម្បីដណ្តើមមេដាយមាសព្រឹត្តិការណ៍អូឡាំពិកទីក្រុងតូក្យូឆ្នាំ ២០២០។ ខណៈម្ចាស់ផ្ទះជប៉ុន ត្រូវប៉ះម៉ិកស៊ិក ដើម្បីដណ្តើមមេដាយ សំរិទ្ធ ។ មុនឈានដល់​វគ្គ​ដណ្តើម​មេដាយមាស ប្រេស៊ីល បានយកឈ្នះលើម៉ិកស៊ិក ដោយបាល់ប៉េណាល់​ទីកាត់សេចក្តី ក្នុងលទ្ធផល ៤-១​ ។ បន្ទាប់ពីបញ្ចប់ការប្រកួត ដោយម៉ោងបន្ថែម ១៥នាទីពីដង ក្នុងលទ្ធផល ០ទល់០ ។ ដោយឡែកអេស្ប៉ាញ បានយកឈ្នះម្ចាស់ផ្ទះជប៉ុន នៅម៉ោងបន្ថែម១៥នាទី២ដងជាមួយលទ្ធផល ១-០។ ដែលរកបានដោយខ្សែបម្រើស្លាប Marco Asensio របស់ក្រុមអធិរាជស Real Madrid។ សូមបញ្ជាក់ថា  សម្រាប់ការប្រកួតដណ្តើមមេដាយមាសរវាងអេស្ប៉ាញ និងប្រេស៊ីល នឹងត្រូវធ្វើឡើងនាថ្ងៃទី៧ ខែសីហា ។ ខណៈការប្រកួតដណ្តើមមេដាយសំរិទ្ធរវាងជប៉ុន និងម៉ិកស៊ិក នឹងធ្វើការប្រកួតមុខ១ថ្ងៃ គឺនៅថ្ងៃទី៦ ខែសីហា ឆ្នាំ២០២១ ៕