ភ្នំពេញ៖ លោក វ្ល៉ាឌីមៀរ ពូទីន ប្រធានាធិបតីរុស្ស៊ី បានផ្តល់គ្រឿងឥស្សរិយយសថ្នាក់ «មិត្តភាព» ជូនសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ចំពោះការចូលរួមចំណែកដ៏សំខាន់ក្នុងការពង្រឹងមិត្តភាពរវាងប្រជាជនរុស្ស៊ី និងកម្ពុជា។ នេះបើយោងតាមការចេញផ្សាយលើហ្វេសប៊ុកផេកស្ថានទូតរុស្ស៊ីប្រចាំកម្ពុជា នៅថ្ងៃទី២៦ ខែកក្កដា ឆ្នាំ២០២១។ ស្ថានទូតរុស្ស៊ី បានបញ្ជាក់ថា «នៅថ្ងៃទី២៥ ខែកក្កដា ឆ្នាំ២០២១ លោក វ្ល៉ាឌីមៀរ ពូទីន ប្រធានាធិបតីនៃសហព័ន្ធរុស្ស៊ី បានចុះហត្ថលេខាលើ អនុក្រឹត្យលេខ ៤៣៤ ស្តីពីការបំពាក់គ្រឿងឥស្សរិយយសថ្នាក់មិត្តភាពជូន សម្ដេចអគ្គមហាសេនាធិបតី ហ៊ុន សែន នាយករដ្ឋមន្រ្ដីនៃព្រះរាជាណាចក្រកម្ពុជា សម្រាប់ការចូលរួមចំណែកដ៏សំខាន់ ក្នុងការពង្រឹងមិត្តភាពរវាងប្រជាជនរុស្ស៊ី និងកម្ពុជា»៕

ភ្នំពេញៈ កូនស្រីលោក កឹម សុខា និងលោក សុន ឆ័យ មន្ត្រីជាន់ខ្ពស់នៃអតីតគណបក្សសង្គ្រោះជាតិគ្រោងបង្កើត គណបក្សនយោបាយថ្មីនៅចុងឆ្នាំ២០២១ខាងមុខនេះ។ ការ បង្កើតគណបក្សថ្មីនេះ គឺបង្កើតផ្សេងគ្នា ដើម្បីចូលរួមការបោះឆ្នោតនាពេលខាងមុខនេះ។ នេះបើតាមប្រភពស្និទ្ធនឹងលោក កឹម សុខា។ ចំណែកលោក គួយ ប៊ុនរឿន អតីត អនុប្រធាន គ.ជ.ប. នឹងទៅដឹកនាំគណបក្សបេះដូងជាតិ ដែលមានលោកស្រី មូរ សុខហួរ និងលោក អេង ឆៃអ៊ាង នៅពីក្រោយ។ លោក ផាន់ ច័ន្ទស័ក្តិ អតីតមេធាវីលោក កឹម សុខា បានបង្ហើបឲ្យដឹងថា នៅចុងឆ្នាំ២០២១ និងក្នុងឆ្នាំ២០២២ និងមានគណបក្សនយោបាយចំនួន២ទៀតកើតឡើង។ ក្នុងអំឡុងខែតុលា ឬខែវិច្ឆិកា ខាងមុខនេះ កញ្ញា កឹម មនោវិទ្យា កូនស្រីលោក កឹម សុខា អាចនឹងសុំទោសសម្តេចតេជោ ហ៊ុន សែន ដែលខ្លួនបានធ្វើសកម្មភាពការទូតនយោបាយបំពានបម្រាមដែលសាលដីកាតុលាការកំពូលបានហាមឃាត់ និងវិលចូលប្រទេស ហើយសុំសិទ្ធិធ្វើនយោបាយ បង្កើតគណបក្សថ្មីមួយទៀត។ លោកបន្តថា លោក សុន ឆ័យ ក៏នឹងបង្កើតបក្សនយោបាយថ្មីមួយដែរ។ ចំណែកគណបក្សបេះដូងជាតិ មិនមែនដឹកនាំដោយលោក ថាច់ សេដ្ឋា នោះទេ គឺដឹកនាំដោយលោក គួយ ប៊ុនរឿង អតីតអនុប្រធាន គណៈកម្មាធិការជាតិរៀបចំការបោះឆ្នោត (គ.