នៅទីស្ដីការក្រសួងមហាផ្ទៃ នាព្រឹកថ្ងៃទី១៦ ខែធ្នូ ឆ្នាំ២០២០នេះ ក្រសួងមហាផ្ទៃ ចូលរួមកិច្ចប្រជុំអន្តរក្រសួង ជាមួយក្រសួងពាក់ព័ន្ធនានា ដើម្បីពិភាក្សា និងកែសម្រួលលើឯកសារចាំបាច់ សម្រាប់ត្រៀមចូលរួមកិច្ចប្រជុំគណៈកម្មការចម្រុះកម្ពុជា-វៀតណាម លើកទី១៨ តាមរយៈប្រព័ន្ធវីដេអូអនឡាញ ក្រោមអធិបតីភាពឯកឧត្តម ប្រាក់ សំអឿន អគ្គនាយក នៃអគ្គនាយកដ្ឋានរដ្ឋបាល និងជាអនុប្រធានក្រុមការងារទទួលបន្ទុកបង្កើតបណ្ដាញទីក្រុងឆ្លាតអាស៊ាន ដោយមានការចូលរួមពីអគ្គនាយករងរដ្ឋបាល អគ្គស្នងការរង អគ្គលេខាធិការរង មន្ត្រីពាក់ព័ន្ធជាច្រើនរូបផងដែរ។ គួរបញ្ជាក់ថា កិច្ចប្រជុំគណៈកម្មការចម្រុះកម្ពុជា-វៀតណាម លើកទី១៨ ស្ដីពីកិច្ចសហប្រតិបត្តិការសេដ្ឋកិច្ច វប្បធម៌ វិទ្យាសាស្ត្រ និងបច្ចេកទេស នឹងត្រូវរៀបចំឡើងតាមប្រព័ន្ធវីដេអូអនឡាញ នៅថ្ងៃទី១៨ និងថ្ងៃទី២២ ខែធ្នូ ឆ្នាំ២០២០ ខាងមុខនេះ ដោយភាគីវៀតណាមធ្វើជាម្ចាស់ផ្ទះ៕ ដោយ-រ៉ាវុធ

ខេត្តបាត់ដំបង៖ លោកវរសេនីយ៍ឯក យ៉យ ស៊ីដូ មេបញ្ជាការកងការពារព្រំដែនលេខ៥០៤ នៅថ្ងៃ១៥ធ្នូឆ្នាំ២០២០ បានចាត់តាំងក្រុមការងារវាស់វែងGPS ដឹកនាំដោយលោក ស បូរា នៅចំនុចបង្គោលព្រំដែន ស្ថិតក្នុងភូមិបឹងរាំង ឃុំបឹងរាំង ស្រុកកំរៀង ខេត្តបាត់ដំបង។ ការចុះវាស់វែងនោះ គឺជាកិច្ចសហប្រតិបត្តិការក្នុងន័យរក្សាឱ្យបាននូវបូរណភាពដែនដី ក៏ដូចជាការសហការក្នុងការបង្ក្រាបបទល្មើសឆ្លងដែនផ្សេងៗ ដែលកើតមានតាមបន្ទាត់ព្រំដែននៃប្រទេសទាំងពីរ។ ម្យ៉ាងវិញទៀត ក៏បានបង្ហាញឱ្យឃើញពីការសាមគ្គីភាព និងសុខសន្តិភាព និងទំនាក់ទំនងការងារល្អរវាងប្រទេសទាំងពីរនៅតាមបន្ទាត់ព្រំដែនផងដែរ។ ការងារកិច្ចសហប្រតិបត្តិការនោះ បានប្រព្រឹត្តធ្វើឡើងដោយមានការចូលរួមពី ភាគីកម្ពុជា ដូចជាកម្លាំងកងអនុសេនាធំល្បាតទី៤ និងទី៥ ផ្នែកសឹករងស្រុកកំរៀង និងកម្លាំងនគរបាលការពារព្រំដែនលេខ៨១៩ រីឯភាគីប្រទេសថៃវិញ មានសមាសភាពចូលរួមដូចជា ទាហានឈុតខ្មៅកងរយ៥៤៧ កងរយ៥២១ និងកងរយ១១៤ និងទាហានឈុតប៉ារ៉ាផងដែរ៕កឹម ទៀង

