ដោយ៖ម៉ាដេប៉ូ រាជធានីភ្នំពេញ៖ជាមួយការទទួលបានម្លប់ត្រជាក់និងបរិស្ថានកាន់តែស្អាតបរិសុទ្ធល្អនោះមន្ត្រីនៃ ក្រសួងបរិស្ថានបានលើកទឹកចិត្តអាជ្ញាធរមូលដ្ឋាននិងប្រជាពលរដ្ឋឱ្យបង្កើនការចូលរួមដាំដើមឈើនៅតាមទីសាធារណៈ សាលារៀន វត្តអារាមនិងនៅតាមក្រសួង មន្ទីរអង្គភាពនានា។           ការលើកទឹកចិត្តឱ្យបង្កើនការដាំដើមឈើនេះធ្វើឡើងដោយ ឯកឧត្តម នេត្រ ភក្ត្រា រដ្ឋលេខាធិការក្រសួងបរិស្ថានក្នុងឱកាសប្រារព្ធទិវាអនាម័យបរិស្ថានជាតិនាថ្ងៃទី២៣ ខែវិច្ឆិកា ឆ្នាំ២០២០ នេះ។ ឯកឧត្តមរដ្ឋលេខាធិការបានគូសបញ្ជាក់ថាការដាំដើមឈើគឺមិនត្រឹមតែផ្តល់ម្លប់ត្រជាក់ទេប៉ុន្តែវាក៏ជាផ្នែកមួយយ៉ាងសំខាន់ដើម្បីបង្កើនភាពបៃតង ចូលរួមការពារបរិស្ថាននិងធនធានធម្មជាតិ និងប្រព័ន្ធអេកូឡូស៊ី បង្កើនគុណភាពខ្យល់ ថែរក្សាគុណភាពដី និងការពារប្រភពទឹកក្រោមដីសម្រាប់មនុស្សរាប់ជំនាន់ទៅមុខទៀត បន្ថែមពីលើព្រៃឈើនៅក្នុងតំបន់ការពារធម្មជាតិដែលកម្ពុជាមានស្រាប់ និងបានកំពុងការពារនិងអភិរក្ស។ ឯកឧត្តម រដ្ឋលេខាធិការ នេត្រ ភក្ត្រា បានមានប្រសាសន៍ថា ព្រៃឈើដើរតួនាទីសំខាន់ក្នុងការការ ពារប្រព័ន្ធអេកូឡូស៊ីដែលយើងចាំបាច់ត្រូវដាំបន្ថែមពីលើឈើធម្មជាតិដែលកម្ពុជាមាន។  ឯកឧត្តម នេត្រ ភក្ត្រា បានថ្លែងថាបច្ចុប្បន្ន គម្របព្រៃឈើកម្ពុជាមានជាង ៨,៥ លានហិកតាស្មើនឹង ៤៦,៨៦ភាគរយ នៃផ្ទៃដីសរុប របស់កម្ពុជា។ដោយឡែកផ្ទៃដីព្រៃឈើដែលស្ថិតក្រោមការការពារនិងអភិរក្សដោយក្រសួងបរិស្ថានមានទំហំប្រមាណ ៧,៣ លានហិកតាដោយចែកចេញជា ៦៥ តំបន់ការពារធម្មជាតិដែលរួមមានឧទ្យានជាតិ ដែនជម្រកសត្វព្រៃ តំបន់ការពារទេសភាព តំបន់ប្រើប្រាស់ច្រើនយ៉ាង រួមនឹងរបៀងអភិរក្សជីវៈចម្រុះ។    ឯកឧត្តមរដ្ឋលេខាធិការបានលើកឡើងថានៅពេលតាមទីប្រជុំជន និងភូមិដ្ឋានប្រជាពលរដ្ឋមានភាពបៃតង នោះនឹងចូលរួមយ៉ាងសំខាន់ក្នុងការធ្វើឱ្យខ្យល់បរិសុទ្ធ រក្សាគុណភាពដី និងប្រភពទឹកក្រោមដី និងជាផ្នែកមួយនៃការបន្ស៊ាំទៅនឹងការប្រែប្រួលអាកាសធាតុ។…

