(ភ្នំពេញ)៖ លោកឧត្តមសេនីយ៍ទោ ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ និងឱ្យកម្លាំងនគរបាលចរាចរណ៍រាជធានីភ្នំពេញ នឹងចាប់ផ្ដើមអនុវត្តរឹងបន្ដឹងច្បាប់ចរាចរណ៍ផ្លូវគោក ចាប់ពីថ្ងៃទី២៣ ខែកញ្ញាស្អែកនេះតទៅ ។ លោកស្នងការរាជធានីភ្នំពេញ បានថ្លែង ឱ្យដឹងនៅថ្ងៃទី២២ ខែកញ្ញា ឆ្នាំ២០២៣នេះយ៉ាងដូច្នេះថា៖ មុនឈានដល់ការអនុវត្តវិធានការច្បាប់ចំពោះអ្នកបើកល្មើសច្បាប់ចរាចរណ៍នេះ កម្លាំងនគរបាលចរាចរណ៍បានប្រើប្រាស់ពេល១សប្ដាហ៍ ដើម្បីធ្វើការអប់រំចំពោះអ្នកល្មើសច្បាប់ និងជូនដំណឹងពីការអនុវត្តនេះជាមុនផងដែរ។ បេីយោងតាមរបាយការណ៍អំពីស្ថានភាពគ្រោះថ្នាក់ចរាចរណ៍ពីមន្ត្រីជំនាញ ក្នុងរយៈពេល០៦ខែ នៃឆ្នាំ២០២៣ និងរយៈពេល០៦ខែ ក្នុងឆ្នាំ២០២២ បើប្រៀបធៀបទៅមានការថយចុះ គួរឲ្យកត់សម្គាល់ ប៉ុន្តែកិច្ចការងារពង្រឹងច្បាប់ចរាចរណ៍នេះនៅតែបន្ត ដើម្បីកុំឲ្យប្រជាពលរដ្ឋ នៅតាមបណ្តារាជធានី-ខេត្ត មានការស្រពិចស្រពិល យល់ច្រឡំហើយអនុវត្តខុស ព្រោះថាការរៀបចំច្បាប់ចរាចរណ៍ គឺក្នុងន័យដើម្បីលុបបំបាត់នូវគ្រោះថ្នាក់ចរាចរណ៍ បង្កើននូវសណ្តាប់ធ្នាប់គ្រប់ពេលធ្វើដំណើរក្នុងក្របខណ្ឌទូទាំងប្រទេស៕ ដោយ ៖ ជីម ភារ៉ា

(ភ្នំពេញ)៖ នាល្ងាចថ្ងៃទី២ ខែកញ្ញា ឆ្នាំ២០២៣នេះ លោកឧត្តមសេនីយ៍ទោ ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានបញ្ជាឲ្យបញ្ចេញកម្លាំងអន្ដរាគមន៍ពិសេស ដើម្បីចេញល្បាតក្នុងភូមិសាស្ដ្ររាជធានីភ្នំពេញ ដោយប្ដូរវេន២៤ម៉ោង លើ២៤ម៉ោង ដើម្បីរក្សា សន្តិសុខសណ្ដាប់ធ្នាប់ សុខសុវត្ថិភាពជូនពលរដ្ឋ។ បេីតាមអ្នកនាំពាក្យ នៃស្នងការដ្ឋាននគរបាលរាជធានីភ្នំពេញ លោកឧត្តមសេនីយ៍ត្រី សាន សុខសីហា បានឲ្យដឹងថា នាល្ងាចថ្ងៃទី០២ ខែកញ្ញា ឆ្នាំ២០២៣នេះថា ក្រោយមានបទបញ្ជារបស់ ឯកឧត្តមស្នងការ ឲ្យបញ្ចេញកម្លាំងអន្ដរាគមន៍ពិសេសនេះ គឺដើម្បីបង្ការ ទប់ស្កាត់ និងបង្ក្រាបបទល្មើសនានាដែលអាចកើតមានឡើង និងធ្វើយ៉ាងណាឲ្យប្រជាពលរដ្ឋរស់នៅ និងប្រកបមុខរបរផ្សេងៗ ដោយគ្មានការភ័យខ្លាច។ គួរបញ្ជាក់ផងដែរ ប៉ុន្មានថ្ងៃចុងក្រោយ ពាក់ព័ន្ធក្រុមក្មេងទំនើងដែលអុកឡុកក្នុងសង្គម លោកបានបញ្ជាក់អំពីវិធានការក្ដៅយ៉ាងម៉ឺងម៉ាត់បំផុត និងស្រាវជ្រាវបង្ក្រាបជាបន្ដបន្ទាប់ ដោយមិនបណ្ដោយឲ្យក្មេងទំនើងទាំងអស់នោះ បង្កការភ័យខ្លាចដល់ប្រជាពលរដ្ឋទៀតនោះឡើយ។ លោកបានបន្ថែមថា ស្នងការដ្ឋាននគរបាលរាជធានីភ្នំពេញ នឹងប្រើប្រាស់វិធានការជំនាញផ្សេងៗជាច្រើនទៀត ដើម្បីទប់ស្កាត់ បង្ការកុំឲ្យមានបទល្មើសព្រហ្មទណ្ឌគ្រប់ប្រភេទកើតមានឡើងនៅក្នុងរាជធានីភ្នំពេញ៕ ដោយ ៖ ជីម ភារ៉ា