យោងតាមការផ្សាយរបស់ស្ថានទូតជប៉ុនប្រចាំកម្ពុជានៅថ្ងៃ១៥ធ្នូឆ្នាំ២០២០ បានឲ្យដឹងថា រដ្ឋាភិបាលជប៉ុននៅថ្ងៃ១៤ធ្នូឆ្នាំ២០២០ បានផ្តល់ថវិកា៩៦ម៉ឺន៨ពាន់៣៩០ដុល្លារអាមេរិក ដល់អង្គការចំនួនពីរ ក្រោមគ្រោងការណ៍ជំនួយហិរញ្ញប្បទានឥតសំណងសម្រាប់គម្រោងរបស់អង្គការក្រៅរដ្ឋាភិបាលជប៉ុន ក្នុងការពង្រឹងប្រព័ន្ធថែទាំផ្នែកវះកាត់កុមារក្នុងខេត្តក្រចេះ និងការលើកកម្ពស់ការអប់រំបញ្ចូលគ្នាក្នុងខេត្តកណ្តាល។ ក្នុងចំណោមនោះ ទឹកប្រាក់ចំនួន ៦៩ម៉ឺន៤ពាន់៥៣៩ ដុល្លារសម្រាប់អង្គការមូលនិធិសម្រាប់ការអភិវឌ្ឍ និងជំនួយសង្គ្រោះអន្តរជាតិ (FIDR) ដើម្បីអនុវត្តន៍គម្រោងសល្យសាស្រ្តកុមារប្រចាំខេត្តក្រចេះឆ្នាំទី២ និង ទឹកប្រាក់ចំនួន ២៧ម៉ឺន៣ពាន់៨៥១ ដុល្លារអាមេរិក សម្រាប់សមាគមសម្រាប់ជំនួយ និងសង្គ្រោះនៃប្រទេសជប៉ុន (AAR Japan) ដើម្បីអនុវត្តន៍គម្រោងលើកកម្ពស់ការអប់រំបរិយាប័ន្នសម្រាប់កុមារពិការតាមរយៈពង្រឹងការអនុវត្តក្នុងតំបន់គំរូ និងការអភិវឌ្ឍប្រព័ន្ធវាយតម្លៃការអប់រំបរិយាប័ន្ន ឆ្នាំទី២។ អគ្គរាជទូតជប៉ុនលោក មិកាមិ ម៉ាសាហ៊ីរ៉ូ និងអ្នកតំណាងអង្គភាពទាំង២ បានចុះហត្ថលេខាលើកិច្ចសន្យាផ្តល់ជំនួយរបស់ពួកគេជាមួយនឹងអ្នកតំណាងអង្គការទាំងពីរ។ លោកមិកាមិ ម៉ាសាហ៊ីរ៉ូ បបានថ្លែងថា លោកជឿជាក់ថាជំនួយឥតសំណងនោះនឹងជួយក្នុងការកែលម្អគុណភាពជីវិតសម្រាប់ប្រជាជននៅក្នុងតំបន់នីមួយៗនៃគម្រោង៕កឹម ទៀង

រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ឯកឧត្តម វេង សាខុន នៅរសៀលថ្ងៃ១៤ធ្នូឆ្នាំ២០២០ បាន ចូលរួមជាសហប្រធានកិត្តិយសក្នុងពិធីបើកសិក្ខាសាលា និងពិព័រណ៍ផ្នែកកសិកម្មអន្តរជាតិ អាស៊ី-អឺរ៉ុប លើកទី៤ ដែលប្រព្រឹត្តធ្វើឡើងតាមរយៈប្រព័ន្ធវីដេអូ។ ក្នុងពិធីបើកសិក្ខាសាលា និងពិព័រណ៍ផ្នែកកសិកម្មអន្តរជាតិ អាស៊ី-អឺរ៉ុប លើកទី៤នោះ ឯកឧត្តមរដ្ឋមន្ត្រី វេង សាខុន ក្នុងនាមរាជរដ្ឋាភិបាលកម្ពុជា បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាលនៃសាធារណរដ្ឋប្រជាមានិតចិន តាមរយៈគោលនយោបាយខ្សែក្រវាត់ និងផ្លូវ បានធ្វើឲ្យប្រទេសកម្ពុជាមានការរីកចម្រើនយ៉ាងឆាប់រហ័សក្នុងការកសាងហេដ្ឋារចនាសម្ព័ន្ធសំខាន់ៗ ដូចជាផ្លូវថ្នល់ ស្ពាន មន្ទីរពេទ្យ ធារាសាស្ត្រកសិកម្ម និងជាពិសេសវិនិយោគិនចិនមកវិនិយោគនៅកម្ពុជាផងដែរ។ ឯកឧត្តមរដ្ឋមន្ត្រីក៏បានវាយតម្លៃខ្ពស់ចំពោះ Huehe International Businees Consultancy ដែលបានរៀបចំសិក្ខាសាលា និងពិព័រណ៍ផ្នែកកសិកម្មនោះឡើង ដើម្បីចូលរួមលើកស្ទួយការធ្វើទំនើបកម្មក្នុងវិស័យកសិកម្ម និងផ្តល់ឱកាសដល់ស្ថាប័នរដ្ឋ ដៃគូអភិវឌ្ឍន៍ វិស័យឯកជន និងអ្នកផលិតជួបគ្នា ផ្លាស់ប្តូរបទពិសោធន៍ និងស្វែងរកភាពជាដៃគូរវាងគ្នា។ ឯកឧត្តមរដ្ឋមន្ត្រី បានចាត់ទុក ព្រឹត្តិការណ៍នោះ គឺស្របតាមគោលនយោបាយ និងផែនការយុទ្ធសាស្ត្រអភិវឌ្ឍន៍វិស័យកសិកម្មរបស់ក្រសួងកសិកម្ម រុក្ខាប្រមាញ់ និងនេសាទ ក្នុងការជំរុញកសិកម្មទំនើប ប្រកួតប្រជែង បរិយាប័ន្ន ធន់នឹងការប្រែប្រួលអាកាសធាតុ…