១. អាជីវករលក់សាច់គោ ក្របីស្រស់ៗ សាច់ក្លាស្សេ និងសាច់ងៀត នៅតាមទីផ្សារក្នុងភ្នំពេញត្អូញត្អែរលក់ពុំសូវដាច់ បន្ទាប់ ពី ចាប់ សាច់ ក្របីក្លា ស្សេ ដែល នាំ ចូល ពី ឥណ្ឌា – កោះសន្តិភាព ២. ឆមាសទី២ ឆ្នាំ២០២១ ពាណិជ្ជកម្មទ្វេភាគីមានតម្លៃ ៤៥១លានដុល្លារ កើនឡើង ៦.៧% ដោយកម្ពុជានាំចេញទំហំ ១៥៩លានដុល្លារទៅកាន់កូរ៉េខាងត្បូង ឯការនាំចេញរបស់កូរ៉េខាងត្បូងមកកម្ពុជាមានទំហំ ២៩២លានដុល្លារ – ខ្មែរថាមស៍ ៣. ការផ្តល់ឥណទានរបស់វិស័យធនាគារទៅវិស័យអចលនទ្រព្យ និងសំណង់ គិតត្រឹមឆមាសទី១ ឆ្នាំ២០២១ មានតម្លៃប្រមាណ ១០.៥ពាន់លានដុល្លារ ស្មើនឹង ៣១% នៃទំហំឥណទានសរុបនៅកម្ពុជា – ភ្នំពេញបុស្តិ៍ ៤. កងទ័ពជើងទឹកចិន កំពុងធ្វើសមយុទ្ធយោធានៅសមុទ្រចិនខាងត្បូងនៅសប្តាហ៍នេះ ចំពេលមានការរំពឹងទុកនៃការមកដល់របស់នាវាផ្ទុកយន្តហោះ HMS Queen Elizabeth និងកងកម្លាំងរបស់អង់គ្លេស – The Global…

អ្នកស្រាវជ្រាវនៃសហព័ន្ធអ្នកវិទ្យាសាស្ត្រអាមេរិក បានរកឃើញថា ប្រទេសចិនកំពុងសាងសង់មូលដ្ឋានយោធាទី២ សំរាប់ការបាញ់មីស៊ីលនុយក្លេអ៊ែរដែលស្ថិតនៅជិតទីក្រុង Hami នៃតំបន់ស្វយ័តស៊ីនជាំង។ នេះបើតាម Aljazeera ថ្ងៃទី២៨ កក្កដា។ បន្ទាប់ពីវិភាគលើរូបភាពផ្កាយរណប អ្នកស្រាវជ្រាវសន្មតថាការដ្ឋាននេះ អាចមានបំពង់បាញ់មីស៊ីលក្រោមដីរហូតទៅដល់ ១១០បំពង់ ដែលនេះអាចជា “ការពង្រីកសមត្ថភាពអាវុធនុយក្លេអ៊ែររបស់ចិនដ៏ធំបំផុតដែលមិនធ្លាប់មាន”។ ដោយឡែក សារព័ត៌មានចិន Global Times បានចេញផ្សាយបទវិចារណកថាដែលបញ្ជាក់ថា ការអះអាងរបស់អ្នកស្រាវជ្រាវអាមេរិកគឺមិនត្រឹមត្រូវ ហើយការដ្ឋាននោះ គឺជាគ្រឹះនៃស្ថានីយ៍ថាមពលដើរដោយខ្យល់តែប៉ុណ្ណោះ។ ពួកគេបានបន្ថែមថាប្រព័ន្ធផ្សព្វផ្សាយ និងស្ថាប័នអាមេរិកមួយចំនួនបានធ្វើការចោទប្រកាន់ខាងលើដើម្បីដាក់សម្ពាធលើចិន។ ប្រភព៖ Aljazeera