(ភ្នំពេញ )៖ ផ្ទុះធុងឧស្ម័នអាម៉ូញ៉ាក់ ពីក្នុងរោងចក្រផលិតទឹកកក មួយកន្លែង យីហោ ឈាង មួ នៅជាប់បណ្ដោយផ្លូវបេតុង ក្នុងសង្កាត់ច្រាំងចំរេះ ខណ្ឌឬស្សីកែវ បណ្ដាលឱ្យមនុស្សប្រុសស្រីជាង ២០នាក់បានដួលសន្លប់ជាបន្ដបន្ទាប់ បង្កការភ្ញាក់ផ្អេីលដល់អាជ្ញាធរមានសមត្ថកិច្ចជួយអន្តរាគមន៍ដឹកជនរងគ្រោះយកទៅមន្ទីរពេទ្យដេីម្បីសង្គ្រោះបន្ទាន់ កាលពីវេលាម៉ោង៧ និង៣០នាទីយប់ថ្ងៃទី១ ខែកញ្ញា ឆ្នាំ២០២៣ ។ តាមប្រភពពីប្រជាពលរដ្ឋដែលនៅកន្លែងកើតហេតុបានឱ្យដឹងថា នៅមុនកើតហេតុ គេឃើញរោងចក្រផលិតទឹកកកមួយកន្លែងយីហោ ឈាង មួ ខាងលេីកំពុងដំណើរការផលិតទឹកកក និងមានកម្មករធ្វើការជាធម្មតា ។ លុះក្រោយមកស្រាប់តែផ្ទុះធុងឧស្ម័នអាម៉ូញ៉ាក់ បង្កឱ្យសាយភាយពេញតំបន់ក្បែរៗនោះតែម្ដង ដោយបង្កឱ្យមានអ្នកដួលសន្លប់ជាច្រើននាក់ ខណៈអ្នកខ្លះដឹងខ្លួនទាន់ក៏រត់ចេញពីតំបន់នោះ ដេីម្បីរកកន្លែងមានសុវត្ថិភាពព្រោះធំក្លិនចំហាយមិនបាន នឹងអ្នកខ្លះរត់ចេញមិនទាន់ហូរទឹកភ្នែកពិបាកដកដង្ហើមដួលសន្លប់ផងដែរ ។ ក្រោយពីទទួលបានព័ត៌មានខាងលេីនេះភ្លាម លោក ឯក ឃុនដឿន អភិបាល នៃគណៈអភិបាលខណ្ឌឬស្សីកែវ បានដឹងនាំកម្លាំងគណៈបញ្ជាកាឯកភាពខណ្ឌ ចុះអន្តរាគមន៍និងមានការចូលរួមពីរថយន្ដសង្គ្រោះបន្ទាន់របស់មន្ទីពេទ្យសម្ដេចឪសម្ដេចម៉ែ នឹងរថយន្ដពន្លត់អគ្គីភ័យ មកត្រៀមនិងជួយដឹកប្រជាពលរដ្ឋរងគ្រោះមកកាន់មន្ទីរពេទ្យដេីម្បីសង្គ្រោះអាយុជីវិតភ្លាមៗ ។ រីឯរោងចក្រផលិតទឹកកកដែលធ្លាយចេញនូវឧស្ម័នបណ្ដាលឱ្យប្រជាពលរដ្ឋដួលសន្លប់នោះ អាជ្ញាធរជំនាញបានចាត់ការបន្តតាមនីតិវិធី ៕ ដោយ ៖ ជីម ភារ៉ា