ដោយ៖ម៉ាដេប៉ូ រាជធានីភ្នំពេញ៖យ៉ាងហោចណាស់កាកសំណល់ដែលជាសារជាតិប្លាស្ទិកគ្រប់ប្រភេទក្នុងមួយឆ្នាំៗប្រមាណជិត ២០០ តោនត្រូវបានទប់ស្កាត់និងប្រមូលចេញមិនឱ្យហូរចូលបឹងទន្លេសាប នៅភូមិសាស្ត្រខេត្តសៀមរាប។នេះបើតាមការឱ្យដឹងពីសំណាក់ ឯកឧត្តម នេត្រ ភក្រ្តា មន្រ្តីនាំពាក្យនិងជារដ្ឋលេខាធិកាក្រសួងបរិស្ថាន។ ថ្លែងនៅថ្ងៃទី២២ខែវិច្ឆិកាឆ្នាំ២០២០នេះក្នុងពិធីប្រារព្ធទិវាអនាម័យបរិស្ថានជាតិ និងពិធីបុណ្យទន្លេសាបរដូវទឹកសម្រកប្រចាំឆ្នាំ២០២០ឯកឧត្តម នេត្រ ភក្ត្រា ឱ្យថា បឹងទន្លេសាបត្រូវបានបំពុលដោយថង់ប្លាស្ទិកទាំងសហគមន៍ដែលរស់នៅលើបឹងទន្លេសាបនេះផង និងការហូរនាំយកប្លាស្ទិក ដែលបងប្អូនប្រជាពលរដ្ឋបោះចោលគ្មានសណ្តាប់ធ្នាប់តាមព្រែក តាមស្ទឹងនានាចាក់ចូលមកក្នុងបឹងទន្លេសាបផង។ យ៉ាងណាក្តី ឯក ឧត្តម រដ្ឋលេខាធិការបានបញ្ជាក់ថាសារជាតិប្លាស្ទិកគ្រប់ប្រភេទក្នុងមួយឆ្នាំៗប្រមាណជិត ២០០ តោនត្រូវបានទប់ស្កាត់និងប្រមូលចេញមិនឱ្យហូរចូលបឹងទន្លេសាប នៅភូមិសាស្ត្រខេត្តសៀមរាបដែលជាផ្នែកមួយចូលរួមថែរក្សាបរិស្ថានដើម្បីនិរន្តរភាពទីស្អាត មានមេត្រីភាពបរិស្ថាន ដើម្បីភាពសុខុដុមរមនាបរិស្ថាន និងការស់នៅដោយចីរភាព។  ឯកឧត្តមនេត្រភក្ត្រាបានលើកឡើងថាចំពោះការអប់រំនិងផ្សព្វផ្សាយលើផលប៉ះពាល់ពីសំណល់ប្លាស្ទិកពិតជាមានសារៈសំខាន់និងត្រូវធ្វើ ជាប្រចាំហើយជាមួយគ្នានេះត្រូវមានការចូលរួមអនុវត្តជាប្រចាំ រួមនឹងបង្កើតគំនិតផ្តួចផ្តើមផ្សេងៗដើម្បីប្រសិទ្ធភាពនៃការកាត់បន្ថយការបំពុលដោយប្លាស្ទិកក្នុងបឹងទន្លេសាប។ បើតាមការឱ្យដឹងរបស់ រដ្ឋលេខាធិការក្រសួងបរិស្ថាន ស្ថានភាពគ្រប់គ្រងសំរាម សំណល់រឹងទីប្រជុំជន របស់ខេត្តសៀមរាប សម្រាប់ឆ្នាំ២០២០នេះគឺបរិមាណបង្កើតសំណល់ប្រមាណ ៥០៦តោនក្នុងមួយថ្ងៃ ហើយបរិមាណកែច្នៃឡើវិញមានប្រមាណ ១០៣ តោនក្នុងមួយថ្ងៃ (អាជីវករប្រមូលទិញអេតចាយ មានចំនួន៤៩ទីតាំង) បរិមាណសំណល់ប្រមូលយកទៅដាក់ទីលានចាក់សំរាមប្រមាណ ២៤១តោនក្នុងមួយថ្ងៃ ហើយបរិមាណសំណល់ដែលបោះចោលដោយខុសច្បាប់ប្រមាណ ១៦២តោនក្នុងមួយថ្ងៃ ដែលបាន ដុតចោល បោះចោលតាមដងផ្លូវ និងប្រឡាយសាធារណៈ៕