📷 Black Crow

បន្ថែមពីលើបញ្ហាជាច្រើនដែលនាយករដ្ឋមន្ត្រីថ្មីរបស់អ៊ីស្រាអែល Naftali Bennett កំពុងប្រឈមក្នុងការរក្សាស្ថិរភាពនៃសម្ព័ន្ធភាពកាន់អំណាចដ៏ផុយស្រួយ លោកក៏ត្រូវប្រឈមនឹងការប៉ុនប៉ងទម្លាក់រដ្ឋាភិបាលដោយលោក Nathanyahu ផងដែរ។ នេះបើតាម Aljazeera ថ្ងៃទី៣១ កក្កដានេះ។ លោក Nethanyahu បានប្រើប្រាស់យុទ្ធសាស្ត្រគោលចំនួន ៣ ក្នុងការព្យាយាមដើម្បីត្រឡប់មកកាន់អំណាច និងជៀសពីការផ្ដន្ទាទោសដោយតុលាការ៖ យុទ្ធសាស្ត្រទី១ គឺការប្រើប្រាស់គ្រប់នីតិវិធី ការប្រមាថ និងការលាបពណ៌ ដើម្បីបង្កើតរូបភាពថារដ្ឋាភិបាលថ្មីគឺមិនស្របច្បាប់ ឬបង្កើតដោយការក្លែងបន្លំ និងដើម្បីជ្រៀតជ្រែកសិទ្ធអំណាចរបស់លោក Bennett។ យុទ្ធសាស្ត្រទី២ គឺការប្រើប្រាស់គ្រប់មធ្យោបាយទាំងអស់ ដើម្បីពន្យារការអនុម័តសេចក្ដីព្រាងច្បាប់របស់រដ្ឋាភិបាល ហើយធ្វើសំណើសេចក្ដីព្រាងច្បាប់ជាច្រើនលើប្រធានបទដ៏ចម្រូងចម្រាស ក្នុងបំណងបង្កភាពតានតឹង និងភាពបែកបាក់រវាងគណបក្សនានាក្នុងសម្ព័ន្ធភាពកាន់អំណាច។ យុទ្ធសាស្ត្រទី៣ គឺការព្យាយាមទាក់ទាញសមាជិកសម្ព័ន្ធភាពកាន់អំណាច ដូចជារដ្ឋមន្ត្រីការពារជាតិលោក Benny Gantz ឱ្យបោះបង់កិច្ចព្រមព្រៀងជាមួយលោក Bennett ហើយមកចូលរួមការបង្កើតរដ្ឋាភិបាលជាមួយលោក Nethanyahu វិញ។ ក្រុមអ្នកវិភាគយល់ឃើញថា ទង្វើទាំងនេះពិតជាជះឥទ្ធិពលយ៉ាងខ្លាំងលើស្ថិរភាពក្នុងជួររដ្ឋាភិបាល ដែលនេះអាចនាំឱ្យបាត់បង់សន្ដិភាព និងរាំងស្ទះដល់ការអភិវឌ្ឍជាតិ ជាពិសេសក្នុងកំឡុងពេលនៃការរាតត្បាតជំងឺកូវីដ១៩ផងដែរ។ ប្រភព៖ Aljazeera

កាលពីថ្ងៃទី៣១ កក្កដា មនុស្សជាង២០មុឺននាក់បានធ្វើការតវ៉ាទូទាំងប្រទេសបារាំង ប្រឆាំងនឹងបទបញ្ជា ដែលតម្រូវអោយបង្ហាញលិខិតចាក់វ៉ាក់សាំងរួចរាល់ដើម្បីចូលទៅកាន់កន្លែងសាធារណៈ។ សភាបារាំងបានអនុម័តច្បាប់ថ្មីមួយនៅសប្តាហ៍នេះ ដែលនឹងតម្រូវឱ្យមានការចាក់វ៉ាក់សាំងជាកាតព្វកិច្ចដល់បុគ្កលិក សុខាភិបាល និងតម្រូវអោយមានការបង្ហាញប័ណ្ណសុខភាពដែលបញ្ជាក់ថា អវិជ្ជមានកូវីដ១៩ ឬទទួលបានការចាក់វ៉ាក់សាំងរួចរាល់។ ប្រភព៖ Reuters

ប្រទេសជាច្រើននៅទ្វីបអាស៊ីកំពុងប្រឈមនឹងការកើនឡើងយ៉ាងខ្លាំងនូវការរាតត្បាតនៃជំងឺកូវីដ១៩ ដែលបង្កឡើងដោយវីរុសបម្លែងដែលតា។ នេះបើតាម Reuters ថ្ងៃទី៣១ កក្កដានេះ។ ជាក់ស្ដែង ជប៉ុនបានប្រកាសដាក់រាជធានីតូក្យូ និងទីក្រុងនៅក្បែររាជធានីនេះ ក្នុងភាពអាសន្នរហូតដល់បញ្ចប់ខែសីហា ក្រោយរកឃើញករណីវិជ្ជមានប្រចាំថ្ងៃរហូតដល់ ៤.០៥៨ករណី ខណៈចិនកំពុងប្រយុទ្ធប្រឆាំងនឹងជំងឺកូវីដ១៩ ជាមួយវីរុសបម្លែង Delta នៅទីក្រុងណានជីង ក្រោយរកឃើញបុគ្គលិកសម្អាតយន្តហោះមួយពីរុស្ស៊ីមានវិជ្ជមាន។ ដោយឡែក រដ្ឋាភិបាលថៃ ក៏បានរកឃើញ ៦០%នៃករណីសរុប គឺបង្កឡើងដោយវីរុសបម្លែង Delta ខណៈដែលវៀតណាមបិទទីក្រុងហូជីមិញ និងទីក្រុង ១៨ផ្សេងទៀតនៅភាគខាងត្បូងរយៈពេល ២សប្ដាហ៍។ យោងតាមអង្គការសុខភាពពិភពលោក ករណីថ្មីនៃជំងឺកូវីដ១៩កើនឡើងរហូតដល់ទៅ ៨០% ឯណោះនៅជុំវិញពិភពលោកក្នុងរយៈពេល ៤សប្ដាហ៍ចុងក្រោយនេះ។ ប្រភព៖ Reuters