(ភ្នំពេញ)៖ ស្ថានភាពធាតុអាកាស ចាប់ពីថ្ងៃទី០១ – ០៤ ខែកញ្ញា ឆ្នាំ២០២៣ នៅតំបន់សមុទ្រអាចមានភ្លៀងធ្លាក់ជាប់ជាបន្តបន្ទាប់ពីបង្គួរទៅច្រើនលាយឡំ ផ្គរ រន្ទះ និងខ្យល់កន្រ្តាក់ ។ នេះបេីយោងតាមសេចក្ដីជូនដំណឹងរបស់ក្រសួងធនធានទឹក និងឧតុនិយម កាលពីថ្ងៃទី៣០ ខែសីហា ឆ្នាំ២០២៣ ។ ក្រសួងបានបញ្ជាក់ថា៖ ដោយយោងតាមការតាមដានស្ថានភាពវិវត្តនៃធាតុអាកាស និងព្យាករណ៍បន្ត ក្រសួងធនធានទឹក និងឧតុនិយម សូមជម្រាបដល់សាធារណជនឲ្យបានជ្រាបថា ចាប់ពីថ្ងៃទី០១ ដល់ថ្ងៃទី០៤ ខែកញ្ញា ឆ្នាំ២០២៣ នៅតំបន់មាត់សមុទ្រនឹងអាចមានភ្លៀងធ្លាក់ជាប់ជាបន្តបន្ទាប់ពីបង្គួរទៅច្រើនលាយឡំ ផ្គរ រន្ទះ និងខ្យល់កន្រ្តាក់។ នៅលើផ្ទៃសមុទ្រមានភ្លៀងខ្យល់បក់បោកនិងរលកសមុទ្រខ្ពស់ៗ។ អាស្រ័យដូចបានជម្រាបជូនខាងលើ សូមសាធារណជនជ្រាបជាព័ត៌មាន និងប្រុងប្រយ័ត្នចំពោះគ្រោះថ្នាក់នានាដែលអាចកើតមានជាយថាហេតុ៕ ដោយ ៖ ជីម ភារ៉ា

(ភ្នំពេញ)៖ ជនសង្ស័យចំនួន ៤៥នាក់ (ស្រី ១០នាក់) ត្រូវបានសមត្ថកិច្ចជំនាញធ្វេីការឃាត់ខ្លួន ក្នុងប្រតិបត្តិការបង្ក្រាបបទល្មើសគ្រឿងញៀនចំនួន ៩ករណី ទូទាំងប្រទេសកាលពីថ្ងៃទី៣១ ខែសីហា ឆ្នាំ ២០២៣ ម្សិលមិញ ។ នៅក្នុងចំណោមជនសង្ស័យចំនួន ៤៥នាក់ រួមមាន៖ ជួញដូរ ១ករណី ឃាត់ ៤នាក់ (ស្រី ០នាក់)។ ដឹកជញ្ជូន រក្សាទុក ៧ករណី ឃាត់ ២៧នាក់ (ស្រី ៩នាក់)។ និងប្រើប្រាស់ ១ករណី ឃាត់ ១៤នាក់ (ស្រី ១នាក់)។ វត្ថុតាងដែលចាប់យកសរុបក្នុងថ្ងៃទី៣១ ខែសីហា រួមមាន៖ មេតំហ្វេតាមីន ម៉ាទឹកកក (Ice) ស្មេីនិង ៦៤,៨២ក្រាម និង ៥កញ្ចប់តូច។ កេតាមីន (Ke) ស្មេីនិង ៦,១០ក្រាម និង២៦កញ្ចប់។ អុិចស្តាសុី (mdma) ស្មេីនិង ៧៩គ្រាប់។…

(ភ្នំពេញ)៖ យោងតាមរបាយការណ៍ របស់អគ្គស្នងការដ្ឋាននគបាលជាតិ បានឲ្យដឹងថា ជនសង្ស័យចំនួន ៤៥នាក់ ត្រូវបានសមត្ថកិច្ចជំនាញធ្វេីការឃាត់ខ្លួន ក្នុងប្រតិបត្តិការបង្ក្រាបបទល្មើសគ្រឿងញៀនចំនួន ១៦ករណី ទូទាំងប្រទេស នៅថ្ងៃទី២៦ ខែសីហា ឆ្នាំ២០២៣។ ក្នុងចំណោមជនសង្ស័យចំនួន ៤៥នាក់ រួមមាន ៖ ជួញដូរ ១ករណី ឃាត់ ១នាក់ (ស្រី ០នាក់)។ ដឹកជញ្ជូន រក្សាទុក ១៣ករណី ឃាត់ ៣៥នាក់ (ស្រី ១នាក់)។ ប្រើប្រាស់ ២ករណី ឃាត់ ៩នាក់ (ស្រី ០នាក់)។ វត្ថុតាងដែលចាប់យកសរុបក្នុងថ្ងៃទី២៦ ខែសីហា រួមមាន ៖  មេតំហ្វេតាមីន (Ice) ស្មើ ៧៣,៥៣ក្រាម និង ២១កញ្ចប់តូច។លទ្ធផលខាងលើ ៨អង្គភាព បានចូលរួមបង្ក្រាប គឺនគរបាល ទាំង ៨អង្គភាព  ៕ ដោយ ៖ ប៊ុនធី និង ភារ៉ា

(ភ្នំពេញ)៖ យោងតាមរបាយការណ៍ របស់អគ្គស្នងការដ្ឋាននគរបាលជាតិឲ្យដឹងថា នៅថ្ងៃទី២៦ ខែសីហា ឆ្នាំ២០២៣ មានករណីគ្រោះថ្នាក់ចរាចរណ៍ នៅទូទាំងប្រទេសកើតឡើងចំនួន ១២លើក បណ្ដាលឲ្យមនុស្ស ៦ស្លាប់និងរបួសធ្ងន់ស្រាល ១៨នាក់។ ប្រភពព័ត៌មានដដែលបញ្ជាក់ថា គ្រោះថ្នាក់ដែលបង្កឲ្យមានមនុស្សស្លាប់ និងរបួសសរុបចំនួន ២៤នាក់ គឺកើតឡើងដោយសារការប៉ះទង្គិចគ្នាចំនួន ១២លើក មាន កត្តាល្បឿន ៥លើក មិនគោរពសិទ្ធ ៥លើក បត់គ្រោះថ្នាក់ ១លើក និងមិនប្រកាន់ស្តាំ ១លើក៕ ដោយ៖ ប៊ុនធី និង ភារ៉ា

(ភ្នំពេញ)៖ យោងតាមរបាយការណ៍ របស់អគ្គស្នងការដ្ឋាននគរបាលជាតិឲ្យដឹងថា នៅថ្ងៃទី១៨ ខែសីហា ឆ្នាំ២០២៣ មានករណីគ្រោះថ្នាក់ចរាចរណ៍ នៅទូទាំងប្រទេសកើតឡើងចំនួន ១៧លើក បណ្ដាលឲ្យមនុស្ស ៨ស្លាប់និងរបួសធ្ងន់ស្រាល ១៤នាក់។ ប្រភពព័ត៌មានដដែលបញ្ជាក់ថា គ្រោះថ្នាក់ដែលបង្កឲ្យមានមនុស្សស្លាប់ និងរបួសសរុបចំនួន ២២នាក់ គឺកើតឡើងដោយសារការប៉ះទង្គិច គ្នាចំនួន ១៧លើក មាន កត្តាល្បឿន ៧លើក មិនគោរពសិទ្ធ ៣លើក មិនប្រកាន់ស្តាំ ៣លើក បត់គ្រោះថ្នាក់ ៣លើក និងស្រវឹង ១លើក៕ ដោយ៖ ប៊ុនធី និង ភារ៉ា