មេដឹកនាំកំពូលអ៊ីរ៉ង់ លោក Ayatollah Ali Khamenei កាលថ្ងៃពុធ បានប្រកាសថាក្រុងតេអេរ៉ង់នឹងមិនទទួលយកការទាមទារបែប “រឹងរួស” របស់ក្រុងវ៉ាស៊ីនតោននៅក្នុងកិច្ចពិភាក្សាដើម្បីស្ដារកិច្ចព្រមព្រៀងនុយក្លេអ៊ែរឆ្នាំ ២០១៥នោះទេ និងថាអាមេរិកបានបរាជ័យក្នុងការធានាថាមិនបោះបង់កិច្ចព្រមព្រៀងនេះតទៅទៀត។ តាមការចុះផ្សាយរបស់ទូរទស្សន៍រដ្ន មេដឹកនាំរូបនេះបាននិយាយថា អាមេរិកបានធ្វើសកម្មភាពយ៉ាងកំសាក ហើយមានតែបំណងអាក្រក់។ លោកបន្ថែមថា អាមេរិកធ្លាប់បានរំលោភលើកិច្ចព្រមព្រៀងនុយក្លេអ៊ែរដោយសេរីហើយទុកវាចោល ប៉ុន្តែឥឡូវ បែរជានិយាយយ៉ាងច្បាស់ថាខ្លួនមិនអាចផ្ដល់ការធានាថារឿងនេះនឹងមិនអាចកើត ឡើងម្តងទៀត។ ប្រភព៖ Reuters

នៅថ្ងៃទី២៩ កក្កដា ការព្យាករណ៍នៃការលក់វ៉ាក់សាំងការពារជំងឺកូវីដ១៩ ដោយក្រុមហ៊ុន Pfizer ក្នុងឆ្នាំ២០២១នេះ បានកើនដល់ ២៩% ស្មើនឹងទំហំទឹកប្រាក់ ៣៣.៥ពាន់លានដុល្លារ ដោយរំពឹងថានឹងមានតម្រូវការវ៉ាក់សាំងដូសទី៣បន្ថែមទៀត។ ទិន្នន័យបានបង្ហាញថា វ៉ាក់សាំងដូសទី៣ អាចបង្កើតអង្គបដិប្រាណប្រឆាំងនឹងវ៉ារ្យ៉ង់ Delta ខ្ពស់ជាងមុន ៥ដងសំរាប់មនុស្សវ័យក្មេង និង ១១ដងសំរាប់មនុស្សចាស់ បើធៀបទៅនឹងសមត្ថភាពវ៉ាក់សាំងតែ ២ដូស។ Pfizer គ្រោងនឹងស្នើសុំឱ្យមានការចាក់ដូសទី៣ ដើម្បីប្រឆាំងនឹងវ៉ារ្យ៉ង់ Delta នៅខែសីហាខាងមុខនេះ។ ប្រភព៖ Reuters

ក្នុងជំនួបជាមួយប្រតិភូរបស់ក្រុមតាលីបង់កាលពីថ្ងៃទី២៨ កក្កដា រដ្ឋមន្ត្រីការបរទេសចិនលោក Wang Yi ថា ចិនចាត់ទុកក្រុមតាលីបង់ថាជាតួអង្គសំខាន់មួយក្នុងការបញ្ចប់សង្គ្រាមនៅអាហ្វហ្គានីស្ថាន។ ចិនមានជំហរមិនជ្រៀតជ្រែកកិច្ចការផ្ទៃក្នុង តែចិនសង្ឃឹមថាគ្រប់ភាគីទាំងអស់នឹងរួមសាមគ្គីគ្នា ដើម្បីកសាងអាហ្វហ្គានីស្ថានមួយដែលឯករាជ្យពិតប្រាកដ។ លោក Wang Yi ក៏សង្ឃឹមថា ក្រុមតាលីបង់នឹងបង្ក្រាបចលនាឥស្លាមទួរមេនីស្ថានខាងកើត ដែលជាក្រុមភេរវកម្មកំពុងធ្វើប្រតិបត្តិការនៅតំបន់មួយចំនួនក្បែរ និងក្នុងខេត្តស៊ីនជាំង ដែលធ្វើឱ្យប៉ះពាល់ដល់សន្តិសុខជាតិរបស់ចិន។ ខាងតាលីបង់ក៏ធានាចិនវិញថា ខ្លួននឹងមិនអនុញ្ញាតឱ្យក្រុមណាមួយធ្វើសកម្មភាពនៅទឹកដីអាហ្វហ្គានីស្ថាន ដើម្បីប្រឆាំងនឹងចិនឡើយ។ ប្រភព៖ Reuters