សង្ហិបុរី៖ មនុស្សគ្រប់គ្នា តែងតែចង់ទៅរស់នៅក្នុងប្រទេសជាតិ ដែលមានសន្តិភាព និងសុភមង្គល។ បច្ចុប្បន្ននេះបញ្ហាអំពើហិង្សា សង្រ្គាម និងភាពចលាចល បានកើតមានទ្បើងជាញឹកញាប់ នៅតាមបណ្ដាប្រទេសនានា ក្នុងពិភពលោកទូទាំពិភពលោក។ ប៉ុន្តែមិនមែនមានន័យថា ប្រទេសទាំងអស់សុទ្ធសឹងតែ ជួបរឿងបែបនេះទាំងអស់ទេ។ វិទ្យាស្ថានសេដ្ឋកិច្ច និងសន្តិភាព បានបង្ហាញនូវការសិក្សាសន្ទស្សន៍សន្តិភាពសកល ឬ The Global Peace Index (GPI) នៅក្នុងប្រទេសចំនួន១០ ដែលមានសន្តិភាពបំផុតនៅលើពិភពលោកសម្រាប់ឆ្នាំ ២០២៤។ ទី១.អ៊ីស្លង់ បានឈរលើកំពូលតារាងក្នុងរយៈពេល ១៦ឆ្នាំជាប់ៗគ្នា, ទី២.អៀរឡង់, ទី៣.អូទ្រីស, ទី៤.នូវែលសេឡង់, ទី៥.សិង្ហបុរី, ទី៦.ស្វីស, ទី៧.ព័រទុយហ្គាល់, ទី៨.ដាណឺម៉ាក, ទី៩.ស្លូវេនី និងទី១០.ម៉ាឡេស៊ី។ ការផ្តល់នូវសន្ទស្សន៍នេះ ផ្អែកលើសូចនាករចំនួន២៣ផ្សេងៗគ្នា រួមបញ្ចូលទាំងកម្រិតនៃឧក្រិដ្ឋកម្ម, អំពើហិង្សា, ទំនាក់ទំនងជាមួយប្រទេសជិតខាង, អស្ថិរភាពនយោបាយ, សកម្មភាពភេរវករ, ការស្លាប់ដោយសារជម្លោះ, ការចំណាយលើវិស័យយោធា និងការចូលរួមចំណែកបេសកកម្មរក្សាសន្តិភាពនៃអង្គការសហប្រជាជាតិជាដើម៕ ប្រភព៖ timeout ប្រែសម្រួលដោយ៖ ឈឹម ទីណា

បាងកក៖ អាជ្ញាធរទេសចរណ៍ថៃ (TAT) កំពុងស្វែងរកភាពជាដៃគូជាមួយក្រុមហ៊ុនអាកាសចរណ៍អន្តរជាតិ យ៉ាងហោចណាស់ចំនួន១១ ក្នុងគោលបំណងជំរុញកំណើនភ្ញៀវទេសចរ ចាប់ពីឆមាសទីពីរ ឆ្នាំ ២០២៤នេះ។ លោក Siripakorn Cheawsamoot អនុប្រធានអាជ្ញាធរទេសចរណ៍ថៃ (TAT) ប្រចាំតំបន់អឺរ៉ុប អាហ្វ្រិក មជ្ឈិមបូព៌ា និងអាមេរិក បាននិយាយថា ទីភ្នាក់ងារនេះគ្រោងនឹងពង្រឹងទីផ្សារទេសចរណ៍ដ៏មានសក្តានុពល ដោយប្រើប្រាស់ក្រុមហ៊ុនអាកាសចរណ៍នៅក្នុងតំបន់ទាំងនោះ ដែលដំណើរការជើងហោះហើរមកកាន់ប្រទេសថៃ។ លោកបន្តថា ទីផ្សារទេសចរណ៍រយៈពេលវែងបានព្យាករថា នឹងបង្កើតប្រាក់ចំណូលបានយ៉ាងហោចណាស់ ២០.៩៦ពាន់លានដុល្លារនៅឆ្នាំ ២០២៤នេះ ពីចំនួនភ្ញៀវបរទេសចំនួន ១០.៨លាននាក់។ លោកបន្ថែមថា ទីផ្សាររបស់ TAT នៅក្នុងឆមាសទីពីរនៃឆ្នាំនេះ នឹងផ្តោតលើតំបន់មានសក្តានុពលចំនួនពីរ គឺអឺរ៉ុប និង មជ្ឈឹមបូព៌ា។ ភ្ញៀវទេសចរមកពីប្រទេសអឺរ៉ុបចំនួន៥ បានកើនឡើងខ្លាំងយ៉ាងគំហុក ក្នុងនោះប្រទេសបារាំង ៣៨.៧ភាគរយ, អាល្លឺម៉ង់ ៣២ភាគរយ ចក្រភពអង់គ្លេស ២២.៦ភាគរយ, រុស្ស៊ី ១៤.៨ភាគរយ និងសហរដ្ឋអាមេរិក ១៤.៣ភាគរយ។ គិតត្រឹមថ្ងៃទី២៩ ខែឧសភា ជើងហោះហើរដឹកភ្ញៀវទេសចរក្នុងអំឡុងរដូវក្តៅ បានស្ទុះឡើងខ្លាំងលើសពីចំនួនមុនពេលផ្ទុះជំងឺរាតត្បាត ដែលភាគច្រើនមកពីតំបន់មជ្ឈឹមបូព៌ា ជាមួយនឹងអត្រាងើបឡើងវិញ…