រូបថតកាលពីខែកក្កដា ២០២១ ស្រុកកែវសីមា ខេត្តមណ្ឌលគិរី 📷 Piak Lim

គិតមកដល់ពេលនេះ កម្ពុជាមានវ៉ាក់សាំងនៅក្នុងដៃសរុបជាង ១៩លានដូសហើយ។ កម្ពុជានឹងទទួលបានវ៉ាក់សាំងទាំងផ្នែកជំនួយផង និងទាំងការទិញផង ចំនួន ៧,៧លានដូសបន្ថែមទៀតក្នុងខែសីហា ២០២១នេះ។ ត្រឹមចុងខែសីហា កម្ពុជានឹងមានវ៉ាក់សាំងសរុបចំនួនជាង ២៦,៥លានដូស។ គិតត្រឹមថ្ងៃនេះ កម្ពុជាសម្រេចបាន ៧៣% នៃផែនការចាក់វ៉ាក់សាំងជូនប្រជាជនដែលមានអាយុលើសពី១៨ឆ្នាំ។ វ៉ាក់សាំងការពារអាយុជីវិត 💉❤️ ទិន្នន័យ៖ សម្តេចតេជោ, ១ សីហា ២០២១

ចិនបានផ្តល់ជំនួយវ៉ាក់សាំងបង្ការជំងឺកូវីដ១៩ ចំនួន ១លានដូសបន្ថែមទៀត ដល់រាជរដ្ឋាភិបាល និងប្រជាជនកម្ពុជា។ វ៉ាក់សាំង Sinopharm បានដឹកមកដល់ប្រទេសកម្ពុជានៅថ្ងៃទី១ សីហា ២០២១នេះ។ រដ្ឋាភិបាល និងប្រជាជនចិន បានផ្តល់ជំនួយវ៉ាក់សាំងមកដល់ប្រទេសកម្ពុជាសរុប ៣.២លានដូសហើយ។ នាយករដ្ឋមន្ត្រីកម្ពុជា បានថ្លែងថា “ចិនជាបង្អែក និងជាអ្នករួមចំណែកដ៏សំខាន់ជួយឱ្យកម្ពុជាសម្រេចផែនការចាក់វ៉ាក់សាំង”៕

បើយើងបណ្តែតបណ្តោយឱ្យ Delta ចូលមកច្រើន តើជីវិតប្រជាជនប៉ុន្មាននាក់ នឹងត្រូវបាត់បង់ទៀត។ រាជរដ្ឋាភិបាលពិចារណាអនុញ្ញាតឱ្យសណ្ឋាគារមួយចំនួនដែលចង់បើកជួលតម្លៃថោកដល់ការព្យាបាលអ្នកជំងឺកូវីដ១៩ ហើយរាជរដ្ឋាភិបាលនឹងគាំទ្រផ្នែកសុខាភិបាល។ នៅលើពិភពលោកនេះ មានប្រទេសមិនច្រើនទេអាចធ្វើដូចកម្ពុជា ដែលអនុញ្ញាតឱ្យធ្វើតេស្តកូវីដ១៩ មិនយកលុយ ព្យាបាលមិនយកលុយចំពោះពលរដ្ឋខ្លួន និងជនបរទេស។ កម្ពុជាប្រកាន់នយោបាយការបរទេសចម្រុះពណ៌ ហើយជំនួយពីប្រទេសណា ក៏កម្ពុជាទទួលដែរ គ្រាន់តែយើងកំណត់នូវបង្អែកវ៉ាក់សាំងច្បាស់លាស់មួយប៉ុណ្ណោះ។ កម្ពុជានៅតែបន្តរួមដៃជាមួយប្រទេសនានាលើពិភពលោក ជាពិសេសប្រទេសជិតខាង ដើម្បីប្រយុទ្ធនឹងជំងឺកូវីដ១៩។ ហ៊ុន សែន គ្មានប្រាក់ទិញក្បាលនរណាទេ ហ៊ុន សែន មានតែប្រាក់ដើម្បីជួយប្រជាពលរដ្ឋក្នុងបរិបទកូវីដ១៩។នៅពេលចាក់ដូសទី៣ សូមកុំភ្លេចអ្នកសារព័ត៌មាន។ ដ៏រាបណាកូវីដ១៩ មិនទាន់ចប់ ប្រទេសណាក៏ដោយក៏មិនត្រូវអឿដែរ។ សម្តេចតេជោប្រាប់មេដឹកនាំសង្គមស៊ីវិលដែលរិះគន់រាជរដ្ឋាភិបាលថា ក្លាយជាមេអំបៅ កុំភ្លេចភាពជាដង្កូវ។ ប្រសាសន៍សម្តេចតេជោ ១ សីហា ២០២១