ជ.ប.) និងត្រូវជាប្អូនថ្លៃលោក អេង ឆៃអាង។ ទាក់ទងការលើកឡើងនេះ លោក សុន ឆ័យ និងកញ្ញា កឹម មនោវិទ្យា មិនអាចសុំការអត្ថាធិប្បាយបានទេ។ លោក ផាន់ ច័ន្ទស័ក្តិ បានបន្តទៀតថា លោកសង្កេតឃើញអ្នកជាបញ្ញវន្ត និងមន្រ្តីអតីតបក្សនយោបាយដែលបានរំលាយជាច្រើន មានការលើកឡើងពីទស្សនៈផ្សេងៗ និងចោទសព្វបែបយ៉ាងជុំវិញអ្នកស្នើសុំសិទ្ធិធ្វើនយោបាយ និងបង្កើតគណបក្សនយោបាយថា  ជាអ្នកក្បត់ អ្នកលក់ឧត្តមគតិ ឬជាអាយ៉ងជាដើម ។ សម្រាប់លោកមើលឃើញថា  ការបង្កើតគណបក្សនយោបាយច្រើនជារឿងល្អបំផុតសម្រាប់បរិស្ថានកម្ពុជា។ ហេតុអ្វីបានជាលោកយល់ខុសពីមនុស្សមួយចំនួនថា « មិនល្អ »ហើយលោកថា « ល្អ » ទៅវិញ ? ។ បើសិនយើងមើលនិយមន័យបក្សនយោបាយ គឺមានន័យថា « គណបក្សនយោបាយ ជាថ្នាលសម្រាប់បណ្តុះមេដឹកនាំប្រទេសសម្រាប់អនាគតឱ្យប្រទេសជាតិមួយមានមេដឹកនាំ ដឹកនាំប្រទេសបន្តជាប់គ្នាមិនដាច់។ មិនមែនបង្កើតបក្សនយោបាយសម្រាប់ជាសួនឧស្សាហកម្មរកផលចំណេញសម្រាប់ខ្លួនឯង និងគ្រួសាររបស់មេបក្សនោះទេ»។ ឧទាហរណ៍ ១-សម្តេចព្រះនរោត្តម សីហនុ បង្កើតគណបក្សហ៊្វុនស៊ិនប៉ិច បណ្តុះបានអ្នកនយោបាយជាច្រើន ក្នុងនោះក៏មានលោក សម រង្សី ម្នាក់ដែរ។ ២ – សម្តេច សឺន សាន បង្កើតគណបក្សប្រជាធិបតេយ្យសេរីនិយមព្រះពុទ្ធសាសនា បណ្តុះបានអ្នកនយោបាយជាច្រើន ក្នុងនោះក៏មានលោក ប៉ុល ហំម និងលោក កឹមសុខា ( ប៉ុន្តែ លោក កឹម សុខា បានបំផ្លាញកេរ្តិ៍ដំណែលស្អាតស្អំរបស់សម្តេច សឺន សាន តាមរយៈភាពស្មោកគ្រោករបស់ខ្លួន )។ លោកបន្តថា បរិបទនយោបាយពេលនេះការបង្កើតបានគណបក្សនយោបាយមួយឡើង គឺស្មើនិងបង្កើតបានថ្នាលបណ្តុះមេដឹកនាំនយោបាយមួយនៅពេលអនាគត ។ បើសិនថ្នាលមួយ ( គណបក្សនយោបាយមួយ ) បណ្តុះបានអ្នកនយោបាយឆ្នើមពី០៥ទៅ១០នាក់ មានន័យថា គណបក្ស១០ បណ្តុះបានអ្នកនយោបាយឆ្នើមសម្រាប់ប្រទេសជាតិទៅអនាគត ចន្លោះពី៥០ ទៅ១០០នាក់។ដូច្នេះនឹងធ្វើឱ្យសង្គមជាតិយើង សម្បូរធនធានអ្នកនយោបាយបន្តវេនសម្បូរបែបជាមិនខាន។ លោកបន្ថែមថា ត្រឡប់មកវិញ តើយើងចង់បញ្ចប់អ្វីៗគ្រប់យ៉ាងត្រឹមយុគសម័យ សម រង្សី និង កឹម សុខា នេះឬយ៉ាងណា ? បានជាយើងមិនព្រមមើលទៅមុខមើលទៅខ្មែរដទៃៗ ផ្សេងទៀតនោះ? ។ បើសិនអស់លោក មិនព្រមមើលសមត្ថភាពខ្លួន លោកក៏ហ៊ីទៅចុះ តែកុំមើលងាយអ្នកផ្សេងទៅបានហើយ។ អ្នកដែលតែងតែយល់ទាស់មិនចង់ឱ្យខ្មែរដទៃបង្កើតគណបក្សនយោបាយ អ្នកនោះឯងដែលដើរស្របទៅនឹងគំនិតគណបក្សកាន់អំណាចដែលគេចង់បាន បីដូចប្រសាសន៍សម្តេចតេជោ ហ៊ុន សែន ក៏ដូចលោក សុខ ឥសាន ធ្លាប់លើកឡើងថា « បងប្អូនអ្នកទទួលបានសិទ្ធិធ្វើនយោបាយហើយ ទៅរកស៊ីទទួលទានចុះជាការប្រសើរ» « កឹម សុខា និងសម រង្សី មិនអមតៈទេ »។ សូមជម្រាបថា មន្ត្រីជាន់ខ្ពស់នៃអតីតគណបក្សសង្គ្រោះជាតិ មួយចំនួនដែលទទួលបានសិទ្ធិធ្វើនយបាយឡើងវិញបាន បង្កើតគណបក្សថ្មី មានដូចជា ក្រុមលោករៀល ខេមរិន្ទ្រ បង្កើតគណបក្សខ្មែរអភិរក្ស , ក្រុមលោកជីវ កត្តា បង្កើតគណបក្សខ្មែរស្រឡាញ់ជាតិ , ក្រុមលោកអ៊ូ ច័ន្ទរ័ត្ន បង្កើត គណបក្សកែទម្រង់កម្ពុជា , ក្រុមលោកយ៉ែម បុញ្ញឫទ្ធិ បង្កើតគណបក្សកម្ពុជានិយម , គណបក្សបេះដូង ជាតិ បង្កើតដោយក្រុមលោកអេង ឆៃអ៊ាង មូរ សុខហួរ , គណបក្សឆន្ទៈខ្មែរ បង្កើតដោយកូន ប្រុសលោកគង់ គាំ…៕  ដោយៈ ពលជ័យ

ភ្នំពេញ: គណបក្សប្រជាជនកម្ពុជា បានទទួលសំឡេងឆ្នោតគាំទ្រសរុបចំនួន១៧សន្លឹក និងគណបក្សនយោបាយចំនួនបីផ្សេងទៀត គឺគណបក្សហ៊្វុនស៊ិនប៉ិច គណបក្សសញ្ជាតិកម្ពុជា និងគណបក្សយុវជនកម្ពុជា មិនទទួលបានសំឡេងឆ្នោតនោះទេ នៅក្នុងការបោះឆ្នោតជ្រើសរើសក្រុមប្រឹក្សាក្រុងបូកគោនៃខេត្តកំពត កាលពីថ្ងៃអាទិត្យ ទី២៥ ខែកក្កដា