អាមេរិក៖ គ្រោះមហន្តរាយទឹកជំនន់ ដែលបណ្តាលមកពីការធ្លាក់ភ្លៀងខ្លាំងក្លា រយៈពេលបីថ្ងៃ ជាប់ៗគ្នា គិតត្រឹមថ្ងៃព្រហស្បតិ៍ បានធ្វើឲ្យភាគខាងត្បូងរដ្ឋ ផ្លរីដា ត្រូវបានជន់លិច ក្នុងនោះ នៅតំបន់ Miami-Dade បង្ហាញពីរថយន្តជាប់គាំង និងធ្វើដំណើរ នៅក្នុងទឹក។ ព្យុះដែលកើតមាន តាំងពីថ្ងៃពុធ បានធ្វើឲ្យផ្លូវថ្នល់ទៅជាប្រឡាយ ហើយផ្ទះសម្បែងរបស់ប្រជាជនត្រូវទឹកហូរចូលទៅខាងក្នុង។ ផ្នែកខ្លះ នៃរដ្ឋផ្លរីដាខាងត្បូង រួមទាំងទីក្រុងម៉ៃអាមី ស្ថិតនៅក្រោមកម្រិតដ៏កម្រ ចំពោះហានិភ័យខ្ពស់នៃជំនន់ទឹកភ្លៀង គឺកម្រិត៤លើ៤ កាលពីថ្ងៃព្រហស្បតិ៍ នេះបើយោងតាមមជ្ឈមណ្ឌលព្យាករណ៍អាកាសធាតុ ហៅកាត់ WPC។ មនុស្សជាង ៨លាននាក់ ស្ថិតនៅក្រោមការព្រមានអំពីទឹកជំនន់ រួមទាំងនៅតំបន់ Fort Lauderdale, Miami និង Naples គិតត្រឹមថ្ងៃព្រហស្បតិ៍ ។ កម្ពស់ទឹកភ្លៀងធ្លាក់ ក្នុងកម្រិតកត់សម្គាល់ ត្រូវបានគេព្យាករណ៍ថានឹងមានបន្តទៀត នៅថ្ងៃសុក្រនេះ៕ ប្រភពពី CNN ប្រែសម្រួល៖ សារ៉ាត

បរទេស៖ អាជ្ញាធរនៅក្នុងប្រទេសហុងឌូរ៉ាស កាលពីថ្ងៃព្រហស្បតិ៍ បានដុតបំផ្លាញកូកាអ៊ីន ចំនួនជាង ៥,៦តោន ដែលរឹបអូសបាន នៅក្នុងប្រតិបត្តិការប្រឆាំងគ្រឿងញៀន កន្លងមក នេះបើយោងតាមការិយាល័យរដ្ឋអាជ្ញាសាធារណៈ។ ប្រភពបានបន្តថា គ្រឿងញៀនទាំងនេះ ត្រូវបានរឹបអូសបាន ក្នុងរយៈពេលបីខែ ចន្លោះពីខែកុម្ភៈ ដល់ខែឧសភា ឆ្នាំ២០២៤ ដែលភាគច្រើន នៅក្នុងដែនទឹកនៃសមុទ្រការ៉ាប៊ីន។ កូកាអ៊ីន ទាំងចំនួន ៥៦៣១គីឡូក្រាមនេះ ត្រូវបានដុត នៅក្នុងវាលនៃកងកម្លាំងរក្សាសណ្តាប់ធ្នាប់សាធារណៈ នៅជាយក្រុងភាគខាងត្បូង នៃរដ្ឋធានី Tegucigalpa ។ ប្រទេសហុងឌូរ៉ាស និងបណ្តាប្រទេសនៅអាមេរិកកណ្តាលផ្សេងទៀត ត្រូវបានចាត់ទុកថា ជាចំណុចដឹកជញ្ជូនឆ្លងកាត់នៃកូកាអ៊ីន ពីប្រទេសផលិត នៅតំបន់អាមេរិកខាងត្បូង ទៅកាន់ទីផ្សារសហរដ្ឋអាមេរិក។ កាលពីថ្ងៃទី៩ ខែមេសា កន្លងទៅនេះ គ្រឿងញៀនទម្ងន់១៣៥០គីឡូក្រាម ដែលរឹបអូសបាន ត្រូវបានដុតបំផ្លាញ នៅប្រទេសហុងឌូរ៉ាស ផងដែរ៕ ប្រភពពី AFP ប្រែសម្រួល៖ សារ៉ាត