ឆ្នាំ២០២១។ លោក សោម សូរីដា អគ្គលេខាធិការរងគណៈកម្មាធិការជាតិរៀបចំការបោះឆ្នោត បានបញ្ជាក់ថា “ជាលទ្ធផលនៃការរាប់សន្លឹកឆ្នោតឃើញថា គណបក្សប្រជាជនកម្ពុជា បានទទួលសំឡេងឆ្នោតគាំទ្រសរុបចំនួន ១៧សន្លឹក រីឯគណបក្សនយោបាយផ្សេងទៀត ដែលបានចូលរួមការប្រកួតប្រជែងការបោះឆ្នោតនេះ ពុំទទួលបានសំឡេងឆ្នោតនោះទេ”។ លោកបន្តថា នៅក្នុងដំណើរការបោះឆ្នោត និងរាប់សន្លឹកឆ្នោតនេះ មានសន្លឹកឆ្នោត បានការសរុបចំនួន១៧ ពុំមានសន្លឹកឆ្នោតមិនបានការ និងពុំមានសន្លឹកឆ្នោតខូចឡើយ។ អគ្គលេខាធិការរងគ.ជ.ប បានបន្តទៀតថា ដំណើរការនៃការបោះឆ្នោតលើកទី១ ដើម្បីជ្រើសរើសក្រុមប្រឹក្សាក្រុងបូកគោ នៃខេត្តកំពត បានប្រព្រឹត្តទៅដោយរលូន ស្របតាមច្បាប់ បទបញ្ជា និងនីតិវិធី ប្រតិទិនការងារ និងលិខិតបទដ្ឋានគតិយុត្តពាក់ព័ន្ធ។ ដំណើរការនេះ បានរៀបចំឡើងក្នុងបរិយាកាសសន្តិសុខ សុវត្ថិភាព និងមានសណ្តាប់ធ្នាប់ របៀបរៀបរយល្អ ស្ថិតក្នុងបរិបទនៃការរីករាលដាលជំងឺកូវីដ-១៩៕ដោយៈ ពលជ័យ

ភ្នំពេញៈ ឯកឧត្តមឧបនាយករដ្ឋមន្រ្តី ប្រាក់ សុខុន រដ្ឋមន្រ្តីការបរទេស និងសហប្រតិបត្តិការអន្តរជាតិ និងឯកឧត្តម មិកាមិ ម៉ាសាហ៊ីរ៉ូ (MIKAMI Masahiro) ឯកអគ្គរាជទូតជប៉ុនប្រចាំកម្ពុជា បានចុះហត្ថលេខាលើលិខិតប្ដូរសារស្ដីពីការផ្ដល់ហិរញ្ញប្បទានឥតសំណងរបស់ជប៉ុន សម្រាប់អនុវត្តគម្រោង «អាហារូបករណ៍អភិវឌ្ឍន៍ធនធានមនុស្ស» ក្នុងឆ្នាំ២០២១ ដែលមានទឹកប្រាក់សរុបចំនួន៣៦២លានយ៉េន ឬប្រមាណ៣,៣ លានដុល្លារអាមេរិក នៅព្រឹកថ្ងៃចន្ទ ទី២៦ ខែកក្កដា ឆ្នាំ២០២១ នៅទីស្តីការក្រសួង។ ឯកឧត្តមបនាយករដ្ឋមន្រ្តី ប្រាក់ សុខុន បានមានប្រសាសន៍ថា លិខិតប្ដូរសារស្ដីពីការផ្ដល់ហិរញ្ញប្បទានឥតសំណងរបស់ជប៉ុន ដែលមានទឹកប្រាក់សរុបចំនួន ៣៦២ លានយ៉េន ឬប្រមាណ៣,៣លានដុល្លារអាមេរិក សម្រាប់អនុវត្តគម្រោង «អាហារូបករណ៍អភិវឌ្ឍន៍ធនធានមនុស្ស»។ មន្រ្តីរាជរដ្ឋាភិបាលកម្ពុជា ចំនួន២៦រូប (ដែលក្នុងនោះ២៤រូប រៀនថ្នាក់អនុបណ្ឌិត និង២រូប រៀនថ្នាក់បណ្ឌិត) នឹងទទួល បានអត្ថប្រយោជន៍ពីការទៅបន្តការសិក្សាកម្រិតខ្ពស់នៅក្នុងប្រទេសជប៉ុន។ ប្រមុខការទូតកម្ពុជាបានបន្តថា ចាប់តាំងពីការដាក់ឱ្យដំណើរការនៅក្នុងឆ្នាំ២០០០ គម្រោងអាហារូបករណ៍អភិវឌ្ឍន៍ធនធានមនុស្ស ឬហៅថា «JDS» បានដើរតួនាទីយ៉ាងសំខាន់ក្នុងការគាំទ្រដល់ការអភិវឌ្ឍធនធានមនុស្សនៅកម្ពុជា។ អស់រយៈពេលជាង២០ឆ្នាំ JDS បានផ្តល់អាហារូបករណ៍ដល់មន្រ្តីកម្ពុជាប្រមាណ៥០០នាក់ ដែលក្នុងនោះមាន ២៤នាក់ មកពីក្រសួងការបរទេស…

ភ្នំពេញ: នៅថ្ងៃអាទិត្យ ទី២៥ ខែកក្កដា ឆ្នាំ២០២១ គឺជាព្រឹត្តិការណ៍នៃការបោះឆ្នោតលើកទី១ ដើម្បីជ្រើសរើសក្រុមប្រឹក្សាក្រុងបូកគោនៃខេត្តកំពត ហើយការិយាល័យបោះឆ្នោតបានចាប់ផ្តើមបើកនៅវេលាម៉ោង ៧:០០ នាទីព្រឹក តាមការគ្រោងទុក។ គណៈកម្មការការិយាល័យបោះឆ្នោត បានប្រកាសបិទការបោះឆ្នោតនៅវេលាម៉ោង៧:៤១នាទីព្រឹក បន្ទាប់ពីអ្នកបោះឆ្នោតចំនួន១៧រូប ដែលជាសមាជិកក្រុមប្រឹក្សាសង្កាត់បឹងទូក សង្កាត់ ព្រែកត្នោត និងសង្កាត់កោះតូច បានចូលទៅបោះឆ្នោតរួចរាល់។ មន្ត្រីបោះឆ្នោត និងអ្នកបោះឆ្នោតបានអនុវត្តន៍យ៉ាងខ្ជាប់ខ្ជួននូវវិធានការការពារ និងទប់ស្កាត់ការឆ្លងរាលដាលជំងឺកូវីដ-១៩ នៅក្នុងការិយាល័យបោះឆ្នោត។ ក្រោយពីប្រកាសបិទការបោះឆ្នោត គណៈកម្មការការិយាល័យរាប់សន្លឹកឆ្នោតបានអនុវត្តន៍នីតិវិធីនៃការរាប់សន្លឹកឆ្នោតនៅការិយាល័យរាប់សន្លឹកឆ្នោត ហើយដំណើរការរាប់សន្លឹកឆ្នោត បានបញ្ចប់នៅវេលាម៉ោង ៨:០៨នាទីព្រឹក ប្រកបដោយភាពត្រឹមត្រូវ និងមានតម្លាភាព ដោយមានការឃ្លាំមើលពីភ្នាក់ងារគណបក្សនយោបាយ អ្នកសង្កេតការណ៍បោះឆ្នោត និងអ្នកសារព័ត៌មានជាតិ។ នៅក្នុងដំណើរការបោះឆ្នោត និងរាប់សន្លឹកឆ្នោតនេះ មានសន្លឹកឆ្នោត បានការសរុបចំនួន១៧ ពុំមានសន្លឹកឆ្នោតមិនបានការ និងពុំមានសន្លឹកឆ្នោតខូចឡើយ។ សូមជម្រាបជូនថា ដំណើរការនៃការបោះឆ្នោតលើកទី១ ដើម្បីជ្រើសរើសក្រុមប្រឹក្សាក្រុងបូកគោ នៃខេត្តកំពត បានប្រព្រឹត្តទៅដោយរលូនស្របតាមច្បាប់ បទបញ្ជា និងនីតិវិធី ប្រតិទិនការងារ និងលិខិតបទដ្ឋានគតិយុត្តពាក់ព័ន្ធ។ ដំណើរការនេះ បានរៀបចំឡើងក្នុងបរិយាកាសសន្តិសុខ សុវត្ថិភាព និងមានសណ្តាប់ធ្នាប់ របៀបរៀបរយល្អ ស្ថិតក្នុងបរិបទនៃការរីករាលដាលជំងឺកូវីដ-១៩៕ ដោយ:ពលជ័យ

ភ្នំពេញៈ នាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ បានបញ្ជាក់ថា កងយោធពលខេមរភូមិន្ទគាំទ្រយ៉ាងពេញទំហឹង នឹងបញ្ជូននាយទាហានទៅកាន់ប្រទេសចិន ដើម្បីចូលរួមក្នុងសមយុទ្ធរក្សាសន្តិភាពចិន និងអាស៊ាន ហើយសង្ឃឹមថា សមយុទ្ធរក្សាសន្តិភាពរវាងទ្វេភាគីកម្ពុជា និងចិន នឹងត្រូវបានរៀបចំឡើងនៅពេលសមស្របមួយបន្ទាប់ពីការរាតត្បាតនៃជំងឺកូវីដ-១៩ ត្រូវបានធូរស្រាល។ ការបញ្ជាក់នេះ នៅក្នុងខួបអនុស្សាវរីយ៍លើកទី១០០ នៃការបង្កើតគណបក្សកុម្មុយនីស្តចិន និងខួបអនុស្សាវរីយ៍លើកទី៩៤ នៃការបង្កើតកងទ័ពរំដោះប្រជាជនចិន កាលពីថ្ងៃទី២៣ ខែកក្កដា ឆ្នាំ២០២១។ នាយឧត្តមសេនីយ៍ វង្ស ពិសេន បានបញ្ជាក់ថា ឡានឆាងមេគង្គប្រភពតែមួយ ចិន និងកម្ពុជា រួមចិត្តតែមួយ។ ត្បិតតែជំងឺកូវីដ-១៩ បានរារាំងការប្រាស្រ័យទាក់ទងគ្នាទៅវិញទៅមករវាងគណបក្ស ប្រទេស និងកងទ័ពទាំងពីរក៏ពិតមែន ប៉ុន្តែមិនអាចរារាំងចំណងមិត្តភាពដូចបងប្អូនរវាងគណបក្ស ប្រទេស និងកងទ័ពទាំងពីរបានឡើយ។ អគ្គមេបញ្ជាការ បានបន្តថា លំហាត់រួមគ្នា “នាគមាស” ប្រឆាំងភេរវកម្ម និងជំនួយមនុស្សធម៌ បានបោះជំហានទៅកាន់ខឿនថ្មីមួយទៀត។ លំហាត់រួមគ្នា “នាគមាស” ចិន និងកម្ពុជា រៀបចំបានចំនួន៤លើក ដោយចាប់តាំងពីឆ្នាំ២០១៦ ទំហំអ្នកចូលរួម និងឧបករណ៍មានការវិវឌ្ឍកាន់តែថ្មីច្រើន និងអស្ចារ្យនៅក្នុងប្រវត្តិសាស្ត្រ។ ក្នុងនាមជាអគ្គមេបញ្ជាការ…